1-3. (a) Pana Mazwi Akangwara 13:20, rinoda kurevenyi gama rokuti ‘anobatana no’? (b) Ngenyi tinodikana kunasa kusana shamwari jedu?

MAKAMBOVONA mwana mudoko ecisota vabari vake here? Mukuezana no ciponja kana mufadha, mwana anotorera zvese zvaanovona no kuzwa ku vabari. Paanonga ecikura anotanga kuvatevejera pikija acikazwisisi. Ndizvona zvinoitikavo na itusu. Potinopeja nguva yakareba no mundhu, tinotanga kutevejera mabhuire no zviito zvake.

² Mazwi Akangwara 13:20 inoti: “Ndiani anofamba no vazivi, anoita muzivi.” Tinojijenyi nga izvi? Gama rokuti ‘anofamba no’ arirevi basi “kucungamija” kana “kueneka.” Rinoreva kupeja nguva yakawanda no mundhuwo ngokuti tinoda kugara naye. Umwe mujiji wo zvo Bhaibheri wakananga kuti, kufamba no mundhu zvinobatanija kuda mundhuwo zve kugara naye. Kudari tikapeja mukuvo wakawanda no mundhu, tinopejisira ngo kumutevejera, maningi-ningi kudari tecimuda.

³ Shamwari jedu jingatiita kuti tiite zviro zvakanaka kana zvakashata. Mazwi Akangwara 13:20 inotizve: “Ndiani anobatana (kana anofamba) no mapenji,  anoita wakaxata.” Mu Cihebheri, gama ro kuti “anobatana no” rinopa murangariro wo kuva no ushamwari no mundhu. (Mazwi Akangwara 22:24) Kudari shamwari jedu jinoda Mwari, jinotivangisa kuti tirambe takagondeka kwaari. Waro tingasanisa kudini shamwari jedu? Zvingatibesera, kuvona masanire anoita Jehovha shamwari jake.

4. (a) Ngenyi i makomborero makuru kuva shamwari ya Mwari? (b) Ngenyi Jehovha wakadaninja Abhirahama kuti ‘shamwari yangu’?

⁴ Jehovha i mundhu anosisira maningi wo kumatenga. Pikija zvakadaro, anotipa mukana wo kuva shamwari jake. Aya, makomborero makuru. Asi Jehovha anonasa kusana shamwari jake, anosana vandhu vanomuda zve vano rutendo naye. Vonanyi muezaniso wa Abhirahama. Jehovha wakamudanija “shamwari yangu.” (Isaia 41:8; Jakobo 2:21-23) Wakamudanija “shamwari yangu” ngokuti Abhirahama nguva jese wainga akagondeka zve anozwira. Iyena wainga akanasiririka kuti aite ciricese ngo ndava ya Mwari, pikija kutopa mwana wake Izaki inga mupiro. Abhirahama waigonda Jehovha zve wainga no cokwadi cokuti Jehovha waizomusa mwana wake. (Vaheberi 11:17-19; Genesi 22:1, 2, 9-13) Taakuzwisisa kuti ngenyi Jehovha wakananga kuti Abhirahama wainga shamwari yake.

5. Jehovha anozwa kudini ngo shamwari jake jakagondeka?

⁵ Kuno shamwari ja Jehovha, apana cinosisira maningi kuciripi kuva vakagondeka kwaari. (Verenganyi 2 Samueli 22:26.) Ivona vakagondeka no kuzwira ngokuti vanomuda. Bhaibheri rinoti: Jehovha i shamwari  yo “varurami”, zvinoti, vaya vanomuzwira. (Mazwi Akangwara 3:32) Jehovha anoda maningi shamwari jake. Anovakoka kuti vanghwine mu “tende” yake kana kuti anovakoka kuti vave vanamati vake zve kuti vaite mukumbiro kwaari mukuvo uri wese wovanoda.—Nduyo 15:1-5.

6. Tingakhombijisa kudini kuti tinoda Jesu?

⁶ Jesu wakati: “Kudari mundhu akandida anozongwarira mazwi angu; Baba wangu vanozomuda.” (Johani 14:23) Kuti tive shamwari ja Jehovha, tinodikana kukhombija kuti tinoda Jesu. Tingazviitisa kudini? Ngokuita zvaakajijisa, inga kucumaera no kuita vajiji. (Mateu 28:19, 20; Johani 14:15, 21) Tinokhombijavo kuti tinoda Jesu ‘potinoteveja ngo phedo gwanja rake’, kana kuti potinovangisira kutevejera Jesu ngo zvese zvotinoita no zvatinobhuya. (1 Pedru 2:21) Jehovha anodakara maningi paanotivona teciita kudaro.

