Kureremeja Bandera. Zvapupu zva Jehovha zvinotenda kuti kukotamira bandera kana kurireremeja, kazinji panoimbwa ino nasionari, i ciito co kunamata cinotatija kuti rinotiponesa, kuciripi kunamata Mwari, asi kureremeja Citado kana mutungamiriri waco. (Isaia 43:11; 1 VaKorinto 10:14; 1 Johani 5:21) Umwe wo mutungamiriri wo Citado wainga Mambo Nabhukadhinezari wo ku Bhabhironi ro kare. Kuti akahamarise vandhu ngo ukuru hwake no kuvangisira kwake mu kunamata, mambo uu wainga no simba wakaita cithombi no kuvangirija vatongwi vake kuti vacigwadamire pakandorira ndumbo, yakadari inga ino nasionari. Asi, vaHebheru vatatu—Shadhereki, Misheki na Abhedhenego—vakaramba kugwadamira cithombi, pikija vaizotongehwa rufu.—Danieli, cipauko 3.

Mu makore ano, mutari wo ndhorondho anozwi Carlton Hayes wakati: “Kubesera nyika i citatijo cikuru co gonda zve ngo pakacijikira kunamatwa ko bandera. Vanarume vanobvisa shapewa panopinda bandera; zve kuitira kukuja bandera, vaimbi vanotara ndumbo kuitira vana vaimbe ino nasionari.” Wakaengejera kuti kureremeja nyika kuna njiku jako “jakaceneswa” jakadari inga njiku yo Cirongomuna ya Khunguru ku Estadhos Unidhos, inga njiku jo “vakaceneswa no vakafira nyika” zve “matembere” akona, kana mbuto jinoera. Mu mutango-mutango jo vese mu Bharaziri, mutungamiriri  umwe wo masoca wakatenda kuti: “Bandera rinokotamihwa no kunamatwa . . . inga zvinoitwa Nyika ya Baba.” Pa vhaza imweni, The Encyclopedia Americana rakati: “Bandera, inga mucinjiko, zvakacena.”

Bhuku ravha kunangwari rakananga kuti ino nasionari, “i manangiro o vagari vo mu nyika zve kazinji anobatanija bvikiriro yo umwari no ndhungamiriro ku mbungano no vatongi vayo.” Vashandiri va Jehovha avacengejeki, asi vanovona mutango-mutango jinobatanija kureremeja bandera no ino nasionari inga zviito zvo kunamata. Ricidavira ngo kuramba ko vana vo Zvapupu zva Jehovha kukuja bandera kana kuita mbhiko yo kugondeka ku Cikora co ku Estadhos Unidhos, bhuku rinozwi The American Character rakati: “Pa shwiro zinji jatongwa mu Dare Guru, pa kupejisira jazovonesa kuti mutango-mutango iji jinoitwa njiku ngo njiku ngo jo ciara.

Pikija avanghwiniri mu mutango-mutango jo vanovona kuti ajivhi mu matahwa, vandhu va Jehovha vanoreremeja kutendehwa ko vamweni kuti vazviite. Ivona vanoreremejazve mabandera inga zvitatijo zve vanoziva ‘majimambo anotonga’ inga “mushandiri wa Mwari.” (VaRoma 13:1-4, Baiberi Mazwi Akacena aMwari) Ngokudaro, Zvapupu zva Jehovha zvinozwira ngwajo yo kukumbira “ngo ndava yo majimambo no vamweni vese vakadihwa pa utongi.” Asi, tinoita izvi “kuti tikwanise kurarama no kunyarara uxoni, ngo [kuzvipira kuna Mwari] no nderemejo yese.”—1 Timoti 2:2.

Kuvhota mu rusanano hwo zvomatongehwo o nyika. MaKristu o cokwadi anoreremeja kutendehwa ko vamweni ko koovhota. Ivona avarambisi koovhota, vanozwira vatongi vakagajwa. Asi, vanoramba vacikanghwiniri mu zvomatongehwo o nyika yo majinja. (Mateu 22:21; 1 Pedru 3:16) Angaitenyi muKristu ari mu nyika jinovangijihwa koovhota kana anosvuzvunyuhwa ngo kutama kovhota? Rangariranyi kuti Shadhereki, Misheki na Abhedhenego vakaenda kubani ro Dhura, muKristu ari pa mugariro jakadari, kangaije angasunga kuenda kunovhotehwaro kudari hana yake ikamutendera. Asi, anodikana kungwarira kuti acadophwanya kutama kwake  kwaakapeyamira mu zvomatongehwo o nyika. Iyena anodikana kurangarira zviambi zvitandhatu izvi:

1. Vateveri va Jesu avaiti divi ro “nyika.”—Johani 15:19.

2. MaKristu anoimirira Kristu no Umambo hwake.—Johani 18:36; 2 VaKorinto 5:20.

3. Ungano yo ciKristu yakabatana mu kutenda, zve ndhengo jayo jakabatanijwa ngo rudo hwakadari ngo hwa Kristu.—1 VaKorinto 1:10; VaKolosi 3:14.

4. Vaya vanovhota mundhu kuti ave pa cigaro, vanomubesa pa zvaanoita.—Vonanyi zviambi zviri pa masoko ari pa 1 Samueli 8:5, 10-18 na 1 Timoti 5:22.

5. VaIziraeri povaida mutongi anovoneka, Jehovha waivavona inga kuti vari kuramba kutongwa Ndiena.—1 Samueli 8:7.

6. MaKristu anodikana kuva akasujunuka paanocumaira ngo pamusoro po utongi hwo Umambo hwa Mwari ku vandhu vo partidhu iri yese.—Mateu 24:14; 28:19, 20; Vaheberi 10:35.

Basa rimweni kunja ko usoca. Mu nyika jimweni, Utongi hunoda kuti vaya vanoramba basa ro usoca vaite basa rimweni pa mukuvo wakatemehwa. Potinowanana no zvisungo zvakadari, tinodikana kuita mukumbiro no kubhuya no mutendi doni wakaivha ngo pamusoro pazvo, kusiapo izvi, totema zvivaringo zvakacijikira mu hana yedu yakarovejwa.—Mazwi Akangwara 2:1-5; VaFilipi 4:5.

Soko ra Mwari rinotibvunja kuti: ‘Tipurukire vatongi no majimambo: tivazwire; tecinasirika kubata mabasa ese auxoni, . . . tive vokuthiva mwoyo.’ (Tito 3:1, 2) Ticirangarira izvo, tingazvibvunjisa kudari: ‘Ndikatendera basa rimweni kunja ko usoca, ringaphwanya kutama kondakapeamira ko ciKristu kana kundinghwinisa mu ciara co kunyepa here?’ (MIKEYA 4:3, 5; 2 VaKorinto 6:16, 17) ‘Ndikaita basa iri, zvinozondinesera kana kuzondikonehwesa kukwanirisa mabasa o ciKristu here?’ (Mateu 28:19, 20; VaEfeso 6:4; Vaheberi 10:24, 25) ‘Ngo divi rimweni, ndikazobatikana ngo basa iri, rinozonditendera kuti ndipandaraje mabasa angu o kumujimu, kangaije kushanda mu nguva yakazara here?’—Vaheberi 6:11, 12.

 Kudari hana yo muKristu ikamutendera kuti aite basa rimweni kunja ko usoca, kusiapo kuenda mu karaboso, maKristu doni anodikana kureremeja civaringo cake. (VaRoma 14:10) Asi, kudari aakwanisi kuita basa iri, vamweni vanodikana kureremeja civaringo cake.—1 VaKorinto 10:29; 2 VaKorinto 1:24.