1-3. (a) Ngenyi mai vanoita zvese zvavanokwanisa kuti mwana wavo ave akacena? (b) Ngenyi Jehovha anoda kuti vandhu vake vave vakacena?

RANGARIRANYI mai vano rudo vari kunasirira mwana wavo kuti aende ku cikora. Ivona vanoda kuvona kuti iyena wasamba zve nguvo jake jakarongeka no kucena. Izvo zvinovonesa kuti ivona vanotaja uhomi hwo mwana wavo zve vanoda kuti agare ushoni.

² Baba wedu, Jehovha, vanoda kuti tive vakacena. (Nduyo 18:27) Iyena anoziva kuti kuva takacena zvinotibesera.  Kudari tikava vakacena, tinokuja iyena.—Ezekieli 36:22; verenganyi 1 Pedru 2:12.

³ Ngozvapi zvinobatanijwa pakuva vakacena? Zve ngenyi kuva vakacena zvinotibesera? Patinonga tecipopora muvhunjo iji, tinozovona cinjo jimweni jatinodikana kuita.

4, 5. (a) Ngorapi thangwe guru rinotiitisa kuti tive vakacena? (b) Zviro zvakasikwa zvinotijijisenyi ngo mavonero a Jehovha ngo pamusoro po ruceno?

⁴ Thangwe guru rinotiitisa kuti tive vakacena, ngo ro kuti Jehovha wakacena. (VaLevi 11:44, 45) Iyena muezaniso wedu ngokudaro tinoda kuva “vaejaeji va Mwari.”—VaEfeso 5:1.

⁵ Zviro zvakasikwa zvinotijijisa zvakawanda maningi ngo pamusoro po kuti Jehovha anovona kudini kucena. Jehovha wakasika nyika ngo njira yokuti mbhepo no kumwa zvigare zvakacena. (Jeremia 10:12) Rangariranyi ngo zviro zvinoitwa ngo nyika kuti icenese svina inodihwa ngo vandhu. Inga muezaniso, Jehovha wakasika zvitongoni, zviro zvokuti azvikwanisiki kuvoneka ngo majiso edu. Zvitongoni zvinokwanisa kucinja svina kuti iite ciro cicikakhuvazi upenyu. Izvo zvinoshamaisa kamare. Masientista anoshandisa zvitongoni kuitira kucenesa ndau jimweni.—VaRoma 1:20.

6, 7. Mutemo wakapuwa Mosi unotatijisa kudini kuti vaya vanonamata Jehovha vanodikana kuva vakacena?

⁶ Ciro cimweni cinokhombija kuti ruceno hunosisira maningi i Mutemo wakapa Jehovha kuno Vaiziraeri ecishandisa Mosi. Inga muezaniso, vandhu vaidikana kuva vakacena kuti Jehovha atendere manamatiro avo.  Mu njiku yo kuita mupiro kuti varegerehwe zvishaishi, mupiri mukuru waidikana kusamba muviri wese kaviri. (VaLevi 16:4, 23, 24) Zve vapiri vamweni vacito vaita mupiro, ivona vaidikana kusamba nyara no soka. (Exodo 30:17-21; 2 Kronike 4:6) Mu shwiro jimweni, vaya vainga vacikazwiri mutemo iji jo ruceno vaifa.—VaLevi 15:31; Bziverengo 19:17-20.

⁷ Tingativo kudini nyamasi uno? Tingajijira zvakawanda maningi ngo pamusoro pa Jehovha kuvha pa Mutemo jaakapa Vaiziraeri. (Malakia 3:6) Ijona jinojekesa kuti Jehovha anoda vandhu vakacena. Ndhungamiriro ja Jehovha ajizivi kucinja. Nyamasi, iyena anovetera kuti vashandiri vake vave vakacena.—Jakobo 1:27.

8. Kuna Jehovha zvinorevenyi kuva wakacena?

⁸ Kuna Jehovha, kuva wakacena zvinobatanija zvakawanda kupinda kuva vakacena mu muviri, nguvo no muzi. Zvinobatanija upenyu hwedu hwese. Manamatiro edu, mufambiro no murangariro wedu zvese zvinodikana kuva zvakacena. Wari ngativone fundo rimwe nga rimwe.

9, 10. Zvinoda kunangenyi kuva vakacena mu manamatiro?

