1, 2. (a) Rudo hunozwirana kudini no gonda? (b) Mubvunjo japi joticada kujija?

BABA wedu, Jehovha, vanopikira kukomborera vashandiri vavo vakagondeka. Iyi ndi imwe njira yaanotatija ndiyona rudo hwake Jehovha kotiri, zve tinomuda “ngokuti ndiyena wakatanga kutidisa.” (1 Johani 4:19) Rudo hwedu kuna Jehovha pohunokura, gonda redu kwaari rinovanga zve tinokhohwa maningi kuti Jehovha anopfupa vaya vaanoda.—Verenganyi Vaheberi 11:6.

² Jehovha i mupfupi. Iri i divi guru ro zvaari no zvaanoita. Ngokudaro, gonda redu kuna Mwari arizivi kukwana kudari atikhohwi kuti anozopfupa vaya vanomupsaka ngo mwoyo wese. Ngenyi? Ngokuti “rutendo ndihwona hwokadi hwokuti tino bziro bzo tinovetera.” (Vaheberi 11:1) Kutenda kana gonda zvinoreva kugonda zvakaperera kuti Mwari anozokomborera vagondeki vake. Asi vetero yo  mupfupo inotibeseresa kudini? Jehovha wakakomboreresa kudini vashandiri vake vokare no vowari? Ngativone.

3. Cipikihwa capi cotinoverenga pa Malakia 3:10?

³ Jehovha Mwari wakapikira kupfupa vashandiri vake vakagondeka. Iyena anotikoka kuti tiite mbhera panoperera simba redu no kugonda kuti anozotikomborera. Jehovha wakati: “Ndiejenyi.” Wakaenderera mberi aciti: “Munozovona kuti ndinozofunungura misuvo yo mugore, ndozodurura panyezuru penyu makomborero akawanda.” (Malakia 3:10) Tinotatija kubonga kwedu ngo kupa kwake potinotendera mukoka wake wokuti timueje.

4. Ngenyi tingagonda cipikihwa ca Jesu cinowanika pa Mateu 6:33?

⁴ Jesu wakapikira vajiji vake kuti kudari vakadira Umambo pa kutanga, Mwari waizovasapota. (Verenganyi Mateu 6:33.) Jesu wakananga izvo ngokuti waiziva kuti zvipikihwa zva Mwari nguva jese zvinoitika. (Isaia 55:11) Ngokudaro, tingavavo no gwinyiso rokuti kudari tikava no gonda rakakwana kuna Jehovha, iyena anozokwanirisa cipikihwa cokuti: “Andicakuregeri wega nokuti kukusia.” (Vaheberi 13:5) Cipikihwa ca Mwari ici cinotibesera kugonda masoko a Jesu anowanika pa Mateu 6:33.

5. Ngenyi tese tinovangiswa ngo zvakapinguhwa Pedhru ndi Jesu?

⁵ Mupostori Pedhru wakabvunjisa Jesu kudari: “Itisu takasiari bzese tomutevera,  tinozowanenyi?” (Mateu 19:27) Jesu aazivi kumuvereketera ngo kuita kwake mubvunjo uwo. Kunja kwa izvi, Jesu wakabvunja vajiji vake kuti vaizopfupwa ngo kuzvipira kwavo. Vapostori no vagondeki vamweni vanozotonga na Jesu kumatenga kumbejiyo. Asi Jesu wakanangazve kuti pikija kuna mupfupo wokuti: “Mundhu wese anosia nyumba, vanukuna, majiyaya, baba na mai, vana dangani minda ngo ndava yo zina rangu, anozoaxira zana ro muengejero, wozova no kupona kucingaperi.” (Mateu 19:29) Vateveri vese va Jesu vanowana majibaba, majimai, hama, majiyaya no vana mu ungano nyamasi uno. Izvo zvina mutengo mukuru kupinda ciricese cotakapira ngo ndava yo Umambo hwa Mwari.

6. Ngenyi Jehovha anopikira kupfupa vashandiri vake?

⁶ Kunja ko kubusa makomborero acikanangiki wari, tinovetera makomborero akawanda maningi kumbejiyo. (1 Timoti 4:8) Jehovha anopikira kupfupa vashandiri vake vakagondeka, zve kuziva izvi kunotibesera kuti tivangirire pa mukuvo jinonesa. Ngo kunasa kukhohwa kuti Jehovha “ndiyena anopa mupocero vandhu vanomupsanga,” tingakwanisa kugara takagondeka.—Vaheberi 11:6.

