1, 2. Tinodikana kuitenyi kuti tirambe tecida Mwari?

TESE tinoda kuva takavanga pomwe no uhomi hwaushoni. Ngo kudaro, tinoha zvinovaka, tinodamura-damura no kungwarira muviri wedu. Izvi azvizivi kureruka, asi atirembi ngokuti zvinomuviyo wakanaka. Wari tiri kuda kuvona njira jimweni jatinodikana kuita kuti tive takavanga pomwe no uhomi hwaushoni.

² Taakuziva Jehovha zve aya i matangiro aushoni. Asi tinodikana kuramba tecivangisa ushamwari hwedu naye. Judha paakavhunja Makristu kuti arambe ari “mu rudo hwa Mwari,” iyena wakavavhunja njira yokuzviita ndiyona. Iyena wakati: “Cijikiranyi njiki yo rutendo hwenyu.” (Juda 20, 21) Asi tingavangisa kudini rutendo hwedu?

3-5. (a) Sathana anoda kuti murangarirenyi ngo pamusoro po kuzwira Jehovha? (b) Munovona kudini ngo mutemo no ndhungamiriro ja Jehovha?

³ Cinosisira maningi ngo cokuti munodikana kukhohwa kuti manera anoita Jehovha zviro ndiona akanaka. Sathana anoda kuti murangarire kuti zvinonesa maningi kuzwira Mwari zve munozodakara kudari mukajikhetera mega zvakanaka no zvakashata. Kutangira mu munda wo  Edheni, Sathana ari kueja kuti vandhu vadavire zvondhozvo. (Genesi 3:1-6) Na nyamasi aciri kuita zvondhozvo.

⁴ Mavonero a Sathana akanaka here? Kureva kuti tiri kuruza ciri cese ngo kuzwira Jehovha? Haiwa. Inga muezaniso, rangariranyi kuti muri kufamba mu parki yakaseja maningi. Ngo divi rimweni ro gwanja, movona ndau yakafungwa ngo fenzi yakavanga maningi no kureba. Kangaije maizorangarira kudari: Ngenyi apa pafungwa kudari ngo fenzi? Panguva yondhoyo, mozwa mbhondoro yecibhonga ngo divi rimweni ro fenzi. Wari maizorangarira kudini ngo fenzi? Pacina jiviriro yo fenzi iyi, maizorumwa ngo mbhondoro! Ndhungamiriro ja Jehovha jakadari inga fenzi zve Dhiyabho wakadari inga mbhondoro. Soko ra Mwari rinoti: “Jibatenyi no kungwara; ngokuti Sathana, mukorore wenyu inga mbhondoro inofamba-famba yecibhoonga, yecipsanga mundhu kuti imuhe.”—1 Pedru 5:8.

⁵ Jehovha anoda kuti tive no upenyu hwakanaka. Iyena aadi kuti ticengejwe ndi Sathana. Ngo zvinoitisa kuti Jehovha atipe mutemo no ndhungamiriro kuti jitijivirire pomwe no kutipa mudakaro. (VaEfeso 6:11) Jakobo wakatara kuti: “Ndiani anopurukisisa Mutemo wakaperera wo rusujunuko, wouteveja . . . ndiyena anomucena no bzaanoita.”—Jakobo 1:25.

6. Ngo zvapi zvinotikhohwesa kuti Jehovha anoda zvakanaka kwatiri?

⁶ Kudari tikazwira Jehovha, tinova no upenyu hwaushoni zve ushamwari hwedu naye hunovanga maningi. Inga muezaniso, tinobesereka kudari tikatendera mukoka wa Jehovha wokuti tiite mukumbiro kwaari. (Mateu 6:5-8; 1 VaTesalònika 5:17) Tinodakara kudari tikazwira ndhungamiriro jake jo kuenda kumusongano  pomwe no kuvangisana no vamweni. Zve tinodakarazve maningi kudari tikaita mbhera patinokwanisa mu basa rokucumaera no kujijisa. (Mateu 28:19, 20; VaGalàsia 6:2; Vaheberi 10:24, 25) Kurangarira ngo manera atinobesereka ngo zviro izvi, zvinovangisa maningi rutendo hwedu zve zvinotikhohwesa kuti Jehovha mukuvo wese anoda kuti zvatinoita zvibudirire.

