1, 2. (a) Mupfupo wapi uri kuvetehwa ngo vandhu va Mwari? (b) Zvicinyi zvingatibesera kuramba takasota mupfupo? (Vonanyi pikica yo kutanga.)

MAKRISTU o kuzojwa ano vetero inosisira maningi. Ari kuvetera kurarama mugore. Mupostori Pauro wakadanija vetero ii kuti “[“mupfupo”, Shanduro yeNyika Itsva] wo ndinodanijihwa kupuwa ndi Mwari.” (VaFilipi 3:14) Mugore, vo kuzojwa vanotonga pamwepo na Jesu Kristu mu Umambo hwake no kushanda naye kuitira kubesera vandhu kuti vagume pa kuva vakakwana. (Apokalipsi 20:6) Mupfupo wakanaka zvakadini! Mushambi umweni uri kuvetera kuashira mupfupo wakasiyana no uwo. Uri kuvetera kurarama mu Paradhiso pasi pano, zve vetero iyi inovapa mudakaro wokadi-kadi!—2 Pedru 3:13.

² Pauro waida kubesera maKristu doni ake kuti arambe akagondeka kuti aashire mupfupo. Wakavabvunja kudari: “Rangariranyi bzo nyezuru, asi bzo pasi.” (VaKolosi 3:2) Ivona vaidikana kuramba vakasotesesa vetero yavo inosisira yo mugore. (VaKolosi 1: 4, 5) Kurangarira makomborero a Jehovha kuri  kubesera vashandiri va Mwari kuti varambe vakasota mupfupo. Izvi ngo zvokadi azvinenyi dangani vano vetero yo kurarama pasi pano kana mugore.—1 VaKorinto 9:24.

3. Pauro wakangwaja maKristu ngo pamusoro penyi?

³ Pauro wakangwaja maKristu ngo pamusoro po ngozi yaizophingaija kuti vatame kuashira mupfupo. Inga muezaniso, wakatarira vaKorosi ngo pamusoro po maKristu o kunyepa aieja kudakajisa Mwari ngo kutevejera Mutemo wa Mosi kusiyapo kuva no gonda kuna Kristu. (VaKolosi 2:16-18) Pauro wakabhuyazve ngo pamusoro po ngozi pikija jinowanika nyamasi uno jaizotiphingaija pa kuashira mupfupo. Iyena wakasanangura matizire atingaita zvido zvakashata zve zvatinodikana kuita patinonesana no mbhuri yedu kana no hama jedu mu ungano. Mbhangiro inosisira ya Pauro ingatibesera nyamasi uno. Ngatipopore ngwajo nganani jo rudo jatinowana mu karata yake ku vaKorosi.

4. Ngenyi zvido zvakashata zvingatikoneresa kuashira mupfupo?

⁴ Pauro paakapeja kuceukija hama jake ngo pamusoro po vetero yavo inoshamaisa, iyena wakatara kudari: “Ngo kudaro urayanyi mativi o muviri jenyu jiri pa nyika ngo pamusoro po uhure, zviro zvicikazivi kucena, cido co kuvatana.” (VaKolosi 3:5, Shanduro yeNyika Itsva) Zvido zvakashata zvingavanga zve zvingatiruzisa ushamwari hwedu na Jehovha pamwepo no vetero yedu kuitira kumbeji. Hama imweni yakazvipekejera ku zvido zvayo zvakashata zve poyakahwirira mu ungano yakananga kuti zvido zvondhozvo zvainga zvakavanga zvokuti “zvaiitonesa kuhwirira sure.”

