Imbanyi no Mudakaro Wese!
‘Ngo kuti kwakanaka kuimba no kukuja Mwari wedu.’—NDUYO 147:1, Baiberi Mazwi Akacena aMwari.
1. Kuimba kunotibesera kuti tiitenyi?
MUTARI umweni wo ndumbo anozivikanwa maningi wakananga kudari: “Magama anotiita kuti tirangarire. Mumbo jinopsasa mazwiro edu. Asi ndumbo jinobaya mwoyo.” Ndumbo jedu jinotatija rukujo zve rudo kuno Baba wedu vo mugore, Jehovha. Ijona jinoita kuti tikwedere kwaari. Ngokudaro, azvinesi kuzwisisa kuti ngenyi kuimba kunosisira maningi mu kunamata kwakacena, azvinenyi dangani muri kuimba mwega kana no hama no hambzaji jedu.
2, 3. (a) Vamweni vanozwa kudini ngo pamusoro po kuimba ngo izwi rakakhwira mu ungano? (b) Ngojapi mubvunjo jaticazobhuisana mu musoro uno?
2 Munozwa kudini pamunoimba ngo izwi rakakhwira mu ungano? Munoita nyowa here? Mu ndharaundha jimweni, vanarume vangatama kujizwa ushoni kuimba pambeji po vandhu vamweni. Murangariro uwu ungava unopsasa ungano yese mu njira icikabeseri, maningi-ningi kudari ndi vakuru avajizwi vakasujunuka pa kuimba kana vanoramba vakabatikana ngo mabasa amweni ndumbo painonga iciimbwa.—Nduyo 30:13.
3 Kuimba i divi ro kunamata kwedu Jehovha. Ngokudaro, atibviri kufamba-famba ndumbo painonga iciimbhwa kana kutoruza divi iri ro musongano. Ngokudaro, tinodikana kuzvibvunjisa kudari: ‘Ndinozwa kudini ngo pamusoro po kuimba pa musongano? Ndinodikana kuitenyi kudari ndicikajizwi ndakasujunuka kuimba pambeji po vamweni? Zve ndingaimbisa kudini no mazwiro?’
KUIMBA I DIVI RINOSISIRA RO KUNAMATA KOKADI-KADI
4, 5. Ngoyapi nasiriro yakaithwa kuitira kuimba mu temberi ku Iziraeri yo kare?
4 Kubvira kare, vanamati va Jehovha vari kundoshandisa mumbo kuti vamukuje. Zvinodakajisa ngo zvokuti, vaIziraeri pavainga vakagondeka kuna Jehovha, kuimba kwainga divi rinosisira pa kunamata kwavo. Inga muezaniso, Dhavhidhi paakaita nasisiro kuitira temberi, iyena wakaronga 4.000 zvo vaLevi kuti vakuje Jehovha ngo mumbo. Vese vaikwanisa ushoni kuimba, 288 “vainga vakajija kuimbira Tenji Mwari.”—1 Kronike 23:5; 25:7.
5 Mumbo no ndumbo zvakavazve divi rinosisira pa urongwa hwo kupira temberi. Bhaibheri rinotibvunja kudari: “Umwe nga umwe wavo wairija mbayapaya nokuti waiimba; vaisimba no kukomborera Tenji Mwari, inga mundhu umwe basi; vaimusa mazwi avo ngo mutindhiro yo mbayapaya, madangari no mbira, vaikomborera Tenji Mwari veciti: “Ngokuti yena wakanaka, rudo hwake ahuzoperi! Vapiri novabuda mu ndau yakacena, nyumba yakazajwa ngo Gwiti ro goja ra Tenji Mwari, . . . ngokuti goja ra Tenji Mwari raizaja nyumba ya Mwari.” Rangariranyi mavangire o gonda akava no vaIziraeri pa ciitiko ici!—2 Kronike 5:13, 14; 7:6.
