Kuregerera kunoreva kukanganwa ciro cakashata caitwa ngo mundhu kana kunangwa no kutama kuviga bundu. Asi izvo azvirevi kuti munodikana kuita inga kuti apana caitika kana kurangarira kuti zvaitaya mundhu wiya azvizivi kushata maningi.

BHAIBHERI RINOTI: “Endereranyi mberi mecicungirirana ngocenyu no kuregererana ngo mwoyo wese pikija aripo wamukhugunya ngo ciro ciri cese.”—Vakorose 3:13.

“Kudari imwimwi munoda mundhu umweni, amubatikani maningi pa zviya zvaanoposa. Asi munobatikana pa zvakanaka zvaari kueja kuita.”—Aroni.

Kuviga bundu kungaita kuti mutame kuva no mudakaro, muve no zvineso zvo uhomi pomwe no kutobara zvineso mu mucadho wenyu.

“Pa vhaza imweni, mwamunangu vakaita zviro zvakandihwaja maningi. Vakandikumbira ruregerero asi zvakandinesera maningi kuti ndivaregerere. Ndakazovaregerera hangu, asi ndinozvidemba ngokuti ndakanonoka kuzviita. Kunonoka uku kuregerera, kwakaita kuti tinesane kamare.” —Jhuriya.

AMBORANGARIRANYI KUDARI

Kudari mudoni wenyu akaita kana kunanga zviro zvamuhwaja, jivhunjisenyi kudari:

• ‘Ndiri kukasika maningi kunyangajwa here?’

• ‘Kunanga kuti zvaaitaro, zvakashata maningi zvokuti ndinodikana kukumbihwa kuregerehwa kana ndinodikana kutokanganwa zvaitikari?’

BHUISANANYI NO WAMAKAROVORANA NAYE NGO PAMUSORO PO MUVHUNJO JINOTEVERA

• Kunanga kuti tinoregererana no papera mukuvo wakareba here?

• Ngozvapi zvatinodikana kuita kuti tikasike kuregererana?

MAZANO

• Kudari mukanyangajiswa ngo mudoni wenyu, mucarangarira kuti wazviita ecizvida.

• Ejanyi kuregerera mudoni wenyu, meciceukija kuti “tese tinoshaisha kazinji.”—Jakobo 3:2.

“Zvakareruka maningi kuregerera kudari tese tashaisha. Asi zvinonesa maningi kuita izvi, kudari ndi umwe basi washaisha. Ngo kudaro, unodikana kujidodokesa kamare kuti ukwanise kuregerera mudoni wako.”—Kimberi.

BHAIBHERI RINOTI: “Kasikai kutonga ndava.”—Mateu 5:25.