1, 2. Jehovha ari kukhombijisa kudini kukova?

JEHOVHA ndi Mwari anokova. Zvese zvatinazvo zvinobva kwaari. Iyena ndi mune wo zviro zvese zvinosisira zviri pasi pano zve anozvishandisa kuitira kusapota upenyu. (Nduyo 104:13-15; Hagayo 2:8) Mu Bhaibheri, tinozwa kuti Jehovha nguva jimweni waishandisisa kudini zviro zvake zvinosisira ngo maitiro anoshamaisa kuti akorondhe vandhu vake.

² Inga muezaniso, ko 40 o makore, Jehovha waipa manaa no kumwa kuno jinja ro Iziraeri parainga reciponera mu zvipare. (Exodo 16:35) Ngo kudaro, vo jinja iri vakava no zvese zvavaida. (Neemia 9:20, 21) Pa kufamba ko nguva, Jehovha wakapa muporofita Erija simba ro kuengejera mafuta o noni imweni yakagondeka. Cipo ici caibva kuna Mwari cakabesera mwanakaji wiya kupagari magava ake wotosarazve no mare imweni yakazosapota iyena no vana vake. (2 Majimambo 4:1-7) Zve no besero ra Jehovha, Jesu ecishandisa mushamaiso wakapa zvokuha, atee  no mare kuno vaishaihwa.​—Mateu 15:35-38; 17:27.

3. Tinozojijenyi pa musoro uno?

³ Jehovha angashandisa ciri cese haco caanoda kuti abesere cisikwa cake. Pikija zvakadaro, iyena anokoka vashandiri vake kuti vape zvavanokwanisa kuitira kubesera basa ro sangano rake. (Exodo 36:3-7; verenganayi Mazwi Akangwara 3:9.) Ngenyi Jehovha anovetera kuti itusu tishandise upfumi hwedu kuti tipekejezve iyena? Vashandiri va Jehovha mu nguva jo Bhaibheri vakabeseresa kudini basa rake? Sangano riri kushandisa kudini mupiro jo mare jiri kuitwa nyamasi uno? Musoro uno unozodavira mubvunjo iji.

4. Patinobesera basa ra Jehovha tinokhombijenyi kwaari?

⁴ Tinopa Jehovha ngo kuti itusu tinomuda no kumubongesera. Patinorangarira ngo pamusoro po zvese zvaakatiitira Jehovha, mwoyo wedu unotitora kuti tiite ciri cese mukubongesera. Mambo Dhavhidhi waijizwa kudaro paakasanangura zvaidiwa kuitira kuvaka temberi. Dhavhidhi wakananga kuti zvese zvatinazvo zvinobva kuna Jehovha zve ciri cese catinomupa i ciro cainga akatipa kare.​—Verenganyi 1 Kronike 29:11-14, Shanduro yeNyika Itsva.

5. Bhaibheri rinotijijisa kudini kuti kupa ngo mwoyo wese i divi ro kunamata ko kadi-kadi?

⁵ Cimwenizve nga ici: Itusu tinopa Jehovha ngo kuti iyi ndi imwe njira yo kumunamata. Pa civoniso cimweni, mupostori Johani wakazwa vashandiri va Jehovha mu gore veciti: “Tenji, Mwari wedu, ndimwi munonakira kuaxira goja, nderemejo no simba; ngo kuti makarura bzese. Bzakaruhwa, ngo kuda kwenyu bziriyo, bzvorarama.” (Apokalipsi 4:11) Hina, Jehovha anofanera kamare goja rese, rukujo hwese, ngo kudaro itusu tinoda kumupa zvakanakisisa zvatinazvo. Ecishandisa Mosi, Jehovha wakabvunja jinja ro Iziraeri kuti riite mabuso katatu pa gore. Divi ro kunamata kwavo pa mabuso ondhowo kwainga kupa zvipo kuna Jehovha. Vandhu vakabvunjwa kuti “apana anoenda acina ciro mu nyara pambeji pa Tenji Mwari.” (Deuteronòmio 16:16) Nyamasi uno, kupira ngo mwoyo wese i divi ro kunamata. Ngo maitiro ao, tinokhombija kuti tinoreremeja no kubesera basa ro sangano ra Jehovha.

