1-3. (a) Cokwadi capi cicikarambiki cinonangwa mu Bhaibheri? (b) Tingasanisa kudini shamwari jinozotikwevejera kuzvakanaka?

MUKUEZANISIRA, vandhu vakadari inga mufadha, ivona vakapeamira mukutorera magariro anovatendeneja. Zvakareruka maningi kwavari kutorera murangariro, mugariro pomwe no zviito zvo vaya vovanoshamwarijana navo, pikija vacikadi.

² Bhaibheri rinonanga ngo pamusoro po cokwadi cimweni cicikarambiki parinonanga kuti: “Ndiani anofamba no vazivi, anoita muzivi; ndiani anobatana no mapenji, anoita wakaxata.” (Mazwi Akangwara 13:20) Mazwi Akangwara aya anobhuya zvinodarika ushamwari hwo kuvonana kana kudavijana basi. Magama okuti “anofamba no” anoda kunanga ushamwari hwo kwenderera mberi. * Matahwa amweni anonangira zvo mu Bhaibheri, akasanangura ngo pamusoro po bvesi iyi eciti: “Kufamba no mundhu zvinobatanija kumuda no kubatana naye.” Amutendi here kuti itusu takapeamira mu kuda kutevejera vaya vatinoda? Hina, zvecivoneka kuti itusu tingabatanija murangariro jedu no jovayani vatinoda, ivona vangakwanisa kutiumba votikwevejera—kuzvakanaka kana kuzvakashata.

³ Kuti tirambe tiri mu rudo hwa Mwari, zvinosisira maningi kuti tipsake kushamwarijana no vaya vanotikwevejera  kuzvakanaka. Tingazviitisa kudini zvondhozvo? Ngo magama mashoma, tingaita izvo ngo kuda vaya vanodiwa ndi Mwari, ngo kuita shamwari jake jive shamwari jedu. Rangariranyi izvi. Ndiani wataizokheta inga shamwari jedu kuciripi vayani vana mugariro jinopsaka Jehovha kuna shamwari jake? Ngo kudaro, ngatende tivone kuti mushovonyi wo vandhu vanodiwa ndi Mwari. No mavonero a Jehovha akanasa kujeka mu murangariro medu, itusu tinozova takanasirika kuti tikwanise kusana shamwari jinozotikwevejera kuzvakanaka.

4. Ngenyi Jehovha ana citendehwa co kukheta shamwari jake, zve ngenyi Jehovha wakadanija Abhirahama kuti “xamwari yangu”?

⁴ Jehovha anosana shamwari. Iyena anotendehwa. Cokutanga iyena ndi Mukuru-kuru wo mudenga no pasi, ngo kudaro kuva no ushamwari na iyena i rukujo hukuru maningi. Waro ndiani, vaanokheta kuti vave shamwari jake? Jehovha anokhwedera phedo kuna vayani vanomuthemba zve vanokhombija gonda rakakwana kamare kwaari. Inga muezaniso, ngativone Abhirahama, mwanarume waizivika ngo kuva no gonda rakakura. Apanazve muejo ungapinda uu wo kuti baba vokumbihwa kuuraya mwana wavo kuti vamupire. * Asi Abhirahama ‘wakapira mwana wake’ ana gonda rakakwana rokuti “Mwari wainga no simba ro kumusa mwana wake, sure ko kufa.” (Vaheberi 11:17-19) Ngo kukhombija kwake gonda rakadaro no kuzwira, Jehovha ngo rudo hwese wakamudanija “xamwari yangu.”—Isaia 41:8; Jakobo 2:21-23.

5. Jehovha anovonesa kudini vaya vanomuzwira vakatendeseka?

⁵ Jehovha anopa maningi mutengo kuzwira ko kutendeseka. Iyena anoda vaya vanokhombija ngo kuda kwavo kutendeseka  kwaari kupinda zvese. (Verenganyi 2 Samueli 22:26.) Tikasota pa Cipauko co 1 co bhuku iri, tinovona kuti Jehovha anodakajihwa maningi ngo vaya vanokheta kumuzwira ngo ndava yo rudo hwovanahwo kwaari. Mazwi Akangwara 3:32 inoti: “[Jehovha] anoda ngo mwoyo wese varurami.” Vaya vanozwira Jehovha ngo kutendeseka kwese, vanoashira mukoka wo kunaka mwoyo kwa Jehovha, wo kuti: Ivona vangava varendo mu “tende” yake—kuashihwa ushoni pa kumunamata zve kutendehwa kuva vakasujunuka pa kuguma kwaari ngo mukumbiro.—Nduyo 15:1-5.