7. Vetero vakaezanisa kudini no nanga?

⁷ Pa Hurukuro yo pa Dundhu, Jesu wakati: “Dakaranyi, sekereranyi, ngokuti mupocero wenyu unozoita mukuru mugore. Ngokutibze vakagogomeresa kudaro vaporofeti vakamutungamirira.” (Mateu 5:12) Vashandiri va Mwari vamweni vanozoashira mupfupo wavo kumatenga. Zve vamweni vanozoashira mupfupo wo upenyu hucikaperi mu paradhiso pasi pano. Iro i thangwezve rokuti ‘tidakare no kusekerera.’ (Nduyo 37:11; Luka 18:30) Asi kotiri tese, vetero yedu ingava “inga nanga yokadi-kadi no yakavangisisa.” (Vaheberi 6:17-20) Kudari inga nanga inoita kuti piketi igare yakacijikira pa mukuvo wo bepo, gonda rakavanga rinotibesera kuti tigare takavanga. Rinotivangisa kuti ticungirire mukuvo jinonesa.

8. Vetero yedu inothurujisa kudini kuthimwa-thimwa?

⁸ Vetero yedu inotibesera kuti tithuruje mazwiro o kuthimwa-thimwa. Kudari inga barsaramo rinoitisa sethere ganda redu, zvipikihwa zva Mwari zvinothuruja kuthimwa-thimwa ko mwoyo wedu. Zvinoembezera kuziva kuti Jehovha anozotikorondha potinomuthurira muthwaro wedu. (Nduyo 55:23) Tinganasa kuthemba kuti Mwari anokwanisa “kuita bzese . . . kupindirija mukumbiro . . . yedu.” (VaEfeso 3:20) Jehovha aazotibesi kakawanda basi, asi anozvotibesa kakawandisisa!

9. Tingavisa kudini no gwinyiso rokuti tinozowana makomborero a Jehovha?

 ⁹ Kuti tiwane mupfupo, tinodikana kuva no gonda rakakwana kuna Jehovha no kuzwira ndhungamiriro jake. Mosi wakabvunja jinja ro Iziraeri kudari: “[Jehovha] Mwari wako anozokukomborera, mu nyika yaanozokupa kuti iite ndhaka yako, basi ukapurutana bzokadi izwi ra [Jehovha] Mwari wako, wecingwarira kuti uteveje mupango yese yo ndinokubvunja. Apo [Jehovha] Mwari wako akakukomborera, kudari ngo bzaakananga.” (Deuteronòmio 15:4-6) Muri kukhohwa kamare kuti Jehovha anozomukomborera kudari mukagara mucimushandira no makagondeka here? Muna thangwe rakanaka kuti mukhohwe kudaro.

10, 11. Jehovha wakapfupisa kudini Josefa?

¹⁰ Bhaibheri rakatahwa kuti ritibesere. Mukati mwaro tinowana muezaniso jakawanda jokuti Mwari wakapfupisa kudini vashandiri vake vakagondeka vokare. (VaRoma 15:4) Josefa waenga muezaniso wakanaka pa swiro iyi. Pakutanga, hama jake jakamutengesa inga muranda. Tevere, mukaji wa tenji wake wakamupumbha zvaacikazivi kuita zve wakaendeswa mu karaboso yo ku Ejipita. Josefa paaenga mu karaboso, wakaparajana na Jehovha here? Aazivi! Bhaibheri rinoti: “[Jehovha] Mwari wakava na Josefa, womuitira unyaxa” zve: ‘Mwari wainga naye; woita kuti bzibudirire bzese bzaaiita.’ (Genesi 39:21-23) Pikija no mukuvo jo kunesa ijo, Josefa wakavetera Mwari wake ngo kusengerera.

