Mucadho unorura ukama hupsa. Pikija hazvo nguva jese munozondoreremeja vabari venyu, mudoni wenyu ndiena mundhu anosisira maningi kwamuri pasi pano. Kangaije izvi zvingava zvinonesa ku vamweni vo paukama kuti vazvitendere. Asi zviambi zvo Bhaibheri zvingamubesera kuva mundhu wakaezanana, ngo kudaro mungaramba mecizwirana no ukama hwenyu pamunonga mecishanda ngo simba kuti muvake ushamwari no ukama hwenyu hupsa.

BHAIBHERI RINOTI KUDINI: “Reremejai baba wako na mai wako” (VaEfeso 6:2) Azvinenyi kuti makura zvakadini, nguva jese munodikana kureremeja vabari venyu. Zivanyi kuti mudoni wenyuvo, inga mwana wo rume kana wokaji, anodikana kuzwira majibaba ake. Rudo “ahuna thima,” ngo kudaro mucadombozwa inga kuneswa ngo ushamwari hwo mudoni wenyu no ukama hwake.—1 VaKorinto 13:4; VaGalàsia 5:26.

ZVAMUNGAITA:

• Jiviriranyi kuvereketa zvakawanda, inga kuti “Ukama hwako nguva jese hunondirerusa basi” kana “Mai wako avambodakaririvo zvandinoita”

• Ejanyi kuvona zviro kubva mu mavonero o zvinovetera mudoni wenyu

BHAIBHERI RINOTI KUDINI: ‘Ndizvo mwanarume anozosia baba na mai vake ozobatana no mukaji wake, vovaviri vanozova muviri umwe.’ (Genesi 2:24) Pamunocadha, ukama hwenyu hungazwa inga kuti huciri kundodikana kumuvonerera, zve ivona vangada kuva vecinghwinira maningi mu mucadho wenyu kupinda zvavanovetehwa.

Zviri kwamuri no mudoni wenyu kutenderana kuti cakamubatanijaro pamwepo cinovadira pamutivi perapo ngo rudo itanyi kuti vazvizive. Ivanyi makasujunuka zve mucingapoti-poti asi kuciripi ngo hasha. (Mazwi Akangwara 15:1) Kuzvidodokesa, kupfava zve kusengerera zvinozomubesera kuvaka ushamwari hwakavanga no ukama hwenyu zve rambanyi “mecikorondhana ngocenyu, ngo rudo.”—VaEfeso 4:2.

ZVAMUNGAITA:

• Kudari muri kurangarira ngo pamusoro po ukama hwenyu kuti huri kunghwinira maningi mu upenyu hwenyu, bhuisananyi no mudoni wenyu pamunongaya makagajana

• Gumanyi pa mbhejiso yondhoyo ngo pamusoro po kuti mungazviitisa kudini izvi