1, 2. Kudari mucadho uno zvineso kureva kuti iwona wakaposeka here? Durujiranyi.

MUCADHO i cipo cinovha kuna Jehovha. Iwona ungaviisa mudakaro wakakura maningi mu upenyu. Pikija zvakadaro, mucadho wese unozova no zvineso zvawo. Nguva jimweni, zvingatovoneka inga kuti zvinesozvo azvingaperi, zve zvingaita kuti mwamuna no mukaji vagume pa kuparajana.

² Ngo kudaro, atidikani kukahamara kudari nguva jimweni pakamuka zvineso pa mucadho. Asi, zvineso azvirevi kuti mucadho wenyu wakaposeka. Pikija zvakadaro, kuno varovorani vamweni vakambosongana no zvineso zvakakura asi vakakwanisa kuzvitonga zve vovangisa mucadho hwavo. Kuitisa kudini?

3, 4. Ngozvapi zvingaitika nguva jimweni pa mucadho?

³ Mucadho unobatanija vandhu vaviri vakasiana. Umwe na umwe wavo kangaije ano zvirovejeso zvake, zvaanodakarira, mavonero pomwe no maitiro akasiana okuita zviro. Zvimwenizve zvingaitika kuti mwamuna kana mukaji vakavha mu ndau jakasiana no mavhumbo akasiana. Pikija zvakadaro, zvinotora mukuvo kuti varovorani vanase kuzivana umwe no umweni.

 ⁴ Pa kufamba ko nguva, mwamuna no mukaji vangabatikana maningi ngo mabasa avo zve votoguma pakuparajana. Zvingaguma pa kuvoneka inga kuti i vandhu vaviri vacikazivani vari kugara pa nyumba imweyo. Waro zvicinyi zvingavabesera kuti vave vakabatana?

5. (a) Zvicinyi zvingabesera varovorani kuti vave vakabatana? (b) Mukuzwirana no Vaheberi 13:4, tinodikana kuuvona kudini mucadho?

⁵ Jehovha anopa mazano anosisira maningi, angabesera varovorani kuti vave vakabatana zve vakhwedere phedo naye. (Nduyo 25:4; Isaia 48:17, 18) Iyena wakati: “Mucadho ngaureremejwe ngo vese.” (Vaheberi 13:4) Ciro cinoreremejwa i ciro cinosisira maningi. Zve imwimwi munonasa kucitaja haiwa kucireja-reja. Jehovha anoda kuti tive no mavonero akadaro ngo pamusoro po mucadho.

6. Mateu 19:4-6, inotivhunjenyi ngo mavonero a Jehovha ngo pamusoro po mucadho?

⁶ Jehovha ndiyena wakaita mucadho wokutanga. Ngokudaro Jesu wakati: “Amuzivi kujija kuti Marure, pakutungamira, wakavarura mwanarume no mwanakaji eciti: Ndibzo mwanarume anozosia baba na mai, wozobatana no mukaji wake, vovaviri vanozoita muviri umwe basi? Ngokudaro avaciripibze vaviri, kaveta muviri umwe. Mundhu acadoparaja bzakabatanijwa ndi Mwari.” (Mateu 19:4-6) Tsamba iyi inotatija kuti kuvhira pakutanga, Jehovha anoda kuti mucadho ugare mbhera narini. Iyena waida kuti mbhuri jive jakabatana zve jakadakara.

7. Zvicinyi zvingabesera varovorani kuti vavangise mucadho wavo?

⁷ Asi nyamasi uno, varovorani vari kusongana no matambujiko pomwe no kuhwajihwa ko murangariro kupinda kare. Nguva jimweni, matambujiko awo angava akakura, zvokuti vanorangarira kuti mucadho wavo auzovi ushoni, ngokudaro vanoramwija. Asi kuzwisisa kuti Jehovha anovonesa kudini mucadho zvingatibesera.—1 Johani 5:3.

8, 9. (a) Ndi rini patinodikana kuteverera ndhungamiriro ja Jehovha ngo pamusoro po mucadho? (b) Tingatatijisa kudini kuti mucadho wedu unosisira kwatiri?

⁸ Mukuvo wese ndhungamiriro ja Jehovha jingatibesera. Inga zvotavona, imwe yo ndhungamiriro yakona nga iyi: “Mucadho ngaureremejwe.” (Vaheberi 13:4; Mucumaeri 5:4) Kudari tikazwira ndhungamiriro ja Jehovha, pikija zvecinesa, tinozobesereka kamare.—1 VaTesalònika 1:3; Vaheberi 6:10.

⁹ Mucadho unosisira maningi kwatiri. Ngo iyo ndava, atidi kuita nee kubhuya zviro zvinokhuvaza mucadho wedu. Waro tingazviitisa kudini izvi?

10, 11. (a) Ngozvapi zvineso zvimweni zvingawanika pa mucadho jakasiyana-siyana? (b) Ngenyi manera atinovereketa no mwamuna wedu kana mukaji anosisira maningi?

