Ushamwari na Mwari
Inga zvanangwa pakutanga pa revhista iyi, vandhu vazinji vanovona Bhaibheri inga bhuku rakacena. Ivona vakapfumbhura kuti kuverenga Bhaibheri pomwe no kushandisa ndhungamiriro jaro, zvinoita kuti vakhwedere phedo na Mwari zve zvinovabesera kuziva kuti ngo capi cinangwa co upenyu.
Bhaibheri rinonanga kuti mundhu ano ‘ushamwari’ na Mwari, anoreremeja mavonero ake zve anopona mukuzwirana no ndhungamiriro jake. Mukusiana na izvi, mundhu acikadi kutungamirihwa ndi Mwari anojithemba ega zve anoteverera zvinoda muviri wake.—Juda 1:18, 19; VaEfeso 5:1.
SOTERERO
CIAMBI CO MU BHAIBHERI: “Ukarembesesa pa njiku yo khombo, simba rako i doko.”—Mazwi Akangwara 24:10.
ZVINODA KUREVENYI: Kurembejeka kungatipeja simba kuti tihwisane no nyathwa jo upenyu. Ngo divi rimweni, kuimira kunotipa cicunge kuti tienderere mbheri. Zvinotitondhoja kuziva kuti zvineso zvedu ngo zvo nguva shoma, zvokadi, izvona zvingaviisa muviyo jaushoni.
NGOZVAPI ZVAMUNGAITA: Ejanyi kuvona kumbeji kwenyu ngo manera aushoni. Kunja ko kugara mecineseka ngo zvingaitika kumbejiyo kana kuvetera mukana jaushoni, itanyi zviri zvese kuti mukwanirise zvido zvenyu. Icokwadi kuti zviro zvaticingaveteri zvingaitika. (Mucumaeri 9:11) Kazinji zviro zvingaitika ngo manera aticikaveteri. Kuitira kuezanisira, Bhaibheri rinoti: “Co mangwanani kusai mbeu jako; co madeko nyara jako jitame kuzorora, ngokuti auzivi i mbeu yapi inozomera: ii, nokuti iyo, nokuti jojiviri.”—Mucumaeri 11:6.
MUPINGURO JO MUVHUNJO JINOSISIRA MANINGI JO UPENYU
CIAMBI CO MU BHAIBHERI: “ndipenyi kuzwisisa . . . “matongero enyu akarurama.”—Nduyo 119:144, 160.
ZVINODA KUREVENYI: Bhaibheri rinodavira muvhunjo jakawanda jokuti vandhu vazinji vanojiita. Inga muezaniso:
-
Takavha kwapi?
-
Ngocapi cinangwa co upenyu?
-
Icinyi cinoitika mundhu akafa?
-
Kureva kuti upenyu hwedu unozova wakadari basi here?
Bhaibheri rakabesera vandhu vo mu nyika yese, kuti vawane mupinguro jo muvhunjo iji no jimweni zve rakavabeserazve kuti vave no upenyu waushoni.
NGOZVAPI ZVAMUNGAITA: Vonanyi mega kuti zvicinyi zvinojijisa Bhaibheri. Kumbiranyi besero kuno umwe wo Zvapupu zva Jehovha kuti muzwisise Bhaibheri. Nghwinanyi mu site yedu, jw.org, kana vonanyi musongano jedu, jicikapagahwi zve jakafunungukira vese.
ZVIAMBI ZVIMWENI
Vonanyi vhidhio inoti Ngenyi kujija Bhaibheri? mu jw.org. Inowanika mu ndumi jinokwana 880
MUNODIKANA KUZIVA MWARI NO KUTEVERERA NDHUNGAMIRIRO JAKE.
‘Vanodakara avo vanopurutana izwi ra Mwari no kuriteveja!’—LUKA 11:28, Shanduro yeNyika Itsva.
JIJANYI ZVAKAWANDA NGO PAMUSORO PA MWARI.
“Vapsange Marure vavangirire kumuwana . . . yena aaripi ndhambo na ariwese wedu.”—MAITIRO O VAPOSTORI 17:27.
VERENGANYI ZVE RANGARIRANYI NGO MASOKO O MU BHAIBHERI.
“Anodakara ngo Mupango wa Mwari worangarira matongero ake usiku no masikati . . . Bzese bzaanoita bzauxoni.”—NDUYO 1:2, 3.
Bhaibheri rinotatija kuti Jehovha i zina ra Mwari.
