1, 2. (a) Tinodikana kureremeja kutungamirira kwani? (b) Muvhunjo japi jatinozodavira pa cipauko cino?

PAMAINGA muri mwana mudoko i cokwadi kuti vabari venyu vaimukumbira kuti muite ciro camainga mucikadi kuciita. Imwimwi maida vabari venyu zve maiziva kuti zvainga zvakanaka kuti muvazwire. Pikija zvakadaro, asipi nguva jese maida kuvazwira.

² Azvizivi kureruka nguva jese kuzwira pa tinotungamirihwa ngo mundhu. Asi tinodikana kureremeja kutungamirira ka Jehovha. (Mazwi Akangwara 24:21) Iyena ndi Baba wedu zve anotida maningi. Anotikorondha zve anotipa zvese zvatinoda kuitira kupona. Jehovha anoda kuti tive takadakara, ndizvona zvinoitisa kuti atipe ndhungamiriro. Nguva jimweni anoshandisa vandhu vamweni kuti vazviite. Asi ngenyi azvizivi kureruka nguva jese kuzwira ndhungamiriro? Ngenyi Jehovha anotikumbira kuti tizviite? Zve tinokhombijisa kudini kuti tinoreremeja kutungamirira kwake? —Vonanyi Masoko o Kupejisira, n.° 9.

3, 4. (a) Ngenyi vandhu vanobahwa vacizivi kukwana? (b) Ngenyi zvinganesa kuzwira Jehovha no vandhu vamweni?

³ Itusu atizivi kukwana. Ngo iyo ndava zvinganesa  kuva tinozwira. Izvi zvakatangira pakashaisha Adhamu na Evha. Jehovha wakavasika vovaviri vakakwana, asi ivona avazivi kuzwira Mwari. Ngo kudaro vandhu vanobahwa vacizivi kukwana. Iri ndi rimwe thangwe rinotiitisa kuti zvive zvinonesa kuzwira Jehovha no vandhu. Thangwe rimweni ngo ro kuti vandhu vanoshandiswa ndi Jehovha kuti vatitungamirire avazivi kukwanavo.—Genesi 2:15-17; 3:1-7; Nduyo 51:5; VaRoma 5:12.

⁴ Atizivi kukwana, ngo iyo ndava nguva jimweni tinojikuja. Kujikuja kunoitisa kuti zvinese kudavira ndhungamiriro. Mu nguva yo kare ku Iziraeri, Jehovha wainga akasana Mosi kuti atungamirire vandhu vake. Asi, mwanarume waizwi Kora wakatanga kutama kureremeja Mosi. Kora wainga mushandiri wa Jehovha pa nguva yakareba, asi wakazoguma pa kuzvikuja. Mosi waitofanera kuzvikuja ngokuti waitungamirira vandhu va Mwari. Asi Bhaibheri rinonanga kuti iyena wainga mundhu waizvidodokesa maningi mu nguva yondhoyo. Pikija zvakadaro, Kora aazivi kuda kudavira ndhungamiriro ja Mosi. Kora wakakhohwesa vandhu vazinji kuti vamukire Mosi. Ngowapi wakava muviyo? Kora no vese vainga ku divi rake vakauraiwa. (Bziverengo 12:3; 16:1-3, 31-35) Bhaibheri rinonanga ngo muezaniso muzinji jinokhombija kuti kujikuja i ngozi.—2 Kronike 26:16-21; Vonanyi Masoko o Kupejisira, n.° 10.

5. Munjira yapi vandhu vamweni vakashaisha kushandisa cigaro cavo?

⁵ Kangaije makambovona kuti vamweni pavanowana cigaro vanopindirija kushaisha. Zviitiko zvinovonesa  kudaro. (Verenganyi Mucumaeri 8:9.) Vonanyi muezaniso wa Sauri. Wainga mundhu wakanaka no anozvidodokesa paakakhetwa ndi Jehovha kuti ave mambo wo Iziraeri. Asi wakazova mundhu anozvikuja no anocishatihwa. Ngo kudaro, wakateverera Dhavhidhi, mundhu wainga acina caakashaisha. (1 Samueli 9:20, 21; 10:20-22; 18:7-11) Tevere, Dhavhidhi wakazova mambo, zve wakava umwe wo majimambo aushoni o Iziraeri. Asi no kufamba ko nguva, Dhavhidhi wakashaishavo kushandisa cigaro cake. Wakaita uhure na Bhate-sebha, wainga no mwamuna wake. Kuti afise cishaishi ici, Dhavhidhi wakaita kuti Uria mwamuna wa Bhate-sebha auraiwe ku hondo.—2 Samueli 11:1-17.