6. Ngojapi nasiriro kuitira mumbo no kuimba jakaithwa ndi Neemia paakava ghovherinadhori wo Jerusarema?
6 Neemia, uwo wakaronga vaIziraeri kuti vavakise mufimbiji jo Jerusarema, wakarongavo vaLevi kuti vaimbe zve varije mumbo. Kubatikana kwavakaita kwakavabesera kuti vaite basa no mudakaro. Neemia wakagaja “bzikwata bziviri bzo vaimbi.” Cikwata co vaimbi caifamba ngo pa nyezuru po mufimbiji ngo divi rakasiana no cikwata cimweni, mbhera povakasongana phedo no pa temberi. Vaiimba ngo izwi rakakhwirira zvokuti vandhu vaikwanisa kuzwa ngo ndhambo kamare. (Neemia 12:27, 28, 31, 38, 40, 43) Tingava no cokwadi co kuti Jehovha wakadakara maningi paakazwa kuti vanamati vake vaiimba ngo mudakaro wese ndumbo jo kumukuja.
7. Jesu wakakhombijisa kudini kuti kuimba i divi rinosisira ro kunamata ko ciKristu?
7 Mu nguva ja Jesu, mumbo jakaramba jiri divi rinosisira pa kunamata kokadi-kadi. Rangariranyi zvakaitika pa usiku unosisira maningi kupinda hwese. Jesu paakapera kuita Majiisa o Cirariro ca Tenji no vajiji vake, vese vakaimba ndumbo jinokuja Jehovha.—Verenganyi Mateu 26:30.
8. MaKristu okutanga akagajisa kudini muezaniso wo kukuja Mwari ngo ndumbo?
8 MaKristu okutanga akagaja muezaniso wakanaka wo kukuja Mwari ngo ndumbo. Mukusiana no vaIziraeri, avo vakaenda ku temberi kuti vanamate Jehovha, maKristu aya aizviita mu jinyumba kamare. Pikija hazvo nyumba iji ajicainyarepi zve ajicaishamaisepi inga temberi, hama jaiimba no kuvangisira kwese. Zvokadi kamare, mupostori Pauro wakananga kudari ku hama jake jo ciKristu: ‘Rambanyi mucijijisana zve mucivangisana no nduyo, ndumbo jinokuja Mwari, ndumbo jo mujimu no nyasha, muciimbira Jehovha mu mwoyo mwenyu.’ (VaKolosi 3:16, Shanduro yeNyika Itsva) Ndumbo jiri mu bhuku redu ro ndumbo jinodikana kuva “ndumbo jo . . .nyasha.” Irona rinoita divi ro ‘zvokuha zvinosisira zvo pa nguva kwayo’ izvo zvatinopuwa ngo “muranda wakagondeka no wakangwara.”—Mateu 24:45.
KUIMBA MAKASUJUNUKA
9. (a) Ngenyi vamweni avadakariri kuimba no izwi guru pa musongano no magungano? (b) Tinodikana kuimbisa kudini pa kukuja Jehovha, zve ndiani anodikana kutungamirira pa kuimba? (Vonanyi pikica yo kutanga.)
9 Ngoapi mathangwe amweni angamuita kuti muimbe mucizivi kusujunuka? Kangaije kuimba asipi ciro co cirovejeso ko makabahwaro kana pa ukama hwenyu. Zvingaitazve kuti pamunozwa, kuvona muiimbi muradhio kana muterevhizau, moezanisa maimbire ake no enyu, munomukira kupera simba, mozwa inga amutokwanisi kuimba. Asi zvinovetehwa kuti tese tiimbe ticikuja Jehovha. Ngo kudaro mucaremba, batanyi nduyo yenyu, momusa musoro, motoimba no mudakaro wese. (Esdra 3:11; verenganyi Nduyo 147:1.) Nyamasi uno nyumba jo Umambo zinji, jino materevhizau makuru, anobudisa magama o ndumbo, izvo zvinobesera kuti tiimbe ngo izwi guru. Cimwenizve ngo co kuti kubvira ka wari ndumbo jo Umambo jaakutora rutivi pa Cikora co Mushando wo Umambo kuitira vakuru. Izvi zvinogogomejera kuti, zvinosisira maningi vakuru vo ungano vatungamirire pa kuimba ndumbo pa musongano jo ungano.
10. Zvicinyi zvatinodikana kuceukija kudari tikathya kuimba ngo izwi guru?
10 Vazinji vanothya kuimba ngo izwi guru ngokuti ivona vanorangarira kuti vanozokhuwisisa kana kuti avana izwi raushoni. Ngokudaro, rangariranyi basi. “Tese tinoxaixa ruzinji” patinovereketa, asi atiregeri kuvereketa ngo ndava yazvo. (Jakobo 3:2) Waro, ngenyi tinodikana kuregera kuti izwi redu ricizivi kukwana rititamise kuimbira Jehovha?