⁹ Kunamata kwakacena. Atidikani kuva no ciri cese cinobatanijwa no manamatiro o kunyepa. Vaiziraeri pavainga varanda ku Bhabhironi, ivona vaitendenejwa ngo vandhu vainamata zvimwari zve vaiita zviro zvicikazivi kucena. Muporofita Isaya wakaporofita kuti Vaiziraeri vaizohwirirazve ku nyika yavo kuti vamusijire kunamata kwakacena. Jehovha wakavavhunja kuti: “Budanyi pano! Mucadopsasa bziro bzakangora bzisienyi, jicenesenyi.” Kunamata kwavaiita Jehovha akucaidikana  kuvhengana no majijisiro pomwe no zvirovejeso zvo ciara co kunyepa co Bhabhironia.—Isaia 52:11.

¹⁰ Nyamasi uno, itusu inga Makristu okadi, tinodikana kunyenya manamatiro okunyepa. (Verenganyi 1 VaKorinto 10:21.) Kutenderera nyika yese, kuno zvirovejeso no zvimutango-mutango zvakacijikira pa majijisiro o kunyepa. Inga muezaniso, mu ndharaundha jimweni vandhu vanotenda kuti pa sure po kufa kuno ciro cinobuda mukati mwedu zve coramba cecipona, zve zvirovejeso zvizinji zvakacijikira pa manyepo ondhowo. (Mucumaeri 9:5, 6, 10) Makristu anodikana kuramba zvirovejeso zvakadaro. Mbhuri jedu kangaije jingativangirija kuti tiite zvirovejeso zvakadaro. Asi tinoda kuzwira Jehovha zve tova vakacena pa meso ake.—Maitiro o Vapostori 5:29.

11. Tingatatijisa kudini kuti tiri vakacena mu mufambiro?

¹¹ Mufambiro wakacena. Kuti Jehovha ativone inga mundhu wakacena tinodikana kugara ndhambo no uhure. (Verenganyi VaEfeso 5:5.) Mu Bhaibheri Jehovha anotivhunja kuti: “Tizanyi upombo.” Iyena anonasa kujekesa kuti vese vaya vanoita upombo zve votama kukhauya “avazovi no utaka mu umambo hwa Mwari.”—1 VaKorinto 6:9, 10, 18; Vonanyi Masoko o Kupejisira n.° 22.

12, 13. Ngenyi murangariro jedu jinodikana kuva jakacena?

¹² Murangariro wakacena. Murangariro unotitora kuti tiite ciito. (Mateu 5:28; 15:18, 19) Kuva no murangariro jakacena zvinozotibesera kuva no mufambiro waushoni. Zvakajeka kuti atizivi kukwana, ngokudaro nguva jimweni tingava no murangariro wakashata. Kudari izvo zvikaitika, ngo kukasika tinodikana  kurangarira zviro zvimweni. Tikatama kuita kudaro, pakufamba ko nguva mwoyo wedu unozogara ndhambo no zviro zvakacena. Tingatanga kuda kuita zviro zvakashata zvatiri kurangariraro. Ngo kudaro tinodikana kuzaja murangariro wedu ngo zviro zvakacena. (Verenganyi VaFilipi 4:8.) Ngo ndava yazvo, tinonyenya mabungaijo ese anobatanija zvo uhure no ugevenga. Tinonasa kungwarira ushoni zvatinoverenga, zvatinovona no zvatinovereketa.—Nduyo 19:9, 10.

¹³ Kuti tirambe tecida Mwari, tinodikana kuva takacena mu manamatiro, mu mufambiro no mu murangariro. Asi zvinosisirazve maningi kuna Jehovha kuti muviri wedu, nguvo no pa muzi pedu zvivoneke zvakacena.

14. Ngenyi zvinosisira kuva takacena mu muviri?

¹⁴ Kudari tikangwarira muviri wedu kuti urambe wakacena pomwe no zviro zvakatitendeneja, zvinobesera itusu pamwepo no vamweni. Tinozojizwa ushoni zve vamweni vanozoda kuva nesu. Asi kuno thangwe rimweni rinosisira maningi rinotiita kuti tive takacena mu muviri. Potinova takacena, tinokuja Jehovha. Rangariranyi basi: Kudari mukavona cimwana cokuti mukuvo wese cinogara cakasvipa, munorangarira zvakashata ngo pamusoro po vabari vaco. Ngo manera akafanana, kudari tikatama kutaja ushoni muviri wedu, totama kuva vakacena, vandhu vanozorangarira zvakashata ngo pamusoro pa Jehovha. Pauro wakati: “Atipekeji ariwese ndava yo kuxaixa, kuti ubatiri hwedu hutame kunyoejwa. Kaveta tinovangirira kuita vanasi, inga vabatiri va Mwari.”—2 VaKorinto 6:3, 4.

