Mupostori Pauro waizviziva kuti kucengejera kwa Sathana kuno ngozi maningi. Asi asipi maKristu ese aiiziva ngozi iyi. Inga muezaniso, zvinovoneka kuti vamweni ku Korinto vaijivona kuva vakavanga maningi zvokuti avacaizocengejwa ndi Sathana. (1 VaKorinto 10:12) Ngo zvakaitisa kuti Pauro ape ngwajo yokuti: “Kaveta ndinothya kuti, inga nyoka yakacengeja Eva, ngo maitiro ondhoo icengeje murangariro yenyu, moregera kutenda Kristu no kujipira kwaari.”—2 VaKorinto 11:3.

Masoko a Pauro anokhombija kuti kutama kuva anojithemba kunosisira maningi. Kuti muwine pa kuhwisana no kucengejera kwa Sathana, munodikana kuziva kuti kuna ngozi yakadini, perepo mozvijivirira.

Ticirangarira izvi, fafanya yo kucengejera i masoko aciripi iona kana okupausa anosandiswa kuitira kucengeja vandhu kana kutungamirira murangariro no zviito zvavo. Mukuzwirana no bhuku rinozwi Propaganda and Persuasion (Fafanya yo Kucengeja no Kukhohwesa), fafanya yo kucengejera “aitendehwi, inokhuvaza zve aizivi kugondeka.” Vandhu vanoisanangura vacishandisa magama akadari inga “manyepo, kuphetamisa zvokadi, kucengejera [no] kungwarira murangariro.”

Fafanya yo kucengeja ina ngozi maningi ngokuti inokwevejera murangariro wedu pikija ticikatozvivoni. Tingaiezanisa no gajhi rino nvenene  roticikakwanisi kuvona kana kuzwa munuhi. Umwe muzivi wo zvomufambiro wo vandhu anozwi Vance Packard, wakanananga kuti kucengejera kunopsasa maningi marangaririro otinoita “kupinda zvotinoziva.” Muzivi umweni wakananga kuti kucengejera kwakaitisa kuti mufambiro wo vandhu uve no ngozi maningi, ucizivi kurangaihwa zve kwakaitisa kuti kuuraiwe vandhu ngo kukhetana ko bvumbo, no kuteverehwa ngo ndava yo bvumbo kana zvokunamata.—Easily Led—A History of Propaganda.

Kudari vandhu vanokwanisa kutiungisa ngo kucengeja kwavo, Sathana anokwanisavo maningi. Ari kujija mufambiro wo mundhu kubvira paakasikwa. Wari anokwanisazve kungwarira “nyika yese,” ngokudaro, anoshandisa divi ririrese ro nyika kuti andhandhanise manyepo ake. (1 Johani 5:19; Johani 8:44) Sathana ‘wakadira cidima mumusoro’ mo vandhu vakawanda maningi ngo kucengeja kwake, zvokuti wari ari kucengeja “nyika yese yo pasi.” (2 VaKorinto 4:4; Apokalipsi 12:9) Mungakurambisa kudini kucengeja uku?

Jesu wakatijijisa kuti kuna njira yakareruka yo kuhwisa kucengeja uku, paakati: “Munozoziva bzokadi, no bzokadi bzinozomusujunura.” (Johani 8:31, 32) Mu hondo, musoca anodikana kuziva kuti anowanira kwapi masoko anothembeka, ngokuti muvengi anozondhandhanisa manyepo kuitira kuti amucengeje. Waro tinowanira kwapi masoko anothembeka? Takaapuwa ndi Jehovha mu Soko rake, Bhaibheri. Munowanemo zvese zvomunoda kuti muhwise kucengeja ka Sathana.—2 Timoti 3:16, 17.

Zvokadi kamare, Sathana anozviziva izvi. Ngokudaro, anoshandisa nyika yaanovonererari kuti itiphingaije no kutirembesa kuitira ticaverenga no kujija Bhaibheri. Mucadocengejeka ngo “bziejo” zvakashata zva Sathana! (VaEfeso 6:11) Azvikwani kuzwisisa padoko basi cokwadi. Tinodikana kushanda ngo simba kuti tijikise kuziva kotinoita cokwadi. (VaEfeso 3:18) Inga zvakananga mutari wo bhuku anozwi Noam Chomsky, “akuna mundu anodururira cokwadi mu uruzvi hwenyu. Ndi ciro comunodikana kuwana mwega.” Ngokudaro, ‘ciwanenyi mwega’ ngo ‘kujija mazuva ese Matahwa.’—Mait. 17:11.

