1, 2. VaRoma 5:12 ingatibesesa kudini?

VAROMA 5:12 inoti: “Hwakangwina uxaixi mu nyika yo pasi ngo ndava yo mundhu umwe, ngo uxaixi hwongwinavo rufu; ndibzonavo bzondhobzo rufu hwakagumira vandhu vese, ngokuti vese vakaxaixa.” Iyi ndi imwe yo mavhesi otinonasa kuziva zve tinoanja kuishandisa potinojijisa vandhu ngo pamusoro po Bhaibheri.

² Vhesi iyo inoshandiswa kazinji mu mabhuku Bhaibheri Rinojijisenyi Kamare? no Bhaibheri Ringatijijisenyi? Potinojija zvipauko 3, 5, no 6 no vana vedu, no vamweni, tinoverenga VaRoma 5:12. Tingashandisa vhesi iyi kuitira kuvabesera kuzwisisa kuti ngenyi nyika asipi paradhiso, ngenyi tinoda muripo zve ngenyi tinofa. Asi vhesi iyi inobesazve tese kuti tijikise kubongesera kwedu ngo ushamwari hwedu na Jehovha. Ingatibesera kuti tivangise cisungo cedu co kumudakajisa no kuramba ticivetera zvaakatipikira.

3. Tinodikana kurangarirenyi ngo pamusoro po mugariro wedu?

 ³ Zvinosuruvarisa ngo zvokuti tese tiri vashaishi. Tinoposa njiku jese. Asi Jehovha wakazara ngo unyasha. Anozviziva kuti atizivi kukwana, zve anoda kutiregerera. (Nduyo 103:13, 14) Jesu wakatibvunja kuti tinodikana kukumbira Mwari kuti aregerere zvishaishi zvedu. (Luka 11:2-4) Jehovha paanoregerera zvotakaposa kare, atidikani kugara ticindozvirangarija. Ngativone kuti Jehovha anokwanisisa kudini kutiregerera.

4, 5. (a) Zvicinyi zvinotibesera kuzwisisa VaRoma 5:12? (b) “Unyaxa” zvinorevenyi?

⁴ Bhuku ro VaRoma, maningi-ningi cipauko 6, cinotibesera kuzwisisa matajiro anotiita Jehovha. Mu cipauko 3, tinojija kuti “vese vakaxaixa.” Pauro wakazonanga kudari: ‘Vanoita varungami, ngo unyaxa kamare, ngo ndava yo ruponeso hwakaitwa ndi Jesu Kristu.’ (VaRoma 3:23, 24) Gama ro ciGiriki rakasandujwa apa kuti “unyaxa” rinopa murangariro wo kuita ciro co kunaka mwoyo kuno mundhu acizivi kucishandira, zve acikafaneri kuciashira, ticikaveteri kuhwirijihwa ndiyena.

⁵ Umwe mujiji wakasanangura kuti gama ro ciGiriki iri, rinonangira zvakaita Mwari na Jesu kuti vaponese vandhu vese ku ushaishi no rufu. Ngokudaro, Biblia Mazwi a Mwari ro Cindau rakasanduja gama ro ciGiriki iri kuti “unyaxa.” Ngativone kuti Mwari wakatiitirenyi zve unyasha hucikafaneri kuwana hwake hunotibesera kudini wari no kutipa vetero yo kumbeji.

6. Ndiani anobesereka ngo unyasha hucikafaneri kuwana hwa Mwari, zve kuitisa kudini?

⁶ Ngokuti Adhamu wakashaisha, kushaisha no rufu zvakazogumira vese vakazorarama sure kwake. Ngo iyo ndava kuti Bhaibheri rinonanga kudari: ‘Ngo kushaisha ko mundhu, kufa kwakatonga ngo ndava yo umwe.’ Asi Jehovha wakatatija unyasha hucikafaneri kuwana hwakakura no kunasirira njira yo kuponesa vandhu vese ecishandisa ‘mundhu umwe, Jesu Kristu.’ (VaRoma 5:12, 15, 17, BMAA) “Ngo kupurukira kwa umwe, vese vanozoita varurami.” Zve vangavetera “uhomi hucikaperi ndi . . . Jesu Kristu.”—VaRoma 5:19, 21.

