1. Ngenyi Jesu waineseka ngo vajiji vake?

WAINGA usiku wo kupejisira Jesu acito afa. Iyena waineseka ngo vajiji vake. Ngenyi? Ngokuti, kuna Jesu, zvaisisira maningi ngo zvokuti vajiji vake vatame kuita “divi ro nyika.” (Johani 15:19) Iyena wakakumbira kuna Jehovha ngo pamusoro pavo, eciti: “Ivona asipi vo pasi pano, kudari inga ndini andiripi wo pasi pano.” (Johani 17:15, 16) Jesu waida kunangenyi?

2. Jesu paakananga kuti “nyika“ waida kunangenyi?

² Jesu paakananga kuti “nyika”, iyena wainangira vandhu vacikashandiri Mwari zve vanotongwa ndi Sathana. (Johani 14:30; VaEfeso 2:2; Jakobo 4:4; 1 Johani 5:19) Tingaitisa kudini kuti titame kuva “divi ro nyika”? Pa cipauko cino, tinozovona manera mashanu anotibesera kuti titame kuita divi ro nyika: (1) Kuva takagondeka ku Umambo hwa Mwari zve kutama kughwinira mu zvomatongehwe o nyika; (2) Kuhwisana no mujimu wo nyika; (3) Kungwarira masimiriro edu no mavonekero; (4) Kutama kurangarira mare basi, Zve (5) kusimira zvijito zvo hondo zva Mwari.—Vonanyi Masoko o Kupejisira, n.° 16.

3. Jesu waivona kudini zvomatongehwe o nyika?

³ Jesu paainga ari pa nyika, waivona kuti vandhu vainga no zvineso zvizinji zve upenyu hwavo hwainga hucikazivi kureruka. Iyena wainesekadi kamare ndivona. Kunanga kuti Jesu wakanghwinira mu zvomatongehwe o nyika kuti avabesere here? Haiwa. Iyena waizviziva kuti vandhu vaida Umambo, kana utongi hwa Mwari. Jesu waizova Mambo wo Umambo uhu, zve Umambo hwakava ciro cinosisira maningi mukucumaera kwake. (Danieli 7:13, 14; Luka 4:43; 17:20, 21) Jesu aazivi kunghwinira mu zvomatongehwe o nyika, iyena nguva jese wakaramba acina kwaakapeamira. Paainga pambeji pa govhernadhori wo Roma, Ponsio Pirato, iyena wakati: “Umambo hwangu asipi hwo pasi pano.” (Johani 18:36) Vajiji va Jesu vaingavo vacina kovakapeamira. Rimwe bhuku ro ngano rakananga kuti: Makristu o mu zana ro makore o kutanga “aacaitendepi kuva no cigaro mu zvomatongehwe o nyika.” Makristu okadi nyamasi uno, anotevejeravo Makristu o kutanga. Ivona vakagondeka ku Umambo hwa Mwari, avanghwiniri mu zvomatongehwe o nyika.—Mateu 24:14.

4. Makristu okadi anokhombijisa kudini kuti anobesera Umambo hwa Mwari?

⁴ Pauro wakatarira Makristu o kuzojwa kuti: “Tiri vatumwi vokubatira Kristu.” (2 VaKorinto 5:20) Icinyi mutumwi? Mutumwi (Embashadhori) anobatira ku nyika imweni eciimirira utongi hwo nyika yake. Ngo kudaro, iyena aanghwiniri zvomatongehwe o nyika yaanobatiraro. Ndizvonavo zvondhozvo no vokuzojwa vanozoenda kotonga na Jesu ku matenga. Ivona vanoimirira Umambo hwa Mwari ngo kudaro  avanghwiniri zvomatongehwe o nyika. (VaFilipi 3:20) Ivona vanobesera zviuru no zviuru zvo vandhu kuti vajijire ngo pamusoro po Umambo hwa Mwari. Ivona vanoashira besero ro “mavhuta amweni,” anozopona kwenda no kwenda pasi pano. Mavhuta amweni aanghwinirivo mu zvomatongehwe o nyika. (Johani 10:16; Mateu 25:31-40) Zvakajeka kuti Makristu okadi aanghwiniri mu zvomatongehwe o nyika ino.—Verenganyi Isaia 2:2-4.

5. Ngorapi thangwe rinoitisa kuti Makristu arambe kwenda ku hondo?

⁵ Ku Makristu okadi-kadi, vatendi doni vavo vakadari inga ukama hwo pa mbhuri pavo. Ivona vakabatana, azvinenyi ko vakakurira kana zvirovejeso zvavo. (1 VaKorinto 1:10) Kudari no taienda kuhondo, taizohwisana  no ukama hwedu, no hama jedu. Jesu wakananga kuti, tinodikana kuda hama jedu. (Johani 13:34, 35; 1 Johani 3:10-12) Kusiapo izvi, Jesu wakanangazve kuti tinodikana kuda vavengi vedu.—Mateu 5:44; 26:52.