6. Ngenyi kupa kunobeserazve itusu?

⁶ Zvakanaka maningi kupa ngo kukova, haiwa basi kuashira. (Verenganyi Mazwi Akangwara 29:21.) Amborangariranyi basi mwana anopuwa mare ngo vabari vake mweji ngo mweji kana bviki ngo bviki perepo wobvisa padoko mare yondhoyo wotengera cipo vabari vakamupaya. Vabarivo vanojizwa kudini ngo cipo ciya? Rangariranyizve ngo pamusoro po mujaha ari piyona anopona no vabari vake asi anovapa zvimare kuitira kupagari zviri zvese kana kutenga zvokuha. Kangaije vabari vake avacaivetera kuti aite zvondhozvo, asi kunanga kuti vanoramba here? Haiwa. Ngenyi? Ngo kuti kupa kwake, i njira yo kubongesera ngo zvese zvaakaitihwa. Mukufananavo, Jehovha anoziva kuti, kudari tikapa zviro zvedu zvinonakirazve itusu.

7, 8. Vandhu va Jehovha vo mu nguva jo Bhaibheri vakagajisa kudini muezaniso pavaipira (a) kuitira basa rainga rarongwa kuitwa? (b) kuti vabesere basa rake?

⁷ Mu Bhaibheri, tinojija kuti vandhu va Jehovha vakaita mupiro kuitira kubesera basa rake. Nguva jimweni vaiita mupiro kuitira basa rainga rarongwa kuitwa. Inga muezaniso, Mosi wakavangisa vaIziraeri kuti vaite mupiro kuitira kuvakwa ko tabhernakeri. Pa kufamba ko nguva, Mambo Dhavhidhi wakaitavo zvondhozvo kuitira kuvakwa ko temberi. (Exodo 35:5; 1 Kronike 29:5-9) Mu nguva yo kutonga ka Mambo Jehoashi, vapiri vakanasirira-nasiria temberi vecishandisa mare yakabviswa ngo vandhu. (2 Majimambo 12:5, 6) Mu zana ro kutanga ro makore, maKristu akazwa kuti ku Judhea kwainga no njara zve hama jaida besero. Ngo kudaro muKristu umwe nga umwe wakajipira kutenga ciri cese kuti atumire ku hama jondhojo.—Maitiro o Vapostori 11:27-30.

⁸ Vandhu va Jehovha vanopa besero ro mare kuitira kubesera vaya vanotungamirira basa rake. Inga muezaniso, pasi po Mutemo wa Mosi, vaLevi avacaingepi no utaka inga manjija amweni. Ngokudaro vaIziraeri vazinji vakapa cogumi cavo ku vaLevi. Zvovaipuwari mweji ngo mweji kana bviki ngo bviki zvaivabesera kuti vabatisise basa ravo mu tabherinakeri. (Bziverengo 18:21) Mu njira yakafanana, vanakaji vaikova, vaishandisa zvavainga nazvo kuti vabesere Jesu no vapostori vake.​—Luka 8:1-3.

9. Mupiro jaiwanikisa kudini kareko?

⁹ Mupiro jondhojo jaibva kwakasiyana-siyana. VaIziraeri vaipira kuitira kuvakwa ko tabhernakeri kangaije vakapa zviro upfumi hwovakabva nawo ku Ejipita. (Exodo 3:21, 22; 35:22-24) Mu zana ro kutanga ro makore, maKristu amweni aitengesa zviro zvavo zvakadari inga maminda kana nyumba, veciviisa mareyo ku vapostori. Vapostori vaizoshandisa kuitira kubesera hama no hambzaji jaida besero ro kunyama. (Maitiro o Vapostori 4:34, 35) MaKristu amweni nguva jese aisengera mare kuitira kuti azobesere basa. (1 VaKorinto 16:2) Ngo kudaro, kubvira ku mukhupuki wo kutanga mbhera ku murombo wo kuperera kamare, vaikwanisa kupa ciri cese.​—Luka 21:1-4.

10, 11. (a) Tingatevejeresa kudini vashandiri va Jehovha vanokova vo mu nguva jo Bhaibheri? (b) Munozwa kudini ngo kubesera basa ro Umambo?

¹⁰ Nyamasi uno, tingakumbihwavo kuti tiite mupiro kuitira basa riri rese rinonga rarongwa kuitwa. Kangaije ungano yenyu iri kuronga kunasirira-nasirira Nyumba yo Umambo kana kuvaka imweni imbza. Kangaije hofise yenyu yo cine iri kuda kunasirihwa. Tingakwanisazve kubesera dhispeza jo gungano redu. Zvingaitazve kuti hama jedu jiri kutambujika ngo ndava yo ngozi jinoitika jega zve jiri kuda besero redu. Mupiro jedu jinobeseravo mamisionario, mapiyona anosisira, vavonereri vo ndharaundha,  pamwepo no vese vaya vari kushanda ku cine ro pasi pese no mu mahofise o macine kutenderera pasi pese. Ungano yenyu ingatumira mupiro nguva jese kuitira kubesera kuvakwa ko Nyumba jo Magungano no Nyumba jo Umambo kuitira hama jedu ku mativi amweni o nyika.

