1, 2. (a) Ngenyi tinowanana no kuthimwa-thimwa? (Vonanyi pikica yo kutanga.) Ticazojijenyi pa musoro uu?

NYAMASI uno, ‘Sathana, mukorore wenyu inga mbhondoro, anofamba-famba ecibhoonga, ecipsanga mundhu kuti amuhe.’ (1 Pedru 5:8; Apokalipsi 12:17) Inga muviyo, upenyu huri kunesa maningi, zve pikija vashandiri va Mwari vari kuwanana no kuthimwa-thimwa. Vashandiri va Mwari vokare vakawananavo no mukuvo unothimwathimwisa. Inga muezaniso, Bhaibheri rinonanga kuti Mambo Dhavhidhi nguva jimweni waithimwa-thimwa. (Nduyo 13:3) Zve mupostori Pauro ‘waithimwathimwa, ngokuda kungwarira ungano jese.’ (2 VaKorinto 11:28) Tingaitenyi potinonyiswa ngo kuthimwa-thimwa?

² Baba wedu vano rudo vo mugore vakabesera vashandiri vavo vokare kuti vawane kutondhojwa pa kuthimwa-thimwa, zve vanoda kuitavo zvondhozvo kotiri nyamasi uno.  Bhaibheri rinotibvunja kudari: “Turanyi muthwaro wenyu kwaari, yena anozomukorondha.” (1 Pedru 5:7) Asi mungazviitisa kudini? Ticazojija ngo njira murongomuna. (1) Mungaita mukumbiro, (2) mungaverenga no kurangarijira Soko ra Mwari, (3) mungatendera mujimu mucena Jehovha kuti umubesere, zve (4) mungabvunja womunogonda mazwiro omuri kuita. Potinopopora mafundo marongomuna aya, ejanyi kuwana kuti ngopapi pomunodikana kuitisa nane.

3. Mungathurisa kudini ‘muthwaro wenyu kuna [Jehovha]’?

³ Njira yo kutanga yotingathurira ndiyona Jehovha kuthimwa-thimwa kwedu ngo yo kuita mukumbiro ngo mwoyo wese. Pomunothimwa-thimwa, Baba wedu vano rudo vanoda kuti muvabvunje mazwiro enyu o mukati. Mutari wo nduyo Dhavhidhi wakadeketerera Jehovha kudari: “Mwari, izwanyi [mukumbiro] wangu.” Pa nduyo yondhoyo, Dhavhidhi wakanangazve kudari: “Thurai muthwaro wako kuna [Jehovha] Mwari, yena anozokukorondha.” (Nduyo 55:2, 23) Mukapera kuita zvese zvomunokwanisa kuti mupeje cineso, kuita mukumbiro ngo mwoyo wese kuna Jehovha zvinozomubesera mutame kuthimwa-thimwa maningi. Mukumbiro unoshandisa kudini? Ungatibesera kudini kuti titame kuzwa kunyiswa ngo kuthimwa-thimwa?—Nduyo 94:18, 19.

4. Ngenyi mukumbiro unosisira maningi potinothimwa-thimwa?

⁴ Verenganyi VaFilipi 4:6, 7. Jehovha anodavirisa kudini mukumbiro jedu jo mwoyo wese no jokuvangisira? Iyena anokwanisa kutibesera kuti tigajane no kuramba murangariro no mazwiro akashata? Kunja ko kuva no kuthimwa-thimwa no kuthya, Mwari anotibesera kuti tive no runyararo hwo mukati hwokuti aticaizohuwana. Hama jedu zinji no hambzaji jakazwa kugajana uku. Izvo zvingatiitikiravo. “Rugarisiko hwa Mwari” hungatibesera kunyisa cineso ciricese! Munganasa kuthemba cipikihwa ca Jehovha cokuti: “Ucathya, ngokuti ndinewe, ucatetemera, ngokuti ndiri Mwari wako; ndinokuvangisa, hina, ndokubesa.”—Isaia 41:10.