7, 8. Ngo zvapi zvingatibesera kuti titame kuthya muejo jatingazosongana najo kumbejiyo?

⁷ Zvingaita nguva jimweni kuneseka ngo pamusoro po kumbeji, tecirangarira kuti tinozosongana no muejo jakakura maningi. Kudari njiku iri yese mukava no murangariro uwu, ceukijanyi zvinonangwa ngo soko ra Jehovha parinoti: “Ndini Tenji Mwari wako, wiya anokujijisa kuti uwane bzakanaka, wiya anokuseseja ngo gwanja ro unodika kutevera. Iwewe, nokwainga kuti wakapurutana  mupango yangu! Kunyarara kwako kwaizoita inga murambo, no ururami hwako inga mavimbi o bahari.”—Isaia 48:17, 18.

⁸ Kudari tikazwira Jehovha, rugarisiko hwedu hunozodari inga murambo ucikavomi. Urungami hwedu kana maitiro edu akanaka, anozodari inga mavimbi o mujombe anotaka acikazorori. Azvinenyi kuti ngo zvapi zvatingasongana nazvo mu upenyu, tingava takagondeka. Bhaibheri rinogondesa kuti: “Thurai muthwaro wako kuna Tenji Mwari, yena anozokukorondha; aazoregeri kuti mururami akhugunywe mbhera narini.”—Nduyo 55:23.

9, 10. Zvinoda kurevenyi kuva Mukristu wakaivha?

⁹ Kudari tikavangisa ushamwari hwedu na Jehovha, tingava Makristu akaivha. (Vaheberi 6:1) Zvinoda kurevenyi kuva Mukristu wakaivha?

¹⁰ Asipi makore akawanda anotiita kuti tive Makristu akaivha. Kuti tive vakaivha, tinodikana kuva no Ushamwari hwakanaka na Jehovha zve tovona zviro inga mavonero aanoita. (Johani 4:23) Pauro wakatara kudari: “Vaya vanoteveja muviri, vanoda bziro bzo muviri. Vaya vanoteveja mujimu, vanobatira mujimu.” (VaRoma 8:5) Mukristu wakaivha aabatikani maningi ngo zviro zvokunyama. Kunja ko kubatikana ngo zviro zvokunyama, iyena anobatikana ngo kushandira Jehovha zve anotema zvivaringo zvakanaka mu upenyu. (Mazwi Akangwara 27:11; verenganyi Jakobo 1:2, 3.) Mukristu wakaivha aatenderi kukwevejehwa kuti aite zvakashata. Iyena anoziva zvakanaka zve anosunga kuzviita.

11, 12. (a) Pauro wakanangenyi ngo pamusoro po kukwanisa kuziva “kukheta”? (b) Kuitisa kudini kuva Mukristu wakaivha kungaezaniswa no kuva mugogomi?

 ¹¹ Zvinoda kuvangisira kuti muve Mukristu wakaivha. Mupostori Pauro wakatara kudari: “Bzokuha bzakavanga bzinohiwa ngo madoda, akaroveja kuziva no kukheta bzauxoni nokuti bzakaxata.” (Vaheberi 5:14) Gama ro kuti “akaroveja” rinotiita kuti tirangarire ngo kujijira kunoita mugogomi.

¹² Kudari tikavona mugogomi pa muphikizano, tinoziva kuti zvaidikana mukuvo no kuvangisira maningi kuti akwanise kuita zvaari kuita. Iyena aazivi kubahwa ecigogoma. Mwana paanobahwa, anonga acikakwanisi kufamba kana kubata ciri cese. Asi padoko ngo padoko, anotanga kukhwava kana kuavhura no kudadamira zviro. Pakufamba ko nguva, akambhera ngo kujijira, angaguma pakuva mugogomi. Ngo njira yakafanana, zvinoda nguva no kujijira kuti tive Makristu akaivha.

