MASOKO O KUENGEJERA
Nyisanyi Cirovejeso co Kuita Cinyamundundu
Cinyamundundu cirovejeso cicikadakajisi Mwari, cinoita kuti mundhu ave no murangariro wo kundoda kuzvidakajisa basi zve cinovoja murangariro. * Mundhu anoita cinyamundundu kangaije angavonavo mundhu inga citengerebwe cokuvata naco basi—kuitira kugutisa zvido zvake zvo vatano. Anozoguma pa kuvona vatano mu njira iciripi yo rudo asi mu njira yo kudakajisa cido cake pa nguva shomani no kumusujunura pa zvaaidaro. Asi kusujunuka uku ngo ko nguva shomani. Zvokadi, kusiapo kuuraya mativi o muviri ‘ngo pamusoro po uhure, zviro zvicikazivi kucena, cido cokuvatana no mundhu,’ cinyamundundu cinoitisa kuti mundhu ade kuvatana no umweni.—VaKolosi 3:5, Shanduro yeNyika Itsva.
Mupostori Pauro wakatara kudari: “Hama jokudikana, ngokudaro, ngatisuke psina yese yo muviri no yo mujimu yedu, tecipeja basa ro unasi hwedu, tecithya Mwari.” (2 VaKorinto 7:1) Kudari kwamuri i cineso kuzwira masoko aya, mucaruza vetero. Jehovha nguva yese ‘anokungurira’ zve anobesera. (Nduyo 86:5; Luka 11:9-13) Zvokadi kamare, mwoyo wakakhuvazika no kuvangisira kwamunoita kuti muhwise cirovejeso ici—pikija zvingava zvinonesa—munonga muri kutatija mugariro waushoni. Ceujanyi kuti “Mwari mukuru kupinda mwoyo yedu; yena anoziva zvese.” (1 Johani 3:20) Mwari anovona zvizinji kupinda zvishaishi zvedu, anovona zvakanaka zvinoitwa ngo mundhu. Kuziva uku kunomukwanirisa kuti azwe no unyasha kudeketera kwedu kuti atizwire unyasha. Ngo kudaro, narini mucaremba kukumbira Mwari ngo kuzvidodokesa no kuvangisira kwese, inga mwana anoenda kuna baba wake paanowanana no cineso. Jehovha acazomukomborera ngo kumupa hana yakacena. (Nduyo 51:3-14, 19; Isaia 1:18) Zvokadi kuti, imwimwi munodikana kuita mudanyu jinoshanda mu kuzwirana no mukumbiro jenyu. Inga muezaniso, munodikana kuita simba kuitira kutiza njira iri yese yo zvoumitu-mitu no ushamwari hwakashata. *
Kudari cineso cenyu co kuita cinyamundundu cikaramba ciripo, tapota bhuyanyi ngo pamusoro po shwiro iyi no mubari wo ciKristu kana muKristu wakaivha kumujimu kana shamwari inomutaja kamare. *—Mazwi Akangwara 1:8, 9; 1 VaTesalònika 5:14; Tito 2:3-5.
^ ndim. 1 Cinyamundundu kupuruzira kana kubata-bata ndhengo jo vatano kweciita inga kuti mundhu ari kuita zvovatano.
^ ndim. 2 Inga mudanyu umwe kuitira kungwarira pakushandisa komputadhori, mbhuri zinji jinoidira pa ndau inofamba-famba vandhu. Mukuengejera, mbhuri jimweni jinotenga komputadhori no zvirongwa zvinosefa masoko akashata. Asi, apana no cirongwa cimwe haco cingapiningijira kamare mundhu kuvona zvakashata. Ceujanyi kuti, mundhu anganghwina mu Interneti ngo kushandisa foni no zvimucini zvimweni zvo mu nyara.
^ ndim. 1 Kuitira kuwana masoko anoshanda o kuti mungahwisa kudini cinyamundundu, vonanyi musoro unoti “Vechiduku Vanobvunza Kuti . . . Ndingakurira Sei Tsika Iyi?” uri mu Mukai! ya Cikowe 2006, zve pa mapheji 178-182 mu bhuku rinozwi Mibvunzo Inobvunza Vechiduku—Mhinduro Dzinoshanda, Bhuku 1.
