‘Kudira Murangariro Wenyu pa Zviro zvo Kumujimu Zvinoreva Upenyu no Runyararo’
‘Vaya vanoita mu kuzwirana no mujimu [vanodira murangariro javo] pa zviro zvo kumujimu.’—VAROMA 8:5, Shanduro yeNyika Itsva.
NDUMBO: 57, 52
1, 2. Ngenyi VaRoma cipauko 8 inosisira ku maKristu akazojwa?
KANGAIJE makaverenga VaRoma 8:15-17 pa mukuvo wo Cirangarijo co kufa ka Jesu. Mavhesi ao anodurujira kuti maKristu akazojwa anozvizivisa kudini kuti ana vetero yo kurarama ku matenga mbhera narini. VaRoma 8:1 inonangira vakazojwa inga “vakabatana na Kristu.” Asi VaRoma cipauko 8 inoshanda ku vokuzojwa basi here? Kana ingabeseravo vano vetero yo kurarama mbhera narini pasi pano?
2 VaRoma cipauko 8 yakatarihwa maningi-ningi vokuzojwa. Ivona vanoashira ‘mujimu’ inga vaya ‘vari kuvetera kuashihwa inga vana, kusujunuhwa ko muviri wavo [wo kunyama]’. (VaRoma 8:23, Shanduro yeNyika Itsva) Kumbejiyo, vanozova vana va Mwari mugore. Jehovha wakavaregerera zvishaishi zvavo acishandisa muripo. Ngokuti vakavavona kuva varungami, ngo kudaro vangava vana vake.—VaRoma 3:23-26; 4:25; 8:30.
3. Ngenyi vano vetero yo kurarama mbhera narini pasi pano vanodikanavo kujija VaRoma cipauko 8?
3 Asi, pa matangiro po bhuku ro VaRoma, Pauro wakatara ngo pamusoro po mwanarume waenga acizivi kuzojwa asi waivoniwa kuti wakarungama ndi Jehovha. Waenga Abhirahama. Mugondeki uwo wakararama kare Jesu acito apira upenyu hwake inga muripo. (Verenganyi VaRoma 4:20-22.) Nyamasi uno, Jehovha anovonavo maKristu akagondeka ana vetero yo kurarama mbhera narini pasi pano kuti akarungama. Iwona angabesekavo ngo mbhangiro jiri pa VaRoma cipauko 8.
4. Potinoverenga VaRoma 8:21, tinodikana kuzvibvunjisenyi?
4 Pa VaRoma 8:21, Jehovha anotithembesa kuti nyika imbza yake inozoviyadi zve vandhu vanozosujunuhwa ku ushaishi no rufu. Vhesi iyi inonanga kuti vanozobusa “rusujunuko [hwo] goja ro vana va Mwari.” Munozvivona muri mu nyika imbza here? Ngatibhuisane ngo pamusoro po zvotinodikana kuita kuti tizoraramemo.
‘KUDIRA MURANGARIRO PA ZVIRO ZVO KUNYAMA’
5. Mugariro wapi wakasananguhwa ndi Pauro pa VaRoma 8:4-13?
5 Verenganyi VaRoma 8:4-13, Shanduro yeNyika Itsva. Pa cipauko cocisere co VaRoma, Pauro wakasanangura mukhaindi muviri wakasiyana wo vandhu, vaya vanorarama ‘mu kuzwirana no nyama’ no vaya vanorarama ‘mu kuzwirana no mujimu.’ Vamweni vanorangarira kuti Pauro wainangira vaya vacaengepi maKristu no vaya vaenga maKristu. Asi Pauro apa waitarira maKristu, aya ‘akadanijwa kuita vanasi.’ (VaRoma 1:7) Ngokudaro, vaya vairarama ‘mu kuzwirana no nyama’ no vaya vairarama ‘mu kuzwirana no mujimu’ vese vaenga maKristu. Vaisiana papi?