¹¹ Mu makore akazotevera, Faro wakazobudisa Josefa mu karaboso, zve muranda wo kushoropoteka uu wakazova mutongi mukuru wocipiri mu Ejipita. (Genesi 41:1, 37-43) Josefa no mukaji wake povakava no vana vaviri, “Josefa wakadura mwana wake wo dangwe kuti Manasa, ngokuti wakati: ‘Mwari wakandiita kuti ndikanganwe kutambujika kwangu kwese, no ukama hwa baba wangu wese.’ Zina ro wocipiri ndi Efraimi, ngokuti wakati: ‘Mwari wakandiberekesa mu nyika yo kutambujika kwangu.’” (Genesi 41:51, 52) Jehovha wakapfupa kugondeka kwa Josefa, zve wakakwanisa kuponesa vaIziraeri no vaEjipita pa njara. Zve Josefa wakaziva kuti Jehovha ngaakamupfupa no kumukomborera.—Genesi 45:5-9.

12. Jesu wakarambisa kudini wakagondeka paaiejwa?

¹² Jesu Kristu wakarambavo acizwira Mwari pikija no muejo jakawanda, zve Jehovha wakamupfupa. Icinyi cakabesera Jesu kuti arambe akagondeka? Soko ra Mwari rinodurujira kudari: “Yena, eciziva rudakaro hwaizomuviira, wakadavira kufa pa [“danda ro kutambujikira,” Shanduro yeNyika Itsva], acikanyoejeki.” (Vaheberi 12:2) I zvokadi kuti Jesu wakawana mudakaro ngo kukwanisa kucenesa zina ra Mwari. Zve Jesu wakapfupwa  ngo kutendehwa ndi Baba wake no rudakajiso huzinji hunoshamaisa. Bhaibheri rinonanga kuti ‘wakagara pa mukono muho wo dendemaro ra Mwari.’ Tinoverengazve kudari: “Mwari wakamukuja, womupa zina riri pa nyezuru po mazina ese.”—VaFilipi 2:9.

13, 14. Jehovha anozwa kudini ngo pamusoro po zvotinomuitira?

¹³ Tingava no gwinyiso rokuti Jehovha anoreremeja ciricese cotinoita kuti timushandire. Iyena anozwisisa potinonga ticina gwinyiso kana potinokana-kana zvotinokwanisa. Iyena anotikorondha maningi potinothimwa-thimwa ngo pamusoro po basa redu kana po kupekeja zvinodiwa zvo mbhuri yedu. Zve anozwisisa potinonga aticakwanisi kuita zvotaiita kare mu basa rake ngokuti tiri kuhwaja kana tasuruvara. Tinganasa kukhohwa kuti Jehovha anoreremeja ugondeki hwedu pikija no zvineso zvedu.—Verenganyi Vaheberi 6:10, 11.

¹⁴ Ceujanyikuti Jehovha i Muzwi wo Mukumbiro. Tingava no gwinyiso rokuti potinoita mukumbiro kwaari, iyena anozotizwa. (Nduyo 65:3) “Baba wo unyaxa, Mwari wo unyarajo hwese” anozotipa ciricese cotinoda kuitira tigare tiri phedo naye. Pa mukuvo umweni angashandisa hama no hambzaji kuti aite kudaro. (2 VaKorinto 1:3, 4a) Jehovha anodakajihwa maningi patinoitira usizi ku vamweni. ‘Anoitira unyaxa murombo anokwereteswa ndi [Jehovha] Mwari; naye anozomupa mupocero wake.’ (Mazwi Akangwara 19:17; Mateu 6:3, 4) Ngokudaro, potinokova no kubesera hama jedu, Jehovha anovona zvakanaka zvotinoita inga kuti waitihwa zvigava. Zve anogondisa kuzopfupa vanokhombija kunaka mwoyo.

15. Mupfupo wapi womuri kuvetera? (Vonanyi pikica yo kutanga.)

¹⁵ MaKristu akazojwa anovetera kupuwa mupfupo wo “junguja ro urungami” ndi Jesu. (2 Timoti 4:7, 8) Asi, kudari muno vetero imweni, azvirenyi kuti munosisira padoko pamberi pa Mwari. Mamiriau o ‘mabvuta amweni’ a Jesu ari kuvetera ngo cidaka-daka mupfupo wo upenyu hucikaperi mu paradhesi pasi pano. Mondhomo “vanozodakara ngo kunyarara kwakaperera.”—Johani 10:16; Nduyo 37:11.