5. Tingazvijiviririsa kudini pa mugariro jo ngozi?

⁵ Tinodikana kunasa kungwarira maningi-ningi kudari tiri pa mugariro ungatitungamirira kuti titame kuzwira ndhungamiro ja Jehovha ngo pamusoro po mufambiro. Inga muezaniso, zvaizova zvo ungwaru vandhu varikunomorari vadire mugano ngo pamusoro po kuita zviro zvakadari inga kupuruzirana, kupana mabejhu zve kugara vega vovaviri pacina mundhu umweni. (Mazwi Akangwara 22:3) Ngozi imweni ingaitika patinoita hwendo yo nyagoso kana patinoshanda no mundhu ano cihwa cakasiana. (Mazwi Akangwara 2:10-12, 16) Mungajijiviririsa kudini? Vabvunjenyi kuti muri umwe wo Zvapupu zva Jehovha. Ivanyi wakagajana zve mucanganganwa kuti kutamba no mundhu muciita inga munomuda zvingatungamirira ku ngozi. Tinodikanazve kungwarira patinonga takasuruvara kana patinoushongwe. Tingada kuti mundhu atiite kuti tijizwe ushoni. Tingajizwa kuvora mwoyo tozotendera kuti ariwese atitaje ushoni. Iyi i ngozi. Kudari munojizwa kudaro, mucadotendera kuruziswa mupfupo wenyu ngo ciri cese. Psakanyi Jehovha no hama pomwe no hambzaji jenyu kuitira kuwana besero.—Verenganyi Nduyo 34:19; Mazwi Akangwara 13:20.

6. Tinodikana kuceukijenyi patinosana mabungaijo?

⁶ Kuti tiuraye zvido zvakashata, tinodikana kuramba mabungaijo akashata. Nyamasi uno, mabungaijo mazinji anowanika anoticeukija zviro zvo Sodhoma no Gomora. (Juda 1:7) Vaya vanobudisa mabungaijo vanoita kuti uhure uvoneke inga ciro cicikazivi kushata zve cicikakhuvazi. Ngokudaro tinodikana kungwarira. Atidikani kutendera mabungaijo ese anobudiswa ngo nyika. Kunja  kwa izvi, tinodikana kusana mabungaijo kuti titame kuruzwiswa kuashira mupfupo wedu wo upenyu.—Mazwi Akangwara 4:23.

7. Zvineso zvapi zvingaita kuti tibude mu ungano yo ciKristu?

⁷ Tinodakara ngo kuva divi ro ungano yo ciKristu. Ku musongano tinojija Soko ra Mwari zve no rudo tinobeserana. Izvi zvinotibesera kuti tirambe tecisotesesa mupfupo wedu. Nguva jimweni kungava no zviro zvingabara kunesana no hama no hambzaji jedu. Kudari atikwanisi kupeja cinesoco, tingakasika kuviga bundu.—Verenganyi 1 Pedru 3:8, 9.

8, 9. (a) Ngoapi mavara anozotibesera kuti tiashire mupfupo? (b) Zvicinyi zvingatibesera kuramba tino runyararo kudari maKristu doni akatinyangajisa?

⁸ Atidikani kutendera kuti bundu ritiruzise kuashira mupfupo. Pauro wakasanangura zvinodikana kuithwa ngo maKristu: “Ngo ndava yabzo, inga vasanwi va Mwari, vacena mwoyo no vakadika, simiranyi mwoyo wo unyaxa no wakathiva; jidodokesenyi; thivanyi no kusengerera. Cijikiranyi ngocenyu ngo rudo, mecikungurirana kudari aripo ana ciricese no mudoni wake. Regererananyi inga bzaakamuregerera Tenji. Kaveta panyezuru po bzese, simiranyi rudo, huri cisungo cakaperera.”—VaKolosi 3:12-14.

⁹ Rudo no kunaka mwoyo zvingatibesera kuregerera vamweni. Kudari tiri kuhwajihwa ngo zvakanangwa kana kuithwa ngo ari wese, ngatirangarire bvaza yatakananga kana kuita ciro cicikazivi kunaka ku umweni zve iyena wakatiregerera. Kubonga kwakadini kwatinako ngo rudo no kunaka kwavo mwoyo! (Verenganyi Mucumaeri 7:21, 22.) Tinobonga ngo kunaka mwoyo ka Kristu ngo kubatanija vanamati vokadi-kadi. (VaKolosi 3:15) Tese tinoda Mwari wondhoo, tinocumaera masoko ondhoo zve tino zvineso zvondhozvo. Kudari tikava vakanaka mwoyo, tova no rudo zve toregererana umwe no umweni, ungano unozoramba yakabatana zve tecisotesesa mupfupo wedu.