¹⁰ Kuno njira jakawanda jingaita kuti mundhu akhugunye waakarovorana naye. Tinozviziva kuti Mukristu aadikani kutaka mwamunake kana mukaji wake. Asi nguva jimweni tingakhugunya umweni ngo magama. Magama angaezaniswa no cipanga. Mwanakaji umweni wakananga kudari: “Mwamunangu anondihwisa ngo magama. I gwinyiso kuti andina mbanga jinovoneka mu muviri wangu, asi magama ake anondiceka, iyena anonanga zviro zvakadari inga: ‘Iwewe unondinyangaja basi’ zve ‘iwewe ausisiri!’ Iyo i mbanga inonesa kuoma.” Umwe mwanarume wakananga kuti mukaji wake anomunyoeja ngo magama zve anomupa mazina akawanda. Iyena wakati: “Azvitoiti kunanga masoko anobhuiwa ngo mukaji wangu. Andicakwanisi kubhuisana naye, ngo iyo ndava zvinondiita kuti ndipeje mukuvo wakawanda ndiri kubasa. Ngokuita kudaro ndinotiza zvineso.” Kubhuya magama akashata zve anotuka zviri kuitika maningi mu njiku jino.

¹¹ Kudari mukaji no mwamuna vanobhuya ngo manera akashata kuno umweni, zvingakhugunya maningi zvoita kuti zvinese kuzvikanganwa. Ngozvokadi kuti andizvopi zvinoda Jehovha kuti mukaji kana mwamuna ataje mudoni wake ngo njira yakadaro. Asi zvingaitika kuti umweni angakhugunya mudoni wake acikazvidi. Munozvivona muri wakapfava mukuvo wese, asi mukaji wenyu kana mwamuna wenyu anovona kudini? Asi nguva jimweni mungabhuya zviro zvingakhugunya, kureva kuti makanasiririka kuti muite cinjo here?—VaGalàsia 5:15; verenganyi VaEfeso 4:31.

12. Mundhu wakacadha, ngozvapi zvingaphingaija ushamwari wake na Jehovha?

 ¹² Manera o munobhuya no mwamuna kana mukaji wenyu, anosisira maningi kuna Jehovha zve azvinenyi kuti munonga muri mwega kana pano vandhu. (Verenganyi 1 Pedru 3:7.) Jakobo 1:26 inoticeuja kuti: “Ndiani anoti anotenda Mwari, kaveta aabati rurimi hwake, anojicengeja kamare. Rutendo hwake hwabiresi.”

13. Ngoapi manera amweni okuti varovorani vangahwajisa umweni?

¹³ Vakarovorana vanodikana kungwarira kuti vacadohwajisa umweni ngo maitiro avo. Inga muezaniso, wo makarovorana naye waizojizwa kudini kudari mukatanga kupeja nguva zinji no mundhu umweni? Kangaije kungava  no thangwe rakanaka, inga kubata mwese mu basa ro kucumaera kana kumubesera kutonga zvineso zvakati-kuti. Kureva kuti mukaji wenyu kana mwamuna anohwajihwa here? Mwanakaji umweni wo Mukristu wakananga kudari: “Ndinosuruvara maningi pa ndinovona mwamunangu ecipeja nguva zinji no hambzaji imweni mu ungano. Zvinondiita kuti ndijizwe ndicikasisiri.”

14. (a) Ngozvapi zvatinojija pana Genesi 2:24? (b) Ngozvapi zvatinodikana kujivhunjisa pacedu?

¹⁴ Inga Makristu, tinodikana kubesera vabari vedu pomwe no hama no hambzaji jo mu ungano. Asi patinocadha, mukaji wedu kana mwamuna wedu anodikana kuva pandau yokutanga kupinda vamweni. Jehovha wakati: Mwamuna ‘anozobatana no mukaji wake.’ (Genesi 2:24) Mazwiro o mukaji kana mwamuna wedu anodikana kuva anosisira maningi kwatiri. Waro jivhunjisenyi kudari: ‘Ndinopeja nguva yakareba no mwamuna kana mukaji wangu, ndinotaja mazwiro ake kana kumuitira zvaanofanera here?’

15. Ngenyi tinodikana kubhasopa kuti titame kuva no ushamwari wakavanga maningi no mundhu acikaripi mukaji kana mwamuna wedu?

¹⁵ Kudari tikava no ushamwari wakavanga maningi no mundhu acikaripi mukaji kana mwamuna wedu, zvingabara zvineso pa mucadho wedu. Tingatanga kusirira mundhu wiya zve totanga kumuda. (Mateu 5:28) Mazwiro awo angatanga kukura zve otiita kuti tiite ciro cinozophwanya mucadho wedu.

16. Bhaibheri rinopa mupango wapi ngo pamusoro po mucadho?

¹⁶ Pa kupera kunanga kuti: “Mucadho ngaureremejwe ngo vese,” Bhaibheri rinonangazve kuti: ‘Mubhedhu wo  vakacadha ngauve ucikazivi kusvipiswa [BMAA], ngokuti vaya vanohura no kupombora vanozotongwa ndi Mwari.’ (Vaheberi 13:4) Mu Bhaibheri gama rokuti mubhedhu wo vakacadha” rinoda kureva ruvatano unoizwa ngo mwamuna no mukaji. (Mazwi Akangwara 5:18) Vakarovorana vangatatijisa kudini nderemejo pa shwiro iyi?