13. Ngo zvapi zvinotibesera kuti tirangarire inga ndi Jehovha?

¹³ Mu bhuku iri, takavona kuti tingaitisa kudini kuti tirangarire inga ndi Jehovha no kuvona zviro inga mavonero aanoita. Takajijira kuda Jehovha no kureremeja mutemo pomwe no ndhungamiriro jake. Patinoda kuita ciri cese, tinodikana kujivhunjisa kudari: ‘Mutemo japi no ndhungamiriro jo Bhaibheri jinoshanda pa mugariro uwu? Ndingashandisisa kudini ndhungamiriro iji? Jehovha anoda kuti ndiitenyi?’—Verenganyi Mazwi Akangwara 3:5, 6; Jakobo 1:5.

14. Tinodikana kuitenyi kuti tive no gonda rakavanga?

¹⁴ Narini atizoregeri kuvangisa rutendo hwedu kuna Jehovha. Kudari inga kuha zviro zvinovaka kunovangisa muviri, kujijira ngo pamusoro pa Jehovha  kunotibesera kuti tive no gonda rakavanga. Potakatanga kujija Bhibheri, takajija zvokadi zvinganani ngo pamusoro pa Jehovha no manera aanoita zviro. Asi pakufamba ko nguva, tinodikana kuzozwisisa zviro zvakajika. Ndizvona zvaida kunanga Pauro paakatara kudari: “Bzokuha bzakavanga bzinohiwa ngo madoda.” Kudari tikashandisa zvatinojija, tinozowana uzivi. Bhaibheri rinoti: “Psakai uzivi.”—Mazwi Akangwara 4:5-7; 1 Pedru 2:2.

15. Ngenyi zvinosisira kuda Jehovha pomwe no hama jedu?

¹⁵ Mundhu angava akavanga pomwe no uhomi hwaushoni. Asi kuti arambe akadaro, anodikana kuenderera mberi eciziva kujingwarira. Ngo maitiro akaezana, mundhu wakaivha anoziva kuti anodikana kuvangisira kuti arambe ano ushamwari hwakavanga na Jehovha. Pauro wakati: “Jisotesesenyi uxoni, mujivone kuti muno kutenda. Jiejenyi mega.” (2 VaKorinto 13:5) Zvinosisira maningi kuva no rutendo hwakavanga, asi rutendo basi ahukwani. Rudo hwedu kuna Jehovha pomwe no hama jedu hunodikana kuramba weciengejeka. Pauro wakati: “Pikija ndive . . . no uzivi hwese . . . no kutenda kukuru kokukwanisa kutakura matundhu, ndikatama rudo, andiripi ciro.”—1 VaKorinto 13:1-3.

16. Sathana anoda kuti tirangarirenyi?

¹⁶ Sathana anoda kuti tirangarire kuti narini atizombokwanisi kuita zvakanaka kuti tidakajise Jehovha. Iyena anoda kutirembesa no kutiita kuti tirangarire kuti zvineso zvedu azviperi. Iyena aadi kuti tithembe hama jedu zve aadizve kuti tidakare. (VaEfeso 2:2) Sathana anoziva kuti murangariro jakashata  jinotikhuvaza zve jingakhuvazazve ushamwari hwedu na Mwari. Asi Jehovha wakatipa vetero, iyo inotibesa kuti titame kuva no murangariro wakashata.

17. Ngenyi vetero inosisira?

¹⁷ Pana 1 VaTesalònika 5:8, Bhaibheri rinoezanisa vetero no cigoko cinoshandiswa ngo musoca kuti ajivirire musoro wake pa hondo. Irona rinodanija cigoko ici kuti ‘vetero yo ruponeso.’ Kuva no vetero ku zviya zvinogondeswa ndi Jehovha kunojivirira murangariro wedu zve kunotibesera kuti tihwisane no murangariro wakashata.

