‘Ndiyena Anovangisa Varembi’
Vhesi yedu yo gore ro 2018: ‘Vaya vanovetera Jehovha, vanozomusijihwa simba ravo.’—ISAIA 40:31, Shanduro yeNyika Itsva.
1. Ngozvapi zvineso zvimweni zvatinodikana kucungirira, asi ngenyi Jehovha anodakajihwa ngo vashandiri vake vakagondeka? (Vonanyi pikica yo kutanga.)
UPENYU mu mugariro uno auzivi kureruka. Inga muezaniso, uzinji hwenyu hama no hambzaji jinodiwa, muri kutambujika ngo ndhendha jinonesa. Vamweni, vari kutoneseka ngo kuda kukorondha ukama waamusharuka. Vamweni vari kutohwisana ngo kuda kupa zvinodiwa kuno mbhuri javo. Tinoziva kuti vazinji venyu muri kuhwisana, haiwa basi no zvineso zvondhozvo, asi no zvizinji zvimweni pa mukuvo wondhowo. Izvi zvinomutorera nguva, simba no mare. Asi munothemba kuti Jehovha anozomubesera. Munoziva kuti zviro zvinozonaka ngokuti iyena wakazvigondesa. Zvokadi, gonda renyu riri kudakajisa Jehovha!
2. Isaia 40:29 inotivangisa kudini, zve taizoposa kudari tikaitenyi?
2 Makambojizwa nguva jimweni, kuti zvineso zvenyu zviri kunesa maningi kucungirira here? Kudari makambojizwa, amuripi mwega. Vashandiri vamweni va Mwari vakagondeka vokare vakajizwavo kudaro. (1 Majimambo 19:4; Jobe 7:7) Zvicinyi zvakavabesera kuti vacungirire? Ivona vakathemba Jehovha kuitira kuvangiswa. Bhaibheri rinonanga kuti Mwari “ndi yena anovangisa varembi.” (Isaia 40:29) Zvinosuruvarisa ngo zvokuti, vandhu va Mwari vamweni nyamasi vanorangarira kuti njira imwe yo kucungirira zvineso zvovanazvo mu upenyu i kusia kushandira Jehovha pa nguva yakati kuti. Ivona vanovona kuti kushandira Jehovha asipi makomborero, asi i muthwaro. Ngokudaro, vanotoima kuverenga Bhaibheri, kwenda ku musongano pamwepo no kucumaera. Izvo ngozvaanoda kamare Sathana.
3. (a) Tingaitenyi kuti titame kurembeswa ndi Sathana? (b) Tinozojijenyi pa musoro uno?
3 Dhiabhu aadi kuti tive vakavanga. Zve tinoziva kuti tinoguma pa kuvanga maningi patinonga takabatikana mu basa ra Jehovha. Ngo kudaro pamunonga makaremba zve makacamwa, mucasiya Jehovha ndhambo. Kwederanyi phedo naye. Bhaibheri rinonanga kudari: ‘Anozomugwinyisa, no kumuvangisa.’ (1 Pedru 5:10; Jakobo 4:8) Pa musoro uno, tinozojija kubva pana Isaia 40:26-31, kuti Jehovha anokwanisa kudini kutivangisa. Perepo tinozobhuisana ngo ndava yo zviro zvaizoita kuti tithuruje pa kushandira kwedu Jehovha, zve tinozojija kuti kushandisa zviambi zvo Bhaibheri kungatibesera kudini kucungirira.