6, 7. (a) Rudo hwedu kuna Jehovha unotindundira kuti tiitenyi? (b) Muezaniso wa Jesu unotijijisenyi?

⁶ Tinoda maningi Jehovha kupinda ciri cese haco. Ndiyo ndava tinoreremeja utungamiriri hwake zve tinoda kuti Jehovha adakare. (Verenganyi Mazwi Akangwara 27:11; Marco 12:29, 30.) Kuvhira mu nguva ya Adhamu na Evha, Sathana aadi kuti vandhu vareremeje kutungamirira ka Jehovha. Dhiabho anoda kuti vandhu varangarire kuti Jehovha aana citendehwa co kunanga zvovanodikana kuita. Asi tinoziva kuti aya manyepo. Tinoziva kuti Jehovha ngo anofanera ‘kuashira goja, nderemejo no simba; ngo kuti wakarura zvese.’ —Apokalipsi 4:11.

⁷ Po mainga mwana mudoko, kangaije makajijira kuti maidikana kuzwira vabari venyu pikija po mainga  mucikadi. Mukuezana, azvizivi kureruka kuzwira Jehovha nguva jese. Asi itusu tinoda zve tinoreremeja Jehovha, ngo iyo ndava tinoita zvese kuti timuzwire. Jesu wakatipa muezaniso. Iyena waizwira Jehovha pikija po zvainga zvicizivi kureruka kana kuti paainga acikadi kuzviita. Ngo kudaro, iyena waitonanga kuna babake: “Kaveta kucaitwa kuda kwangu, ngakuitwe kuda kwenyu.” —Luka 22:42; Vonanyi Masoko o Kupejisira, n.° 11.

8. Njira japi jaanoshandisa Jehovha nyamasi uno kuti atitungamirire? (Vonanyi bhokiso “ Daviranyi mbhangiro.”)

⁸ Nyamasi uno, Jehovha anotitungamirira mu njira jakasiana-siana, anoshandisa Bhaibheri zve no vakuru. Itusu tinoreremeja utungamiriri hwa Jehovha patireremeja vandhu vaanoshandisa kuti vatitungamirire. ‘Patinoramba’ besero ravo tinonga ‘tecitorambavo’ kubesehwa ndi Jehovha. VaIziraeri po vakaramba kuzwira Mosi, Jehovha aazivi kudakara ndizvona. Zvakaita inga kuti ivona vainga varamba kuzwira Jehovha. —Bziverengo 14:26, 27; Vonanyi Masoko o Kupejisira, n.° 12.

9. Rudo unotibeseresa kudini kuti tizwire ndhungamiriro? Ipanyi muezaniso.

⁹ Njira imweni inosisira, ngo yo kuti patinoreremeja vandhu vanotungamirira, tinokhombija kuti tino rudo no hama. Inga muezaniso, panoitika ngozi jinoitika jega, kazinji cikwata co kubesera cinoeda kopa besero rinodiwa. Kuitira kuponesa vandhu vakawanda, cikwata cinodikana kurongiwa ushoni. Vese pa cikwateco vanodikana kuzwira ndungamiriro. Asi kudari ari wese akatama kuzwira woita zvaanorangarira keni? Pikija  iyena anomavonero aushoni, kutama kuzwira ndungamiriro kungaviisa zvineso. Kangaije vamweni vo pacikwata vangatokhuvazika. Mu njira yakafanana, kudari tikatama kuzwira Jehovha pomwe no vandhu vaanoshandisa kuti vatitungamirire, vamweni vangatambujika ndizvona. Patinozwira Jehovha, tinokhombija kuti tinoda hama zve tinoreremeja manera aanoita Jehovha zviro. —1 VaKorinto 12:14, 25, 26.

10, 11. Tinoda kuvonenyi wari?

¹⁰ Zvese zvaanotikumbira Jehovha kuti tiite zvinobesera itusu. Zvinosisira kureremeja vanotungamirira pa mbhuri, mu ungano no vanotungamirira nyika. Ngo kudaro, tese tinobesereka. —Deuteronòmio 5:16; VaRoma 13:4; VaEfeso 6:2, 3; Vaheberi 13:17.

¹¹ Kuzwisisa kuti ngenyi Jehovha anoda kuti tireremeje vamweni zvinotibesera kuti tizviite. Ngatende  tivone kuti tingareremejesa kudini vaya vanotungamirira pa mbhuri, mu ungano no vanotungamirira nyika.

