Amborangarirai ciitiko ici: Kareni ari pa festa. Pacito padarika gumi ro museswa anozwa izwi sure kwake ro mundhu waanoziva.

Kareni wosika kuti avone shamwari yake Jesika wakabata mabotiri maviri akafununguhwa. Iyena angamubvunja kuti ano doro. Jesika wakabata botiri ngo mukono muho pambeji pa Kareni woti: “Auripi mwana mudoko zvokuti aungabungaiji padoko, andizvopi?”

Kareni anoda kuramba, asi Jesika i shamwari yake. Kareni aacaida kuti shamwari yake irangarire kuti iyena wakanyangajwa. Kusiapo izvo, Jesika ndi umwe wo vasikane vakanaka. Kudari iyena ari kumwa, azvingavi zvakashata. Kareni onanga pacake kuti: ‘i doro basi.’ ‘Azvizivi kuezana no kushandisa mutombo jinorejeresa.’

Kudari nowainga pa mugariro wa Kareni, waizoitenyi?

Kuti uteme civaringo co ungwaru pa shwiro yakadari, unodikana kuziva zvauri. Zvauri i mazwiro o mukati anokubvunja zvauri zve zvicinyi zvounovetehwa kuita. Paunova no uzivi hwondhowo, unowana simba ro kuvonerera upenyu hwako haiwa kusa vamweni vaite pa pa ndau yako.—1 VaKorinto 9:26, 27.

Ungaitisa kudini kuti ukurise simba rakadaro? Kudavira mubvunjo jinotevera angava matangiro akanaka.

Kuziva zvaunokwanisa, no mugariro wakavanga zvinozoengejera kuzvithemba kana kuzvinyinda kwako.

MUEZANISO WO MU BHAIBHERI: Mupostori Pauro wakatara kudari: “Mbzakadi kuti andivereketi uxoni; kaveta ndino uzivi.” (2 VaKorinto 11:6) Pauro wainga no uzivi wakakwana hwo Matahwa, hwakamubesera kuti arambe akavanga paaiphikizwa ngo vamweni. Aazivi kutendera kuti masoko avo akashata arembese kuthemba kwake.—2 VaKorinto 10:10; 11:5.

ZVIPOPOREI: Tarai pasi apa, ungwaru humwe kana caunoziva kuita.

Wari tarai mugariro wakavanga wounawo. (Inga muezaniso, unotaja vamweni here? unokova here? unothembeka here? Unokasika kuguma here?)

Kudari ukatendera kuti marembo ako atonge upenyu hwako, angadira pa ngozi mugariro wako, kudari ngo pakahika po kurenti panodira pa ngozi kuvanga kwayo.

MUEZANISO WO MU BHAIBHERI: Pauro waiziva kurembejeka kwake. Iyena wakatara kudari: “Bzakadi, kuti inini ndinodakara ngo Mupango wa Mwari, ndeciteveja undhu wo mu hana. Kaveta ndinozwa mu muviri wangu mupango umweni unorovana no mupango wo mwoyo wangu, wondiita muranda wo mupango wo uxaixi.”—VaRoma 7:22, 23.

ZVIPOPOREI: Kurembejeka kwapi kwandinodikana kujija kukungwarira?

Iwewe waizonghwina mu karu wobvunja mufambisi kuti arambe acisika-sika no karuyo mbhera yapera mafuta here? Zvaizova zvo upenji—zve kutamba no mare!

Tinojijenyi? Zvido zvinokubesera kuti upe divi kwaro upenyu hwako ucikatendereri zvicina revo. Unako kokwenda no njira jokugumeyo.

MUEZANISO WO MU BHAIBHERI: Pauro wakatara kudari: “Inini andigogomi ndicikazivi ko ndinoda kuguma.” (1 VaKorinto 9:26) Kunja kokundotendera kuti zvese zvimutore mu upenyu, Pauro wakagaja zvido zve worarama mukuzwirana nazvo.—VaFilipi 3:12-14.

ZVIPOPOREI: Pasi apa, tarai zvido zvitatu zvowaidakarira kuwana mukati mo gore rinozari.

Ucina zvounokhohwa ndizvona, unova ucina civaringo. Inga hwaivhi kana kuti nyauvhivhi, unozocinja kori kuti uezane no shamwari jako—citatijo co cokwadi co kuti auzivi zvauri.

Mukusiana, kudari zviito zvako zvakacijikira pa kukhohwa kamare, unoramba uno zvauri—pacinenyi no zvinoita vamweni.

MUEZANISO WO MU BHAIBHERI: Pikija wainga ari kuaruka, muphorofeti Dhanyeri ‘wakaimisira [kana wakasunga] mu mwoyo wake’ kuti waizozwira mutemo ja Mwari, azvinenyi wainga wakaparajana no mbhuri yake. (Daniel 1:8) Ngo kuita kudaro, iyena wakaramba ari zvaari kamare. Dhanyeri wakararama mukuzwirana no zvitendwa zvake.

ZVIPOPOREI: Ngozvapi zvinokukhohwesa? Inga muezaniso: Unotenda kuti Mwari ariyo here? Kudari wecitenda, ngenyi? Zvitatijo zvapi zvinokukhohwesa kuti iyena ariyo?

Unotenda kuti ndhungamiriro ja Mwari, ngo pamusoro po mugariro, jakanaka kwauri here? Kudari wecitenda, ngenyi?

Pa kupejisira, waidakarira kufanana no—sakani haro rawa rotohwa ngo mbhepo reciendeswa kuri kwese kana miti unoramba uripo pikija no bepo guru? Vangisai zvauri, ngo kudaro ucazova wakafanana no miti. Izvo zvicazokubesera kudavira mubvunjo wo kuti, Ndiri mundhu wo mushovonyi?