VAYA VANOVETERA JEHOVHA, VANOZOMUSIJIHWA SIMBA RAVO
4. Ngocapi cijijo catingawana kubvira pana Isaia 40:26?
Jehovha angamupa simba ramunoda kuti mucungirire zvineso zvenyu
4 Verenganyi Isaia 40:26. Apana anokwanisa kukontari ndhondho jese jiri mudenga. Masientista anotenda kuti kangaije kuno 400 o mabhirioni o ndhondho mu garasia redu. Pikija zvakadaro, Jehovha anopa zina imwe nga imwe yajo. Izvi zvinotijijisenyi ngo pamusoro pa Jehovha? Kudari Iyena pacake anoneseka ngo ndhondho jicitona no upenyu, rangariranyi kuneseka kwaanoita ndimwi! Imwimwi, muri kutomushandira, haiwa ngo kuvangirijwa, asi ngo kuti munomuda. (Nduyo 19:2, 4, 15) Baba wedu vanodiwa, vanoziva zvese ngo pamusoro penyu. Bhaibheri rinonanga kuti nee “vhuji rese ro mu musoro menyu rakaverengwa” ndivona. (Mateu 10:30) Jehovha anoda kuti tizive kuti ‘anoziva njiku yo vacina ndava.’ (Nduyo 37:18, Shanduro yeNyika Itsva) Zvakajeka kuti, Jehovha ari kuvona zvineso zvenyu zvese zve angamupa vangiso yamunoda kuti mucungirire pa zvese zvazvo.
5. Tingava kudini no cokwadi co kuti Jehovha anokwanisa kutivangisa?
5 Verenganyi Isaia 40:28. Jehovha i Cinyuke co simba rese. Inga muezaniso, rangariranyi mutengo wo simba raakapa kuno zuva. Sientista umweni naarizve mutari, anodanijwa David Bodanis wakananga kuti pa segundu imwe basi, zuva rinobudisa simba rakawanda inga raizobudiswa ngo kuputika ko mabhirioni o mabhombha atomika. Mupsakisiri umweni wakananga kuti mutengo wo simba rinobudiswa ngo zuva pa segundu imwe ringakwana kuti rishandiswe ngo vandhu pasi pese ko 200.000 o makore! Zvokadi, Jehovha, wakapaya simba kuno zuva, angatipa simba ratinoda kuitira kucungirira pa zvineso zvedu.
6. Kanga ya Jesu yakapfavisa kudini, zve kupfava kwayo kunotipsasisa kudini?
6 Verenganyi Isaia 40:29. Kushandira Jehovha kunotipa mudakaro. Jesu wakananga kudari ecibvunja vajiji vake: “Thwaranyi kanga yangu.” zve wakaengejera eciti: “Munozowana kuzorora mu mwiha menyu. Ngokuti kanga yangu yakapfava, muthwaro wangu wakareruka.” (Mateu 11:28-30) Izvi ngo zvokadi! Nguva, jimweni tingajizwa takaremba ticito tabva pamuzi kwenda ku musongano kana koocumaera. Asi tinojizwa kudini patinonga tabveyo? Tinojizwa tavangiswa zve takanasiririka kuitira kuhwisana no zvineso zvedu. Zvokadi, kanga ya Jesu yakapfava.
7. Ipanyi muezaniso unovonesa kuti zviri pana Mateu 11:28-30 ndizvonadi.
7 Vonanyi zvakaitika ku imwe yo hambzaji yedu. Iyona inoneseka ngo ndhendha inozwi síndrome da fadiga crônica (inobara kuremba kukuru), iri kuhwisanazve no kucamwa zve musoro wayo unopanda maningi. Ngo kudaro, nguva jimweni zvinotonesa maningi kwairi kuti iyende ku musongano. Asi, njiku imweni, iyona yakavangisira yoenda ku musongano zve pasure pazvo, yakatara kudari: “Hurukuro yakaitweyo yaibhuya ngo zvo kurembejeka. Zvayakananga zvaizwirana no zvandaisongana nazvo zve zvaipsasa mazwiro angu zvokuti ndakatombhweja musoji. Ndakavona kuti ndaidikanadi kuva pa musongano kamare.” Hambzaji iyi yakadakara maningi zvokuti yaindovangisira kuti iende ku musongano!
8, 9. Mupostori Pauro waida kunangenyi paakatara kuti: “Ngokuti ndikava wokurembejeka, ndiri wokuvanga”?
8 Verenganyi Isaia 40:30. Tingakwanisa hedu no uzivi wo kuita zvakawanda, asi tino patinogumira pa kuita zviro ngo simba redu. Tese tinozviziva zvondhozvo. Mupostori Pauro waikwanisa kuita zviro zvizinji, asi aacaikwanisa kuita zvese zvaiida. Paakabvunja Jehovha mazwiro ake, Jehovha wakamubvunja kudari: “Simba rinotatijwa mu kurembejeka.” Pauro wakazwisisa zvaakabvujwari ndi Jehovha. Ngo iyo ndava iyena wakati: “Ngokuti ndikava wokurembejeka, ndiri wokuvanga.” (2 VaKorinto 12:7-10) Waida kunangenyi?