7. Ngenyi cipo ca Mwari co muripo cinotatija kunaka mwoyo kwake zve acitifaneri?

⁷ Rangariranyi izvi: Jehovha aacaidikana kupa Mwana wake inga muripo. Asi wakatatija kunaka mwoyo kukuru ngo kunasirira gwanja kuitira kutiponesa ku ushaishi no rufu. Apana na umwe wedu anofanera zvotakaitihwa ndi Mwari na Jesu. Kubonga kwakadini kotinako ngo kuita kwavo kuti zvikwanisike kuti tiregerehwe zvishaishi zvedu zve tirarame mbhera narini! Tingatatija Mwari kubonga kwedu ngo mararamiro edu.

8. Murangariro wapi wotinodikana kuramba?

⁸ Tinozviziva kuti Jehovha anoda kuregerera zvishaishi, pikija zvishaishi zvikuru. Asi atidikani kushandisa unyasha hucikatifaneri hwa Jehovha inga thangwe rokuti tiite ciro cakashata, torangarira kuti, ‘Jehovha anozondiregerera.’ Mu zana ro kutanga ro makore, pikija vapostori vamweni povaenga penye, kwaenga no maKristu aenga no mugariro wondhowo. (Verenganyi Juda 1:4.) Nyamasi uno, tinodikana kungwarira kuti titame kukwevejehwa ngo mugariro wakadaro zve totanga kurangariravo kudaro.

9, 10. Pauro no vamweni vakasujunuriswa kudini mu ushaishi no rufu?

⁹ Pauro wakabvunja maKristu kuti zvaizova zvakashata kurangarira kuti kudari vakaramba vacishaisha, Mwari waizogara acindovaregerera. Pauro wakananga kuti vaidikana kuramba murangariro uwo ngokuti vainga ‘vafa ku ushaishi.’ (Verenganyi VaRoma 6:1, 2, Shanduro yeNyika Itsva.) Pauro waida kunangenyi?

¹⁰ Acishandisa muripo, Mwari wakaregerera zvishaishi zva Pauro no maKristu amweni o muzana ro kutanga ro makore. Jehovha wakavazoja ngo mujimu mucena kuti vave vana vake. Kudari vakaramba vakagondeka, vaizorarama ku matenga no kuzotonga na Kristu. Zvecivoneka kuti vaenga vacapona pasi pano, ngenyi tingati vaenga ‘vafa ku ushaishi’? Pauro wakashandisa kuezanisira kuti atatije mararamiro avo akacinjisa kudini. Iyena wakananga kuti Jesu naafa, wakamuswa inga cisikwa co kumujimu cicikafi. Ngokudaro, kufa kwaenga “akucamunyisi.” Mu njira yakafanana, zvaiita inga kuti maKristu aenga afavo. Upenyu hwao hwakacinja ngokuti aazivi kutenderazve kutungamirihwa ngo zvido zvao zvakashata. Kubvira pondhopo, vakaita mbhera panoperera simba ravo vave no mararamiro anodakajisa Mwari. MaKristu ao ainga ‘afa ku uxaixi; oraramira Mwari, mwa Kristu Jesu.’—VaRoma 6:9, 11.

11. Kuitisa kudini maKristu nyamasi uno ‘akafa ku ushaishi’?

¹¹ Tingativo kudini ngo pamusoro pedu? Ngo maitiro api taenga ‘vakafa ku ushaishi’? Kangaije taiita zviro zvizinji zvakashata ticikazivi kuti Jehovha waizvivona kudini. Taenga inga ‘vaxandiri [vo] psina no bzicizivi kurungama,’ zvinoreva, “varanda vo uxaixi.” (VaRoma 6:19, 20) Asi potakajija mu Bhaibheri mararamiro aanoda Jehovha kuti tiite, takaita cinjo mu upenyu hwedu, tozvipira kwaari no kubhabhatijwa. Takava no cido cakavanga co kuzwira Jehovha no kurarama ngo maitiro anomudakajisa. ‘Takakungurihwa uxaixi, tojiita varanda vo ururami.’—VaRoma 6:17, 18.