Sathana aaadi kuti murangarire zvakajeka no kuzwisisa zvokadi zvomunozwa. Ngenyi? Ngokuti fafanya yo kucengeja “ingabudirira maningi” kudari vandhu “vakarembejeka pa kuva no murangariro  wo kuphikiza.” (Media and Society in the Twentieth Century) Mucadotenda basi zvese zvomunozwa mucizivi kurangarijisisa ngo pamusoro pazvo. (Mazwi Akangwara 14:15) Mwari wakatipa “hwiru” no ‘simba ro kurangarira,’ ngokudaro, zvishandisenyi kuitira kuvangisa gonda renyu.—Mazwi Akangwara 2:10-15; VaRoma 12:1, 2.

Kudari masoca akakhohweswa ngo fafanya yo kucengeja, anothya zve anoruza haraka yo huhwa. Kucengejera uku kungatomaitisa kuti ahwisane ngocao kana kutomaitisa kuti aparajane ngocao. Mukuzirana na komandati wo Aremanya, fafanya yo kucengejera yakava cimwe co zvakaitisa kuti Aremanya inyiswe mu Hondo yo Kutanga yo Nyika Yese. Wakananga kuti vandhu vakakhohweswa ngo kucengejera zvoita kuti vavaraihwe ngo ndava yako. Sathana anoshandisa njira jakadaro kuti aphwanye rubatano hwo maKristu nyamasi uno. Inga muezaniso, Sathana anodira mapope pakati po hama. Kana anoeja kuvasiisa sangano ra Jehovha ngo kuvaita kuti varangarire kuti riri kuita zvicizivi kurungama kana riri kuita ciro cakashata..

Mucadoungiswa! Tevejanyi mazano ari mu Soko ra Mwari zve rambanyi makabatana no hama jenyu. Inga muezaniso, Bhaibheri rinotivangisa kuti tiregererane ngo mwoyo wese zve tipeje mapope ngo kukasika. (VaKolosi 3:13, 14; Mateu 5:23, 24) Rinotingwajazve kuti titame kugara tega kana kuparajana no ungano. (Mazwi Akangwara 18:1) Ivanyi no gwinyiso rokuti makanasiririka kuti murambe fafanya yo kucengeja ya Sathana. Zvibvunjisenyi kudari: ‘Pa hwendo hwo ndakapejisira kukhugunywa ngo hama, ndakadavira ngo njira inodakajisa Mwari, kana Sathana?’—VaGalàsia 5:16-26; VaEfeso 2:2, 3.

Musoca acizivi kugondeka ku mutungamiriri wake aahwi ushoni mu hondo. Ngokudaro, vavengi vanoshandisa kucengeja kuti vapwanye kuthemba no kugonda kunoita masoca vanovatungamirira. Kudari vatungamiriri vakaposa, vavengi vanoshandisa kuposa uku, vonanga kudari: “Mucadovagonda!” zve “mucadovasiya vacimutungamirira kuenda mu ngozi!” Sathana anoitavo kudaro. Anoeja kupwanya kuthemba komunoita vanoshandiswa ndi Jehovha pa kutungamirira vandhu vake.

Mungazvijiviririsa kudini? Temanyi civaringo co kuramba muri mu sangano ra Jehovha. Garanyi makagondeka ku vanarume vari  kutungamirira vandhu va Mwari zve vabeserenyi, pikija vanarume avo avazivi kukwana. (1 VaTesalònika 5:12, 13) Vapanduki no vacengeji vamweni vangahwisa sangano. (Tito 1:10) Pikija zvovari kunangaro zvinoita inga ndizvona, “mucangweta ngo kukasika mu mwoyo menyu.” (2 VaTesalònika 2:2) Tevejanyi mazano akapuwa Timoti ndi Pauro okuti: “Vangai pa bzese bzo wakajija,” zve uciziva kuti ‘mbhaani vakakujijisa,’ Shanduro yeNyika Itsva. (2 Timoti 3:14, 15) Rangariranyi zvese zvinokhombija kuti Jehovhaari kushandisa muranda wakagondeka no wakangwara ko makore anokhwedera kuita zana kuti utijijise cokwadi.—Mateu 24:45-47; Vaheberi 13:7, 17.