9 Pauro wakazwisisa kuti wainga no paanogumira pa zviro zvaaikwanisa kuita ega. Iyena waida besero rinobva ku mundhu umweni ano simba maningi kupinda iyena. Mujimu mucena wa Mwari waizokwanisa kupa Pauro simba paaizojizwa wakarembejeka. Zve waizokwanisa kuita zvizinji. Mujimu mucena wa Mwari waizokwanisazve kupa simba Pauro kuti aite zviro zvokuti aacaizokwanisa kuita no simba rake. Izvo zvingatotiitikiravo. Jehovha paanozotipa mujimu mucena wake, ndipona patinozovanga kamare!
10. Jehovha wakabeseresa kudini Dhavhidhi kuti acungirire pa zvineso zvake?
10 Mutari wo nduyo Dhavhidhi, kazinji waivona kuti mujimu mucena wa Mwari waimuvangisa. Iyena wakaimba kudari: “Hina, pamwepo nemwi, ndinoambira vavengi vangu; ngo simba raanondipa Mwari ndinotora maguta.” (Nduyo 18:30) Mukufanana no mufimbiji wakareba unonesa kuwisa, nguva jimweni zvineso zvedu zvingava zvakakura maningi zvo kuti atikwanisi kuzvitonga tega. Tinoda besero ra Jehovha.
11. Mujimu mucena unotibesera kudini kucungirira pa zvineso zvedu?
11 Verenganyi Isaia 40:31. Hokotora ajikwanisi kuramba jiri mudenga basi ngo simba rajo. Simba rinobahwa ngo mbhepo yo kupisa ngarinoita kuti hokotora irambe iri mu makore. Izvi zvinoiita kuti iyona ikwanise kumburuka kwenda ndhambo icikaperi simba. Ngo kudaro, kudari mukava no cineso cikuru, rangariranyi ngo pamusoro po hokotora. Deketeranyi kuna Jehovha kuti amupe simba ecishandisa mubeseri “mujimu mucena.” (Johani 14:26) Tingakumbira Jehovha kuti atipe simba pa nguva iri yese hayo, mukati mo jiku yese. Zvinosisira maningi kukumbira besero kuna Jehovha, patinovona kuti tiri kunesana no hama kana hambzaji mu ungano. Asi ngenyi kunesana kondhoko kunovepo?
12, 13. (a) Ngenyi nguva jimweni maKristu anganesana? (b) Upenyu hwa Jasefa unotijijsenyi ngo pamusoro pa Jehovha?
12 Kunesana kunovepo ngo kuti tese atizivi kukwana. Nguva jimweni, tinganyangajwa ngo zvanangwa kana kuitwa ngo vamweni, kana kuti vamweni vanganyangajwa ndisu. Uwu ungava muejo unonesa maningi. Asi unotipa mukana wo kuva takagondeka kuna Jehovha. Kuitisa kudini? Ngo kujijira kushanda pamwepo mukuzwirana no hama zve hambzaji. Jehovha ano rudo no hama no hambzaji jedu pikija ajizivi kukwana, waro itusu tingajiramba ngenyi?
Jehovha aazivi kusia Jasefa zve iyena aazomusiivo (Vonanyi ndima 13)
13 Jehovha aambzengesi vashandiri vake kuti vatame kuejwa. Izvo tinozvijija kubvira mu upenyu hwa Jasefa. Paainga ari mujaha, hama jake jakamuitira ushanje. Jakamutengesa inga muranda, wotohwa kwenda ku Ejipita. (Genesi 37:28) Jehovha wakavona zvese kamare zvakamuitikira zve atikani-kani kuti iyena wakahwajihwa maningi ngo kuvona matajihwe akashata akaizwa Jasefa, uwo wainga shamwari zve mushandiri wake wakagondeka. Pikija zvakadaro, Jehovha aazivi kujamisa matambujiko a Jasefa. Pasure pazvo, Jasefa wakapumbwa kuti wakaeja kujipa mukaji wa Potifari, wotofungihwa mu jere, asi Jehovha aazivi kumubvisemo. Waro kunanga kuti Mwari wainga amusiya here? Haiwa. Bhaibheri rinonanga kuti ‘Mwari wainga naye; woita kuti bzibudirire bzese bzaaiita.’—Genesi 39:21-23.