6. Vashandiri va Jehovha vanovonesa kudini vatongi?

⁶ Ngo zvokadi kuti itusu Makristu, atidikani kuva no kwatakapeamira. Pikija zvakadaro, zvinosisira kureremeja vatongi. Inga muezaniso, itusu tinozwira mutemo zve tinoripa mushabo. Asi narini atikanganwi kupa ‘Mwari bza Mwari.’ (Marco 12:17; VaRoma 13:1-7; 1 VaKorinto 6:19, 20) Izvi zvinobatanija rudo hwedu kwaari, kumuzwira no manamatiro edu. Takacunga kuruza upenyu hwedu ngo kuda kuzwira Jehovha.—Luka 4:8; 10:27; verenganyi Maitiro o Vapostori 5:29; VaRoma 14:8.

7, 8. (a) Icinyi “mujimu wo nyika”? (b) Mujimu wo nyika unoitenyi no vandhu?

⁷ Kuva ticizivi kubatana no nyika ino ya Sathana zvinoreva kutama kusiya kuti mujimu “wo nyika” utitungamirire. Icinyi mujimu wo nyika? I manera o kurangarira no kuita ko nyika ya Sathana. Mujimu uu unotungamirira vandhu vacikashandiri Jehovha. Asi Makristu anodikana kuhwisana nawo. Pauro wakati: “Itisu atizivi kuaxira mujimu wo nyika, kaveta takaaxira mujimu unovha ka Mwari”.—1 VaKorinto 2:12; VaEfeso 2:2, 3; Vonanyi Masoko o Kupejisira, n.° 17.

⁸ Mujimu wo nyika unoita kuti vandhu vade zvinovadakajisa, vajikuje zve vapanduke. Unovaita kuti varangarire kuti avana dikano yo kuzwira Mwari. Sathana anoda kuti vandhu vaite zvavanoda vacikarangariri  muviyo. Iyena anoda kuti vandhu vadavire kuti kugutisa zvido zvavo ngo zvinosisira maningi. (1 Johani 2:16; 1 Timoti 6:9, 10) Dhiabho anoita zviri zvese kuti acengeje vashandiri va Mwari. Iyena anoda kuti tirangarire zve tive inga ndiyena.—Johani 8:44; Maitiro o Vapostori 13:10; 1 Johani 3:8.

9. Mu njira yapi mujimu wo nyika ungatikwevejera?

⁹ Mukuezana no mbhepo yatinofema, mujimu wo nyika uri kwese. Kudari tikatama kuhwisana no mujimu uu, iwona unopejisira ngo kutikwevera. (Verenganyi Mazwi Akangwara 4:23.) Izvi zvingatanga ngo zviro zvatingavona kuti azvitiviisiri ndava iri yese. Inga muezaniso, tingatotanga ngo kurangarira no kuita zviro mu njira yakafanana no vaya vacikashandiri Jehovha. (Mazwi Akangwara 13:20; 1 VaKorinto 15:33) Tingatokwevejehwa ngo zviro zvakadari inga kuvona zvo umitu-mitu, kuphikizana zve mutambo jo kuti vandhu vanoda kuwina.—Vonanyi Masoko o Kupejisira, n.° 18.

10. Tingahwisana kudini no mujimu wo nyika?

¹⁰ Tingahwisana kudini no mujimu wo nyika? Tinodikana kuva shamwari ja Jehovha zve totendera kuti atitungamirire. Tinodikana kuita mukumbiro tecikumbira mujimu mucena zve tova takabatana mu zviro zvinodakajisa Jehovha. Iyena i mukuru-kuru wo zvese. Ngo zvokadi kuti Jehovha angatibesera kuti tihwisane no mujimu wo nyika ino.—1 Johani 4:4.

11. Ngo api masimirire o vandhu vanoita divi ro nyika?

¹¹ Njira imweni inokhombija kuti atiiti divi ro nyika i mavonekero edu no nguvo jedu. Vandhu vazinji vanosimira nguvo jicizivi kureremera jinoita kuti vandhu  vavasotesese, vanokhombija kuti vapanduki kana kukhombija kuti vano mare. Vamweni avana ndava no mavonekero zve vanosimira nguvo jicizivi kucena kana jicizivi kurongeka. Atidikani kutendera kuti izvi zvitikwevejere patinonga tecisana nguvo jedu.

12, 13. Ngojapi ndhungamiriro jo Bhaibheri jinotibesera kukheta zvatinoda kusimira?

