1. Vocidoko vangatemesa kudini civaringo ngo pamusoro po kumbeji kwavo? Cicinyi cingavabesera kutama kunyiswa ngo kuthimwa-thimwa? (Vonanyi pikica yo kutanga.)

VOCIDOKO kangaije vanozvitenderavo kuti mundhu acito aita hwendo anodikana kutanga arangarira kwaarikuda kwenda. Zvecivoneka kuti upenyu hwakadari inga hwendo, nguva yo kuronga zvaunoda kuita kumbejiyo ndi wari, uciri mujaha kana musikane. I zvokadi kuti kuronga kwatiri kunangari akuzivi kureruka kukuita. Musikane umweni anodajijwa Heather wakananga kudari: “Zvinothyisa maningi. Unodikana kutema civaringo co zvaunoda kuzoita mu upenyu hwako hwese.” Kudari unojizwavo kudaro, ceujai kuti Jehovha wakananga kudari: “Ucathya, ngokuti ndinewe, ucatetemera, ngokuti ndiri Mwari wako; ndinokuvangisa, hina, ndokubesa.”—Isaia 41:10.

2. Unozvizivisa kudini kuti Jehovha anoda kuti uronge zviro zvinozoitisa kuti uve no kumbeji kunodakajisa?

² Jehovha anokuvangisa kuti uronge zvo kumbeji kwako no ungwaru. (Mucumaeri 12:1; Mateu 6:20) Anoda kuti uve no mudakaro. Auzvivoni paunosota, kuzwa no kuravira zviro zvaakarura here? Jehovha anotikorondhazve ngo maitiro  amweni. Anotipa mupango no kutijijisa maponero akanaka. Ngo kudaro mundhu akaramba mbhangiro yake, iyena aadakari ndizvona. Wakabvunja vaya vacikamuzwiri kudari: “Makasana bzicikandidakajiri. . . . Ngo bzokadi varanda vangu vanozodakara, asi imwimiwi munozofukijwa ngo nyoa; ngo bzokadi varanda vangu vanozotamba vecidakara mu mwoyo mavo.” (Isaia 65:12-14) Patinotema civaringo co ungwaru mu upenyu, tinokuja Jehovha.—Mazwi Akangwara 27:11.

3. Ngo api mazano aanokupa Jehovha?

³ Ngo api mazano aanokupa Jehovha? Kuti uve no mudakaro, unodikana kunasa kumuziva no kumushandira. Awo ndiwona manera aakasika ndiwona vandhu. (Nduyo 128:1; Mateu 5:3, Shanduro yeNyika Itsva) Zvinyama zvinoha, zvinomwa kumwa no kubarana basi. Asi Jehovha anoda kuti uronge upenyu hwako ngo maitiro o kuti uzove no mudakaro zve no cinangwa. Musiki wako ndi “Mwari wo rudo,” zve ‘Mwari wakadakara,’ zvewakasika vandhu ngo “muezaniso wake.” (2 VaKorinto 13:11; 1 Timoti 1:11, Shanduro yeNyika Itsva; Genesis 1:27) Unozodakara ukatevejera Mwari wedu ano rudo. Bhaibheri rinonanga kudari: “Anodakara anopa, kupinda wiya anopuwa.” (Maitiro o Vapostori 20:35) Auzivi kumbozvizwa izvi here? Ici i cokwadi cinosisira maningi pa upenyu. Ngo kudaro Jehovha anoda kuti uronge zvo kumbeji kwako wakacijikira pa rudo hwaunahwo kuno vamweni no kuna iyena.—Verenganyi Mateu 22:36-39.

4, 5. Zvicinyi zvaidakajisa Jesu?

⁴ Jesu Kristu wakagaja muezaniso wakanaka maningi kwamuri majaha no vasikane. Paainga aciri mudoko, waitotamba no kudakara. Inga zvinonangwa ngo Soko ra Mwari, kuno “mukuvo wo kuseka” zve “mukuvo wo kutamba.” (Mucumaeri 3:4) Jesu waikhwedera phedo na Jehovha ngo kujija Matahwa. Paainga no 12 o makore o kubahwa, vajijisi vo mu tembere vakakahama ngo “uzivi hwake no mipinguro yake.”—Ruka 2:42, 46, 47.