12. Umwe na umwe wedu anodikana kukhetenyi?

¹² Asi, ticiri kudikana kukheta. Pauro wakati: “Mucadotenda kuti uxaixi utonge muviri wenyu, unozofa, nokuti kuteveja madisiro awo.” (VaRoma 6:12) Tingakheta kuzvipekejera ku murangariro no zvido zvedu zvakashata kana kukheta kujibata totama kutungamirihwa ndizvona. Zvibvunjisenyi kudari: ‘Ndinotendera kuti zvido zvangu zvikure mbhera  pakundishaishisa? Kana ndinozviramba ciriporipoco?’ Kudari tecibonga ngo mwoyo wese unyasha hucikafaneri kuwana hwa Mwari, tinozoita mbhera panoperera simba redu kuti timudakajise.

13. Ngenyi tingathembadi kuti tinokwanisa kuita zvakanaka?

¹³ Mu zana ro kutanga ro makore, vandhu vamweni ku Korinto vaingaya mbabva, vanarume vaivatana no vanarume, vapombori, vanamati vo zvithombi no zvidhakwa vakaguma pa kuziva no kuda Jehovha, votocinja. Vakapseruka ngo zvovaiita. (VaRoma 6:21; 1 VaKorinto 6:9-11) MaKristu o ku Roma aidikanavo kuita cinjo jakadari. Pauro wakaabvunja kudari: “Mucadopira muviri wenyu ku uxaixi, kuti ubatire bzicizivi kururama. Jipirenyi mu mabasa a Mwari, inga vandhu vanopona ngo papsa kubva ko vakafa: Muviri yenyu ibatire ururami.” (VaRoma 6:13) Pauro waenga no gwinyiso rokuti aizoita zvakanaka zve aizoramba acibesereka ngo unyasha hucikafaneri kuwana hwa Mwari.

14, 15. Ngozvapi zvotinodikana kuzvibvunjisa?

¹⁴ Zvakaezanavo na nyamasi uno. Hama no hambzaji jedu jimweni kangaije jairarama inga zvairarama hama jo ku Korinto. Asi pojakaguma pa kuziva Jehovha, jakacinja. Zvakaidari inga ‘jakasambijwa, joceneswa.’ Kuti tidakajise Jehovha, tese takaita cinjo mu mararamiro edu. Pikija wari, tiri kuda kutatija kuti tiri kubonga maningi ngo unyasha hucikafaneri kuwana hwa Mwari. Ngokudaro, takatema civaringo co kuhwisana no zvido zvedu zvakashata, toshandisa upenyu hwedu pa kushandira Jehovha.

¹⁵ Zvokadi, tinodikana kuramba kuita zvishaishi zvikuru zvaiitwaya ngo vamweni ku Korinto. Atidikani kuramba teciita zvishaishi izvi tecivetera kuti Mwari anozotiitira unyasha hwake hucikafaneri kuwana, wotiregerera. Asi tingativo kudini ngo zvishaishi zvingareruswaya ngo vamweni? Takatema civaringo cokuita mbhera panoperera simba redu kuti tizwire Jehovha mu zvese here?—VaRoma 6:14, 17.

16. Tinozvizivisa kudini kuti tinodikana kuramba kuita zvishaishi zvicikazivi kunangwa pa 1 VaKorinto 6:9-11?

¹⁶ Rangariranyi ndi mupostori Pauro. Iyena wakatara kudari: “Inini ndiri mundhu wonyama wakatengeswa ku uxaixi inga muranda. Mbzakadi; andibzizivi uxoni bzo ndinoita. Ngokuti, andiiti bzondinoda.” (VaRoma 7:14, 15) Pikija aacaiita zviro zvinonangwa pa 1 VaKorinto 6:9-11, Pauro wakadavira kuti wainga aciri mushaishi. Iyena waida kudakajisa Jehovha, ngokudaro, waivangisira kuti atame kuita zvakashata. (Verenganyi VaRoma 7:21-23.) Tingatevejera muezaniso wake no kuita zvese zvotinokwanisa kuti tizwire Jehovha.

17. Ngenyi munoda kuva makagondeka?

 ¹⁷ Inga muezaniso, tinozviziva kuti tishandire Jehovha tinodikana kuva takagondeka. (Verenganyi Mazwi Akangwara 14:5; VaEfeso 4:25.) Atidi kuita inga ndi Sathana, uwo ari “baba wo unyepi.” Tinoceukija kuti Anania no mukaji wake vakafa ngo ndava yo kunyepa. Ngokudaro, atidikani kunyepa. (Johani 8:44; Maitiro o Vapostori 5:1-11) Asi kuva wakagondeka asipi basi kutama kunyepa. Kudari tecibonga ngo mwoyo wese unyasha hucikafaneri kuwana hwa Mwari, tinovavo vakagondeka mu njira jimweni.