6, 7. (a) Mu Bhaibheri gama rokuti “nyama” ringanangira zvapi no zvapi? (b) Gama rokuti “nyama” rakashandiswa kudini pa VaRoma 8:4-13?
6 Bhaibheri porinoshandisa gama rokuti “nyama,” ringanangira zviro zvakasianasiana. Nguva jimweni rinonangira nyama yo muviri wedu. (VaRoma 2:28; 1 VaKorinto 15:39, 50) Gama iri ringanangirazve ukama. Inga muezaniso, Bhaibheri rinonanga kuti Jesu ‘wakabahwa inga mundhu mu rusinga [kana mubarihwana] wa Davidi,’ zve Pauro wakadanija vaJudha kuti i “jinja rangu ro” kunyama.—VaRoma 1:3; 9:3.
7 Waro, Pauro wainangenyi paakabhuya ngo pamusoro po vaya vanorarama ‘mu kuzwirana no nyama’ pa VaRoma 8:4-13? Kuti tiwane mupinguro, tingavona pa VaRoma 7:5. Pondhopo Pauro wakatara kudari: “Potainga tiri vandhu vo nyama, mapeamiro akaxata akamuswa ngo Mupango ainga mu muviri yedu.” Pauro apa wakadurujira kuti vandhu vanorarama ‘mu kuzwirana no nyama’ ndi vaya vanodira murangariro no kuteveja zvido zvavo zvakashata, voita zviri zvese zvovanoda.
8. Ngenyi Pauro wakangwaja maKristu o kuzojwa kuti ahwisane no kurarama ‘mu kuzwirana no nyama’?
8 Ngenyi Pauro wakangwaja maKristu o kuzojwa kuti ahwisane no kurarama ‘mu kuzwirana no nyama’? Zve ngenyi maKristu ese nyamasi uno anodavo ngwajo iyi? Ngokuti mushandiri ariwese wakagondeka wa Mwari angatanga kuita kuti zvido zvake zvive ciro cikuru mu upenyu hwake. Inga muezaniso, Pauro wakatara kuti hama jimweni jo ku Roma jaenga varanda vo “ndani yavo.” Kangaije iyena wainanga kuti kuita zvo maponde, kuha, kana zvimweni zvinodakajisa zvainga zviro zvinosisira maningi mu upenyu hwavo. (VaRoma 16:17, 18; VaFilipi 3:18, 19; Juda 4, 8, 12) Zve pakufamba ko nguva, ku ungano yo ku Korinto kwaenga no mugariro wokuti hama imweni yaihura ‘no mukaji wa baba wayo.’ (1 VaKorinto 5:1) Zvakajeka kuti, maKristu o kutanga ao aidadi ngwajo ya Pauro kuti atame kurarama ‘mu kuzwirana no nyama.’—VaRoma 8:5, 6, Shanduro yeNyika Itsva.
9. VaRoma 8:6 airipi kunangenyi?
9 Ngwajo iyi inoshandavo nyamasi uno. Pikija mundhu ari kushandira Jehovha ko makore akawanda angatanga kurarama ‘mu kuzwirana no nyama.’ Kureva kuti, Pauro wainanga kuti atidikani kurangarira ngo pamusoro po zviro zvakadari inga zvokuha, basa, mabungaijo kana zvorudo here? Andizvopi. Izvi i zviro zvinoitiwa mu upenyu. Pikija Jesu waiha no kupa zvokuha vamweni. Waizivazve kuti waidikana kuzorora. Zve Pauro wakatara kuti kuita zvo maponde kuna divi rinosisira mu mucadho.
Mabhuyo edu anotatijenyi? (Vonanyi ndima 10, 11)
10. Magama okuti ‘kudira murangariro’ anonangenyi?
10 Pauro waida kunangenyi ngo magama okuti ‘kudira murangariro’? Gama ro ciGiriki rakashandisa Pauro rinonangira kusotesesa ko murangariro jese jo mundhu pa ciro no kuciitira mazano. Umwe mujiji wakadurujira kuti magama aya anonangira vaya ‘vanodisisa maningi ciro no kubhuya ngo pamusoro paco nguva jese,’ zve vanosotesesa maningi zvido zvavo zvo umbau. Vanotendera kuti zvido izvo, zvingwarire mararamiro avo.