12. Mwamuna anokhombijisa kudini kuti anoreremeja utungamiriri hwa Jehovha?

¹² Jehovha wakasika mbhuri zve wakapa muthwaro umwe na umwe. Kudari vese vo pa mbhuri vakazwisisa zve voita zvaanovetera Jehovha kuti vaiite, zviro zvinofamba ushoni. (1 VaKorinto 14:33) Inga muezaniso, Jehovha wakagaja mwamuna inga musoro wo mbhuri. Izvi zvinoda kureva kuti Jehovha anoda kuti mwamuna asapote mukaji no vana zve avatungamirire ngo rudo hwese. Jehovha anovona mwamuna kuti ari kuzviita kana kuti haiwa. Mwamuna anoshandira Jehovha ano rudo zve wakanaka mwoyo, anotaja mbhuri inga matajire aanoita Jesu ungano. (VaEfeso 5:23)  Mwamuna paanoita izvi, anokhombija kuti anoreremeja Jehovha.—Vonanyi Masoko o Kupejisira, n.° 13.

13. Mukaji angakhombijisa kudini nderemejo pa mbhuri?

¹³ Mukaji anavo muthwaro unosisira maningi. Iyena anobesera mwamuna kuti vave musoro wo mburi waushoni. Pamwepo no mwamuna, mukaji ano muthwaro wo kujijisa vana. Njira imwe yaangajijisa ndiyona vana kuti vakhombije nderemejo ngo yo kugaja muezaniso wa ushoni pacake. (Mazwi Akangwara 1:8) Iyena anoreremeja mwamuna zve anoita zviri zvese kuti zvivaringo zvo mwamuna wake zvibudirire ushoni. Pikija akatama kuwirirana naye, iyena anosanangura ngo kunaka mwoyo kwese ngozvapi zvaanorangarira ngo pamusoro pazvo. Tingati kudini kudari mwamuna aciripi Capupu ca Jehovha? Pa mugariro uu zviro zvinganesa. Asi kudari mukaji akataja mwamuna wake ngo rudo no nderemejo, zvingaita kuti njiku iri yese iyena adevo kushandira Jehovha.—Verenganyi 1 Pedru 3:1.

14. Vana vanokhombijisa kudini kuti vanoreremeja matungamirire o vabari?

¹⁴ Vana vanosisira maningi kuna Jehovha. Ivona vanoda ndungamiriro no jiviriro. Vana vanokhombija kuti vanoreremeja matungamirire o vabari povanovazwira. Izvi zvinoita kuti vabari vave no mudakaro kamare. (Mazwi Akangwara 10:1) Vana povanozwira vabari, vanokhombijavo nderemejo kuna Jehovha zve vanoita kuti iyena adakare, izvo ngo zvinosisira maningi. Mu mbhuri zinji, vana vanorehwa ndi baba kana kuti ndi mai basi. Izvi zvinganesa ku vana na baba kana mai vanongaro vecirera vega. Asi kudari vana vakazwira zve voita zviri zvese kuti vabesere, zviro zvingareruka. I cokwadi kuti apana mbhuri yakakwana. Asi  mbhuri iri yese ingava yakadakara kudari vese vakaita zvaanokumbira Jehovha kuti vaite. Izvi zvinopa goja Jehovha, musiki o mbhuri.—VaEfeso 3:14, 15.

15. Tinoreremejesa kudini ndhungamiriro mu ungano?

¹⁵ Jehovha anoshandisa ungano kuti ititungamirire zve wakapa Jesu muthwaro o kuitaja. (VaKolosi 1:18) Jesu wakapa “muranda wakagondeka no wakangwara” muthwaro wo kutaja vandhu va Mwari pa nyika. (Mateu 24:45-47) “Muranda wakagondeka no wakangwara” ndiwona Mukhumbi Unotonga. Nguva jese hama iji jinotipa zvatinoda kuti tivangise rutendo hwedu. Mukhumbi Unotonga unopavo ndungamiriro vakuru, vabatiri vanoshandira zve vavonereri vo ndharaundha kuti vasapote ungano. Hama iji jese jinozvidavirira kuna Jehovha ngo mutoro iji. Patinovareremeja, tinokhombija kuti tinoreremeja matungamirire o ungano no a Jehovha.—Verenganyi 1 VaTesalònika 5:12; Vaheberi 13:17; Vonanyi Masoko o Kupejisira, n.° 14.