7. Ngenyi zvinosisira kuti shamwari jedu jive shamwari ja Jehovha?

⁷ Tavona kuti shamwari ja Jehovha jakagondeka, jinozwira zve jinoda Jesu. Shamwari jenyuvo keni? Jakadarovo? Zvinosisira kuti shamwari jedu jitevejere Jesu zve jivangisire kuti jicumaere ngo pamusoro po Umambo hwa Mwari. Shamwari jakadaro jinotibesera kuva vandhu vaushoni zve tirambe takagondeka kuna Jehovha.

8. Zvicinyi zvinomudakajisa pa ushamwari hwa Rute na Naomi?

⁸ Bhaibheri rinonanga ngo vandhu vazinji vakava shamwari jaushoni. Ngatitange ngo kuvona muezaniso wa Rute na nezvara wake, Naomi. Ivona vainga vaciripi vo nyika imweyo zve vainga vacina zvirovejeso  zvimwezvo. Kunja kwa izvi, Naomi wainga dhodha kupinda Rute. Asi ivona vakava shamwari jaushoni ngo kuti vaida Jehovha. Naomi paakada kubuda mu nyika yo Moabhi kuenda ku Iziraeri, Rute wakavangirira kuti vaende vese. Rute wakati: “Jinja renyu rinozoita rangu, Mwari wenyu anozoita wangu.” (Rute 1:14, 16) Rute waitaja ushoni Naomi. Pavakaguma Iziraeri, Rute wakashanda ngo simba kuti akorondhe shamwari yake Naomi. Naomi waida Rute zve wakamupa mbhangiro jaushoni. Rute wakaita zvakananga Naomi, muviyo wakona wakava wo kuti vovaviri, vakaashira makomborero mazinji.—Rute 3:6.

9. Ngozvapi zvamunodakarira pa ushamwari hwa Dhavhidhi na Jonatani?

⁹ Muezaniso umweni ngo wa Dhavhidhi na Jonatani. Vakava shamwari jaushoni jaigondeka kuna Jehovha. Jonatani waipinda Dhavhidhi ngo makore anodokwana 30 o kubahwa. (1 Samueli 17:33, 31:2; 2 Samueli 5:4) Jonatani waizova mambo waizotevera wo Iziraeri. Asi Jehovha wainga asana Dhavhidhi kuti azove mambo waizotevera. Jonatani paakazviziva, aazivi kuva no cishatihwa nee kutoeja kutorera Dhavhidhi cigaro. Kunja kwa izvi, wakaita zvese zvaaikwanisa kuti abesere Dhavhidhi. Inga muezaniso, Dhavhidhi paainga pa ngozi, Jonatani wakamubesera kuti athembe Jehovha. Jonatani wakatodira upenyu hwake pa ngozi kuti aponese Dhavhidhi. (1 Samueli 23:16, 17) Dhavhidhi wakavavo shamwari yakagondeka. Wakagondesa kukorondha mbhuri ya Jonatani zve wakakwanirisa cigondiso ici pikija pakupera kufa ka Jonatani.—1 Samueli 18:1; 20:15-17, 30-34; 2 Samueli 9:1-7.

10. Zvicinyi zvomajija pa ushamwari hwo vahebheru vatatu?

 ¹⁰ Vonanyizve muezaniso wo vahebheru vatatu. Shadhereki Misheki na Abhedhenego vainga shamwari no shamwari zve vakatohwa kwenda ku Bhabhironi pavainga vari majaha. Ivona vainga vari ndhambo no ukama hwavo, asi vaibeserana kuva vakagondeka kuna Jehovha. Pavakakura, vakahwisana no mugariro wakaeja gonda ravo: Mambo Nabhukadhinezari wakatumira kovadanija kuti vaviye ko namata cithombe co ndarama. Vovatatu vakabvunja mambo kuti ‘avacaizoshandira zvimwari zvake nee kunamata cithombe’ caainga waita. Vovatatu vakaramba vakagondeka kuna Jehovha. —Danieli 1:1-17; 3:12, 16-28.

11. Pauro na Timoti vakagumisa kudini pa kuva shamwari jaushoni?

¹¹ Pauro paakaziva Timoti, wakavona kuti Timoti waida Jehovha zve waitambujikira ungano. Ngo kudaro, Pauro wakaroveja Timoti kuti abesere hama no hambzaji mu ndau zinji. (Maitiro o Vapostori 16:1-8; 17:10-14) Timoti waivangisira mu basa ra Jehovha zvokuti Pauro wakati: ‘Yena wakabatira vhangeri pamwepo na inini.’ Pauro wainga no cokwadi cokuti Timoti waizotaja ushoni hama. Pauro na Timoti pa mukuvo wovakashanda vese, vakava shamwari jaushoni. —VaFilipi 2:20-22; 1 VaKorinto 4:17.