¹¹ Tese tingaita ciri cese kuti tibesere basa riri kuitwa ngo sangano ra Jehovha mu njiku jino jo kupejisira. Mupiro muzinji ajinangwi kuti jaitwa ndiani. Patinodira mare mu bhokiso ro mupiro pa Nyumba yo Umambo kana kuita mupiro tecishandisa interneti ngo mu jw.org, atibvunji vamweni kuti tapira mutengonyi. Asi kudari tikavona kuti mupiro wedu ndi mushoma maningi keni? Cokwadi ngo co kuti mupiro muzinji jinoashihwa ngo sangano jinobva ku zvipo zvishoma, mupiro mushoma ndijona jinoviya jakawanda. Pikija hama jino mare shoma kamare jinotevejera muezaniso jo maKristu o ku Masedhonia. Iwona ainga no ‘utami hukuru,’ asi akadeketera kuti atendehwevo kuita mupiro zve akaita mupiro no kukova kwese.​—2 VaKorinto 8:1-4.

12. Sangano riri kuejesa kudini kushandisa mupiro ngo maitiro akanakisisa kamare?

¹² Mukhumbi Unotonga wakagondeka zve unoshandisa ungwaru pa kushandisa mupiro. (Mateu 24:45) Hama jinoumba cikwata cavo jinoita mukumbiro kuti jiteme zvivaringo zvakanaka zve no kungwarira kwese, vanoronga mashandisire avanoda kuita mare. (Luka 14:28) Mu nguva jo Bhaibheri, vanarume vakagondeka vaingwarira mupiro, vaiita zvese kuti mupiro jondhojo jishandiswe basi pa kunamata Jehovha. Inga muezaniso, Esdra wakahwirira ku Jerusarema no zvipo zvo mutengo mukuru kubva ka mambo wo Persia, zvaibatanija goridhe, sirivha no upfumi umweni wokuti ukacinjwa ngo mare, waikwana mutengo wo 100 ro mamirioni o madhora o ku Amerika nyamasi uno. Esdra wakavona mupiro iji inga zvipo kuna Jehovha. Ngo kudaro wakapa ndhungamiro jakajeka kuitira kuti zvingwaririhwe ushoni pazvainga zvecidarika mu ndau jo ngozi. (Esdra 8:24-34) Papera makore akawanda, mupostori Pauro wakavonerera mare yakahengwa ngo hama kuitira koobesera hama jo ku Judheya. Iyena wakava no gwinyiso ro kuti vaya vaizoenda no mare iyi vaite zvese ‘ngo kugondeka, haiwa basi pa meso pa Jehovha, asi no pamberi po vandhu.’ (Verenganyi 2 VaKorinto 8:18-21.) Nyamasi uno, sangano redu rinotevejera Esdra na Pauro zve rinoshandisa mupiro no kungwarira kwese.

13. Ngenyi sangano rakaita cinjo jimweni pa mukuvo waperari?

¹³ Mbhuri ingaita cinjo pa mashandisire ainoita mare yayo kuitira kuti itame kumosha mutengo wo mare unopinda wainowana. Kana kuti ingapsaka maitiro o kurerusa upenyu kuti iengejere pakushandira kwayo Jehovha. Ndizvonavo zvondhozvo no sangano ra Jehovha. Pa mukuvo waperari, kwaizika masoko anodakajisa ngo pamusoro po mabasa mapsa airongwa kuitwa, asi pa nguva imweyo mare zinji yaimoshwa kupinda yaiashihwa. Ngo kudaro, kudarivo inga mbhuri, sangano rinopsaka maitiro kuti rikwanise kungwarira mare no kurerusa basa, kuitira kuti rinase kushandisa kamare mupiro jo kujipira jinoitwaya.

14-16. (a) Mupiro jenyu jiri kushandisihwa kwapi? (b) Mabasa ari kuithwaro ari kumubesera kudini pacenyu?

¹⁴ Vazinji vari mu cokwadi ko makore akawanda vari kunanga kuti wari tiri kuashira  zvipo zvakawanda maningi zvinobva mu sangano kupinda kareko. Wari uno tino jw.org no JW Broadcasting. Tino Shanduro yeNyika Itsva yeMagwaro Matsvene mu ndumi jakawanda. Mu gore ro 2014/2015 pa gungano ro Nyika Jese ro njiku ndhatu rainga no musoro unoti “Rambanyi Mecitanga Kupsanga Umambo hwa Mwari!” rakaitwa mu estadhio yakakura mu 14 o madhorobha kutenderera pasi pese. Vese vakava pa gungano rondhoro vakadakara maningi!