15, 16. Zvicinyi zvatingaita kuti muviri wedu no nguvo zvirambe zvakacena?

 ¹⁵ Muviri no nguvo jedu. Tinodikana kujicenesa njiku jese. Inga muezaniso, tinozviziva kuti zvinosisira maningi kusamba njiku jese. Tinodikana kusamba nyara ngo sabau ticito taha no kubika, maningi-ningi pakupera kushandisa ratirina kana tavha kubata svina. Kusamba nyara kungavoneka inga kwakareruka, asi kunosisira maningi kuitira kuti titame kupairira ndhendha. Kungatoponesa upenyu. Asi kudari pamuzi pedu pacina ratirina, tinodikana kuita inga zvaiita Vaiziraeri mu nguva jo kare. Ivona vainga vacina ratirina, ngokudaro pavaida kutezuka, vaienda ndhambo no pamuzi zve no ndau yaibuda kumwa votezukireyo perepo vomacira.—Deuteronòmio 23:12, 13.

 ¹⁶ Azvirevi kuti nguvo jedu jinodikana kuva jinoshamaisa, jinodhura maningi kana javha kubuda wari. Asi jinodikana kuva jakarongeka no kucena. (Verenganyi 1 Timoti 2:9, 10.) Nguva jese tinoda kuti mugariro wedu ukuje Jehovha.—Tito 2:10.

17. Ngenyi tinoda kuti muzi wedu no zviro zvakatitendeja zvive zvakacena?

¹⁷ Muzi wedu no zviro zvakatitendeneja. Azvinenyi no kwatinogara muzi jedu jinodikana kuva jakacena. Tinodazve kuti karu yedu, muthu-thu-thu kana mota, pomwe no bhasikoro redu zvive zvakacena, maningi-ningi tecida kuenda kocumaera no ku musongano. Patinonga ticicumaera tinovhunja vandhu ngo pamusoro po paradhiso yakacena inozova pasi pano. (Luka 23:43, Shanduro yeNyika Itsva; Apokalipsi 11:18) Kudari tikataja ushoni muzi wedu no zviro zvakatitendeneja, tinokhombija kuti takanasirika kuti tizopone mu nyika Imbza.

18. Ngenyi tinoda kuti ndau yatinonamatira ive yakacena?

¹⁸ Mu ndau yatinonamatira. Tinotatija kuti ruceno hunosisira kwatiri kudari tikaramba tecicenesa ndau yatinoshandisa kuitira musongano no magungano. Vandhu pavanoviya pa kutanga pa Nyumba yo Umambo, ivona vanovona kuti yakacena zvakadini. Izvo zvinoviisa rukujo kuna Jehovha. Tese tina mukana wo kubesera kucenesa Nyumba yo Umambo no kuinasirira-nasirira.—2 Kronike 34:10.

19. Ngozvapi zvirovejeso zvimweni zvaticikadikani kuva nazvo?

¹⁹ Bhaibheri aritipekeji munda-nda-nda wo zviito zvese zvakashata zvatinodikana kusiya. Asi irona rinotipa ndhungamiriro jinotibesera kuvona kuti ngoapi mavonero  a Jehovha ngo pamusoro po shwiroyo. Inga muezaniso, kuna Jehovha azvizivi kunaka kumwisa mbhera kudhakwa, kubhema kana kushandisa mutombo jinodhakwisa. Kudari tiri shamwari ja Mwari atiiti izvi. Ngenyi? Ngokuti tinoreremeja upenyu. Kuva no zvirovejeso zvakadaro, zvingaita kuti tikase kufa, zvinokhuvaza uhomi pomwe no vandhu vakatitendeneja. Vandhu vazinji vanoeja kusiya zvirovejeso izvi ngo ndava yo uhomi. Asi itusu inga shamwari ja Jehovha, tino thangwe guru rinosisira maningi rinotiita kuti tisiye zvirovejeso zvakashata—rudo hwedu kuna Mwari. Umwe musikane wakati: “Ngo besero ra Jehovha, ndakacenesa upenyu hwagu zve ndakasiya zvirevejeso zvakashata . . . Ndinovona kuti azvicaizoreruka kwandiri kuita izvi ndega.” Wari ngativonenyi ndhungamiriro jimweni jo mu Bhaibheri jinobesera vandhu kuti vasiye zvirovejeso zvakashata.