12, 13. (a) Ngenyi pikija mu ungano tinodikana kungwarira pa kushamwarijana? (b) Ngenyi Pauro wakananga zviri pana 1 VaKorinto 15:33?

¹² Mu ungano, tino hama no hambzaji jinozvirovejeso no maitiro akasina-siana. Vamweni vapsa mu ungano, vamweni vaano makore akawanda vecishandira  Jehovha. Tingatojija zvizinji no hama jedu no kubesana kuti tirambe takagondeka. (Verengani VaRoma 1:11, 12.) Asi pikija mu ungano, tinodikana kungwarira vokushamwarijana navo. Ngenyi? Zvinotora mukuvo kuti mucero uivhe, andizvopi? Mukuezana, zvinotora mukuvo kuti mundhu ave no ushamwari wakavanga na Jehovha. Ngokudaro, tinodikana kuva vanosengerera zve toda vamweni. Pa mukuvo umwewo, tinodikana kunasa kusana ushoni shamwari jedu. —VaRoma 14:1; 15:1; Vaheberi 5:12–6:3.

 ¹³ Nguva jimweni mu ungano mungabuda zvineso. Pazvinoitika tinodikana kungwarira. Inga muezaniso, zvingaita kuti hama yoita zvinonangwa ngo Bhaibheri kuti zvakashata. Kana kangaije ariwese angatanga kun’gun’guta ngo zvese, izvi zvingashatisa ungano. Tinozviziva kuti zviro inga izvi zvingaitika, ngokuti pa nguva jo vapostori mukuvo umweni zvaiitikavo. Makristu amweni o panguva yondhoyo avacaitothemba zvaijijisa Jesu. (1 VaKorinto 15:12) Ndizvona zvakaitisa kuti Pauro anange zviri pana 1 VaKorinto 15:33: “Mucadocengejwa: “Vadoni vakaxata vanovoja maitiro akanaka.”” Kunja kwaizvi, Pauro wakavhunja Timoti kuti asane shamwari no kungwarira. Tinodikanavo kuita zvakaezana.—Verenganyi 2 Timoti 2:20-22.

14. Muezaniso wapi unokhombija kuti tinodikana kunasa kusana shamwari jedu?

¹⁴ Ciro cinosisira maningi catinaco i ushamwari hwedu na Jehovha. Atidi kuva shamwari jo mundhu angarembesa rutendo hwedu kana kutophingaija ushamwari hwedu na Jehovha. Ngenyi? Ngokuti takagara inga ciponja kana mufadha cinotorera zvese zviri phedo naco. Kudari cikatorera kumwa yakasvipa, acizobudisi kumwa yakacena. Mukuezana, tinotorera mugariro jo vandhu vari phedo na itusu. Kudari shamwari jedu jinoita zviro zvakashata, tinozozvitoreravo zve zvinozotinesera kuita zvakanaka. Ngo kudaro, tinodikana kunasa kusana shamwari jedu zve tongwarira ushamwari hwedu na Jehovha. —1 VaKorinto 5:6; 2 VaTesalònika 3:6, 7, 14.

15. Mungaitisa kudini ushamwari hwaushoni mu ungano?

¹⁵ Mu ungano, tinowana shamwari jinoda Jehovha. Ijona jingava shamwari jedu ja ushoni. (Nduyo 133:1)  Asi atidikani kuva shamwari jo vaya vo mupira wedu basi kana vaya vanoda zviro zvimwezvo no zvatinodavo. Rangariranyi kuti Jonatani wainga dhodha kupinda Dhavhidhi, Rute wainga mudoko kuna Naomi. Ngo kudaro, tinoda kuzwira zvinonanga Bhaibheri kuti ‘zauranyivo mwoyo yenyu’ kana kuti, kuva takanasiririka kuti tiite ushamwari hupsa. Tinoda kuva no ‘rudo’ no hama. (2 VaKorinto 6:13; verenganyi 1 Pedru 2:17.) Kudari mukatevejera Jehovha, vamweni vanozovona mugariro jenyu zve voda kuva shamwari jenyu.

16, 17. Kudari hama ikatinyangajisa, ngo zvapi zvaticikadikani kuita?

¹⁶ Ungano yakagara inga mbhuri. Umwe na umwe ano undhu hwake, mavonero no manera o kuita zviro. Tingajijira zvizinji ngo vamweni. Wari, rangariranyi basi kudari vandhu vese vainga vakaezana. Upenyu aucaizodakajisa, andizvopi? Asi ngokuti umwe na umwe anomavonero ake, mukuvo umweni pangamuka kutama kuzwana, tingatoguma pakucamwisa hama, kushora kana kuinyangajisa. (Mazwi Akangwara 12:18) Kunanga kuti tinozoima kuenda ku musongano ngondava yo zvondhozvo?