¹⁵ Vazinji vari kuvonesa mudakaro wavo ngo zvipo zvese izvo zvinobva ku sangano ra Jehovha. Inga muezaniso, varovorani vamweni vo ku Azia vakatara kudari: “Takagajwa kooshanda ku cidhorobha cimweni. Ngo iyo ndava nguva jimweni tinojizwa takapaurana no vamweni zve azvitineseri kukanganwa makurire o basa ra Jehovha. Asi tikavona basi urongwa wo JW Broadcasting tinoceukija kuti tiri divi ro ukama humweni hukuru hwo pasi pese. Hama no hambzaji jedu jinodiwa jo mundharundha mwedumo jinodakarira maningi JW Broadcasting. Kazinji tinojizwa jecinanga kuti pajinopera kuvona urongwa hwo mweji hwo JW Broadcasting vanojizwa vari phedo no vo Mukhumbi Unotonga. Wari uno vari kujikuja maningi ngo kuva divi ro sangano ra Mwari kupinda kare.”

¹⁶ Kutenderera pasi pese, kuri kuvakwa kana kunasirihwa mutengo unokwedera kuita 2.500 zvo Nyumba jo Umambo. Hama jo ungano imweni yo ku Hondura jakananga kuti kuva no Nyumba yo Umambo yavo kamare ndi ciro cavairota basi, asi wari zvakazoitika kamare. Hama jondhojo jakatara kudari: “Tino mudakaro wokadi kamare ngo kuva divi ro mbhuri ya Jehovha yo mudenga no pasi no kubusa ngo kuva divi ro hama no hambzaji jinoshamaisa jo pasi pese.” Vazinji vanovavo no mazwiro akafanana pavanoashira mabhuku mu ndumi yavo kamare, pavanoashira besero ro hama no hambzaji pasure po kuwihwa ngo ngozi jinoitika jega, kana pavanovona muviyo jakanaka jo ucapupu wo mu madhorobha makuru no ucapupu wo pambhene mu ndima javo.

17. Tinozvizivisa kudini kuti Jehovha ari kubesera sangano rake nyamasi uno?

 ¹⁷ Vazinji vaciripi Zvapupu zva Jehovha avakwanisi kuzwisisa kuti zvingaitisa kudini zviro zvese izvi zvishandiswe basi ngo mupiro jo kujipira. Mutungamiriri wo khampani imweni wakabvakacira umwe wo mucini jedu jo kudhindha mabhuku. Iyena wakashamaisika ngo basa rese rinoitwa ngo hama jo kuzvipira, kubvira ku mupiro jo kuzvipira, kucikaizwi urongwa uri wese kuitira kupsaka mare. Iyena wakananga kuti zvese zvatiri kuitari azvicaizokwanisika. Itusu atirambi! Tinoziva kuti izvi zviri kukwanisika ngo kuti Jehovha ari kubesera basa rake.​—Jobe 42:2.

18. (a) Makomborero api atinoashira patinoita mupiro kuitira kubesera Umambo? (b) Tingajijisa kudini vana vedu no vandhu vapsa mu sangano kuti vaitevo kudaro?

¹⁸ Jehovha anotipa rukujo no mukana wo kubesera basa guru ro Umambo. Iyena anotigondisa kuti patinoita zvondhozvo, iyena anozotikomborera. (Malakia 3:10) Jehovha anogondisa kuti kudari tikava vanokova, zviro zvinozotifambira ushoni. (Verenganyi Mazwi Akangwara 11:​24, 25, Shanduro yeNyika Itsva.) Iyena anotibvunja kuti tinozova vakadakara kudari tikapa ngo kuti “anodakara anopa, kupinda wiya anopuwa.” (Maitiro o Vapostori 20:35) Ngo zvotinonanga kana kuita, tingajijisa vana vedu no vandhu vapsa mu sangano maitiro atingaita mupiro kuitira basa perepo towana makomborero akawanda.

19. Mwavangiswa kudini ngo musoro uwu?

¹⁹ Zvese zvatinazvo zvinobva kuna Jehovha. Patinopekejazve iyena, tinokhombija kuti tinomuda zve tinoreremeja zvese zvaakatiitira. (1 Kronike 29:17) VaIziraeri pavaiita mupiro kuitira kuvakwa ko temberi, ivona “vakadakara nga bzovakaita, ngokuti ngo mwoyo yavo yese vakapira Tenji Mwari ngo kuda kwavo.” (1 Kronike 29:9) Ngatirambe teciwana mudakaro unoviiswa ngo kupekejazve iyena zviyana zvaakatipekejaya.