KUITIRA VAKACADHA
3: Kureremajana
KUNOREVENYI?
Mukaji no mwamuna vanoreremejana, vanoenderera mberi vecidisana pikija avaripi kuwirirana pa shwiro yakati kuti. Bhuku rinozwi Dez Lições para Transformar seu Casamento, rakananga kudari ngo pamusoro po mukaji no mwamuna vanoreremejana: “Varovorani ava avagari vecibatisisa zvavanoda basi. Kusiyapo zvondhozvo, vanobhuya ngo pamusoro po mavonero avo, vonasa kupurukira ngo nderemejo yese zano ro umweni. Ngo kudaro, vanoguma pa kuwana zano rinodakarihwa ngo vese.”
BHAIBHERI RINOTI: “Rudo . . . ahupsaki kuda kwahwo.”—1 Vakorinte 13:4, 5.
“Kureremeja mukaji wangu zvinoreva kuziva kuti iyena anosisira maningi no kutama kuita ciri cese cingamunyangajisa kana cingadira pa ngozi mucadho wedu.”—Mika.
NGENYI ZVINOSISIRA?
Mukaji no mwamuna pavanotama kureremejana, mabhuyo avanoita anopejisira ngo kushorana no kutukana. Mukuzwirana no vapsakisisi vamweni, zviro izvi zvinoita kuti vandhu ava vagume pa kurambana.
“Magama okutuka no okushora mukaji wenyu, anoita kuti iyena atame kujidazve, atame kumuthemba no kubara zvineso mu mucadho wenyu.”—Bhraini.
ZVICINYI ZVAMUNGAITA?
AMBORANGARIRANYI KUDARI
Mukati mo sumana imwe, nasanyi kusotesesa manera amunobhuya no kuita zviro. Perapo, daviranyi muvhunjo iji:
-
‘Kangana pondakashora mudoni wangu no kumusimba?’
-
‘Ngozvapi zvondakaita zvinovonesa kuti ndinoreremeja mukaji wangu kana mwamunangu?’
BHUISANANYI NO WAMAKAROVORANA NAYE NGO PAMUSORO PO MUVHUNJO JINOTEVERA
-
Ngozvapi zvamaida kuti mudoni wenyu amuitire kana kunanga zvinovonesa kuti anomureremeja?
-
Ngozvapi zvinoitwa kana kunangwa ngo mudoni wenyu zvinovonesa kuti aaripi kumureremeja?
MAZANO
-
Taranyi zviro zvitatu zvingaitwa ngo mudoni wenyu kuti mujizwe kuti muri kureremejwa. Umwe nga umwe anodikana kutara zviro zvake wopekeja umweni. Perapo, itanyi zvese zvamunokwanisa kuti muite zvakumbiraya mudoni wenyu.
-
Itanyi rista yo zviro zvamunodakarira ku mudoni wenyu. Perapo, muvhunjenyi kuti munodakarira maningi zviro zvondhozvo.
“Kureremeja mwamunangu zvinoreva kukhombija ngo zviito kuti ndinomuda maningi nokutizve ndinoda kuti iyena adakare. Azvirevi kuti ndinodikana kuita zviro zvakakura maningi. Nguva jimweni zviro zvidokowane pa njiku zvinovonesa kuti tinoreremeja mundhu umweni.”—Mega.
Cinosisira maningi, asipi dangani imwimwi munojivona inga mundhu anoreremeja maningi vamweni. Asi ngo co kuti, kureva kuti mudoni wenyu anojizwa kuti ari kureremejwa here?
BHAIBHERI RINOTI: “Tatijirananyi pena no rudo, unyasha, kujidodokesa, kupfava no kusengerera.”—Vakorose 3:12.