Sathana anoejazve kumukhohwesa ngo njira yakasotana na imwimwi kamare. Nguva jimweni anoeja kumuthyisa. Kuthya ndi “amwe o maitiro ese okare o kucengejera.” (Easily Led—A History of Propaganda) Philip M. Taylor, mujijisi wo Gra-Bhretanya, wakatara kuti vaAsiria, inga muezaniso, wakashandisa kuthyisijira no kucengeja kuitira kuti vanyise vavengi vavo. Sathana anozoshandisa kuthyisijira, kwakadari inga kuthya mundhu, kuthya kuteverehwa no kuthya kufa, kuitira kuti muregere kushandira Jehovha.—Isaia 8:12; Jeremia 42:11; Vaheberi 2:15.

Mucadotendera kuti Sathana amuitise izvi. Jesu wakati: “Mucathya vanouraya muviri, kuperapo apana co vanozoita.” (Luka 12:4) Nasanyi kuthemba kuti Jehovha anozokwanirisa cipikihwa cake co kumukorondha, kumupa “simba rakakura” no kumubesera kuti murambe kuhwisa ka Sathana.—2 VaKorinto 4:7-9; 1 Pedru 3:14.

Zvokadi, pangava no mukuvo wokuti munoremba kana kuthimwa-thimwa. Asi ceujanyi masoko anovangisa akabvunjwa Joshuwa ndi Jehovha, okuti, ‘Vangai no kucunga mwoyo. Ucathya no kutetemera, ngokuti Tenji Mwari wako anozova newe, kwese ko unozoenda.’ (Joxwa 1:9) Kudari mukathimwa-thimwa, itanyi mukumbiro ngo kukasika ngo pamusoro po zvomuri kuthyaro. Munozova no gwinyiso rokuti “rugarisiko hwa Mwari hunopinda uzivi hwese hunozorinda mwoyo yenyu no murangariro yenyu.” Perepo munozowana simba ro kuramba kucengeja kwese kwa Sathana.—VaFilipi 4:6, 7, 13.

Mucaceuja kucengeja kwakashandisa Rabhishake, ndhumwa yo Asiria, kuti athyise vandhu va Mwari? Waida kuti vatende kuti akuna anokwanisa kuvajivirira kuti vacahwiswa ngo vaAsiria, na Jehovha aakwanisi. Wakatonanga kuti Jehovha ngowakatuma vaAsiria kuti ndiparaje Jerusarema. Waro Jehovha wakazonangenyivo? Wakazonanga kudari: “Ucathya mazwi o wakazwa, cituko co vakandituka ndicona varanda va mambo wo vaAsíria!” (2 Majimambo 18:22-25; 19:6) Jehovha wakazotumira ngirozi imwe, yoparaja 185.000 zvo vaAsiria mu usiku humwe basi!—2 Majimambo 19:35.

Makambovona firme yo mundhu ari kucengejwa naacikazvizivi here? Makava no cido co kumimira kuti, ‘nandiwe ucadotenda izvo! Vari kukunyepera!’ Waro, cirangariranyi ngirozi jicimubvunja kudari: “Ucaungiswa ngo manyepo a Sathana!”

Ngokudaro, mucadopurukira fafanya yo kucengeja ya Sathana. (Mazwi Akangwara 26:24, 25) Purukiranyi Jehovha zve mugondenyi pa zvese zvomunoita. (Mazwi Akangwara 3:5-7) Iyena anomudanyi zve anomukohomeja kuti, “Itai wakangwara, mwana wangu, dakajisai mwoyo wangu.” (Mazwi Akangwara 27:11) Mukaita kudaro, munozowina pa kuhwiswa kunoitwa murangariro wenyu.