1, 2. Ngenyi tinodikana kungwarira mabungaijo edu?

RANGARIRANYI kuti matora mucero umwe kuti muhe, asi divi rimwe rawo rakavora. Zvicinyi zvamungaita? Maizouha pikija wakadaro? Maizosveja? Kana kuti maizoceka divi rakavoraro zve moha divi rakanaka?

² Mabungaijo akaezana no mucero uu. Kuna ma firime mazinji no zvinovoneswa mu TV, mu mabhuku no mu mumbo kuti tibungaije. Mabungaijo amweni akanaka, asi mazinji akona akavora ngokuti ano zviito  zvakashata. Pamunosana mabungaijo enyu munonanga kuti: “Cisungo ngo cangu. Apana mabungaijo akanaka. Ndingasana zvandinoda.” Kana munongwarira pamunosana mabungaijo enyu, monyenya zvakashata zve moita zvakanaka?

3. Ngenyi tinodikana kunasa kusana mabungaijo edu?

³ Tinoda kubungaija. Asi tinoda kunasa kusana mabungaijo edu, ngokuti atidi kuti izvi zviphingaije ushamwari hwedu na Jehovha.

4. Kuitisa kudini ndhungamiriro iri pana 1 VaKorinto 10:31 inotibesera kunasa kusana mabungaijo edu?

⁴ Patinojipira kuna Jehovha, tinogondesa kushandisa upenyu hwedu pa kumushandira. (Verenganyi Mucumaeri 5:4.) Takagondesa kuita ‘zviri zvese tecikoja Mwari.’ (1 VaKorinto 10:31) Kureva kuti tiri vashandiri va Mwari basi patinonga tiri mu basa ro kucumaera no kumusongano here? Haiwa. Tiri vashandiri va Mwari mu mukuvo wese, pikija tecizorora kana tecibungaija.

5. Zvicinyi zvatinoda kupa Jehovha nguva jese?

⁵ Kunamata Jehovha i ciro cinosisira maningi mu upenyu hwedu. Ngo kudaro, nguva jese tinoda kupa zvaushoni kuna Jehovha. Pauro wakabhuya ngo ndava yazvo paakati: “Mupire muviri yenyu inga muphaxo unopona, wakacena no unodakajira Mwari.” (VaRoma 12:1) Jesu wakati: “Disai tenji Mwari wako ngo mwoyo wako wese, ngo mwiha wako wese, ngo hwiru hwako hwese, ngo simba rako rese.” (Marco 12:30) Kare ku Iziraeri, vandhu vaipira kuna Jehovha mupiro jo zvinyama. Asi kuitira kuti Jehovha atendere mupiro,  cinyama acicadikana kuva cakaremara. (VaLevi 22:18-20) Mukuezana, kudari kunamata kwedu kukava no ciri cese cakashata, Jehovha aangatenderi kunamata kwedu. Izvi zvingaitikisa kudini?

6, 7. Jehovha anozovona kudini manamatiro edu kudari tikasana mabungaijo akashata?

⁶ Jehovha anoti: “Munozoita vakacena ngo kuti inini ndiri Wakacena.” (1 Pedru 1:14-16; 2 Pedru 3:11) Manamatire edu anodikana kuva akacena kuti atendehwe ndi Jehovha. (Deuteronòmio 15:21) Tinozviziva kuti tikaita zviro zvinonyenya Jehovha, zvakadari inga uhure, kuita ugevenga no zvo madhimoni, kunamata kwedu akuzovi kwakacena. (VaRoma 6:12-14; 8:13) Asi kudari tecibungaija nazvo keni? Kunanga kuti Jehovha waizozvidakarira? Zvakajeka kuti haiwa. Kunamata kwedu akuzovi kwakacena. Izvi zvingapeja ushamwari hwedu na Jehovha.

⁷ Tingakhetesa kudini mabungaijo edu? Zve i ndhungamiriri japi jingatibesera kuziva kuti mabungaijo aya, akanaka kana akashata?

8, 9. (a) Tinodika kugara ndhambo no mufumbo japi jo mabungaijo? (b) Ngenyi tinodikana kugara ndhambo no mufumbo iji jo mabungaijo?

⁸ Nyamasi uno kuno mabungaijo akasiana-siana. Mabungaijo amweni ngaushoni ku Makristu. Asi mazinji akona akazara ngo zviro zvinonyenywa ndi Jehovha, zve tinodikana kugara ndhambo no mufumbo uu o mabungaijo. Ngatende tivone muezaniso munganani.