5. Soko ra Mwari ringamubesesa kudini kuti muwane runyararo hwo mukati?

⁵ Njira yocipiri yo kuwana runyararo ngo yo kuverenga no kurangarijira vhesi jo Bhaibheri. Ngenyi zvinosisira? Bhaibheri i Soko ra Mwari. Irona rinobatanija mazano o ungwaru zve anoshanda anobva ku Musiki wedu. Azvinenyi kuti muri kuthimwa-thimwa, mungarangarijisisa ngo pamusoro po murangariro ja Mwari zve mazano ake  angamuvangisa kudini. Izvi zvingamubesera kunyisa, kuthuruja kana pikija kutoramba kuthimwa-thimwa. Jehovha wakazwiranisa maningi-ningi kuverenga Soko rake no kuva ‘wakacunga,’ kuvanga no kutama “kutetemera” ngo kuthya.—Joxwa 1:7-9.

6. Masoko a Jesu anomubeseresa kudini?

⁶ Mu Soko ra Mwari, tinoverenga ngo pamusoro po matajiro aiita Jesu vandhu. Ivona vaida kumupurukira ngokuti masoko ake aivangisa no kutondhoja, maningi-ningi kwa vaya vairemba kana vaiti khurududu. (Verenganyi Mateu 11:28-30.) Jesu wainga no haraka no mazwiro aiita vamweni. (Marco 6:30-32) Inga Jesu wakagondesa kubesera vapostori vaaifamba navo, iyena anozotibesavo. Azvirevi kuti tinodikana kuva na Jesu pamwepo kuti iyena atibesere. Inga Mambo wedu wo kudenga, Jesu anoramba ecitatija rudo kwatiri. Waro pamunothimwa-thimwa, ivanyi no cokwadi kuti iyena aripo kuti amubesere panguva kwayo kamare. Jesu anotipa vetero no kucunga, zvinozotibesera kuti tinyise kuthimwa-thimwa.—Vaheberi 2:17, 18; 4:16.

7. Tinobesereka kudini ngo mujimu mucena wa Mwari?

⁷ Jesu wakapikira kuti Baba wedu vano rudo vanozotipa mujimu mucena potinoukumbira. (Luka 11:10-13) Mujimu wa Mwari unozotibesera kudini kuthuruja kuthimwa-thimwa? Mujimu mucena wa Mwari, kana simba rinoshanda, rinotibesera kusakurira mugariro jina Mwari wo masimba ese. (VaKolosi 3:10) Mu Bhaibheri, mugariro iji jinodanijwa kuti ‘mucero wo mujimu.’ (Verenganyi VaGalàsia 5:22, 23, Shanduro yeNyika Itsva.) Potinosakurira mugariro jaushoni iji, ushamwari hwedu no vamweni hunozoita nane, zve tinozotiza mugariro jingatiita kuti tithimwathimwe. Ngativone kuti mucero wo mujimu unozotibeseresa kudini mu njira jakajeka.

8-12. Mucero wo mujimu ungamubesera kudini?

⁸ ‘Rudo, mudakaro, runyararo.’ Pomunotaja vamweni ngo nderemejo, munozovona kuti amuripi kuthimwa-thimwa maningi. Kuitisa kudini? Pomunotatija rudo hwo hama no hama, rudo ku vandhu vese no nderemejo, kazinji munotiza mugariro jinomuitisa kuti muve no mazwiro akashata akadari inga ushungu, kubararika hwiru no kuhwajihwa mu murangariro. Izvo zvinoita kuti zvireruke kuramba muna runyararo no vamweni.—VaRoma 12:10.

⁹ ‘Kusengerera, unyasha, kunaka.’ Bhaibheri rinoti: “Ivanyi vokuthiva mwoyo, zwirananyi unyaxa, kungurirananyi ngocenyu.” (VaEfeso 4:32) Potinoteveja mazano ao, tinozova no ushamwari hunodakajisa no vamweni, zve tinozojivirira mugariro jingativiisira kuthimwa-thimwa. Zve, zvinozoreruka kuhwisana no mugariro jinoviiswa ngo kutama kukwana kwedu.

¹⁰ ‘Gonda.’ Nyamasi uno, kazinji  tinothimwa-thimwa ngo pamusoro po mare no zviro zvo kunyama. (Mazwi Akangwara 18:11) Tingarambisa kudini mukhaindi uu wo kuthimwa-thimwa? Tinodikana kuteveja mbhangiro yo mupostori Pauro yokuti: “Dakaranyi ngo bzo munabzo.” Gonda rakavanga kuna Jehovha rinozotibesera kuti tigonde kuti anozotipa zviro zvotinotama ngo rudo. Iyena wakagondesa kudari: “Andicakuregeri wega nokuti kukusia.” Ngo thangwe rondhoro, Pauro wakati: “[Jehovha] anondibesa, apana co ndinothya. Vangandiitira cinyi vandhu?”—Vaheberi 13:5, 6.

