Mubvunjo jo Vaverengi
Zvinotendehwa kuti muKristu agare no nvuti kana pistora ngo kuthya kuitihwa zvakashata ngo vamweni here?
Zviambi izvi zvinokhombija kuti zvaizova zvakashata kuti maKristu ashandise pistora kana mukhaindi uriwese wo nvuti ngo kuthya kuitihwa zvakashata ngo vamweni. Rangariranyi ngo pamusoro po mafundo anotevera:
Upenyu hwo vandhu hwakacena kuna Jehovha. Dhavhidhi wakatara kuti Jehovha ndi “cinyuke co uhomi.” (Nduyo 36:10) Asi, kudari muKristu akakheta kuzvijivirira kana kujirira zviro zvaanazvo, anodikana kuita zvese zvaanokwanisa kuti atame kuva no ndava yo ngazi, kana kuva no ndava yo kuuraya mundhu.—Deuteronòmio 22:8; Nduyo 51:16.
Izvokadi kuti cijito ciricese cinoshandiswa ngo mundhu kuitira kuzvijivirira cinoviisa ndava yo ngazi. Asi, nvuti ainesi kuuraya mundhu, ngokuda kana ngo kukhanganisa. * (Vonanyi masoko o pasi.) Cimwenizve ngo cokuti anoitaro zvakashata angava ano ushungu, zvinozoshata maningi kudari akavona nvuti, zve zvingatozoita kuti pafe mundhu.
Jesu paakabvunja vateveri vake kuti vatore mapanga mu usiku hwaaiinga acito wafa, aacainga o kuzvijivirira ndiona. (Luka 22:36, 38) Kusiapo izvo, Jesu waida kujijisa cijijo cokuti: Vajiji vake avacaidikana kuita ugevenga, pikija povaiwanana no mbungano ina mapanga. (Luka 22:52) Pedhru naapera kushandisa banga rake kuti akhuvaze mushandiri wo mupiri mukuru, Jesu wakamupangira eciti: “Dirai banga, mu ndau yaro.” Jesu wakananga ciambi cinotungamirira maKristu pikija na nyamasi uno, cokuti “ariwese anobata banga anozofa ngo banga.”—Mateu 26:51, 52.
Vandhu va Mwari vakanangwa pa MIKEYA 4:3 kuti “ngo mapanga avo vanozoita mapaja; ngo mukhondo vanozoita sikeyo.” Ngokudaro, maKristu o cokwadi anozivika ngo kuita runyararo. Iwona anoteveja mupango jakapa Mwari ecishandisa mupostori Pauro wokuti “mucadohwirijira ariwese ngo uxaixi hwake” no wokuti “itanyi simba kuti mugarisike no vandhu vese.” (VaRoma 12:17, 18) Pauro wakazviita izvi pikija paainga pa mugariro jinonesa, kubatanijavo pa ngozi “yo vaurai,” iyena aazivi kuhwisana no zviambi zvo Bhaibheri kuti azvijivirire no padoko hapo. (2 VaKorinto 11:26) Pikija zvakadaro, wakagonda Mwari zve wakaziva kuti mbhangiro yo ungwaru inobva mu Bhaibheri, ina “mutengo kupinda bziro bzo hondo.”—Mucumaeri 9:18.
Ku maKristu, upenyu huno mutengo kukuru kupinda zviro zvokunyama. Tinozviziva kuti pikija kuti vandhu vave “no bzizinji, apana anopona ngo ndava yo upfumi.” (Luka 12:15) Ngokudaro, kudari tikabhuya no mbabva ina nvuti munyara ngo njira yo runyararo, airegeri kuba zve tinoteveja mbhangiro ya Jesu yokuti: “Mucahwirijira bzakaxata ku muxatisi.” Izvi zvinoreva kuti tinomuregera wotora ciricese caanoda. (Mateu 5:39, 40; Luka 6:29) * (Vonanyi masoko o pasi.) Zvokadi kamare, zvakanaka kuita kuti titame kuganwa ngo maphanga. Angatama kutigumira manigni kudari tikateveja mazano o Bhaibheri zve totama kujikuja ngo “upfumi” hwotinahwo. (1 Johani 2:16) Zvinozotijivirira maningi kudari tiozivika ngo vopacigarisano cedu inga Zvapupu zva Jehovha zvinoita runyararo.—Mazwi Akangwara 18:10.
