IZVI zvicito zvaitika ndainga ndotodakarira cokwadi. Mai wangu vainga vakaashira mabhuku manganani akacijikira mu Bhaibheri, zve ndaimadakarira maningi. Ndaida maningi kuvona mapikica aiwanikemo. Babangu avacaida kuti mangu vabhuye na inini ngo zvovaijija. Asi, ndaida maningi kuziva, ngo kudaro ndaivaitira mubvunjo, ngo iyo ndava vaijija na inini baba vacipo. Inga muviyo, ininivo ndakazotemavo civaringo co kupira upenyu hwangu kuna Jehovha. Ndakabhabhatijwa mu gore ro 1943, ku Brakipori, Ingratera, pandainga no 10 ro makore o kubahwa.

Kubvira pondhopo, inini na mai nguva jese taienda kocumaera. Ngarijo, taishandisa magaramafoni pa kucumaera. Iwona aikura no kurema mutendo unokwana kuita kiru murongomuna no meya. Rangariranyi basi, cimufana ciri kujipana no zigaramafoni rakadaro!

Pandainga no 14 o makore, ndainga ndoda kuva piyona. Mai vakananga kuti ndaidikana  kutanga ndabhuya no mushandiri wo hama (nyamasi anozwi muvonereri wo ndharaundha). Iyena wakandipa zano ro kuti ndaidikana kueja kujija basa riri rese kuti ndizojisapote mu basa ro upiyona hwangu. Ngozvandakaita. Papera makore maviri ndecibata basa, ndakabhuya no muvonereri umweni wo ndharaundha ngo kuda kwangu kuva piyona, wondidavira kuti “Atotangai!”

Ngo kudaro mu mweji wa Nyahwiriri wo 1949, inini na mai wangu takasiya mobhiria jese toenda kogara ku Middreto, phedo no Manchesteri, kondhono takatanga kuita upiyona. Papera mweji murongomuna, ndakapsaka hama yainga piyona kuti ndishande nayo. Hofise yo cine yakandipa zano ro kucinja kwenda ku ungano imweni yaibva kufununguhwa ku Iriram. Mai wangu no hambzaji imweni vainga mapiyona o ungano imwenivo.

Ndainga basi no 17 o makore o kubahwa, asi ndainga no mutoro wo kuitisa musongano pomwepo no mudoni wangu, ngo kuti pa ungano imbza patakaendaya painga no hama shoma jakakwaniriswa. Pa kufamba ko nguva, ndakacinja kwenda ku Ungano yo Buxtoni, yainga no vacumaeri vashoma zve yaida besero. Zvese izvi zvakandinasirira kuitira mabasa andaizogajwa kumbeji.

Mu gore ro 1951, ndakatara petisau kuti ndiende ku Cikora co Bhaibheri co Giriadhi co Tore de Vijhia. Asi, mu mweji wa Mbuji wo gore ro 1952, ndakadaniwa kuti ndiyende ku basa ro usoca. Ndakakumbira kuti vatame kundibatanija pa basa iri ngo kuti ndainga mucumaeri wo nguva yakazara, asi tiribhunari yakaramba cikumbiro cangu zve ndakatongehwa mweji mutandhatu ndiri mu jere. Pandainga ndiri mondhomo, ndakaashira mukoka kuti ndiende ku cikwata co ci22 co Cikora co Giriadhi. Pakundobuda mu jere mu mweji wa Khunguru wo gore ro 1953, ndakapakira piketi yaidanijwa Georgic ndoita hwendo kwenda ku Novha Yorki.

Pandakandoguma, ndakaenda ku Gungano ro Mbungano yo Nyika Imbza ro 1953. Perepo ndakaita hwendo ngo citima kwenda ku South Lansing, Novha Yorki, iyo kwaiwanika Cikora  ici. Zvecivoneka kuti ndainga ndecibva mu jere ndainga no mare shoma. Pandakabzuka mu citima, ndakapakira karu imweni kuti ndigume ku South Lansing, asi ndakafiyari pasajero umweni 25 o masentavho.