Ngocapi cotinodakarira maningi mu upenyu?
11. Ngozvapi zviro zvimweni zvingava zvinosisira maningi kotiri?
11 MaKristu o ku Roma aidikana kujizemena owana kuti aidira pacinyi murangariro jao. Icinyi ‘zviro zvo kunyama’? Nyamasi uno, tinodikanavo kurangarira ngo pamusoro pokuti icinyi cinosisira maningi kotiri. Ngocapi cotinodisisa maningi kubhuya? Ngocapi cotinodisisa kuita? Vamweni mukuvo wese vanorangarira zvo kuravira mufumbo umweni wo doro, kusejesa kana kunyarisa nyumba javo, kutenga nguvo imbza, mawanire avangainda mare yakawanda kana kuronga kubuda feria. Zviro izvi azvizivi kushata. Ndi zviro zvatingaita mu upenyu. Inga muezaniso, Jesu wakapa vhinyu pa mabuso o mucadho, zve Pauro wakabvunja Timoti kuti amwe “padoko doro” ngo ndava yo uhomi hwake. (1 Timoti 5:23; Johani 2:3-11) Asi vhinyu aicaenga ciro cinosisira maningi mu upenyu hwavo. Tingativo kudini ndisu? Ngocapi cotinodakarira maningi mu upenyu?
12, 13. Ngenyi tinodikana kungwarira zvotinosotesa murangariro?
12 Pauro wakangwaja kudari: ‘Kudira murangariro pa zviro zvo kunyama zvinoreva rufu.’ (VaRoma 8:6, Shanduro yeNyika Itsva) Waida kunangenyi nga izvi? Kudari tikararama ‘mu kuzwirana no nyama,’ tinoruza ushamwari hwedu na Jehovha wari zve toruza upenyu hwedu kumbejiyo. Asi izvo azvidikani kuitika. Mundhu angacinja. Muciri kuceukija mundhu wo mufambiro wakashata wo ku Korinto waidikanaya kujingwa here? Wakacinja, woregera kutevera zvido zvake zvakashata. Woshandirazve Jehovha ngo njira yakacena.—2 VaKorinto 2:6-8.
13 Mwanarume uwo wakava muezaniso wakashatisisa ngo kurarama ‘mu kuzwirana no nyama,’ pikija zvakadaro, wakakwanisa kucinja. Ngokudaro, kudari muKristu akatanga kutevera zvido zvake zvakashata kunja ko ndhungamiriro ja Jehovha, angacinjavo. Kurangarira ngwajo ya Pauro kunotindundira kuti tiite cinjo jiri jese jotinodikana kuita.
‘KUDIRA MURANGARIRO PA ZVIRO ZVO KUMUJIMU’
14, 15. (a) Pauro anotibvunja kuti tidire murangariro papi? (b) “Kudira murangariro pa zviro zvo kumujimu” akurevi cinyi?
14 Pauro naapera kubhuya ngo pamusoro po ngozi jo ‘kudira murangariro pa zviro zvo kunyama,’ wakadurujira kudari: ‘Kudira murangariro pa zviro zvo kumujimu zvinoreva upenyu no runyararo.’ Mupfupo unoshamaisa zvakadini wotingava nawo!
15 Asi ‘kudira murangariro pa zviro zvo kumujimu’ azvirevi kuti mundhuwo aaitivo zvinoitwa ngo vamweni. Azvirevi kuti anorangarira no kubhuya ngo pamusoro pa Jehovha kana Bhaibheri basi. Inga Muezaniso, vashandiri va Mwari vo mu zana ro kutanga ro aipona aciita zvaiitwavo ngo vamweni. Aiha no kumwa, aicadha, airera mbhuri, zve ainga no basa.—Marco 6:3; 1 VaTesalònika 2:9.