MaKristu anoreremeja hana jo vamweni. (VaRoma 14:21) Hama no hambzaji jimweni jinozokahamara kana kukhugunyika, kudari jikaziva kuti umwe wo hama jedu ana nvuti ngo kuthya kuitihwa zvakashata ngo vamweni. Tingatotendehwa hedu ngo mutemo kuti tive no nvuti, asi ngo kuti tinoda hama jedu, atizoiti ciro cotinoziva kuti cingajikhugunya.—1 VaKorinto 10:32, 33; 13:4, 5.
MaKristu anodikana kuva muezaniso wakanaka ku vamweni. (2 VaKorinto 4:2; 1 Pedru 5:2, 3) Kudari muKristu akava no nvuti ngo kuthya kuitihwa zvakashata ngo vamweni, vakuru vo ungano vanozomupa mbhangiro inobva mu Bhaibheri. Kudari akatema civaringo co kugara no nvuti, aazovi muezaniso wakanaka. Inga muviyo, aazovi no mutoro kana kuita basa rinosisira mu ungano. Izvo zvinoshandisihwa ku muKristu anoramba ecishandisa nvuti ku basa rake ro kunyama. Zvaizopinda kunaka kudari akapsaka basa rimweni. *—Vonanyi masoko o pasi.
MuKristu anodikana kutema civaringo cake ega cokuti anozvijiviririsa kudini iyena, mbhuri yake no zviro zvaanazvo, kubatanijavo no kwaanozobatira basa. Asi paanotema zvivaringo zvakadari, anodikana kucijikira pa zviambi zvo Bhaibheri. Mwari wedu ano ungwaru anotipa zviambi izvi ngokuti anotida. Ngo iyo ndava kuti maKristu ana ushamwari hwakavanga na Jehovha anokheta kutama kugara no nvuti ngo kuthya kuitihwa zvakashata ngo vamweni. Anoziva kuti kudari akagonda Mwari no kuteveja zviambi zvo Bhaibheri mu upenyu hwao, anozova no kujiviririka kokadi-kadi mbhera narini.—Nduyo 97:10; Mazwi Akangwara 1:33; 2:6, 7.
Pa dambujiko guru, maKristu anozothemba Jehovha zve aazoeji kuzvijivirira ega
^ ndim. 3 MuKristu angatema civaringo co kugara no nvuti kuitira kunyanga kuti awane usavi kana kuzvijivirira ku zvinyama zvo musora. Asi, anodikana kuibvisa mabara, kana kutoikhumura-khumura, kakuifungira pa ndau yakangwaririka paanonga acikaishandisi. Mu ndharaundha jicikatendehwi kuva no nvuti, kana utongi hunorambisa kana hunovonerera vandhu vano nvuti ngo nyira iriyese, maKristu anodikana kuzwira mutemo.—VaRoma 13:1.
^ ndim. 6 Kuti muzive mungazvijiviririsa kudini ku vajipi, vonanyi musoro wokuti “Nzira Yokudzivisa Nayo Kubatwa Chibharo” uri mu mujeura wo Mukai! wo 8 ya Soka ra Baba wo 1993.
^ ndim. 2 Kuti muwane masoko amweni ngo pamusoro po basa rinokumbira kuti mundhu abate nvuti, vonanyi Murindiri wo 1 ya Cikowe wo 2005, pheji 31, no wo 15 ya Khunguru wo 1983, mapheji 25-26.