 ⁹ Ma firime mazinji, saiti urongwa hwo TV, mavhidhio no mumbo, zvakashata, uthisijiri zve zvino zviro zvo madhimoni. Zvese izvi kazinji zvinotatijwa inga zviro zvicizivi kushata zve zvinodakajisa. Asi Makristu aadaviri mabungaijo anobatanija zviro zvinonyenywa ndi Jehovha. (Maitiro o Vapostori 15:28, 29; 1 VaKorinto 6:9, 10) Pa tinotiza mufumbo iji jo mabungaijo , tinokhombija kuna Jehovha kuti tinonyenya zvakashata. —Nduyo 34:14; VaRoma 12:9.

10. Zvicinyi zvinozoitika kudari tikasana mabungaijo akashata?

¹⁰ Vamweni vanovona kuti apana cakashata pa kubungaija no zviro zvinobatanija uhure, kuthyisijira no zvomujimu. Ivona vanorangarira kuti: ‘Pano cineso cenyi? Inini narini ndinozoita izvo.’ Tikarangarira kudaro tiri kujicengeja. Bhaibheri rinoti: “Mwoyo unocengeja kupinda bzese, wakaxata kamare.” (Jeremia 17:9) Kudari tikabungaija no zviro zvinonyenywa ndi Jehovha, atinganangi kuti tinonyenya zvirozvo. Pa tinoramba tecibungaija no zviro zvakashata tinopejisira ngo kuzvivona inga zvakanaka. Pa kufamba ko nguva, hana yedu aizonangi kuti tiri kuita zvakashata.—Nduyo 119:70; 1 Timoti 4:1, 2.

11. VaGalàsia 6:7 inotibesera kudini kunasa kusana ushoni mabungaijo edu?

¹¹ Soko ra Mwari rinoti: “Bzaanosima mundhu ngo bzaanozokotora.” (VaGalàsia 6:7) Mucakana-kana, tikabungaija no zviro zvakashata, tinopejisira ngo kuita zviro zvakashata. Inga muezaniso, vamweni vainga no zvirovejeso zvo kuvona ma firime o zvo uhure. Murangariro javo jakazara ngo zviro zvakashata zve vakapejisira ngo kuita zviro zvakashata. Asi Jehovha anotipa  besero ratinoda kuti tinase kusana ushoni mabungaijo edu.

12. Zvicinyi zvinozotibesera kuti tinase kutema zvivaringo zvinodakajisa Jehovha?

¹² Kuno mabungaijo acikanesi kumaziva kuti Jehovha ano manyenya, zve tinodikana kumanyenyavo. Tingati kudini kudari ticina cokwadi kuti mabungaijo aya akashata? Jehovha aazivi kutipa munda-nda- nda yo mutemo no zvatinodikana kana zvaticikadikani kuvona, kuzwa kana kuverenga. Iyena anoda kuti, umwe na umwe wedu ashandise hana yake yakarovejwa ngo Bhaibheri kuti asunge zvaangaita. (Verenganyi VaGalàsia 6:5.) Kuitira kuroveja hana yedu, Jehovha wakatipa ndhungamiriro, zvokadi zvo Bhaibheri zvinotijijisa kuti ‘ngo kwapi kuda kwake.’ (VaEfeso 5:17) Ndhungamiriro iji jinozotibesera kuti tinase kutema zvivaringo zvinodakajisa Jehovha.

13. (a) Ngenyi nguva jese Makristu maviri aasani mabungaijo akaezana? (b) Makristu ese anoda kuitenyi?

¹³ Asipi nguva jese Makristu maviri anosana mabungaijo ondhoo. Ngenyi? Ngokuti vandhu vano zvido zvakasiyana. Kunja kwa izvo, Mukristu umwe angavona kuti mabungaijo aya akanaka, zve umweni o mavona inga akashata. Asi Makristu ese anoda kutema zvivaringo zvaushoni, ngo kudaro, anotevera ndhungamiriro jo Bhaibheri. (VaFilipi 1:9) Ndhungamiriro jinotibesera kunasa kusana ushoni mabungaijo edu zve todakajisa Jehovha.—Nduyo 119:11, 129; 1 Pedru 2:16.

14. (a) Tinodikana kunasa kungwarira cinyi? (b) Pauro wakapa Makristu ngwajo yapi?