11, 12. Tingaitisa kudini nane kuimba kwedu?
11 Kangaije tingathya kuimba ngokuti atizvizivi kuti tingaimbisa kudini. Asi, kuno zviro zvishoma zvakareruka zvingatibesera kuitisa nane kuimba kwedu. *—Vonanyi masoko o pasi.
12 Imwimwi mungakwanisa kuimba ngo izwi guru zve rakakhwira ngo kujijira kufema mu njira inodikana. Kudari inga magezi anokwanisa kupa simba kuti marujhu abwake, kufema kwamunoita kunokhwija izwi renyu pamunovereketa kana pamunoimba. Munodikana kuimba ngo izwi guru inga zvamunoita pakuvereketa kana kukhuwa. (Vonanyi mazano anowanika mu bhuku rinoti Batsirwa Nedzidzo Yechikoro chaMwari Choushumiri, pa mapheji 181 mbhera 184, pasi po cimusoro cinoti “Fema Zvakanaka.”) Zvokadi kamare, Bhaibheri nguva jimweni rinonanga ku vanamati va Jehovha kuti ‘vadakare’ pavanoimba rukujo.—Nduyo 33:1-3.
13. Sananguranyi kuti tingaitisa kudini kuti tiimbe takasujunuka.
13 Pamunonga meciita kunamata ko mbhuri kana pamunonga muri mwega, enjanyi kuita kudari: Sananyi ndumbo yamunodakarira pa bhuku redu ro ndumbo. Verenganyi magama aripowaro ngo izwi rakavanga zve rakasujunuka. Tevere, no izwi rakakhwirira manera ondhoo, nanganyi magama ese mucikakwevi mwiha. Perapo, imbanyi magama ondhoo ngo izwi rakakhwirira. (Isaia 24:14) Kuimba ngo izwi rakahwirira kunozoguma pakuvanga zve kova kunodakajisa. Mucathya kana kunyowejeka!
14. (a) Ngenyi kushamisa muromo kunotibesera pa kuimba? (Vonanyi bhokiso rinoti “Zvamungaita Kuti Muitise nane Kuimba kwenyu.”) (b) Ngoapi mazano o kunyisa cineso ngo pamusoro po izwi amawana anobesera?
14 Kuti mukwanise kuimba ngo simba, munodikana kushamisa muromo. Ngokudaro pomunoimba, shamisanyi muromo kupinda zvamunoita pamunonga mecivereketa. Asi mungaitenyi kudari mukajizwa kuti muno izwi doko kana muno izwi guru kamare? Imwimwi mungabesehwa ngo mazano ari pa bhokiso rinoti “Kukurira Zvinetso Zvinonyatsozivikanwa,” anowanika mu bhuku Batsirwa Nedzidzo Yechikoro chaMwari Choushumiri.
IMBANYI NGO MWOYO WESE
15. (a) Ngocapi ciziviso cakaithwa pa musongano wo gore wakaithwa mu gore ro 2016? (b) Ngorapi thangwe rakaitisa kuti bhuku ro ndumbo rinasirihwezve?
15 Vese vakaenda koovona musongano wo gore wo 2016 vakanyaukihwa apo Hama Stephen Lett vo Mukhumbi Unotonga vakazivisa kubudiswa ko bhuku ibza rina musoro unoti “Ngatiimbire Jehovha no Mudakaro Wese.” Inga zvakasananguhwa ndi Hama Lett, tanghwe rimwe rakaitisa kuti tide bhuku ibza ngo ro kunasirihwazve ko Tradução do Novo Mundo das Escrituras Sagradas. Matarihwe amweni akava ecicinja no kubviswa ko magama acikawanikizve mu Tradução do Novo Mundo. Ndumbo jinobhuya ngo pamusoro po basa ro kucumaira zve no muripo jakaengejehwa. Mu kuengejera, zvecivoneka kuti kuimba i divi rinosisira ro kunamata kwedu, Mukhumbi Unotonga waida kuti bhuku ro ndumbo iri rive rakavanga zve rakaseja. Ngokudaro irona rino kapa yakadari inga yo Tradução do Novo Mundo.