¹¹ ‘Kupfava, kujibata.’ Rangariranyi ngo mashandiro ozvinoita no kumubesera mukatatija kupfava no kujidodokesa. Mugariro iji jinomujivirira pa kubhuya kana kuita zviro zvingamuviisira kuthimwa-thimwa, zve munozobesereka ngo kuramba “kunyangajwa no runya, izwi rese rakarema nokuti ro kuxora, pamwepo no uxaixi hwese.”—VaEfeso 4:31.

¹² Munodikana kuzvidodokesa kuti muthembe “nyara yakavanga ya Mwari” no ‘kuthura . . . kwaari’ kuthimwa-thimwa kwenyu. (1 Pedru 5:6, 7) Mukajidodokesa, Jehovha anozomubesera no kumusapota. Mukaziva zvomunokwanisa kuita no zvomucikakwanisi kuita, amuzojithembi mwega. Munozova no kuthimwa-thimwa kushoma ngokuti munozothemba Mwari.—MIKEYA 6:8, Shanduro yeNyika Itsva.

13. Jesu waida kunangenyi paakananga kuti: “Mucathimwa-thimwa”?

¹³ Pa Mateu 6:34 (verenganyi), tinowana zano ro ungwaru ra Jesu rokuti: “Mucathimwa-thimwa.” Zano iri ringavoneka inga ricikashandisiki. Asi Jesu waida kurevenyi? Tajija kuti Dhavhidhi na Pauro vaithimwa-thimwa pa nguva jimweni. Jesu aacaireva kuti mundhu anoshandira Mwari aacaizothimwa-thimwa. Kunja kwa izvi, Jesu waibesera vajiji vake kuzwisisa kuti kuthimwa-thimwa kucikafaneri, kana kwakapindirija mudida, akupeji zvineso. Kunozova no zvineso njiku jese, ngokudaro, maKristu acaizoengejera maningi kuthimwa-thimwa ngo kubhuya ngo pamusoro po makomborero okare no okumbeji. Zano ra Jesu ringatibesesa kudini pa kuthuruja kuthimwa-thimwa?

14. Kudari inga ndi Dhavhidhi, mungathurujisa kudini kuthimwa-thimwa?

¹⁴ Nguva jimweni vandhu vanothimwathimwa ngo pamusoro po zvishaishi zvavo zvokare. Vanojizwa kuti vano ndava maningi ngo zvovakaita, pikija zvataana makore  akawanda. Pa nguva jimweni, Mambo Dhavhidhi waijizwa kunyiswa ngo zvokuposa zvake. Iyena wakati: ‘Mwoyo wangu unopanda, ndinobhoonga inga mbondoro.’ (Nduyo 38:4, 5, 9, 19) Pa mugariro uwo, Dhavhidhi wakaita ciro co ungwaru maningi. Iyena waigonda unyasha no kuregerehwa kwa Jehovha. Perepo Dhavhidhi wakadakara ngo kuziva kuti wainga amuregerera.—Verenganyi Nduyo 32:1-3, 5.

15. (a) Tinojijenyizve ngo ndi Dhavhidhi? (b) Mungaitenyi kuti muthuruje kuthimwa-thimwa? (Vonanyi Bhokiso rinoti: “ Jimwe Njira Jinoshanda Kuitira Kuthuruja Kuthimwa-thimwa.”)

¹⁵ Pa nguva jimweni, mungathimwathimwa ngo pamusoro po zviro zvo wari. Inga muezaniso, Dhavhidhi paakatara Nduyo 55, waithya kuti waizouraiwa. (Nduyo 55:3-6) Asi, aacaitendera kuti kuthimwa-thimwa kuphwanye kugonda kwake Jehovha. Dhavhidhi wakadeketerera Jehovha kuti amubesere pa zvineso zvake, asi waiziva kuti zvaisisirazve maningi kuita ciricese ngo mugariro wake. (2 Samueli 15:30-34) Mungajijenyi ndi Dhavhidhi? Kunja ko kutendera kuti kuthimwa-thimwa kumunyise, itanyi zvomunokwasa kuti mupeje cinesoco zve gondanyi kuti Jehovha anozomukorondha.