⁵ Naakura, Jesu waidakajihwa maningi ngo kuita zvaakabvunjwa ndi Mwari. Inga muezaniso, Mwari waida kuti atokotese ‘masoko akanaka kuno vamasikini’ no ‘kofunungura majiso o mapofu.’ (Luka 4:18, 19) Pa Nduyo 40:8, Shanduro yeNyika Itsva, inosanangura mazwiro a Jesu yeciti: ‘Ndinodakarira kuita zvamunoda, oh Mwari wangu.’ Jesu waidakarira maningi kujijisa vandhu ngo pamusoro pa Baba wake. (Verenganyi Luka 10:21.) Bvaza imweni, naapera kubhuya no mwanakaji umweni ngo zvokunamata, iyena wakabvunja vajiji vake kudari: “Bzokuha bzangu, kuita kuda kwa wiya wakanditumaya no kupeja basa rake.” (Johani 4:31-34) Jesu waidakajihwa maningi ngo kuti wakakhombija rudo kuna Mwari no vamweni. Ukaitavo kudaro, unozodakaravo.

6. Ngenyi zvakanaka kubhuira vamweni ngo pamusoro po zvauri kuronga kuitira kumbheji?

⁶ Vazinji vakatanga basa ro upiyona vaciri vadoko kamare, zve izvo zvakavadakajisa.  Ungabhuyavo no vamweni ngo pamusoro po zvauri kuronga kuita here? “Ukatama kurangarira, mabasa ako anozodunya; pano vapangiri vakawanda, mabasa anobuda uxoni.” (Mazwi Akangwara 15:22) Hama no hambzaji jaunobhuyaro najo kangaije jingakubvunja kuti kuita upiyona rinokupa jijiso inozokubesera mu upenyu hwese. Jesu wakajijira zvakawanda maningi kubvira kuna Baba wake paainga ari mugore. Pasure pazvo, paainga mu mushando wake pasi pano, wakaramba ecijija. Wakawana mudakaro paainga ecicumaera vamweni masoko akanaka zve wakaramba akagondeka mu mukovo wo zvineso. (Verenganyi Isaia 50:4; Vaheberi 5:8; 12:2) Ngativone kuti basa ro mu nguva yakazara ringakubesera kudini kuwana mudakaro.

7. Ngenyi majaha no vasikane vazinji vanodakarira basa ro kuita vajiji?

⁷ Jesu wakatibvunja kuti tiende koita vajiji no ‘kujijisa vandhu.’ (Mateu 28:19, 20) Kudari uri kuronga kuti basa iri rive pa kutanga kwauri, unozova no upenyu unopfaja zve unokuja Mwari. Zvinotora nguva kuti ugume pa kunasa kuriziva kamare. Hama imweni inodanijwa Timoti, yakatanga basa ro upiyona iciri muaruki, yakananga kudari: “Ndinoda miningi kushandira Jehovha mu nguva yakazara ngo kuti ndiona manera andinovonesa rudo hwangu kwaari. Pakutanga andicaikwanisa kufunungura jijo yo Bhaibheri no mundhu, asi pa kufamba ko nguva ndakaenda koshandira ku ndima imweni, zve mukati mo mweji umwe basi ndakatangisa jijo jakawanda. Umwe wo vajiji vangu wakatanga kuviya ku musongano. Pasure po kupeja mweji muviri ndiri ku Cikora co Bhaibheri co Hama Jicizivi Kurovora, ndakagajwa kooshandira kumweni, ndakatanga kujija no vandhu varongomuna. Ndinodisisa maningi kujijisa vandhu ngo kuti ndinokwanisa kuvona mujimu mucena wecivacinja.” * (Vonanyi masoko o pasi.)—1 VaTesalònika 2:19.

8. Vo cidoko vamweni vakaitenyi kuti vakwanise kucumaera vandhu vakawanda?

⁸ Majaha no vasikane vamweni vari kujijira ndumi imbza. Inga muezaniso, Jakobe, wo ku Amerika do Norti, wakatara kudari: “Pandainga no makore manomwe, vazinji vandaijija navo cikora vainga vo ku Vhietiname. Ndaida kubhuya navo ngo pamusoro pa Jehovha, ngo kudaro ndakaronga kujija ndumi yavo. Kazinji ndaijijira ngo kuezanisa Murindiri wo cingezi no ciVhietiname. Ndakatangavo kushamwarijana no vo ungano imweni yo phedo yaishandisa ndumi yo ciVhietiname. Pandainga no 18 ro makore o kubahwa, ndakatanga basa ro upiyona. Pa kufamba ko nguva, ndakaenda ku Cikora co Bhaibheri co Hama Jicizivi Kurovora. Izvi zvakandibesera mu basa ro upiyona, randiri kuita ndecibesera inga mukuru pa rimwe gurupu ro ndumi yo Vhietiname. VaVhietiname vanokahamara maningi ngo kuvona kuti ndakajija ndumi yavo. Vanondidanija zve kazinji tinotanga jijo yo Bhaibheri. Vamweni vanoenderera mberi mbhera koobhabhatijwa.”—Ezanisanyi no Maitiro o Vapostori 2:7, 8.