6. Tingakhombijisa kudini kuti tinoda Jesu zve Jehovha anozwa kudini ngo pamusoro po vaya vanoda Mwana wake?

⁶ Jehovha anoda vaya vana rudo na Jesu, Mwana wake umwe ega. Jesu wakananga kuti: “Kudari mundhu akandida anozongwarira mazwi angu, baba wangu vanozomuda, itisu tinozoviya kwaari, toita muzi kwaari.” (Johani 14:23) Tingakhombijisa kudini rudo hwedu kuna Jesu? Hina, ngo kuzwira mupango yake, inobatanija basa ro kucumaera masoko akanaka no kuita vajiji. (Mateu 28:19, 20; Johani 14:15, 21) Tinokhombijazve rudo hwedu kuna Jesu ‘patinoteveja gwanja rake,’ ngokumutevejera ngo magama pomwe no zviito mbhera patinokwanisa inga vandhu vacikazivi kukwana. (1 Pedru 2:21) Mwoyo wa Jehovha unodakajihwa ngo simba rinoitwa ngo vaya vanoda Mwana wake kuti vatevere mufambiro wo ciKristu.

7. Ngenyi ngo zvo ungwaru kuita shamwari ja Jehovha kuva shamwari jedu?

⁷ Gonda, kutendeseka, kuzwira pomwe no rudo kuna Jesu no mupango jake ndi zviro zviri pakati po mugariro jaanoda Jehovha kuna shamwari Jake. Umwe nga umwe wedu waizoita zvakanaka kuzvibvunjisa kudari: Mugariro iji jinowanika kuna vaya vari shamwari jangu jo phedo here? Ndiri kuita shamwari ja Jehovha kuva shamwari jangu here? Kuita kudaro zvaizova zvo ungwaru. Vandhu vanosakurira mugariro jo umwari zve vanocumaera masoko akanaka o Umambo, no kuvangisira kwese, vanokwevejera kuzvakanaka  zve kurarama mukuzwirana no cisungo cedu co kudakajisa Mwari.—Vonanyi bhokiso rino musoro unoti: “ Ndiani Shamwari Yakanaka?” pa pheji 29.

8. Zvicinyi zvinomushamaisa maningi ngo pamusoro po ushamwari hwa (a) Naomi na Rute? (b) majaha matatu o ciHebheru? (c) Pauro na Timoti?

⁸ Matahwa ana muezaniso jakawanda jo vaya vakabesereka ngo kukheta shamwari jakanaka. Mungaverenga ngo pamusoro po ushamwari hwa Naomi no nyamwana yake Rute, ushamwari hwo majaha matatu o ciHebheru akabatana pamwepo mu Bhabhironi, pomwe no wa Pauro na Timoti. (Rute 1:16; Danieli 3:17, 18; 1 VaKorinto 4:17; VaFilipi 2:20-22) Asi, ngatisotesese umwe muezaniso wakanakisisa maningi: ushamwari hwa Dhavhidhi na Jonatani.

9, 10. Ngo papi paicijikira ushamwari hwa Dhavhidhi na Jonatani?

⁹ Bhaibheri rinonanga kuti Dhavhidhi naapeja kuuraya Goria, “[‘Mwiha’, Shanduro yeNyika Itsva] wa Jonatani wakadisisa Dhavhidhi, wakamuda inga kujida kwake.” (1 Samueli 18:1) Ngo kudaro, ivona vakatangisa ushamwari hwakavanga maningi hwo kuti pikija no musiano wo mupira wakatikurire, ushamwari uhu hwakaramba huripo mbera kufa kwa Jonatani pa hondo. * (2 Samueli 1:26) Cicinyi caivangisa ushamwari hwo vaviri ava?