¹² Tiri vashandiri va Jehovha. Ngokudaro tinoda kuti nguvo jedu jive jakacena, jakanasirika, jakanaka zve jinozwirana no kwatinonga tiri. Itusu tinosimira “uxoni,  ngo kujibata no ureremejo” kuti tikhombije kuti tinoshandira Mwari.—1 Timoti 2:9, 10, Juda 21.

¹³ Kujibata kunobatanija kureremeja mazwiro no mavonero o vamweni. Kunja kwa izvi, masimiriro edu angaita kuti vamweni varangarire zvakanaka kana zvakashata ngo pamusoro pa Jehovha no vashandiri vake. Itusu tinoda kuita ‘zviro zvese tecikuja Mwari.’ (1 VaKorinto 10:31) Ngo iyo ndava tinodikana kuneseka ngo nguvo no mavonekero edu.—1 VaKorinto 4:9; 2 VaKorinto 6:3, 4; 7:1.

14. Muvhunjo japi jinotibesera kuti tisane nguvo jatinodikana kusimira tecienda ku musongano no mu basa ro kucumaera?

¹⁴ Patinonga tecida kuenda ku musongano kana mu basa ro kucumaera, tinodikana kurangarira ushoni zvatinoda kusimira. Kunanga kuti zvatinosimira zvinoita kuti vandhu vatisotesese here? Zvinosiya vamweni vacina zvokuita? Kureva kuti tinorangarira kuti: ‘Nguvo iji ngo jangu apana ano basa najo here’? (VaFilipi 4:5; 1 Pedru 5:6) I cokwadi kuti tinoda kuva takaseja kana kunyara, asi kunasa kunanga, cinosejesa mundhu i kuva no mugariro jo Cikristu. Iji ndijona mugariro jinovoniwa ndi Jehovha paanotisotesesa. Mugariro iji jinokhombija zvatiri ngo mukati. Izvi “bzino mutengo pa nyasi pa Mwari.”—1 Pedru 3:3, 4.

15. Ngenyi Jehovha aazivi kutipa mu nda-nda-nda yo mutemo ngo pamusoro po zvatinodikana no zvaticikadikani kusimira?

¹⁵ Jehovha aazivi kutipa munda-nda-nda yo mutemo ngo pamusoro po zvatinodikana no zvaticikadikani kusimira. Kunja kwa izvi, wakatipa ndhungamiriro jinotibesera kuti tiite zvisungo zvaushoni. (Vaheberi 5:14) Wakaita izvi ngo kuti anoda kuti zvisungo zvedu zvivhire  mu rudo hwedu kwaari no vamweni, azvinenyi kuti cisungo cikuru kana cidoko. (Verenganyi Marco 12:30, 31.) Mu nyika yese, vandhu va Mwari vanosimira mu njira jakasiana-siana zvecifira ku zvirovejeso zvavo no zvinoda mundhu. Kusiana-siana uku kwakaseja zve kunoita kuti upenyu uve unodakajisa.

16. (a) Sathana anoda kuti vandhu varangarirenyi ngo pamusoro po mare? (b) Tinodikana kujivhunjisenyi?

¹⁶ Sathana anoda kuti vandhu varangarire kuti mare no zviro zvo kunyama ndizvona zvinoviisa mudakaro.  Asi vashandiri va Jehovha vanozviziva kuti izvi asipi izvona. Tinogonda masoko a Jesu, okuti: “Pikija muve no bzizinji, apana anopona ngo ndava yo upfumi”. (Luka 12:15) Mare aiviisi mudakaro. Aiviisi shamwari jokadi, runyararo wokadi, nee upenyu hucingaperi. Igwinyiso kuti tinoda mare kuitira kujisapota, zve tinoda kuva no upenyu hunodakajisa. Asi Jesu wakatijijisa kuti tive no mudakaro tinodikana kuva shamwari ja Mwari. Kunamata Mwari kunodikana kuva ciro cinosisira maningi mu upenyu. (Mateu 5:3; 6:22) Wari, jivhunjisenyi kudari: ‘Ndinovona mare inga mavonere o vanoita vandhu vo nyika? Kunanga kuti ndinondorangarira mare nguva jese no kundobhuya ndiyona?’—Luka 6:45; 21:34-36; 2 Johani 6.

17. Muviyo japi jinovepo ngo kuvona mare inga icingasisiri maningi?

¹⁷ Patinoregera kupa mutengo unosisira maningi mare tobatikana mubasa ra Jehovha, tinova no upenyu unodakajisa. Patinokwana ngo zvatinazvo, tinojizwa kudakara mu murangariro no mu mwoyo. (VaRoma 15:13) Zve atigari tecineseka ngo zviro zvokunyama. (Mateu 6:31, 32; Verenganyi 1 Timoti 6:9, 10.) Tinovona kuti patinobesera vamweni, tinova vakadakara maningi. (Maitiro o Vapostori 20:35) Tinazve mukuvo wakawanda kuitira kugara no vandhu vatinoda. Tinotovata hope jinoza.—Mucumaeri 5:12.