¹⁷ Haiwa. Pikija hama ikatinyangajisa, atizoregeri kuenda ku musongano. Mbzakadi, Jehovha aana ndava. Iyena wakatipa upenyu no zvese zvatinoda kuti tipone. Jehovha anofanera rudo hwedu no kutendeseka kwedu. (Apokalipsi 4:11) Kunja kwa izvi, ungano icipo ca Jehovha caakatipa kuitira kuvangisa gonda redu. Ngokudaro tinodikana kuzwira hama jinotungamirira  ungano. (Vaheberi 13:17) Atidikani kuregera kuenda ku musongano ngokuti ariwese watinyangajisa.—Verenganyi Nduyo 119:165.

18. (a) Mugariro wapi unotibesera kuti tizwane no hama jedu? (b) Ngenyi tinodikana kuregererana?

¹⁸ Tinoda hama zve tinoda kuzwanana najo. Jehova aaveteri kukwana ko ariwese. Waro, munorangarira kuti tinodikana kuvetera kukwana ko hama jedu here? (Mazwi Akangwara 17:9; 1 Pedru 4:8) Tese tinoshaisha, asi rudo unotibesera kuti ‘tikungurirane.’ (VaKolosi 3:13) Rudo unozotibesera kuti tiregere kuita kuti ndava doko ive ndava huru. I cokwadi kuti mundhu paanotinyangajisa, zvinonesa kurangarira zviro zvimweni. Tingatova no ushungu pa nguva yakareba. Asi izvi zvinozotiita kuti titame kujizwa ushoni. Ngo kudaro, tinodikana kuregererana ngokuti zvinotibesera kuva takagajana, ungano inobatana, cikuru kuru, ushamwari hwedu na Jehovha hunovanga.—Mateu 6:14, 15; Luka 17:3, 4; VaRoma 14:19.

19. Pa mugariro wapi wo tinodikana kugura ushamwari no ari wese?

¹⁹ Pa mbhuri, umwe na umwe anoita divi rake kuti vese vave vakadakara. Asi rangariranyi mwana umwe paanopanduka. Mbhuri inoeja kumubesera, asi iyena anoramba. Mugariro ungacinja zvokuti angada kubuda pamuzi, kana vabari votomukumbira kuti abude. Izvi zvingaitikavo mu ungano. Mundhu angatema civaringo co kuita zviro zvinonyangajisa Jehovha zve zvinokhuvaza hama. Iyena angaramba kubeswa zve zviito zvake zvokhombija kuti aacadi kuita divi ro ungano.  Kangaije angasunga kusia ungano, kana zvingatoda kuti ajingwe kamare. Izvi pazvinoitika, Bhaibheri rinonanga kuti tinodikana ‘kuima kushamwarijana naye’, kana kuti, kugura ushamwari naye. (Verenganyi 1 VaKorinto 5:11-13; 2  Johani 9-11) Izvi zvinganesa kudari mundhuwo i shamwari kana ukama hwedu. Asi kutendeseka kwedu kuna Jehovha kunodikana kuva kwakakura kupinda ku mundhu ari wese.—Vonanyi Masoko o Kupejisira, n.° 8.

20, 21. (a) Ngenyi kujingwa ko mundhu ndi manera o ku khombija rudo ka Jehovha? (b) Ngenyi zvinosisira kunasa kusana ushoni shamwari jedu?

²⁰ Kujingwa ko mundhu ndi manera o kukhombija rudo ka Jehovha. Zvinojivirira ungano ino vandhu vanoda kuzwira Jehovha. (1 VaKorinto 5:7; Vaheberi 12:15, 16) Zvinotibeserazve kukhombijira rudo no nderemejo kuna Jehovha, ngo zina rake rakacena no ndhungamiriro jake. (1 Pedru 1:15, 16) Kusiapo izvi, zvinokhombija rudo ku mundhuwo. I cokwadi kuti kutama kuitazve divi ro ungano i mbhangiro yakavanga. Asi izvi zvingabesera mundhuwo avone kuti zvaari kuitaro zvakashata. Zvingamubeserazve kuti ade kucinja. Vazinji vakambojingwa, vakahwirirazve kuna Jehovha zve vakaashihwazve ushoni ngo ungano.—Vaheberi 12:11.

²¹ Inga zvatavona, shamwari jedu jingatitora kuti tiite zvakanaka kana zvakashata. Ngokudaro zvinosisira kuti tinase kusana ushoni shamwari jedu. Kudari tikada vandhu vanodiwa ndi Jehovha, tinozova no shamwari jinozotibesera kuramba takagondeka kuna Mwari kwenda no kwenda.