16. Zvinoreva zina ra Mwari zvinovangisa kudini gonda renyu?

¹⁶ Nguva jimweni muKristu angathimwathimwa ngo pamusoro po zvineso zvo kumbeji. Asi imwimwi amudikani kuthya ngo pamusoro po zviro zvicito zvaitika. Ngenyi atidikani? Ngokuti nguva zinji, zviro azvigumi pa kushata inga zvotinorangarira. Rangariranyizve kuti apana mugariro waacikakwanisi kuvonerera Mwari. Zina rake kamarerino revo yo kuti: ‘Iyena Anoita Kuti Zviro Zvive Inga Zvaanoda.’ (Exodo 3:14, Shanduro yeNyika Itsva) Ngokudaro, atidikani kuthya maningi ngo pamusoro po kumbeji, ngokuti zina ra Mwari rinotatija kuti zvipikihwa zvake zvese ku vandhu zvinozokwanirisika. Mungava no gwinyiso rokuti Mwari anozokomborera vakagondeka kwaari no kuvabesera kuti vathuruje kuthimwa-thimwa ngo pamusoro po zvokare, zvowari no zvokumbeji.

17, 18. Kusumurira vamweni kungamubesesa kudini pomunothimwa-thimwa?

¹⁷ Njira yo cirongomuna yomungawana ndiyona besero pomunozwa kuthimwathimwa ngo yo kusumurira mundhu womunogonda. Womakarovorana nae, shamwari yo phedo, mukuru wo mu ungano  angakwanisa kumubesera kuzwisisa ushoni mugariro wenyu. Bhaibheri rinotibvunja kudari: “Bonezi ro mwoyo rinopeja simba; izwi rakanaka rinodakajisa.” (Mazwi Akangwara 12:25) Bhaibheri rinotibvunjazve kudari: “Ukatama kurangarira, mabasa ako anozodunya; pano vapangiri vakawanda, mabasa anobuda uxoni.”—Mazwi Akangwara 15:22.

¹⁸ Musongano jedu jo ungano jinozotibesera kuti tithuruje kuthimwa-thimwa. Pa musongano jo vhiki ngo vhiki, munopeja nguva no hama no hambzaji jenyu, jinomutaja zve jinoda kumuvangisa. (Vaheberi 10:24, 25) ‘Kuvangisana’ uku kunozomuvangisa no kuita kuti zvimurerukire kunyisa kuthimwa-thimwa kuri kwese.—VaRoma 1:12.

19. Ngenyi mungathemba kuti ushamwari hwenyu na Mwari hunozomuvangisa?

¹⁹ Umwe mukuru wo ku Kanadhaa wakajija kusisira ko kuthura kuthimwa-thimwa kwake kuna Jehovha. Iyena waenga no basa rinorembesa inga mujijisi no mupangiri wo vajiji pa cikora, wakava no cineso co marapihwo aaita aimuitisa kuti athimwathimwe. Zvicinyi zvakamubesera kuti ave akavanga? Kupinda zvese, wakashanda ngo simba kuti avangise ushamwari hwake na Jehovha. Shamwari jakanaka jakamubeserazve maningi pa mukuvo wo kunesa zve wakasumurira mukaji wake mazwiro aainga nao. Mukuengejera, vakuru doni no muvonereri wo ndharaundha vakamubesera kuti avone mugariro wake ngo mavonero a Jehovha. Dhokodhea wakabesera hama iyi kuti izwisise cineso cayo co uhomi, zve yakakwanisa kuita cinjo pa urongwa hwayo, yowana nguva yo kuzorora no yo kuita zvinodamura muviri. Padoko ngo padoko, yakaziva mangwaririro o yaizoita mugariro no mazwiro ayo. Pakava no zviro zvoicikakwanisi kungwarira, yaithemba Jehovha kuti aibesere.

20. (a) Tingathurisa kudini kuthimwa-thimwa kwedu kuna Mwari? (b) Tinozobhuisanenyi pa musoro unotevera?

²⁰ Pa musoro uu, tajija masisiriro ozvinoita kuthura kuthimwa-thimwa kuna Mwari ngo kuita mumbira kuna Jehovha, kuverenga Soko rake no kurangarijira zvotaverenga. Tajijazve masisiriro anoita kutendera kuti mujimu mucena wa Jehovha utitungamirire, kubhuya no mundhu wotinogonda no kuva pa musongano jo ciKristu. Pa musoro unotevera, tinozojija kuti Jehovha anotibesesa kudini ngo kutipa vetero yo mupfupo.—Vaheberi 11:6.