14. Kudari tikasiya ushungu tinozobesereka kudini?
14 Muezaniso umweni ndi Dhavhidhi. Asipi vazinji vakamboshaisha kutajwa inga ndi Dhavhidhi. Pikija zvakadaro, Dhavhidhi, shamwari ya Mwari, aazivi kumbotendera kuti kutambujwa kwake kumuzaje ngo ushungu. Iyena wakatara kudari: “Regai uxungu, siai kuceneka, ucanyangajwa: ungazoita bzakaxata basi.” (Nduyo 37:8) Thangwe guru rinotiitisa kuti ‘tiregere’ ushungu, kana kusiya kuva no ushungu, i ndava yo kuti tinoda kutevejera Jehovha. Iyena “aatiitiri ngokuteveja kuposa kwedu” asi anotiregerera. (Nduyo 103:10) Ngo divi rimweni, tingabesereka pa upenyu hwedu tikaregera ushungu. Inga muezaniso, ushungu ungabara ndhendha yo tensao, no ndhendha yo kutama kufema ushoni. Izvi zvingakhuvaza ciropa no cihwatata, zvingaitazve kuti muviri utame kukwanisa kushandisa ushoni zvatinoha. Cimwenizve ngo co kuti patinova no ushungu, atikwanisi kurangarira ushoni. Tingatotanga kunanga kana kuita zviro zvingakhuvaza vamweni, zve izvi zvingatiita kuti tive takacamwa ko nguva yakareba. Waro zviri nane kuramba takapfava. Bhaibheri rinonanga kudari: “Mwoyo [‘wakapfava,’ Shanduro yeNyika Itsva], uhomi hwo muviri.” (Mazwi Akangwara 14:30) Ngo kudaro, zvicinyi zvatingaita kudari vamweni vakatinyangajisa, zve tingaitisa kudini runyararo no hama yedu? Tingashandisa uzivi huri mu Bhaibheri.
PATINONYANGAJISWA NGO HAMA JEDU
15, 16. Mundhu akatinyangajisa tinodikana kuitenyi?
15 Verenganyi VaEfeso 4:26. Atishamaisiki kudari tikashaisha kutajwa ngo vandhu vacikashandiri Jehovha. Asi patinoshaisha kutajwa ngo hama kana hambzaji yo ciKristu dengani umwe wo pa ukama hwedu wonanga kana kuita zvinotinyangaja, tinohwajihwa maningi. Waro zvikava zviro zvinonesa kuregerera basi cinyararire keni, tinozodini? Tinozoramba tino ushungu, kangaije ko makore akawanda here? Kana kuti tinozotevera ngwanjo yo mu Bhaibheri yo kutonga shwiroyo ngo kukasika? Tikanonoka kubhuya nowatikhunyaya, tinozononokavo pa kuita runyararo naye.
16 Ngatiti manyangajiswa ngo hama, asi amuripi kukwanisa kuzvikanganwa. Mungaitenyi kuti muite runyararo? Co kutanga, itanyi mukumbiro kuna Jehovha. Deketeranyi kwaari kuti amubesere kubhuya ushoni no hameyo. Ceujanyi kuti hama yenyu ndi umwe wo shamwari ja Jehovha. (Nduyo 25:14) Mwari ano rudo naye. Jehovha anotaja shamwari jake ngo kunaka mwoyo, zve anovetera kuti tiitevo kudaro. (Mazwi Akangwara 15:23; Mateu 7:12; VaKolosi 4:6) Cocipiri, rangariranyi ushoni zvamunoda kunanga pamunozoenda kobhuya naye. Mucarangarira kuti iyena wakazviita ngo kuti waida kumunyangajisa. Kangaije kwainga kuposavo hako kana kuti ndimwi mwakashaisha kuzwisisa zviro. Tendanyi kuti kangaije imwimwi mwakatoposavo padoko. Pamunobhuya naye mungatanga ngo kunanga zvakadari inga izvi: “Zvingaita hazvo kuti ndaakukasika maningi kukhugunyika, asi zvakamanangaya zuro zvakandi . . . ” Kudari mabhuyo ondhoo aripi kubesera kuti muite runyararo no hama yenyu, andoejaejanyi. Itiranyi mukumbiro hameyo. Kumbiranyi Jehovha kuti akomborere hama yenyu no kubesera imwimwi kusotesesa mugariro jake jakanaka. Mungava no cokwadi co kuti Jehovha anozodakajihwa maningi ngo kuvangisira kwenyu ko mwoyo wese kuti muite runyararo no hama yenyu, nairi shamwari ya Mwari.