¹⁰ Ushamwari hwa Jonatani na Dhavhidhi, hwaibatanijwa ngo rudo hwavo kuna Jehovha no cido cavo co kuramba vakagondeka kwaari. Vanarume vaviri ava vaikovana cidisiso cavo co kudakajisa Mwari. Umwe nga umwe waikhombija mugariro jaidiwa ngo umweni. Pacina kukakanija, Jonatani waishamaisika ngo kucunga no kuvangisira ko mujaha  uu wakabvikira zina ra Jehovha. Zvokadi kamare, Dhavhidhi waireremeja musharuka uwo waibesera nasiriro ja Jehovha no kutendeseka zve uwo waidira pakutanga zvido zva Dhavhidhi mukutama umbau. Inga muezaniso, ngatende tivone zvicinyi zvakaitika apo Dhavhidhi wainga ari pa zvineso mu upenyu hwake ecirarama mu zvipare inga mutizi ecitiza Mambo waishata Sauri, baba wa Jonatani. Mu cimwe  cikhombijiro cokutendeseka kwakakura, Jonatani: “Wakavia kosongana na Dhavhidhi . . . , womuvangisa, ngo zina ra Mwari.” (1 Samueli 23:16) Rangariranyi mazwire akava na Dhavhidhi apo shamwari inodiwa yakavia komupa besero no vangiso! *[6]

11. Zvicinyi zvamunojija ngo muezaniso wo ushamwari hwa Jonatani na Dhavhidhi?

¹¹ Zvicinyi zvatinojija ngo muezaniso wa Jonatani na Dhavhidhi? Pamusoro po zvese, tavona kuti ciro cinosisira maningi  pa ushamwari ngo cokuti mwese munodikana kuda Mwari. Patinoita ushamwari no vaya vanotenda zvatinotenda, vana mufambiro wakadari inga wedu, zve vana cidisiso cakadari inga cedu cokuramba takatendeseka kuna Mwari, tinokwanisa kukovana naivona murangariro, mazwiro no zviitiko zvinotivangisa no kutivaka. (Verenganyi VaRoma 1:11, 12.) Shamwari ijowaro jinodisisa zviro zvokumujimu tingajiwana pakati po vanamati doni. Asi, izvi zvinoreva kuti mundhu wese watinosonganirana nae ku Nyumba yo Umambo i shamwari yakanaka here? Haiwa, azvingadaro nguva jese.

12, 13. (a) Ngenyi tinodikana kusana shamwari jedu pikija pakati po maKristu doni? (b) Cineso capi cakasongana no ungano jo muzana ro kutanga ro makore, cakaitisa kuti Pauro ape ngwajo yakavanga?

¹² Pikija mu ungano, tinodikana kusana ushoni shamwari jedu kudari tecida kuti jizotivake kumujimu. Izvi zvingatishamaisa here? Haiwa. Kudari inga mucero jimweni pa miti jingatora nguva yakareba kuti jiibve, maKristu amweni mu ungano angatora mukuvo wakareba kuti agume pa kuibva kumujimu. Ngo kudaro, pa ungano iri yese tinowana maKristu ana makurire o kumujimu akasiana-siana. (Vaheberi 5:12–6:3) I zvokadi kuti, itusu tinokhombija kusengerera no rudo kuna vapsa no vakarembejeka, ngokuti tinoda kuvabesera kuti vakure kumujimu.—VaRoma 14:1; 15:1.

¹³ Nguva jimweni, mu ungano mungawanika mugariro jingaitisa kuti tive tinongwarira pakupsaka ushamwari. Vandhu vamweni vangava vanobatikana mu mufambiro ucikazivi kunaka. Vamweni vangakurisa mujimu wo kuviga bundu kana wo kun’gun’guta. Ungano jo muzana ro kutanga ro makore  N.V.Y. (Nguva ya Vese Yaguma) jakasongana no cineso cakadaro. Vazinji vainga vakagondeka kuveni, vamweni vainga no mufambiro ucizivi kunaka. Zvecivoneka kuti vamweni mu ungano yo Korinto avacaibatisisa jijiso jimweni jo ciKristu, mupostori Pauro wakangwaja ungano  yondhoyo eciti: “Mucadocengejwa: vadoni vakaxata vanovoja maitiro akanaka.” (1 VaKorinto 15:12, 33) Pauro wakangwaja Timoti kuti pikija pakati po maKristu doni, pangawanika vamweni vaizoita zviro mu maitiro acikazivi kurungama. Timoti wakabvunjwa kuti arambe akaparajana no vandhu avo, acikavaiti shamwari jake.—Verenganyi 2 Timoti 2:20-22.

