Vabari vanodikana kuita kamare zvavanojijisa vana vavo. Inga muezaniso, amungaveteri kuti mwana wenyu abhuye cokwadi, kudari imwimwi muno mushambo wo kunanga kuti, kudari pakaguma mundhu “nangai kuti andipo,” kuveni muripo pa muzi.

“Vandhu vazinji vano cirovejeso co kunanga kudari, ‘itai zvandinonanga, kuciripi zvandinoita.’ Asi izvo azvishandi kuno vana. Ivona vakadari inga shiponja, vanotora zvese zvatinoita no zvatinonanga. Kudari tikavajijisa zvimweni, perapo toita zvimweni, ivona vangatotivhunja.”—Dhavhidhi.

BHAIBHERI RINOTI: “Iwewe unocumaera kuti: “Ucaba,” iwewe aubi here?”—Varoma 2:21.

Vana vanotevejera maningi zvinoitwa ngo vabari vavo. Izvo zvinoreva kuti ndimwi munodikana kubesera vana venyu kuti vaite zvakanaka. Asi imwimwi munodikanavo kushandisa zvamunovajijisaro.

“Tingatovhunja mwana wedu ciro cimwe pa vhaza jakawanda, ticikazvizivi dangani ari kupurukira kana kuti haiwa. Asi njiku yatinotama kuita ciro cotakamujijisa, iyena anotivhunja. Vana vanovona zvese zvatinoita, pikija itusu tecirangarira kuti, avaripi kuzvivona.”—Nikore.

BHAIBHERI RINOTI: “Ungwaru hunovha mugore . . . ahucengejeri.”—Jakobo 3:17.

Nasanyi kupopora zvamunoita. Ngozvapi zvamunodakarira maningi kusistiri mu terevhisori? Munotajisa kudini mbhuri yenyu? Shamwari jenyu ivandhu vomushovonyi? Munotaja ushoni vandhu vamweni here? Mukugurisira, kureva kuti imwimwi, munoita zvamunoda kuti vana venyu vaite here?

“Inini no mwamunangu ativhunji vana vedu kuti vaite zviro zvaticikaiti.”—Kristina.

Kudari maposa ciri cese, kumbiranyi kuregerehwa. Vana venyu vanozviziva kuti imwimwi amuzivi kukwana. Kudari mukakumbira “kuregerehwa” ngo mukaji wenyu no vana pazvinodikana weya, zvinozoita kuti ivona vajijire kuva vandhu vakagondeka no vanojidodokesa.

“Vana vedu vanodikana kuzwavo tecinanga kuti taposa no kukumbira ruregerero. Tikatama kuita kudaro, ivona avazonangivo zvavanoposa.”—Robini.