20, 21. Jehovha anoda kuti tisiyenyi?

²⁰ “Itisu tino bzigondiso bzondhobzo. Ngokudaro, ngatisuke psina yese yo muviri no yo mujimu yedu, tecipeja basa ro unasi hwedu, tecithya Mwari.” (2 VaKorinto 7:1) Jehovha anoda kuti tisiye zvirovejeso zvese zvakashata kana zvakasvipa zvinokhuvaza muviri wedu no murangariro wedu.

²¹ Thangwe rotinaro kuti ‘tisuke psina yese yo muviri’ rinowanika pana 2 VaKorinto 6:17, 18. Jehovha anotivhunja kuti: “Mucabata bzakangora.” Perapo anotigondisa kuti: “Inini ndinozomuaxira, ndozoita baba wenyu. Imwimwi munozoita vana vangu vorume no vokaji.” Hina, Jehovha anozotida kudari inga baba vanoda mwana wavo, kudari tikasiya zvese zvinotisvipisa kana zvinotiita kuti titame kuva takacena pa meso ake.

22-25. Ngojapi ndhungamiriro jinowanika mu Bhaibheri jingatibesera kuramba mufambiro ucizivi kucena?

 ²² “Unozodisa Tenji Mwari wako, ngo mwoyo wako wese, ngo mwiha wako wese, ngo hwiru hwako hwese.” (Mateu 22:37) Uwu mutemo unosisira maningi kupinda yese. (Mateu 22:38) Jehovha anofanera rudo hwedu hwese. Tinganangisa kudini kuti tinoda Mwari zvokadi kuveni tiri kuita zvinotiuraisa no kukhuvaza murangariro wedu? Ngo kudaro, mukuvo wese tinodikana kutatija kuti tinoreremeja upenyu hwatakapuwa.

²³ “[Jehovha] ambhwine anopa vese uhomi, kufema no bziro bzese.” (Maitiro o Vapostori 17:24, 25) Kudari shamwari ikatipa cipo, kureva kuti tinocisveja kana kucirejareja here? Zvokadi atiiti kudaro. Ngo maitiro ondhowo, upenyu icipo cinoshamaisa cinovha kuna Jehovha. Ngo kudaro tinoreremeja maningi upenyu zve tinopona ngo maitiro anokuja Jehovha.—Nduyo 36:10.

²⁴ “Unozodisa mudoni wako no madisiro o unojiita iwewe.” (Mateu 22:39) Zvirovejeso zvakashata azvikhuvazi itusu basi. Asi zvinokhuvaza vandhu vamweni vakatitendeneja, maningi-ningi vaya vatinodaya maningi. Inga muezaniso, vaya vanogara no mundhu anobhema vangava no cineso condhoco co uhomi ngo ndava yo kukweva ciusi co foha. Asi kudari tikaregera zvirovejeso izvi, tinonga tecikhombija kuti tinoda vandhu vakatitendeneja.—1 Johani 4:20, 21.

²⁵ “Ceukijisai vatendi, kuti vapurukire vatongi no majimambo.” (Tito 3:1) Kunja ko zvaperari kunangwa, munyika jimweni kuno mutemo jinorambisa kuva no mutombo jinodhakwisa pomwe no kujishandisa. Itusu  tinozwira mutemo iji ngokuti Jehovha wakati tinodikana kureremeja utongi.—VaRoma 13:1.

26. (a) Tinodikana kuitenyi kuti tive shamwari ja Mwari? (b) Ngenyi tinodikana kuvangisira kuti tive vakacena?

²⁶ Asi kuti tive shamwari ja Jehovha, tinodikana kuita cinjo mu upenyu hwedu. Ngo kudaro tinodikana kuita cinjo ngo kukasika. Azvizivi kureruka kusiya zvirovejeso zvakashata, asi zvinokwanisika! Jehovha anogondesa kutibesera. Iyena wakati: “Ndini [Jehovha] Mwari wako, wiya anokujijisa kuti uwane bzakanaka, wiya anokuseseja ngo gwanja ro unodika kutevera.” (Isaia 48:17) Patinovangisira kuti tive vakacena, tinova no cokwadi cokuti tiri kukuja Mwari.