14. Tingashandisisa kudini ciambi cinowanika pa ngwajo ya Pauro ngo pamusoro po ushamwari?

¹⁴ Tingashandisisa kudini ciambi cinowanika pa ngwajo ya Pauro? Ngo kutama kushamwarijana no ari wese—ari mukati kana kuti kunja ko ungano—angatikwevejera ku mufambiro wakavora. (2 VaTesalònika 3:6, 7, 14) Tinodikana kubvikira umujimu hwedu. Rangariranyi kuti, mukufanana no mufadha, tinotorera murangariro no mufambiro wo shamwari jedu. Zvecivoneka kuti azvingaitiki kubija mufadha mu kumwa yakasvipa wobuda no kumwa yakacena, azviitikivo kushamwarijana no vaya vanotikwevejera kuzvakashata totorera zvakanaka.—1 VaKorinto 5:6.

15. Mungaitenyi kuti muwane shamwari jino murangariro wo kumujimu mu ungano?

¹⁵ Zvinodakajisa kuziva kuti mukana wo kuwana shamwari jakanaka pakati po vanamati doni, ngo wakakura kamare. (Nduyo 133:1) Mungawanisa kudini shamwari jino murangariro wo kumujimu mu ungano? Atikani-kani kuti pamunonga mecisakurira mugariro no makwanja o umwari, vamweni vana murangariro wakadaro, vanozoda kushamwarijana nemwi. Pa nguva imweyo, imwimwi mungadikana kuita mudanyu jinoshanda kuitira kutangisa kuita shamwari imbza. (Vonanyi bhokiso rinoti “ Mawanire Otakaita Shamwari Jakanaka,” pa pheji 30.) Psakanyi vayani vana mugariro jamunoda kutevejera. Batisisanyi mbhangiro yo Bhaibheri yokuti “zauranyivo mwoyo yenyu,” mecipsaka ushamwari no vatendi doni mucikasoti mukhaindi, kuvanobva kana mugariro wavo. (2 VaKorinto 6:13; Verenganyi 1 Pedru 2:17.) Mucaita ushamwari basi no vo mupira wenyu.  Ceujanyi kuti Jonatani wainga mukuru maningi kupinda Dhavhidhi. Madhodha mazinji angamupa ungwaru pomwe no zvaanoziva.

16, 17. Kudari munamati doni akatikhugunya ngo maitiro ari ese, ngenyi atidikani kusia ungano?

¹⁶ Zvecivoneka kuti vandhu vari mu ungano vanosiana undhu no kovakarebera, nguva ngo nguva pangabuda zvineso. Mutendi doni angananga kana kuita ciri cese cinotikhugunya. (Mazwi Akangwara 12:18) Nguva jimweni zvineso zvinoviiswa ngo ndava yo kusiana ko undhu, kutama kuzwirana kana kusiana ko mavonero. Kureva kuti zvineso zvondhozvo zvinozotikhugunya kugumira pa kutiita kuti tisie ungano here? Kudari tina rudo hwokadi-kadi na Jehovha pomwe no vaya vanodiwa ndiena, atizodaro.

 ¹⁷ Inga Musiki wedu zve Mukorondhi-wo-Upenyu, Jehovha anofanera kudiwa no kunamata kwedu kwakaperera. (Apokalipsi 4:11) Zve, ungano yaanodakarira kushandisa inofanera kubesehwa ndisu ngo kutendeseka kwese. (Vaheberi 13:17) Ngo kudaro, kudari munamati doni wedu akatikhugunya kana kutinyangajisa ngo maitiro ari ese, itusu atidosiyi ungano mukuda kuvonesa kunyangajwa kwedu. Ngenyi? Ngo kuti Jehovha andiepi wakatikhugunya. Rudo hwedu kwaari ahucaizotitendera kuti tirambe iyena no vandhu vake!—Verenganyi Nduyo 119:165.

18. (a) Tingaitenyi kuti tikhwijirije runyararo mu ungano? (b) Ngoapi makomborero anovepo tikaregerera, kudari pana thangwe rakanaka ro kuzviita?

