1, 2. Ngenyi munoda Jehovha Mwari?

IMWIMWI munoda Mwari here? Kangaije ngo kumuda kwenyu, makazvipira kwaari. Kangaije maakujizwa kuti iyena i Shamwari yenyu yaushoni. Asi mucito mukava no rudo na Jehovha, iyena wakamuda. Bhaibheri rinonanga kudari: “Itusu ngatimude, ngo kuti ndiyena wakatanga kutidisa.”—1 Johani 4:19.

² Rangariranyi njira zinji Jehovha jaanokhombijira ndijona kuti anotida. Iyena wakatipa nyika ino no zvese zvatinoda kuti tive no upenyu hunodakajisa. (Mateu 5:43-48; Apokalipsi 4:11) Kunja kwa izvi, anoda kuti tive shamwari jake. Ngokudaro, anotipa mukana kuti tijije ngo pamusoro pake. Patinoverenga Bhaibheri, tinonga tecipurukira Jehovha. Zve patinoita mukumbiro, iyena anotizwa. (Nduyo 65:2) Jehovha anotitungamirira no kutivangisa ecishandisa simba ro mujimu mucena wake. (Luka 11:13) Iyena wakatotumira Mwana wake waanoda pa nyika kuti atisujunure mu cishaishi no rufu.—Verenganyi Johani 3:16; VaRoma 5:8.

3. Tinodikana kuitenyi kuti ushamwari wedu na Jehovha ugare no kucingaperi?

³ Munoceukija shamwari yenyu yakagaraya na  imwimwi pa kutambujika kwenyu no pakudakara here? Zvinoda kuvangisira kuti tirambe tino ushamwari wakadaro, andizvopi? Ndizvonavo zvinoitika no ushamwari hwedu na Jehovha, Shamwari yaushoni yatingawana mu upenyu. Kuti ushamwari wedu naye ugare no kucingaperi, tinodikana kugara tino rudo na Mwari, kana kuti kuita zvese zvatinokwanisa kuti tive vandhu vanodiwa ndi Mwari. (Juda 21) Tingazviitisa kudini izvi? Bhaibheri rinoti: “Ngokuti, kudisa Mwari ndikona kuteveja mupango yake. Mupango yake airemi.”—1 Johani 5:3.

4, 5. (a) Zvinoda kunangenyi “kudisa Mwari”? (b) Rudo hwenyu kuna Jehovha hwakatangisa kudini kukura?

⁴ Bhaibheri rinoda kunangenyi parinoti: “kudisa Mwari”? Masoko aya aanangiri rudo hwa Mwari kwatiri, asi anonangira rudo hwedu kwaari. Munoceukija pamakatanga kuva no rudo kuna Jehovha here?

⁵ Munorangarira manera amakajizwa pamakatanga kuziva kuti Jehovha anoda kuti murarame no kucingaperi mu Paradhiso? Makajija ngo pamusoro po zvese zvaakaita kuti azvikwanirise. Makazwisisa kusisira ko cipo ca Jehovha caakatipa paakatumira Mwana wake pasi pano. (Mateu 20:28; Johani 8:29; VaRoma 5:12, 18) Pacina kukana-kana, pamakajija kuti Jehovha anomuda maningi, zvakamutora mwoyo, motanga kuva no rudo kwaari.—Verenganyi 1 Johani 4:9, 10.

6. Zvinobatanijenyi kuda mundhu? Kuda kwenyu Mwari kwakamundunda kuti muitenyi?

⁶ Asi kuda Mwari i ciro cokutanga. Inga muezaniso, kuda mundhu, kunopinda kunanga basi kuti: “Inini  ndinokuda.” Kudari tinoda mundhu umweni, tinoita zvese zvinozomuita kuti adakare. Mu njira yakafanana, kuda kwenyu Jehovha kwakamuita kuti mude kupona munjira inomudakajisa. Rudo hwenyu pa hwakakura, kangaije makazvipira kwaari mo bhabhatijwa. Ngokudaro, makagondesa kumushandira kwenda no kwenda. (Verenganyi VaRoma 14:7, 8.) Mungakwanirisa kudini cigondiso cenyu?

7. Zvicinyi zvatingaita kudari tecida Jehovha? Ngojapi mutemo jimweni ja Jehovha?

⁷ Ngo kuti tinoda Jehovha, ‘tinoteveja mupango yake.’ Mu Bhaibheri tinojija manera anoda Jehovha kuti tirarame. Inga muezaniso, Jehovha anorambisa zviito zvakashata zvakadari inga kudhakwa, kuba kana kunyepa, kuita ruvatano no mundhu woticikazivi kurovorana naye, kunamata mundhu kana kunamata ciro cimweni kusiapo Jehovha.—1 VaKorinto 5:11; 6:18; 10:14; VaEfeso 4:28; VaKolosi 3:9.