9. Basa ro kuita vajiji rinotijijisenyi?

⁹ Basa ro kuita vajiji rinokujijisa kuva mundhu ano zvirovejeso zvakanaka,  anokwanisa kudavijana no vamweni, anovereketa no kuthemba zve anoziva kuvereketa. (Mazwi Akangwara 21:5; 2 Timoti 2:24) Asi rinodakajisa maningi-ningi ngo kuti rinokujijisa kukwanisa kuvonesa zvaunotenda mu Matahwa. Unojijiravo kushanda phedo na Jehovha.—1 VaKorinto 3:9.

10. Ungawanisa kudini mudakaro mu basa ro kuita vajiji pikija ndima yauri kushandira inonesa?

¹⁰ Ungawanazve mudakaro mu basa ro kuita vajiji, pikija vashoma basi mu ndima mwako ngovari kudavira kujija Bhaibheri. Basa ro kuita vajiji, ngo ro ungano yese. Pikija hama kana hambzaji imwe basi ngainowana mundhu anoguma pa kuva mujiji, mudakaro unoviira tese ngo kuti tese takatoravo rutivi pa kupsaka. Inga muezaniso, Brandon, wakashanda inga piyona ko makore mafumbhamwe mu ndima yo kuti vandhu vashoma basi ngo vaijija Bhaibheri, wakananga kudari: “Ndinodisisa kucumaera masoko akanaka ngo kuti Jehovha ngo zvaanotikumbira kuti tiite. Ndakatanga upiyona pandakandopeja cikora. Ndaidakarira maningi kuvangisa hama jo cidoko jo mu ungano yedu no kujivona jecienderera mberi ku mujimu. Nondapeja kujija Cikora co Bhaibheri co Hama Jicizivi Kurovora, ndakagajwa koshandira kumweni inga piyona. I zvokadi kuti inini andizivi kumbowana ari wese wakaenderera mberi mbhera koobhabhatijwa, asi vadoni vangu vaivawana. Ndinodakajihwa maningi ngo kuti ndakaronga kutora rutivi zvakakwana mu basa ro kuita vajiji.”—Mucumaeri 11:6.

11. I manera api amweni o kubatira Jehovha ari kushandiswa ngo vo cidoko vazinji?

¹¹ Kuno mukana jakawanda jo kushandira Jehovha. Inga muezaniso majaha no vasikane vazinji vangabesera mu basa ro kuvaka. Kuri kudiwa mazana o Nyumba jo Umambo. Ndau iji jinokuja Jehovha, ngo kudaro kubesera pa kuvakwa kwajo kunotidakajisa. Pondhopo unozowanavo mudakaro wo kushanda no hama no hambzaji jako. Unozojijiravo zviro zvakawanda maningi, zvakadari inga kuziva kuita basa rakanaka ngo maitiro akangwaririka zve kukwanisa kushandira pamwe no muvonereri wako.

12. Basa ro upiyona ringakuendesa kudini ku mukana jakawanda?

¹² Hama imweni inodanijwa Kevin yakati: “Kubvira pa udoko hwangu kamare ndairangarira kuti njiku imweni ndaizoda kushandira Jehovha mu nguva yakazara. Pandakazova no 19 ro makore o kubahwa ndakatanga upiyona. Ndaijisapota ngo kupeja nguva nganani ndecishandira hama imweni yainga muvaki. Ndakajijira kudira denga, majhanera no musuvo. Pa kufamba ko nguva, ndakazopeja makore maviri ndecishanda no cikwata co kubesera vainga vakatambujika ngo zibepo (ciclone), tecivaka Nyumba jo Umambo no nyumba jo hama. Pandakazwa ngo pamusoro po dikano yo basa ro kuvaka ku Afrika dhu Suri, ndakatara petisau, ndotendehwa. Kuno ku Afrika, mukati mo mabviki mashoma basi tinocinja  ungano iyi kwenda ungano imwe tecikava Nyumba yo Umambo. Cikwata co kuvaka candinoshanda naco cakadari inga ukama hwangu. Tinorarama, kujija Bhaibheri, kushanda pamwepo. Ndinodakajihwa ngo kushanda mu basa ro mu munda bviki ngo bviki no hama jo ungano yandinongaro ndiri. Zvandakaronga ndiciri cimujaha zviri kundidakajisa ngo maitiro andicairangarira.”