17. (a) Nyamasi uno vamweni vanovona kudini kutama kuva vakagondeka kuno mwamuna kana mukaji wavo? (b) MaKristu anodikana kuvona kudini upombo?

¹⁷ Nyamasi uno vamweni vanorangarira kuti apana cakashata ngo kutama kuva vakagondeka kuno mwamuna kana mukaji wavo. Atidikani kuregera kuti murangariro jakadaro jiticengeje. Jehovha anojekesa pacena kuti anonyenya uhure kana upombo. (Verenganyi VaRoma 12:9; Vaheberi 10:31; 12:29) Kudari tikaita vatano no mundhu acikaripi mwamuna kana mukaji wedu, tinonga tecisvipisa mucadho wedu. Taizovonesa kuti atireremeji ndhungamiriro ja Jehovha zve taizoruza ushamwari wedu naye. Ngo kudaro, tinodikana kunyenya zvese zvakashata zvingatitora kuti tiite uhure. Izvo zvinobatanija kuramba murangariro jicikasisiri jo kuita ruvatano no mundhu umweni.—Jobe 31:1.

18. (a) Ngenyi upombo unoezaniswa no kunamata zvimwari zvo kunyepa? (b) Jehovha anovona kudini upombo?

¹⁸ Mutemo wa Mosi wainanga kuti kuita upombo, kwainga cishaishi cakakura maningi, zvokuti kwaitoezaniswa no kunamata zvimwari zvokunyepa. Mundhu waiita zvishaishi izvi waiurawa. (VaLevi 20:2, 10) Mu njira yapi kuita upombo kunoezaniswa no kunamata zvimwari zvokunyepa? Kudari mu Iziraeri wainamata zvimwari zvokunyepa, waiphwanya cigondiso co kuva wakagondeka kuna Jehovha. Mu njira yakaezana, mu Iziraeri waiita upombo wainga acikazivi kugondeka kuno waakarovorana  naye. (Exodo 19:5, 6; Deuteronòmio 5:9; verenganyi Malakia 2:14.) Zvakajeka kuti kuna Jehovha kuita upombo kwainga cishaishi cikuru.

19. Ngowapi muezaniso ungatibesera kutama kuita upombo?

¹⁹ Tinoti kudini nyamasi uno? Pikija aticiripizve pasi po Mutemo wa Mosi, mavonero a Jehovha Mwari ngo pamusoro po upombo aazivi kucinja. Zvicivoneka kuti atinamati zvimwari zvokunyepa, narini atidi kuva vandhu vacizivi kugondeka kuno mwamuna kana mukaji wedu. (Nduyo 51:3, 6; VaKolosi 3:5) Tikatama kuva takagondeka, tinokhombija kutama ndheremejo kuno watakarovorana naye zve no kuna Jehovha.—Vonanyi Masoko o Kupejisira n.° 26.

20. Uzivi ungabesera kudini mucadho?

²⁰ Mungaitenyi kuti mucadho wenyu urambe wakavanga? Soko ra Mwari rinoti: “Ngo uzivi, inovakiwa nyumba, ngo hwiru nyumba inovangiswa.” (Mazwi Akangwara 24:3) Nyumba yakanasa kuvakwa, yakangwaririka zve inodakajisa kugaremo. Izvi zvakaezana no mucadho. Mundhu ano uzivi anoita kuti mucadho wake uve wakangwaririka zve unodakajisa.

21. Munodikana kuitenyi kuti uzivi wo Bhaibheri uvangise mucadho wenyu?

²¹ Bhaibheri rinoenderera mberi recibhuya ngo pamusoro po nyumba iyi. Irona rinoti: “Ngo kuziva, nyumba yese inozajwa ngo upfumi, ngo bziro bzese bzakanaka no bzino mutengo.” (Mazwi Akangwara 24:4) Zvomunojija mu Soko ra Mwari zvingabesera mucadho wenyu. (VaRoma 12:2; VaFilipi 1:9) Pamunoverenga Bhaibheri no mabhuku edu pamwepo, bhuyanyi kuti mungazvishandisa  kudini zvamajijaro. Psakanyi njira jamungakhombijirana rudo no nderemejo, kuzwirana no kutajana ngo kunaka mwoyo pa mucadho. Kumbiranyi besero ra Jehovha kuti mukhwijirije mugariro jinozovangisa mucadho wenyu zve mova munodisana maningi no mukaji kana mwamuna wenyu.—Mazwi Akangwara 15:16, 17; 1 Pedru 1:7.

22. Ngenyi tinodikana kutaja watakarovorana naye ngo rudo, nderemejo pomwe no rukujo?

²² Tinodikana kuita zvese zvatinokwanisa kuti titaje mwamuna kana mukaji wedu ngo rudo, nderemejo pomwe no rukujo. Ngo kuita kudaro, mucadho wenyu unozova wakavanga zve unodakajisa. Zve cinosisira maningi, tinodakajisa Jehovha.—Nduyo 147:11; VaRoma 12:10.