18, 19. Vetero yakabeseresa kudini Jesu?

¹⁸ Vetero yaivangisa Jesu. Pa usiku hwokupejisira acito afa, iyena wakasongana no zvineso zvainga zvakatevererana. Wakatengeswa ngo shamwari yake. Shamwari imweni yakamuramba. Shamwari jake jimweni jakamutiza. Vandhu vo jinja rake kamare vakamuzonda zve voita kuti afe akakohomehwa. Zvicinyi zvakabesera Jesu kuti  ahwisane no zvese izvi? “Yena, eciziva rudakaro hwaizomuviira, wakadavira kufa pa [danda ro kutambujikira], acikanyoejeki. Wogara pa mukono muho wo dendemaro ra Mwari.”—Vaheberi 12:2.

¹⁹ Jesu waizviziva kuti kudari akava akagondeka, waizokuja Baba wake zve waizokhombija kuti Sathana i munyepi. Izvi zvakaita kuti Jesu adakare. Iyena waizviziva kuti waizovazve na Baba wake kudenga. Vetero iyi, yakabesera Jesu kuti acungirire. Kudari inga Jesu, itusu tinodikana kubatikana pa vetero yedu. Izvi zvinozotibesera kuti ticungirire, azvinenyi no zvinonga zveciitika.

20. Zvicinyi zvinozomubesera kuti muhwisane no murangariro jakashata?

²⁰ Jehovha anovona gonda pomwe no kucungirira kwenyu. (Isaia 30:18; verenganyi Malakia 3:10.) Yena anogondesa kuti “anozoita bzo unoda mwoyo wako.” (Nduyo 37:4) Ngo kudaro, batikananyi ngo vetero yenyu.  Sathana anoda kuti muruze vetero zve murangarire kuti zvigondiso zva Jehovha azvizokwanirisiki. Hwisananyi no murangariro jakashata! Kudari mukavona kuti vetero yenyu iri kupunguka, kumbiranyi besero ra Jehovha. Ceukijanyi masoko anonangwa pana VaFilipi 4:6, 7 okuti: “Mucathimwa-thimwa ngo ndava iriyese. Kaveta, ngo njio yese, mutatijenyi Mwari bzomunotama, mecipota no kukumbira pamwepo no kubonga. Rugarisiko hwa Mwari hunopinda uzivi hwese hunozorinda mwoyo yenyu no murangariro yenyu, mwa Kristu Jesu.”

21, 22. (a) Jehovha anogondesenyi kuitira kumbeji? (b) Masunga kuitenyi?

²¹ Mukuvo wese, psakanyi nguva kuti murangarijisise ngo pamusoro po kumbeji kunoshamaisa kunotigondesa Jehovha. Sambiri pano, vandhu vese vanonga vari pa Nyika vanozonamata Jehovha. (Apokalipsi 7:9, 14) Upenyu mu nyika imbza hunozova hunodakajisa maningi kupinda zvamunorangarira. Sathana, madhimoni ake pomwe no ushati hwese azvicazoviyo. Imwimwi amuzohwaji nee kufa. Vese vanozoshanda pamwepo kuti nyika ive paradhiso. Vese vanozova no zvokuha zvaushoni pomwe no pokugara pakanaka. Apana anozova mushati, vese vanozova vakapfava umwe kuno umweni. Panguva yondoyo, vandhu vese vanonga vari munyika vanozova no “rusujunuko no . . . goja ro vana va Mwari.”—VaRoma 8:21.

²² Jehovha anoda maningi kuva shamwari yenyu. Ngo kudaro, itanyi zvese zvamunokwanisa kuti mumuzwire pomwe no kuvangisa ushamwari wenyu naye. Tese patinoita izvi, tinozoenderera mberi tecida Mwari kwenda no kwenda!—Juda 21.