Ciro caisisira maningi mu upenyu hwa Pauro kwainga kushandira Mwari
16. Icinyi caisisira maningi mu upenyu hwa Pauro?
16 Asi Pauro no maKristu amweni o kutanga avazivi kutendera kuti zviito izvi zvicizivi kushata zvive zvinosisira maningi mu upenyu hwavo. Inga muezaniso, tinozviziva kuti Pauro wairarama ngo kuita matende. Asi basa rake aricaengepi ciro cinosisira maningi mu upenyu hwake. Ciro caisisira maningi mu upenyu hwa Pauro kwainga kushandira Mwari. Pauro waidira murangariro pa basa ro kucumaira no kujijisa. (Verenganyi Maitiro o Vapostori 18:2-4; 20:20, 21, 34, 35.) Hama no hambzaji jo ku Roma jaidikana kutevejera Pauro, zve itusu tinodikanavo kumutevejera.—VaRoma 15:15, 16.
17. Ngoapi makomborero o kudira murangariro wedu ‘pa zviro zvo kumujimu’?
17 Upenyu hwedu hunozova hwakadini tikadira murangariro pa kushandira Jehovha? VaRoma 8:6 inoti: ‘Kudira murangariro pa zviro zvo kumujimu zvinoreva upenyu no runyararo.’ Kuita izvo zvinobatanija kutendera kuti murangariro wedu utungamirihwe ngo mujimu wa Jehovha no kujijira kurangarira inga ndiena. Jehovha anotipikira upenyu hunodakajisa no kupfaja wari uno, zve upenyu hucikaperi kumbejiyo.
Ngo besero ra Jehovha, tinokwanisa kuwana runyararo hwo mu murangariro
18. Tingava kudini no runyararo potinodira ‘murangariro pa zviro zvo kumujimu’?
18 Pauro waida kunangenyi paakananga kuti ‘kudira murangariro pa zviro zvo kumujimu’ kunotiviisira runyararo? Vandhu vese vanoda runyararo, maningi-ningi runyararo hwo mu murangariro, asi ndi vashoma maningi vanohuwana. Ngo besero ra Jehovha, tinokwanisa kuwana runyararo hwo mu murangariro. Tinokwanisazve kuva no runyararo no vopambhuri no mu ungano yedu. Zvecivoneka kuti atizivi kukwana, nguva no nguva, tinozvova no zvineso no hama no hambzaji jedu. Pozvinoitika, tinoteveja ngwajo ya Jesu yokuti: ‘Endai kozwirana no hama yako.’ (Mateu 5:24) Rangariranyi kuti hama kana hambzaji yenyu inoshandiravo Jehovha, “Mwari [anopa] rugarisiko.”—VaRoma 15:33; 16:20.
19. Mukhaindi wapi wo runyararo wakasiyana no uri wese havo watingawana?
19 Kudari tikadira murangariro wedu ‘pa zviro zvo kumujimu,’ tinozovazve no runyararo na Mwari. Muporofita Isaia wakatara kudari: ‘[Jehovha] munozomungwarira mu kunyarara kwakaperera; uwo murangarijo wake unogara komuri, ngokuti anomugonda.’—Isaia 26:3, BMAA; verenganyi VaRoma 5:1.
20. Ngenyi imwimwi munobonga maningi ngo ngwajo iri pa VaRoma 8?
20 Azvinenyi kuti tinovetera kurarama mbhera narini kumatenga kana pasi pano, tese tinobesereka ngo magama o ungwaru anowanika pa VaRoma cipauko 8. Tinobonga maningi ngokuti Bhaibheri rinotivangisa kuti tidire murangariro pa kushandira Jehovha kuciripi pa zvido zvedu. Tinozviziva kuti ngo kudira murangariro wedu ‘pa zviro zvo kumujimu,’ tinozova no mupfupo unoshamaisa. Pauro wakatara kudari: “Cipo ca Mwari, uhomi hucikaperi, ngo njio ya Kristu Jesu, Tenji wedu.”—VaRoma 6:23.