 ¹⁴ Tinodikanazve kunasa kungwarira ngo mukuvo watinopeja ngo mabungaijo. Inga Makristu, zvinosisira maningi i kushandira kwedu Jehovha. (Verenganyi Mateu 6:33.) Kunanga kuti mabungaijo edu anokhombija zvondhozvo here? Nguva jimweni, ticikazwisisi, tingatanga kupeja nguva yakawanda ngo mabungaijo. Pauro wakatarira Makristu kuti: “Vonesesanyi kufamba kwenyu, mucaita inga mapenji. Itanyi inga vazivi, mecingwarira nguva.” (VaEfeso 5:15, 16) Izvi zvinokhombija kuti tinodikana kudira mugano pomwe no nguva yatinopeja teciita mabungaijo. Zvinokhombijazve  kuti tinodikana kuita zviri zvese kuti basa ratinoitira Mwari rive pa kutanga.—VaFilipi 1:10.

15. Tinodikana kugara ndhambo basi no mabungaijo a tinoziva kuti akashata here?

¹⁵ Tinozviziva kuti tinodikana kugara ndhambo no mabungaijo anonyenya Jehovha. Asi tinozodini kudari tecikana-kana kuti mabungaijo aya akashata kana kuti akanaka? Kunanga kuti pikija zvakadaro tinodikana kungwarira? Amborangariranyi izvi: Kudari muri kukhwira dundhu ngo cikwanja cakatetepa, maizofamba ngo mumbhiripiri here? Haiwa. Imwimwi munoda upenyu hwenyu zve munoda kugara ndhambo no ngozi. Ndizvonavo zvinoitika no mabungaijo. Bhaibheri rinoti: “Rambisai soka jako kuteveja bzakaxata.” (Mazwi Akangwara 4:25-27) Zvinosisira kugara ndhambo no mabungaijo atinoziva kuti akashata. Asi zvinosisiravo kugara ndhambo no mabungaijo o kuti tinokana-kana kuti akanaka kana kuti akashata. Zvokadi, atidi kuita ciri cese cingaphwanya ushamwari hwedu na Jehovha.

16. (a) Ngo zvapi zviro zinonyenya Jehovha? (b) Mungakhombijisa kudini kuti munonyenya zviro zvinonyenya Jehovha?

¹⁶ Umwe wo mutari wo Nduyo wakati: ‘Imwimwi munoda Jehovha, nyenyanyi zvakashata.’ (Nduyo 97:10) Mu Bhaibheri, tinojija kuti ngoapi mazwiro a Jehovha zve ngo zvapi zvaanorangarira. Kuziva zvinorangarira Jehovha zvingatibesera kuti tirangarire inga iyena. Inga muezaniso, tinozviziva kuti Jehovha anonyenya “rurimi hwokunyepa, nyara inopopomeja ngazi icina ndava, Mwoyo unotanda bzakaxata,  soka jinogogomera kuenda ko bzakaxata.” (Mazwi Akangwara 6:16-19) Tinoziva kuti Jehovha anonyenya “upombo, kupombora, . . . kuromberera bzo pasi, uroi, . . . uxanje, runya, . . . thima, kurejera, kuhisa no bzimweni bzakadaro.” (VaGalàsia 5:19-21) Munokwanisa kuvona kuti ndhungamiriro iji jingamubeseresa kudini kuti munase kusana mabungaijo enyu here? Tinoda kuzwira Jehovha pa mugariro uri wese, azvinenyi kuti tiri tega kana kuti tino vandhu vamweni. (2 VaKorinto 3:18) Zvatinoita tiri tega zvinokhombija kuti ndisu ani kamare.—Nduyo 11:4; 16:8.

17. Patinonga tecisana mabungaijo edu, ngozvapi zvatinodikana kujivhunjisa?

¹⁷ Ngo kudaro, ticito tikasana mabungaijo edu, tinodikana kujivhunjisa kudari: ‘Ushamwari hwangu na Jehovha hunozogara kudini ndikaita izvi? Hana yangu inozogara kudini?’ Ngatende tivone ndhungamiriro nganani jinozotibesera kusana ushoni mabungaijo edu.

18, 19. (a) I mbhangiro yapi yakapa Pauro pana VaFilipi 4:8? (b) Ndhungamiriro japi jinozotibesera pakusana ushoni mabungaijo edu?