18. Sathana anoda kuitenyi?

¹⁸ Sathana anoda kuphwanya ushamwari hwedu na Jehovha. Ngokudaro, tinodikana kuita zviri zvese kuitira kujivirira ushamwari hwedu. Tinodikana kuhwisana  no ‘mujimu jakaxata’ kana kuti na Sathana no madhimoni ake. (VaEfeso 6:12) Ivona avadi kuti tive takadakara no kupona kuncingaperi. (1 Pedru 5:8) Ngo zvokadi kuti vavengi ava vanosimba, asi tingakwanisa kuwina kuhwa uku, ngo besero ra Jehovha!

19. Mukuzwirana na VaEfeso 6:14-18, mativi api o zvijito zvokuti Mukristu anodikana kuva nazvo?

¹⁹ Kare masoca aishandisa muvhiko, kapaseti no zviro zvimweni kuitira kuzvijivirira kuhondo. Izvi zvainga zvijito zvavo. Mukuezana tinodikana kusimira “bzijito bzo imbi ya Mwari” kuti tizvijivirire. (VaEfeso 6:13) Tinoverenga ngo pamusoro po zvijito izvi pana VaEfeso 6:14-18: “Ndibzo, makaima, sunganyi mu cihunu menyu ngo bzokadi, makasimira muthavo wo ururami. Simiranyivo magwada mu soka menyu, kuti mukasike kutokotesa Vangeri ro rugarisiko, mecibata mu nyara muviko wo rutendo, nguva yese: Mozokwanisa kujima ndiwona mupaxa yese yakabhwaka ya Sathana. Toranyivo cigoko co ruponeso, no banga ro Mujimu, riri Izwi ra Mwari. Namatanyi njiku jese, itanyi mukumbiro wo mufumbo wese no kupota, mu Mujimu.”

20. Tinodikana kuitenyi kuti zvijito zvitijivirire?

²⁰ Kudari musoca akakanganwa kusimira mativi o zvijito divi rimwe ro muviri arizojiviririki. Muvengi anozomufura ngo pondhopo kamare pacizivi waro kujivirihwa. Kuti zvijito zvitivikire atidikani kukanganwa kuzvisimira nee cimwe haco. Tinodikana kusimira zvijito nguva jese. Hondo yedu yo kuhwisana na Sathana no madhimoni ake inoenderera mberi mbhera ivona vavhiswe zve no kuparajwa ko nyika ino yakashata. (Apokalipsi 12:17; 20:1-3) Ngo iyo ndava kudari tiri  kuhwisana no zvido zvakashata kana kuti kurembejeka atidikani kuhwirira sure.—1 VaKorinto 9:27.

21. Tingamunyisisa kudini Sathana?

²¹ Tega atikwanisi kuhwisana kana kunyisa Dhiyabho. Asi ngo besero ra Jehovha tinokwanisa kumunyisa! Ngo kudaro, tinodikana kuita mukumbiro kuna Jehovha, kuita jijo yo Bhaibheri zve nguva jese kugara pamwepo no hama. (Vaheberi 10:24, 25) Zviro izvi zvinotibesera kuva takagondeka kuna Mwari no kujivirira rutendo hwedu.

22, 23. (a) Tinodikana kuitenyi kuti tive takanasiririka kuti tijivirire rutendo hwedu? (b) Tinozovonenyi mu cipauko cinotevera?

²² Mu mugariro jimweni Zvapupu zva Jehovha zvinoita zviro munjira jakasiyana no vandhu vamweni. Tinodikana kuva takanasiririka kuitira kujivirira rutendo hwedu. (Johani 15:19) Ngokudaro zvivhunjisenyi kuti: ’Kunanga kuti inini ndinozwisisa kuti ngenyi Zvapupu zva Jehovha zvinoita kudaro zviro? Ndinogwinyiso ro kuti Bhaibheri pomwe no muranda wakagondeka vanonanga zvokadi? (Mateu 24:45; Johani 17:17) Ndinozvikuja ngo kuva Capupu ca Jehovha? (Nduyo 34:2; Mateu 10:32, 33) Ndinokwanisa kudurujira vamweni zvandinotenda?’—Verenganyi 1 Pedru 3:15.

²³ Mu mugariro jimweni, zvakajeka kuti ngozvapi zvatinodikana kuita kuti tive takasiana no nyika. Asi nguva jimweni azvizivi kujeka. Sathana anoshandisa zvakawanda kuti aticengeje. Cimwe cazvo i mabungaijo. Mu cipauko cinotevera tinozovona kuti tigasanisa kudini mabungaijo.