16. Ngenyi tingananga kuti vakuru no vabatiri vanoshandira vanosanwa ngo mujimu mucena?

¹⁶ Vakuru no vabatiri vanoshandira vanosanwa ngo mujimu mucena. Ngenyi tingananga kudaro? Ngokuti ivona vanodikana kuva no mugariro jiri pa 1 Timoti 3:1-7, 12 zve Tito 1:5-9. Ndi Jehovha wakashandisa mujimu mucena kuti udire mugariro iji mu Bhaibheri. Vakuru vanokumbira mujimu mucena kuna Jehovha pavanonga vecipopora kuti hama iri yese ingagajwa inga mukuru kana mubatiri anoshandira. Zvese izvi zvinokhombija kuti ndi Jehovha na Jesu vanotaja ungano. (Maitiro o Vapostori 20:28) I cokwadi kuti  vakuru no vabatiri vanoshandira avazivi kukwana inga itusu. Asi ivona i cipo ca Jehovha zve vanobesera kuti ungano irambe yakagondeka zve yakabatana.—VaEfeso 4:8.

17. Hambzaji kuti ikhombije nderemejo, zvicinyi zvainodikana kuita?

¹⁷ Zvingaitika kutama kuwanika mukuru kana mubatiri anoshandira kuti vaite mabasa mu ungano. Pa mugariro uu, hama jimweni jakabhabhatijwa jingabesera. Asi kudari pacina, hambzaji ingaita basa rokuti raizoithwa ngo hama yakabhabhatijwa. Pazvinoitika izvi, hambzaji inodikana kufukija musoro, kangaije ngo resu kana capewa. (1 VaKorinto 11:3-10) Ngo kudaro, iyena anokhombija nderemejo ku ndhungamiriro jaakadira Jehovha pa mbhuri no mu ungano.—Vonanyi Masoko o Kupejisira, n.° 15.

18, 19. (a) Tinojijenyi pa VaRoma 13:1-7? (b) Tinokhombijisa kudini nderemejo ku vatongi no vamweni vanotungamirira?

¹⁸ Vatongi vanotonga ngokuti Jehovha wakavatendera, itisu tinodikana kuvareremeja. (Verenganyi VaRoma 13:1-7.) Ivona vanonasirira zviro kuitira kuti vandhu vave no mabasa avanoda akadari inga zvikora no zvipitari. Tiri Makristu, ngokudaro tinoreremeja “utongi ukuru” zve tinoreremeja mutemo jo mu nyika motinogararo. Mutemo iji jingava no cokuita no mbhuri yedu, basa redu kana zviro zvatinazvo. Inga muezaniso, tinoripa mushabo zve tinopekeja utongi zviro zvaunotikumbira. Asi kudari utongi ukatikumbira kuita zviro zvokuti zvinohwisana no mutemo wa Mwari? Pamugariro  uu tinoita zvakananga Pedhru: “Zvinodikana kutenda Mwari kupinda vandhu.” —Maitiro o Vapostori 5:28, 29.

¹⁹ Patinobhuya no mundhu anotungamirira, wakadari inga jhuwijhi kana muphorisa, tinodikana kukhombija nderemejo. Ku cikora, vocidoko vanodikana kureremeja vajijisi no vabatiri vamweni. Ku basa, itusu tinoreremeja patarawe, pikija vamweni vacikazviiti. Ngo kuita izvi, tinoteveja mupostori pauro. Iyena nguva yese waireremeja vandhu vaitungamirira, pikija po zvainga zvecinesa. (Maitiro o Vapostori 26:2, 25) Pikija vamweni vacikatitaji ushoni, tinodikana kuenderera mberi tecikhombija nderemejo.—Verenganyi VaRoma 12:17, 18; 1 Pedru 3:15.

20, 21. Ngozvapi zvingaitika pa tinokhombija nderemejo ku vamweni?

²⁰ Mu nyika yese, vandhu avacanasi kutatija nderemejo. Asi, vandhu va Mwari vakasiana. Tinoda kureremeja vese. Pedhru wakatara kuti: “Reremejanyi vese.” (1 Pedru 2:17) Vandhu vanozvivona pa tinovareremeja. Pa tinoita izvi, tinozwira zvakananga Jesu: “Kudarovo ruveneko hwenyu huveneke pa meso po vandhu vese, kuti vavone mabasa enyu auxoni, vakuje Baba wenyu vari mugore.”—Mateu 5:16.

²¹ Tinodikana kukhombija nderemejo pa mbhuri, mu ungano ku vatongi zve no vamweni. Kudari tikaita izvi, ngozvapi zvinozoitika? Muezaniso wedu waushoni ungaita kuti vamweni vade kujijira ngo pamusoro pa Jehovha. Pa tinoreremeja vamweni, tinonga tecireremeja Jehovha. Izvi zvinozodakajisa Jehovha zve zvinozokhombija kuti tinomuda.