16, 17. Ngozvapi zvimweni zvakacinjwa mu bhuku ibza ro ndumbo?
16 Kuti bhuku ro ndumbo ritame kunesa kushandisa, ndumbo jakarongwa mukuzwirana no zvinonangwaro mu ndumbojo. Inga muezaniso, ndumbo 12 jo kutanga jinobhuya ngo pamusoro pa Jehovha, 8 jinotevera jinobhuya ngo pamusoro pa Jesu no muripo, zvoenda zvecindodaro. Pa pheji yo kutanga pano munda-nda-nda wese o marongehwe ajo. Izvi zvingabesera kamare, inga muezaniso, hama ingada kusana ndumbo kuti ishandise pa hurukuro ya vese.
17 Kuitira kubesera vandhu vese kuti vaimbe zvicibva mu mwoyo, maimbiro amweni acinjwa kuitira kuti ndumbo ive yakajeka. Kwakava no dikano yo kucinja musoro wo ndumbo unoti “Ngwariranyi Mwoyo Wenyu” wova wakadari “Tinongwarira Mwoyo Wedu.” Ngenyi? Ngokuti kare, mundhu paiimba masoko o ndumbo iyi, iyena waibvunja vamweni zvokuita. Izvi zvaizonesa kuzwisisa ku vapsa vanoviya kumusongano, vadakariri, vocidoko, hambzaji jiri pa musongano jedu, magungano o ndharaundha no o mutundhu. Ngokudaro musoro no maimbiro zvakacinjwa.
Rovejanyi kuimba ndumbo pa kunamata ko mbhuri (Vonanyi ndima 18)
18. Ngenyi tinodikana kujija kuimba ndumbo jo mu bhuku redu ibza ro ndumbo? (Vonanyi masoko o pasi.)
18 Ndumbo zinji jiri mu bhuku redu ro ndumbo “Ngatiimbire Jehovha no Mudakaro Wese” jakadari inga mukumbiro. Ndumbo iji jingamubesera kuvonesa mazwiro enyu kuna Jehovha. Ndumbo jimweni jinozotibesera kuti tivangisire pa ‘kudisana no kuita mabasa akanaka.’ (Vaheberi 10:24) Tinoda kuziva maimbihwe, madho-dho-dho zve no magama o ndumbo jedu. Njira imwe yatingazvita ndiyona ngo yo kupurukira mumbo jakaimbwa ngo hama no hambzaji, jogaravhahwi. Ijona jinowanika mu jw.org. Pamunonga muciroveja kuimba pa nyumba penyu, mungakwanisa kuimba makasujunuka zve no mazwiro. *—Vonanyi masoko o pasi.
19. Vese mu ungano vanganamatisa kudini Jehovha?
19 Ceukijanyi kuti kuimba i divi ro rinosisira ro kunamata kwedu. Injira yakanaka maningi yo kukhombija kwedu kuti tinoda Jehovha zve tinobonga maningi ngo zvese zvaakatiitira. (Verenganyi Isaia 12: 5.) Pamunoimba ngo mwoyo wese, munovangisa vamweni kuti vaitevo zvondhozvo. Vese mu ungano, vangava vocidoko, vasharuka, kana vapsa mu cokwadi, vanganamata Jehovha ngo manera ondhowo. Asi atibviri kuthya kuimba zvecibva pa mwoyo. Purutananyi ndhungamiriro yo mutari wo nduyo uwo wakati: “Imbiranyi Tenji Mwari!” Hina, imbanyi no mudakaro wese!—Nduyo 96:1.
^ ndim. 11 Kuti muwane mazano mazinji o kuti mungaitisa kudini nane kuimba kwenyu, vonanyi vhidhio JW Broadcasting yo mweji wa Mbuji wo 2014 (kuti muiwane nghwinanyi ngopanoti DE NOSSO ESTÚDIO).
^ ndim. 18 Comangwanani no comasikati cese mu magungano o mutundhu no o ndharaundha urongwa wo musongano unotanga ngo mumbo wo kutanga uno gumi ro museswa. Matangiro awo anotibesera kuti tinasiririke ngo kuimba zve kutinasirira kuti tipurukire urongwa hwese. Ngokudaro, tese tinodikana kuva pa ndau jedu jo kugara zve tive takanasiririka pa kupurutana mumbo paunonga ucitanga.