13. Ngenyi vo cidoko vazinji vari kudakara ngo kushandira Jehovha pa Bheteri?

¹³ Mapiyona mazinji wari uno ari kushandira pa Bheteri. Basa ro pa Bheteri rinopa maponera anodakajisa ngo kuti zvese zvaunoitepo unoitira Jehovha. Mbhuri yo pa Bheteri inobesera pa kupa ma Bhabheri no mabhuku amweni kuitira kuti vandhu vajije cokwadi. Bheterita umweni anodanijwa Dustini wakati: “Ndakatanga kudadamira basa ro kushanda mu nguva yakazara pandainga no makore mafumbhamwe o kubahwa, zve ndakatanga kuita basa ro upiyona pandakandopeja cikora. Nondapeja gore no meya mu basa iri, ndakakokwa ku Bheteri, kondakajijira kushanda no mucini wo kudhindha mabhuku zve pa kufamba ko nguva ndakajijiswa kushanda no kumputadhori. Pa Bheteri, ndinodakajihwa ngo kuzwa ngo phedo kwenderera mberi ko basa ro kuita vajiji pasi pese. Ndinodisisa maningi kushanda pano ngo kuti zvatinoita zvinobesera vandhu kukhwedera phedo na Jehovha.”

14. Ungaitenyi wari kuti ujinasirire kuitira basa ro mu nguva yakazara kumbejiyo?

¹⁴ Ungajinasirira kudini kuitira basa ro mu nguva yakazara? Kuti ushandire Jehovha mbhera panopera simba rako ngo maitiro akanakisisa, unodikana kusakurira mugariro jo ciKristu. Jijai Soko ra Mwari nguva jese, wonasa kurirangarijisisa, perepo woeja kuvonesa gonda rako pa musongano jo ungano. Paunonga wecijija cikora, engejerai kuziva kwako ngo kubhuira vamweni masoko akanaka. Jijai kuvonesa kuti unodakarira vandhu ngo kuziva kubvunjisa mavonero avo ngo pamusoro po shwiro iri yese no kupurukira ushoni mupinguro javo. Cimwenizve nga ici: Zvipirei kuita mabasa pa ungano, akadari inga kucenesa no kugejerera zvinodiwa mu Nyumba yo Umambo. Jehovha anodakajihwa maningi ngo kushandisa vaya vanojidodokesa no kujipira pa kushanda. (Verenganyi Isaia 6:8; Maitiro o Vapostori 6:1-3) Mupostori Pauro wakakoka Timoti kuti ashande inga misionario ngo kuti hama “jaimuitira ufakazi hwauxoni.”—Maitiro o Vapostori 16:1-5.

15. Ngozvapi zvaungaita kuti uwane basa rinozokusapota paunonga weciita basa ro upiyona?

¹⁵ Vashandiri vazinji vo mu nguva yakazara vanoda kuva no basa ro kunyama. (Maitiro o Vapostori 18:2, 3) Kangaije ungaita kursu yo mukuvo mushomani inozokubesera kuita basa ro nguva nganani mu ndharaunda makomo. Bhuyai no muvoneri wako wo ndharaundha no mapiyona amweni ngo pamusoro po zvauri kuronga zve vakumbirei mazano. Perepo, inga zvinonanga Bhaibheri, “dirai mu nyara ja Tenji Mwari mabasa ako ese: bzounorangarira bzinozobuda uxoni.”—Mazwi Akangwara 16:3; 20:18.

16. Basa ro mu nguva yakazara rinokunasirira kudini kuitira mutoro jimweni jo kumbeji?

¹⁶ Ungava no cokwadi co kuti Jehovha anoda kuti ‘ubatisise’ kumbeji kunodakajisa. (Verenganyi 1 Timoti 6:18, 19, Shanduro yeNyika Itsva.) Basa ro mu nguva yakazara rinokubesera kuguma pa kuva muKristu wakaibva paunonga wecishanda no vashandiri vamweni vo mu nguva yakazara. Cimwenizve, vazinji vakavona kuti kutanga basa ro mu nguva yakazara vaciri vadoko zvakazovabesera mu mucadho. Kazinji, vanotanga basa ro upiyona vacito vacadha, vanoenderera mberi vecishanda inga mapiyona.—VaRoma 16:3, 4.

17, 18. Kuronga zvo kumbeji, kunobatanija kudini mwoyo wako?

¹⁷ Nduyo 20:5 inonanga kudari: ‘Ngaakupe bzo unoda mwoyo wako aite bzese bzounorangarira.’ Paunonga wecinasirira kuitira kumbeji, rangarirai ngo pamusoro po zvauri kuda kuita kamare mu upenyu hwako. Rangarirai ngo pamusoro pa zvaari kuita Jehovha nyamasi uno zve zvaungaitavo mu basa rake. Perepo rongai kuita zvinomudakajisa.

¹⁸ Ukashandisa upenyu hwako kuti ubatire Jehovha zvakakwana no kumukuja, unozodakara maningi. Unozodakara ndi Jehovha zve “yena anozoita bzo unoda mwoyo wako.”—Nduyo 37:4.