8, 9. Tingazvizivisa kudini zvinoda Jehovha pikija pa mugariro jicina mutemo kamare jakajeka jo mu Bhaibheri? Ipanyi muezaniso.

⁸ Asi kuti tidakajise Jehovha, tinodikana kuita zvizinji kupinda kuzwira mutemo jake. Iyena aazivi kutipa nda-nda-nda jese jo mutemo kuitira mugariro umwe nga umwe mu upenyu. Ngo kudaro, nguva jimweni mu Bhaibheri amuwaniki mutemo unotivhunja zvese zvatinodikana kuita. Tingatemesa kudini civaringo cakanaka? (VaEfeso 5:17) Mu Bhaibheri muno ndhungamiriro, jinotijijisa zvokadi ngo pamusoro po mavonero anoita Jehovha zviro. Patinoverenga Bhaibheri, tinoguma pakuziva Jehovha inga Mundhu. Tinojijira manera  aanorangarira, kubatanija zvaanoda no zvaacikadi.—Verenganyi Nduyo 97:10; Mazwi Akangwara 6:16-19; Vonanyi Masoko o Kupejisira n.° 1.

⁹ Inga muezaniso, mungakhetesa kudini zvamunoda kuvona mu Terevhizau no mu Interneti? Jehovha aanangi zvatinodikana kuita kamare. Asi anotipa ndhungamiriro jinotibesera kuita cisungo cakanaka. Mabungaijo mazinji nyamasi uno akazara ngo ugevenga no uhure. Mu Bhaibheri, Jehovha anotivhunja kuti iyena: “Anonyenya vaya vanodisa kujipa” zve kuti “vanohura no kupombora vanozotongwa ndi Mwari.” (Nduyo 11:5; Vaheberi 13:4) Ndhungamiriro iji jingatibesera kudini pa kuita cisungo cakanaka? Patinoziva kuti Jehovha anonyenya ciro cimweni kana anocivona kuva cakashata, tinodikana kucitiza.

10, 11. Ngenyi tinozwira Jehovha?

¹⁰ Ngenyi tinoda kuzwira Jehovha? Ngo ndava yokuti atidi kupanicwa kana atidi kuwanana no zvineso zvingawanika ngo kuita cisungo cakashata here? (VaGalàsia 6:7) Haiwa. Tinozwira Jehovha ngokuti tinomuda. Inga mwana anoda kuita kuti baba wake vadakare, tinodavo kuita kuti Baba wedu wo mugore vadakare. Apana cakanaka kupinda kuziva kuti Jehovha anodakara ndisu!—Nduyo 5:13; Mazwi Akangwara 12:2; Vonanyi Masoko o Kupejisira n.° 2.

¹¹ Atizwiri Jehovha basi pazvinonga zvakareruka kana pacina cimweni cokuita. Zve atigari tecisana mutemo no ndhungamiriro jatinoda kutevera no jaticikadi kutevera. (Deuteronòmio 13:1) Kunja kwa izvi, tinomuzwira mu zvese, inga zvakaimba mutari wo nduyo  paakati: “Kudakara kwangu kuri mu mupango yenyu, ndinoida.” (Nduyo 119:47; VaRoma 6:17) Tinoda kuva inga ndi Nowa, wakakhombija rudo hwake kuna Jehovha ngo kuita zvese zvaakavhunjwa ndi Jehovha. Bhaibheri rinoti: Nowa “wakaita bzese bzaakabvunjwa.” (Genesi 6:22) Amudi kuti Jehovha anangevo zvondhozvo ngo pamusoro penyu here?

12. Tingaitisa kudini kuti Jehovha adakare?

¹² Jehovha anojizwa kudini patinomuzwira? Bhaibheri rinoti ‘mwoyo wake unodakara.’ (Mazwi Akangwara 11:20; 27:11) Amborangariranyi basi! Tinoita kuti Musiki wo kudenga no pasi adakare patinomuzwira. Asi iyena aativangiriji kuita kudaro. Kunja kwa izvi, iyena wakatipa rusujunuko wo kuzvikhetera. Izvi zvinoreva kuti tino rusujunuko wo kusana kuita zvakanaka kana zvakashata. Jehovha anoda kuti rudo hwedu hutindunde pa kuita cisungo cakanaka, izvi zvinozotibesera kuwana upenyu unodakajisa.—Deuteronòmio 30:15, 16, 19, 20; Vonanyi Masoko o Kupejisira n.° 3.

13, 14. Tinozivisa kudini kuti mutemo ja Mwari ajinesi kuzwira? Ipanyi muezaniso.