PATINO MAZWIRO OKUJIPA NDAVA NGO ZVATAKAITA KARE
17. Jehovha anotibesera kudini kuti tinasirire ushamwari hwedu naye patinoshaisha zve ngenyi tinodikana kuashira besero rondhoro?
17 Vamweni vanojizwa inga avafaneri kuti vashandire Jehovha ngokuti vakamboita Nduyo 32:3-5) Kudari makaita cishaishi cikuru, Jehovha wakanasirira kuti amuregerere. Iyena anoda kumubesera kuti munasirire ushamwari hwenyu naye. Asi munodikana kutendera kuashira besero ramunopuwa ngo vakuru. (Mazwi Akangwara 24:16; Jakobo 5:13-15) Ngokudaro mucanonoka! Upenyu hwenyu ucikaperi hwakacijikira pondhopo. Asi ngatiti kudari muri kuramba muno mazwiro okujipa ndava pasure po nguva zinji cishaishi condhoco no caregerehwa. Munodikana kuitenyi?
zvishaishi zvikuru. Kujipa ndava kungatibvisira runyararo, mudakaro no simba redu. Mambo Dhavhidhi wakahwisana no mazwiro okujipa ndava zve wakati: “Apo ndakanyarara, mafupa angu akahika, ndaiboonga njiku yese. Ngokuti nyara yenyu yairema panyezuru pangu.” Zvinodakajisa ngo zvokuti, Dhavhidhi wakava no cicunge cokuita zvinoda Jehovha kuti zviithwe ngo vashandiri vake. Iyena wakatara kudari: “Ndakadekeca komuri uxaixi hwangu, . . . Imwimwi makakungurira kuxata kwangu, makaregerera uxaixi hwangu.” (18. Kuitisa kudini muezaniso wa Pauro ungabesera vaya vanojizwa kuti avafaneri kushandira Jehovha?
18 Pakava no nguva yo kuti mupostori Pauro wakapejwa simba ngo ndava yo zvishaishi zvaainga akaita kare. Iyena wakati: “Mbzakadi, inini ndiri mudoko wo vapostori. Andinakiri kudanijwa mupostori, ngokuti ndakateverera Gungano ra Mwari.” Pikija zvakadaro, Pauro wakaengejera eciti: “Kaveta, ndiri bzondiri wari, ngo unyaxa hwa Mwari.” (1 VaKorinto 15:9, 10) Jehovha waizviziva kuti Pauro wainga acizivi kukwana. Asi iyena wakaashira Pauro manera aainga zve waida kuti Pauro azvizive zvondhozvo. Kudari makanasa kuregerehwa ngo zvomakaita zve makabhuya na Jehovha ngo pamusoro pazvo, mobvunja vakuru kudari zvediwa, Jehovha anozomuregerera. Tendanyi kuti Jehovha wamuregerera zve tendanyi ruregerero hwake!—Isaia 55:6, 7.
19. Ngoyapi vhesi yo gore ro 2018 zve ngenyi inodikana?
19 Zvatiri kukhwederi ku magumo o mugariro uno wo zviro, tingavetera kuva no zvineso zvizinji. Tinodikana kuceukija kuti Jehovha, uwo “anovangisa varembi, anopa simba vacina simba,” angamupa zvese zvamunoda kuti murambe mucimushandira makagondeka. (Isaia 40:29; Nduyo 55:23; 68:20) Mukati mo gore ro 2018, tinozoceukija cokwadi ici cinosisira nguva jese jatinozoenda ku Nyumba yo Umambo zve patinovona magama o vhesi yo gore inoti: Vaya vanovetera Jehovha, vanozomusijihwa simba ravo.’—Isaia 40:31, Shanduro yeNyika Itsva.