Ku Cikora co Giriadhi takaashira rovejo inoshamaisa yakandibesera ‘kuva zviro zvese ku vandhu vo majinja ese.’ (1 VaKorinto 9:22) Paul Bruun, Raymond Leach na inini takagajwa koshanda ku Firipina, asi takaamba kuvetera mweji jakaanda kuti tiashire maviza [maphaso anodiwa pa kuda kwenda nyikanja] edu. Perepo takaita hwendo ngo piketi kwenda ku Rotterdam, Horanda. Pasure pazvo, takaambuka Mar Mediterrâneo, Canal de Suez no Oseano Indiko kuti tigume Marazia perepo Hongi Khongi. Pakupera ko 47 o njiku tiri mu jombe, takaguma ku Manira pa njiku 19 ya Cikowe, 1954.

Kondhono, takadikana kuroveja magariro mapsa, nyika imweni, zve ndumi imweni. Asi pa kutanga, utatu hwedu takagajwa ku ungano yo Dhorobha ro Kezoni, dhorobha ro kuti huzinji hwo vandhu vaishandisa Cingezi. Nopapera mweji mutandhatu, tainga tokwanisa kuvereketa magama manganani o ndumi yo Tagarogi. Asi takazogajwa pa bvaza yakatevera kwakazvicinja izvi.

Pa njiku imweni, mu mweji wa Mauwe gore ro 1955, patakaguma pa muzi tecibva mu basa ro mu munda, inini na hama Leach takawana karata jainanga kuti tainga tagajwa kuva vavonereri vo ndharaundha. Ndainga no 22 o makore o kubahwa basi, asi kugajwa uku ko basa ro kufambira raizondijijisa makwanja mapsa o ‘kuva zviro zvese ku vandhu vo majinja ese.’

Inga muezaniso, inga muvonereri wo ndharaundha, pondakaita hurukuro ya vese yo kutanga, ndakaiitira kunja ko armazee imweni. Mu nguva yondhoyo, ku Firipina, hurukuro ja vese jakaitihwa kamare pambhene! Pandainga ndecibvakacira ungano jakasiya-siyana mu ndharaundha, ndaiita hurukuro jangu mu zvimacesa, mu mabazari, kumbeji ko nyumba huru jaishandiswa ngo vandhu vazinji, mu kampu jinotambihwa bhora ro nyara, mu maparke, zve kazinji mu makhona mo zvitaka zvo mu dhorobha.  Bvaza imweni ku Dhorobha ro San Pablo, ndaida kuita hurukuro pa bazari rimweni, so azvicaikwanisika ngo kuti nvura yainga yecina maningi. Ngo kudaro, ndakabvunja hama jaitungamirira kuti ndaizoiitira mu Nyumba yo Umambo. Nondapeja kuiita, hama vakandibvunjisa kuti zvaizoita here kuiripota inga musongano wa vese, zvecivoneka kuti aizivi kuitihwa pambhene!

Nguva jese ndaigumira mu mamuzi mo jihama. Pikija ijona jainga jicina nyumba jakakura maningi, asi jaicena maningi. Kazinji mubedhu wangu wainga bonde. Ndau yo kugezera yainga ngo sure ko nyumba, kokuti ari wese waikhirira waikwanisa kundivona. Ngo kudaro ndakakwanisa kujija kugeza ngo maitiro akareruka. Ndaiita hwendo ngo mashibhombo zve nguva jimweni ngo gazirina kuti ndiyende ku zvirundu zvimweni. Mukati mo makore ese o basa rangu, andizivi kumbova no karu yangu kamare.

Ndakajija ndumi yo Tagarogi haiwa mu Shikora kamare. Ndakaijija ngo kupurutana hama patainga mu basa ro mu munda zve pa musongano. Ijona jaida kundibesera kuziva ndumi iyi, zve ndaibongesera maningi ngo kusengerera kwajo no kunanga zviro ngo maitiro akajeka.

