Pa mweji jakazotevera, iyena wakazovora mwoyo ngo pamusoro po basa raainga ecivetera kuwana. Inga muezaniso, paainga eciitwa mubvunjo jo kuda kuwana basa, Hitoshi wakananga kuti aacaizotendera kuita basa rinobatanija kutama kugondeka. Wiyana waimubvunjisaya wakadavira kudari: “Murangariro wako wakasiyana kamare!” Ukama no shwamari ja Hitoshi jakamuvangisa kuti arambe akatema civaringo co kuva akagondeka, asi pikija zvakadaro, iyena wakatanga kukana-kana. Inga muezaniso, iyena wakananga kudari: “Ndakakana-kana kuti kuramba ndakagondeka ngo ndava yo rutendo hwangu zvaingadi zvakanaka here kana kuti haiwa.”

Zvakasongana na Hitoshi zvinotibararisa musoro ngo kuziva kuti asipi vese vanowana mupocero umwewo ngo kuramba vakagondeka. Zvokadi kamare, vamweni vangatovona kugondeka inga ciro cicikabeseri, maningi-ningi pakuita nyagoso. Mwanakaji umweni anoshanda ku Afrika dhu Suri wakananga kudari: “Ndakatendenejwa ngo vandhu vacikazivi kugondeka, zve nguva jimweni, ndinovangirijwa maningi kuti nditenderane no kutama kugondeka.”

Amweni maitiro o kutama kugondeka ari kuwanda maningi nyamasi uno, ngo o kunyepa. Pa makore manganani akapera, imwe jijo yakaizwa ndi Robert S. Feldman wo ku Univhersidhadhe Massachusetts Amherst, anojija ngo zvokupopora murangariro, yakavonesa kuti mutengo unokwana 60 kubva mu zana wo vasharuka, vanonyepa kamwe pa mabhuyo o 10 ro museswa. Iyena wakananga kudari: “I ciro cimweni cinoshamaisa maningi. Aticaivetera kuti kunyepa kuve divi ro upenyu hwo njiku ngo njiku.” Azvitishamaisi here kuziva kuti vazinji avadi kunyepehwa kuveni vanonyepa ngo vakawanda?

Ngenyi kunyepa, kuba, no maitiro amweni o kutama kugondeka ari kuitwa maningi nyamasi uno? Kutama kugondeka kunopsasa kudini vandhu vese? Zve pamusoro pa zvese, tingatizisa kudini kuwira mu maitiro aya o kutama kugondeka?