Maindu anotenda kuti matambujiko i muviyo wo zvishaishi zvo mundhu pacake, kana kuti zviya zvaanoita wari uno kana kuti zvaakaita kare. Thangwe rakona i kukwanirisa kuti mundhu atame kufa—ngo kudaro zvinodikana kuti mundhu atame kuva ecitora rutivi wo zviro zvo munyika.

Mwajimwenye anotenda kuti matambujiko o vandhu vakashata i kupanicwa ko zvishaishi zvavo. Kuveni ku vandhu vakagondeka, matambujiko i kuejwa ko rutendo hwavo. Mukuzwirana na Dr, Sayyid Syeed wo mutundhu wo Isramika yo Amerika yo Kanjikazi, ngozi i ciceukijo cokuti “tinodikana kubonga Mwari ngo ndava yo makomborero edu zve zvinoticeukija kuti tinodikana kubesera vaya vanoda besero.”

Ivona vanotenda kuti kutambujika i muviyo wo zvishaishi zvo mundhuwo kamare, Vajudha vamweni vanotenda kuti kunozova no rumuko zve kururama kunozoizwa ku vaya vakatambujika. Kasike majudhaismo vanojijisa kuti kubahwa ngo papsa kunopa mukana muzinji kuti vapungure zvishaishi zvavo.

Mabhudhista anonanga kuti mundhu anotambujika pakupera kubahwa ngo papsa, zve anosiya kuita zviro zvakashata, murangariro jakashata, zvido zvakashata no mazwiro akashata. Ngo ndava yo uzivi, mufambiro wakanaka no kupangihwa kwakanaka, mundhuwo angava pa mugariro ucina matambujiko.

Mukuzwirana no Bhuku rinonaga ngo pamusoro po Zviara, irona rinoti makonfusionista anotenda kuti matambujiko i muviyo wo kuphosa no “zvishaishi zvo vandhu”. Ivona vanotendazve kuti matambujiko angapunguka ngo kuita zvaushoni, asi kazinji zvinoiitiswa ngo “zvisikwa zvo kumujimu ngokudaro atingakwanisi kuzvingwarira. Asi njira imwe basi ngo yo kutenda zvakaemesehwaro.”

Zviara zvimweni zvo majinja aya zvinotenda kuti mundhu anotambujika ngo ndava yo uroyi hwakadihwa mumuviri wake. Uroyi ungaviisa soroti no matambujiko, mundhu angapokonyoka pa uroyi ngo kuita zvo mujimu. Inga muezaniso, mundhu paanotambujika ngo ndhendha iri yese angaenda ka beze kana kuti kunyanga kuti abhiswe uroihwo.

Ku makristu matambujiko akatanga ngo ndava yo ushaishi wakaitwa ndi Adhamu na Evha inga zvinonangwa ngo Bhaibheri pana Genesis. Asi zviyara zvakawanda zvakaengejera murangariro wazvo ngo pamusoro po jijiso iyi. Inga muezaniso vandhu vo ciyara co Katorika vanonanga kuti matambujiko ‘angapuwa Mwari’ kuti amashandise pa kukomborera gerejha ravo kuti aponese vandhu vamweni.