Kuno vanoda Jehovha Mwari no Soko rake, Bhaibheri:

Jesu wakananga kudari: “Munozoziva bzokadi, no bzokadi bzinozomusujunura.” (Johani 8:32) Rangariranyi mazwire o makava nao pamakatanga kujija cokwadi cinovha mu Bhaibheri! Zvakamudakajisa kuziva kuti pikija nyika ino yakazara ngo manyepo, zvinokwanisika kujija cokwadi.—2 Timoti 3:1.

Jehovha Mwari anoda kuti umwe nga umwe wedu azive cokwadi. Ngo ndava yokuti tino rudo no vandhu, tinoda kuvavhunja ngo pamusoro pake. Asi kushandira Mwari kunobatanija zvizinji. Tinodikana kuita zvatinokwanisa kuti tive no maponero o Cikristu ngokuti tinoreremeja kamare ndhungamiriro ja Jehovha. Jesu wakasangura njira inosisira yo kukhombija ndiyona kuti tinoda Mwari. Iyena wakati: “Mukateveja mupango yangu, munozogara mu rudo hwangu. Kudari inga inini ndakateveja mupango ya Baba wangu no kuva mu rudo hwavo.”—Johani 15:10.

Jesu ano rudo kamare kuna Baba vake, zve iyena anoita zvese zvaanovhunjwa kuti aite. Kudari tikatevejera Jesu mu upenyu hwedu, tinozodiwa ndi Jehovha zve tinozova vandhu vakadakara. Jesu wakati: ‘Kudari meciziva izvi, munodakara kudari mecizviita.’—Johani 13:17, Shanduro yeNyika Itsva.

Tinoimira kuti bhuku iri rimubesere kupona mukuzwirana no cokwadi co Bhaibheri no kuva shamwari ja Mwari. Tino mukumbirira kuti rudo hwenyu kuna Mwari urambe uciengejeka zve rambanyi muri “mu rudo hwa Mwari . . . mucirangarira ngo pamusoro po upenyu hucingaperi.”—Juda 21.