16. I embezero yapi yotinowana pa 1 Johani 3:19, 20?

¹⁶ Nguva jimweni tingajizwa kuti atiripi kuita zvakawanda mu basa ra Jehovha, kana tingazvibvunjisa kuti Jehovha ari kudakajihwa ngo zvotiri kuita kana kuti haiwa. Tingajizwa kuti atifaneri kuashira mupfupo uriwese. Asi atidikani kukanganwa kuti “Mwari mukuru kupinda mwoyo yedu; yena anoziva zvese.” (Verenganyi 1 Johani 3:19, 20.) Potinoshandira Jehovha ngo ndava yo gonda redu no rudo hwedu kwaari, tingava no gwinyiso rokuti anozotipfupa, pikija kudari ticitovona kuti zvotiri kuita zvina mutengo kushoma maningi.—Marco 12:41-44.

17. Ngojapi mupfupo jimweni jotiri kubusa wari?

¹⁷ Jehovha ari kukomborera vandhu vake, pikija mu njiku jokupejisira jino jo nyika ya Sathana. Iyena anova no gwinyiso rokuti taashira uzivi hwakawanda no runyararo inga divi ro ukama hwo nyika jese. (Isaia 54:13) Hina, inga zvaakapikira  Jesu, Jehovha anotipfupa wari ngo mbhuri ina rudo yo hama no hambzaji jese mu nyika yese. (Marco 10:29, 30) Vaya vanopsaka Mwari ngo mwoyo vari kupfupwazve ngo runyararo hwakakura hwo mukati, kupfara no kudakara.—VaFilipi 4:4-7.

18, 19. Vashandiri va Jehovha vari kujizwa kudini ngo mupfupo jovari kuashira?

¹⁸ Vashandiri va Jehovha pasi pese vari kuwana mupfupo jicikanangiki jinobva ka Baba wedu. Inga muezaniso, Bhianka wo ku Aremanya wakati: “Anditomazivi mabongere andingamuita Jehovha ngo kundibesera kwake pa kuthya kwangu no kuva kwake ku divi rangu njiku jese. Nyika yazara ngo birinyongo no zvakashatisisa. Asi pondinoshanda phedo na Jehovha, ndinojizwa kungwaririka mu nyara jake. Pondinozvipira kwaari, iyena anondihwirijira makomborero akapetwa kuita zana.”

¹⁹ Kana vonanyi Paula, mwanakaji wo 70 o makore wo ku Kanadhaa, uwo waitambujika ngo ndhendha inozwi espinha bífida, waineseka maningi ngo ndhendha iyo. Iyena wakananga kuti ngo ndava yo kutama kufamba ushoni ngo mugariro wake, azvirevi kuti mushando wake waiphingika. Iyena wakaengejera kudari: “Ndaishandisa njira jakasiana-siana jo kucumaira, jakadari inga kushandisa foni no ucapupu hucizivi kurongwa. Kuti ndijivangise, ndinogara no cikadherno condinotarira tsamba no murangariro jinowanika mu mabhuku edu condinoverenga pa mukuvo no mukuvo. Ndinocidanija kuti ‘Cikadherno Cangu Cinondiponesa.’ Kucamwa ngo komukuvo mushomani kudari tikasotesesa zvipikihwa zve Jehovha. Iyena aripo nguva jese kuti atibesere, pacinenyi no mugariro jotiri najo.” Mugariro wenyu ungasiana no wa Bhianka kana wa Paula. Asi, mungarangarija njira Jehovha jaakaphupa ndijona imwimwi no vakamutendeneja. Zvakanaka maningi kurangarira mapfupiro ari kumuita Jehovha pa mukuvo uno no mapfupiro aanozomuita kumbejiyo.

20. Tingavetera mupfupo wapi kudari tikaramba tishandira Jehovha takagondeka?

²⁰ Mucakanganwa kuti ngo mukumbiro jenyu jo mwoyo wese mucazowana “mupocero . . . mukuru.” Mungava no gwinyiso rokuti ‘mukateveja kuda ka Mwari,’ munozowana “bzaanogondesa.” (Vaheberi 10:35, 36) Ngokudaro, ngatirambe ticivangisa gonda redu no kuita ciricese cotinokwanisa kuti tishandire Jehovha. Tinothemba kuti Jehova anozotipfupa!—Verenganyi VaKolosi 3:23, 24.