¹³ Kudari tikarangarira kuti mutemo ja Jehovha jinonesa kuzwira kana kuti jinotivhisira rusujunuko hwedu keni? Bhaibheri rinoti: “Mupango yake airemi.” (1 Johani 5:3) Izvi zvinoda kunangenyi? Gama ro ciGiriki rokuti “kurema,” mu matahwa amweni, rinoshandiswa kuitira kujekesa muthetho jinonesa kana vandhu vanoda kuvonerera no kushaishira vamweni. (Mateu 23:4; Maitiro o Vapostori 20:29, 30) Mu Nova  Versão Internacional inoti: “Mupango yake aitibzinyiriri.” Ngokudaro mutemo ja Jehovha “ajiremi,” kana kuti ajinesi kuzwira. Iyena aativhunji zviro zvaticikakwanisi kuita.

¹⁴ Inga muezaniso, rangariranyi muri kuenda koobesera shamwari yenyu iri kuthutha. Iyena wapera kudira zviro zvese mu makasha. Makasha amweni akareruka. Asi amweni anorema zvokuti angatoda vandhu vaviri kuitira kumamujura. Munorangarira kuti shamwari yenyu yaizomukumbira kuti mu mujure mwega makasha anorema here? Haiwa! Ngenyi? Ngokuti iyena aadi kuti mukhuvazike. Mukufanana no shamwari iyi, Jehovha narini aatikumbiri kuti tiite zviro zvinonesa. (Deuteronòmio 30:11-14) Jehovha anozwisisa zvatiri “anoziva kuruhwa kwedu, anocereceja kuti tiri bukuta.”—Nduyo 103:14.

15. Ngenyi tingava no cokwadi cokuti mutemo ja Jehovha i kuitira kugara ushoni kwedu?

¹⁵ Mosi wakavhunja jinja ro vaIziraeri kuti mutemo ja Jehovha i kuitira kuti zvese zvivafambire ushoni. Kuzwira kwavo kwaizovabesera kuti ‘vaponeswe.’ (Deuteronòmio 5:28-33; 6:24) Ndizvonavo na nyamasi uno. Zvese zvaanotivhunja Jehovha zvinoita kuti upenyu hwedu uve wakanaka. (Verenganyi Isaia 48:17.) Baba wedu, Jehovha, nguva jese vanoziva kuti ngozvapi zvaushoni kwatiri. (VaRoma 11:33) Bhaibheri rinoti: “Mwari, i rudo.” (1 Johani 4:8) Izvi zvinoreva kuti zvese zvaanonanga no zvaanoita Jehovha anozviita ngo rudo.

16. Zvicinyi zvinozotibesera kuva vanozwira pikija no kutama kukwana kwedu zve ticirarama mu nyika yakashata?

¹⁶ Azvizivi kureruka nguva jese kuzwira Mwari  ngokuti tiri kupona mu nyika yakashata iri kutongwa ndi Dhiabho. Iyena anoeja kukwevejera vandhu pa kuita zvakashata. (1 Johani 5:19) Kusiapo izvi, atizivi kukwana. Tinodikana kuhwisana no murangariro ucizivi kukwana no mazwiro edu, zve kazinji inotiita kuti titame kuzwira Mwari. (VaRoma 7:21-25) Rudo hwedu kuna Jehovha unotipa simba rokuti tiite zvakanaka. Iyena anovona kuvangisira kwedu kuitira kumuzwira, zve anotibesera ngo kutipa simba ro mujimu wake mucena. (1 Samueli 15:22, 23; Maitiro o Vapostori 5:32 Shanduro yeNyika Itsva) Mujimu mucena unotibesera kuva no mugariro o kuti zvive zvakareruka kuti tizwire Jehovha.—VaGalàsia 5:22, 23.

17, 18. (a) Tinozojijenyi mu bhuku rino? (b) Zvicinyi zvatinozobhuya pa cipauko cinotevera?

¹⁷ Mu bhuku rino, tinozojija kuti tingararamisa kudini mu njira inodakajisa Jehovha. Tinozojija manera okushandisa ndhungamiriro no mutemo jake mu upenyu hwedu. Tinodikana kuceukija kuti Jehovha narini aazombotivangiriji kuti timuzwire. Apo patinokheta kumuzwira, tinova no upenyu waushoni wari zve no kumbeji kunodakajisa. Zvinosisira maningi ngo zvokuti kuzwira kwedu Mwari, kunokhombija kuti tino rudo naye.—Vonanyi Masoko o Kupejisira n.° 4.

¹⁸ Kuitira kutibesera kuziva cakanaka no cakashata, Jehovha wakapa umwe nga umwe wedu hana. Kuroveja hana yedu, kunozotibesera kuitira “kuteveja mupango yake.” Ngokudaro, icinyi hana, zve tingairovejesa kudini? Tinozozvijija mu cipauko cinotevera.