Nguva payainga yecidarika, ndakadikana kuita cinjo mukuzwirana no basa rondainga ndagajwa ro kufambira ungano. Mu gore ro 1956, patakabvakacihwa ndi Hama Nathan Knorr, takava no gungano mu nyika yedu. Pa gungano rondhoro ndakagajwa kuitira kubhuya no vatori vo masoko vaizoviya. Ndainga ndicizivi kumbozviitazve, asi hama jakandibesera kuzviita. Pasure pazvo, pacito papera gore, pa bvaza iyi ndakashanda inga muvonereri wo gungano.  Hama Frederick Franz vatatibvakacira vecibva ngo cine ro nyika yese, ndakajija zvizinji ndivona. Pavaita hurukuro ya vese, vainga vakasimira Barong Tagalog, umwe wo mushovo wo nguvo jinosimihwa ku Firipina. Izvi zvakadajisa maningi hama jo kondhono, zve zvakandiitisa kuti ndidisise kurovejana no vandhu vo kondhono.   

Ndakadikanazve kuita cinjo pandakava muvonereri wo mutundhu. Mu mazuva ondhoo, takavonesa vhidhio yainga no musoro unoti A Felicidade da Sociedade do Novo Mundo. Kazinji vhidhiyo iyi taiivonesa pambhene, zve ngo ndava yazvo nguva jimweni tairumwa ngo zvitongoni. Izvona zvaiteverera kubvenekera kwaiviiswa ngo mucini wo kuvonesa vhidhio, zvotonamirira pa mucinipo. Pasure pazvo tainga no basa ro kuucenesa! Azvicaireruka kuronga zviitiko izvi, asi pasure pazvo, taidakara maningi ngo kuvona vandhu vese veciviya koojijira ngo zvo sangano ra Jehovha ro nyika jese.

Mu ndharaundha jimweni, majipadri o ciara Katorika, aivangirija vatongi kuti vatame kutitendera kuita magunano. Zve pataindoitira gungano redu pa ndau iri phedo no ceci yavo, ivona vairija zinginde-nginde ravo kuitira kuti vandhu vatame kuzwa hurukuro yedu. Pikija no zvese izvi, vandhu vairamba vecizwa cokwadi, zve vazinji mu ndau iji, wari, vari kunamata Jehovha.

Mu gore ro 1959, ndakagajwa kooshandira ku hofisi yo cine. Kondhoyo ndakajija zvakawanda. Pasure po mukuvo, ndakakumbihwa kuti ndibvakacire nyika jimweni, inga muvonereri wo zona. Pa umwe wo hwendo iji, ndakaziva imwe hambzaji yainga misionario ku Tairandia, yaizwi Janet Dumond. Takatanga kutarira karata, papera mukuvo, takarovorana. Takashandira Jehovha takadakara ko makore 51.

 Ndakava no mudakaro wo kubvakacira vandhu va Jehovha vo 33 o nyika. Ndinobonga maningi ngo kuziva kuti mabasa ondakatanga kugajwa akandibesera kukwanisa kurarama no vandhu vano magariro akasiyana-siyana. Kufambira kondaiita kwandibesera kuzwisisa zvakajeka kuti Jehovha anoda mushovo wese wo vandhu.—Maitiro o Vapostori 10:34, 35.

Inini na Janet tiri kuva no mudakaro wo kushanda no hama ku Firipina, zve wari tiri kuramba tecishanda ku hofisi yo cine ku Dhorobha ro Quezon. Wari, mutengo wo vacumaeri vo nyika iyi waengejeka makumi no makumi ko 60 o makore adarika. Pikija sure ko nguva yondhoyo, ndiciri kudisisa kuita cinjo kuti ndizwirane no zvinoda Jehovha. Inga muezaniso, ngo ndava yo cinjo jakaizwa sambi-sambi ngo sangano, takadikana kuva takanasirika kuti tiite cinjo.

Tiri kuita zvese zvatinokwanisa kuti titeveje ndhungamiriro ja Jehovha, zve zviri kutiviisira mudakaro mu upenyu. Tiri kuejavo kuzwirana no cinjo iri yese inodiwa kuti tishandise kuitira kuti tinase kushandira hama jedu. Hina, takatema civaringo co kuramba tiri ‘zvese ku vandhu vo majinja ese.’