¹⁸ Kusana mabungaijo edu kwakadari inga kusana zviro zvinozozaja murangariro wedu. Pauro wakatara kuti: “Bzokadi bzese, bzino nderemejo, bzakarungama, bzakacena, bzakathiva, bzakakojwa, bzauxoni bzese no bzakanakira kukojwa bzese ngabzigare pakati penyu.” (VaFilipi 4:8) Tikazaja murangariro jedu ngo zviro zvakadari, tinozonanga kuti: “Mazwi angu ngaamudakajise, no murangariro yo mwoyo wangu, ucina cidima pambeji penyu, Tenji Mwari.”—Nduyo 19:14.

 ¹⁹ Zvivhunjisenyi kudari: ‘Ndiri kuzaja murangariro wangu ngo zviro zvakandini? Pandinopera kuvona mafirime amweni no zvirongwa zvo mu TV, kunanga kuti ndinorangarira zviro zvakanaka kana kuti zvakacena? Ndinogara ndakagajana, no hana yakacena here? (VaEfeso 5:5; 1 Timoti 1:5, 19) Ndinojizwa ndakasujunuka kuita mukumbiro? Kana ndinojizwa kunyowejeka? Ndinogara ndecirangarira zviro zvo uphanga kana zvakashata here? (Mateu 12:33; Marco 7:20-23) Kunanga kuti mushovo wo mabungaijo andinosana ari kundiita kuti ndiezane no “bzo nyika yo pasi ino”?’ (VaRoma 12:2) Kudavira ngo kugondeka kwese zvinozotibesera kuvona kuti takavangisa kudini ushamwari hwedu na Jehovha. Tinoda kukumbira kuna Jehovha kuti: “Reesanyi majiso angu kuti atame kuvona bza biresi.” *—Nduyo 119:37.

20, 21. Ngenyi tinodikana kurangarira mazwiro o vamweni potinosana mabungaijo edu?

²⁰ Pana 1 VaKorinto 10:23, 24 tinowana ciambi cimweni cinosisira: “Bzese bzinotendehwa, Kaveta asi bzese bzinovaka. Mucadopsanga bzenyu basi. Rangariranyi bzo vamwenivo.” Atidikani kuita ciro basi ngo kuti tino rusujunuko wo kuciita. Tinodikana kujivhunjisa kuti: ‘Hama jangu jinozozwa kudini ngo cisungo cangu?’

 ²¹ Umwe nga umwe ano marangaririre ake. Kangaije imwimwi mungatosunga kuvona firime zve hana yenyu yotama kurema. Asi mungaitenyi kudari mukazofumbhura kuti firime yondhoyo inonyangajisa hama yenyu? Ngo zvokadi kuti muno citendehwa co kuvona firime yondhoyo. Kangaije mungatosunga kutama kuita zvondhozvo. Ngo kuti amudi kushaishira “hamadoni,” nee kutoshaishira “Kristu.” (1 VaKorinto 8:12) Atidi kuita ciri cese cingashaishira rutendo hwo hama jedu.—VaRoma 14:1; 15:1; 1 VaKorinto 10:32.

22. Tinokhombijisa kudini kuti tinoreremeja mavonero o vamweni?

²² Amborangariranyi kuti hana yenyu aimutenderi kuvona, kuverenga kana kuita ciro cimweni, asi hana yo hama imweni inoitendera. Munozoitenyi? Imwimwi munoda zve munoreremeja hama iyi. Ngo kudaro, amuzoivangiriji kuti icinje mavonero ayo. Inga muezaniso, mufambisi wo karu anoziva kuti vamweni vangatekenya ngo kukasika kana padoko-padoko, pikija zvakadaro vandori vafambisi vaushoni. Munjira yakaezana, imwimwi no hama imweni mungava no mavonero akati siane padoko ngo pamusoro po mushovo wo mabungaijo, asi mwese muri kutevera ndhungamiriro jo Bhaibheri. —Mucumaeri 7:16; VaFilipi 4:5.

23. Icinyi cinozotibesera kukheta ushoni mabungaijo edu?

²³ Ngo kudaro, icinyi cinozotibesera kukheta ushoni mabungaijo? Kushandisa hana yedu yakarovejwa ngo Bhaibheri no kureremeja hana yo vamweni. Tikadaro, tinozova no mudakaro wo kuita zviro zvese kuti ‘tikuje Mwari.’