18, 19. Zvinoda kurevenyi kuva wakagondeka?

¹⁸ Mundhu anova acizivi kugondeka pikija acizivi kunyepa. Inga muezaniso, Jehovha wakabvunja vaIziraeri kudari: “Apadikani pakati penyu [kuva no] anoba, nokuti anocengeja no kunyepera mudoni wake.” Ngenyi avacaidikana kuita izvi? Jehovha wakati: “Itanyi vakacena, ngokuti inini, [Jehobva] Mwari wenyu, ndiri wakacena.” (VaLevi 19:2, 11) Pikija tikatama kunyepa, asi toita kuti vamweni vatende zviciripi izvona, atiripi kugondeka.

¹⁹ Inga muezaniso, rangariranyi mundhu wabvunja shefu wake kana vamweni  vaanoshanda navo kuti ari kuda kukasika kubva pa basa ngokuti ari kuda koonasirira shwiro jo kurapwa. Asi iri asipi thangwe guru kamare. Iyena ari kuda kutanga ambopesiari. Zvokadi, wananga kuti ari kuda koonasirira “shwiro jo kurapwa” ngokuti paanonga ecipesiari anozoshandisa nguva shomani basi kuti adarike ecitenga mutombo panotengesehwa mutombo kana panoshandira medhiko. Waro ari kubhuya cokwadi kana ari kucengeja vamweni? Mundhu uwu ari kuita kuti vamweni vatende zviciripi zvokadi. Nguva jimweni vandhu vanocenge vamweni kuti vawane zvavanoda kana kuti vatame kupanicwa. Asi itusu tinozwira Jehovha, uwo anoti: “Apadikani pakati penyu . . . [kuva no] anocengeja.” Itusu tinoda kuita zvakanaka no zvakacena pa meso pake.—VaRoma 6:19.

20, 21. Kudari tiri kubonga ngo mwoyo wese unyasha hucikafaneri kuwana hwa Mwari, tinodikana kunyenyazve cinyi?

²⁰ Zvokadi kamare, tinonyenya uhure, kudhakwa no zvishaishi zvimweni zvikuru. Asi kupinda izvo, tinodikana kunyenya ciricese cingacamwisa Jehovha. Inga muezaniso, atinyenyi basi uhure, asi tinonyenyazve mabungaijo anokhwijirija uhure. Atinyenyi kudhakwa basi, asi atimwi mbhera kuva no cijungu. Zvingada kuvangisira kuti tihwisane no muejo jakadari, asi zvinokwanisika.

²¹ Tinoda kuva no cido co kuita inga zvakananga Pauro kuti: “Mucadotenda kuti uxaixi utonge muviri wenyu, unozofa, nokuti kuteveja madisiro awo.” (VaRoma 6:12; 7:18-20) Izvokadi kuti atikwanisi kuramba zvishaishi zvese. Asi potinohwa no mukhaindi wese wo zvishaishi, tinotatija kuti tiri kubonga ngo mwoyo wese ngo unyasha hucikafaneri kuwana hwotakaitihwa ndi Mwari na Jesu.

22. Tinozovetera kuwanenyi kudari tiri kunasa kubonga ngo unyasha hucikafaneri kuwana hwa Jehovha?

²² Jehovha wakatiregerera zvishaishi zvedu zve acaramba acindotiregerera. Tiri kubonga maningi ngo unyasha hwake hucikafaneri kuwana. Ngokudaro, ngatishande ngo simba kuti tirambe kuita zviro zvaanonanga kuva zvakashata, pikija kudari vamweni avazvivoni kuva zvishaishi. Tinozovetera kuwanenyi ngo kuita kudaro? Pauro wakati: “Kaveta waro, nomasununguhwa ku uxaixi no kuita vateveri va Mwari, munowana mucero wo kuita vakacena mwoyo; kupejisira kwenyu, uhomi hucikaperi.”—VaRoma 6:22.