¹⁸ Kuva no rudo kuna vanamati doni vedu, kunotindunda kuti tikhwijirije runyararo mu ungano. Jehovha aaveteri kuti vaya vaanoda vave vakakwana, pikija itusuvo atidikani kuvetera kudaro. Rudo hunotiita kuti tikanganwe zvishaishi zvidoko, teciceukija kuti tese atizivi kukwana zve tinoshaisha. (Mazwi Akangwara 17:9; 1 Pedru 4:8) Rudo hunotibesera kuti tirambe ‘teciregererana’ umwe kuna umweni. (VaKolosi 3:13) Azvizivi kureruka nguva jese kushandisa mbhangiro iyi. Kudari tikatendera kuti kunyangajwa kutinyise, tingazopeamira mukuda kuviga bundu, kangaije tecitorangarira kuti ngo kuva takanyangajwa tinotova tecipanica watinyangajisaya. Zvokadi kamare, kuviga bundu zvinokhuvaza itusu pacedu. Tikaregerera, kudari pana thangwe rakanaka rokuzviita, tinozova no makomborero. (Luka 17:3, 4) Zvinotipa runyararo mu murangariro no mu mwoyo, zve zvinoviisa runyararo mu ungano, pamusoro po zvese, zvinongwarira ushamwari hwedu na Jehovha.—Mateu 6:14, 15; VaRoma 14:19.

19. Mugariro japi jingaitisa kuti tiime kushamwarijana no ari wese?

¹⁹ Panguva jimweni, tinokumbihwa kuti tigure ushamwari no vaya vainga vari umwe wo ungano. Izvi zvinoitika kudari  umwe mundhu akaphwanya mutemo wa Mwari otama kukhauya wojingwa, kana kuti umwe akaramba gonda ngo kujijisa zvokunyepa kana akajijinga ega mu ungano. Soko ra Mwari rinotibvunja kuti tinodikana ‘kureerana’ [kana kutama kushamwarijana] no vandhu avo waro. * (Verenganyi 1 VaKorinto 5:11-13; 2 Johani 9-11) Zvingava zvinonesa kusia mundhu wo kuti kangaije wainga shamwari yedu kana kuti wainga ukama hwedu. Kunanga kuti, tinozoramba takavanga pakudira pakutanga kutendeseka kwedu kuna Jehovha no mutemo jake jakarungama here? Ceukijanyi kuti Jehovha anoreremeja maningi kutendeseka no kuzwira.

20, 21. (a) Ngenyi kujinga i nasiriro yo rudo? (b) Ngenyi zvinosisira maningi kuti tisane shamwari jedu ngo ungwaru?

²⁰ Zvokadi, nasiriro yokujinga, i nasiriro yo rudo ya Jehovha. Kuitisa kudini? Kubudisa mushaishi acikakhauyi zvinokhombija rudo kuna zina rakacena ra Jehovha no zvese zvarinoimirira. (1 Pedru 1:15, 16) Kujinga kunosia ungano yakabvikirika. Vaya vakagondeka mu ungano vanobvikihwa ku kukwevehwa kuzvakashata ngo vanoshaisha ngo cakwenye kana ngo cabomo, zve vangaenderera mberi vecinamata veciziva kuti, mu nyika ino yakashata, ungano i citiziro cinothembeka. (1 VaKorinto 5:7; Vaheberi 12:15, 16) Kupangihwa kwakavanga, kunokhombija rudo kuna mushaishi. Cingava ciro cinodikana ku mushaishi kuitira azive kuti anodikana kucinja murangariro zve woita mudanyu jinodikana kuti ahwirire kuna Jehovha.—Vaheberi 12:11.

²¹ Atikwanisi kutiza cokwadi cokuti shamwari jedu jo phedo, mu maitiro akavanga, jingakwanisa kutikwevejera no kutiumba. Ngo kudaro zvinosisira maningi kuti tisane shamwari jedu ngo ungwaru. Ngo kuita shamwari ja Jehovha shamwari jedu, toda vaya vanodiwa ndi Mwari, tinozova takatendenejwa ngo shamwari jakanaka maningi. Zvatinotorera kojiri zvinotibesera kuti tirambe tina cisungo cedu co kudakajisa Jehovha.