10, 11. (a) Ngenyi ushanje hwakashata? (b) Tingava kudini no cokwadi co kuti ushanje auzokwanisi kutitamisa kuashira mupfupo?

¹⁰ Ushanje ungatitamisa kuashira mupfupo. Muezaniso jo mu Bhaibheri jinokhombija kuti ushanje wakashata kamare. Inga muezaniso, Kaini wakava no ushanje na Abheri zve wakamuuraya. Koraa, Dhatani, na Abhirami vakaguma pakuva no ushanje na Mosi zve vova vapanduki. Mambo Sauri wakava no ushanje na Dhavhidhi zve wakaeja kumuuraya. Zvinonanga Soko ra Mwari ndizvonadi kamare: “Ngokuti, kuno thima rinovava no kuzondana, ngo kuno bope no uxaixi hwese.”—Jakobo 3:16.

¹¹ Kudari tikashanda no simba kuti tive no rudo wokadi-kadi pamwepo no kunaka mwoyo, atizokasiki kuva no ushanje. Soko ra Mwari rinoti: ‘Rudo unosengerera zve wakanaka mwoyo. Rudo auna ushanje.’ (1 VaKorinto 13:4, Shanduro yeNyika Itsva) Kuti muve no cokwadi co kuti ushanje auripi kuita divi ro undhu hwedu, tinodikana kueja kuvona zviro inga zvinoita Jehovha. Tinodikana kuvona hama no hambzaji jedu inga divi ro muviri umwe, mu ungano. Bhaibheri rinoti: “Cihwa cimwe cikareremejwa, bzihwa bzese bzinodakara ndicona.” (1 VaKorinto 12:16-18, 26) Kudari cikaitika ciro caushoni ku imwe yo hama jedu, tinozodakara naiyona, atizovi no ushanje.  Rangariranyi ngo muezaniso wakanaka wa Jonatani mwana wa Mambo Sauri. Jonatani aazivi kugara no ushanje Dhavhidhi paakasanwa kuva mambo kusiapo iyena. Iyena wakavangisa zve wakabesera Dhavhidhi. (1 Samueli 23:16-18) Tinozova inga ndi Jonatani pa kutatija kunaka mwoyo pamwepo no rudo here?

12. Ngoyapi mbhangiro yo mu Bhaibheri inozobesera mbhuri yedu kuti iyashire mupfupo?

¹² Vese vo pa mbhuri yedu pavanoshandisa zviambi zvo Bhaibheri, mbhuri yedu inozova no runyararo, yova no mudakaro zve yozoashira mupfupo. Pauro wakapa ngwajo iyi yo ungwaru ku mbhuri: “Imwimwi vanakaji, purukiranyi vanarume venyu kudari ngo bzinofanera, mwa Tenji. Vanarume, disanyi vakaji venyu: mucadovaitira haxa. Vana, purukiranyi majibaba enyu ngo bzese; ndibzona bzinodakajisa Tenji. Majibaba, mucacamwisa vana venyu; kuti vatame kupseja mwoyo.” (VaKolosi 3:18-21) Mavona kuti ngwajo iyi ingabesera kuti mbhuri yenyu?

13. Hambzaji yo ciKristu ingabesera kudini mwamuna wayo acikatendi kuti ade kushandira Jehovha?

¹³ Kangaije muri hambzaji yo kuti mwamuna wenyu avashandiri Jehovha. Zvicinyi zvamaizoita kudari mukajizwa kuti amuripi kutajwa mu njira kwayo? Maizonyangajwa zve motukana navo, kuti muitise nane mugariroo here? Kudari mukawina pa mugariroo, maizoita kuti ivona vade kushandira Jehovha here? Kunasa kunanga, haiwa. Asi kudari mukakhombija nderemejo pa basa ravo inga musoro wo mbhuri, munozobesera kuti mbhuri yenyu ive no runyararo zve irambe icikuja Jehovha. Muezaniso wenyu  waushoni kangaije ungaita kuti mwamuna wenyu vade kushandira Jehovha zve mwese muashire mupfupo.—Verenganyi 1 Pedru 3:1, 2.

14. Zvicinyi zvinodikana kuita mwamuna vokuti mukaji wavo acikatendi avamureremeji?

¹⁴ Kangaije muri hama yo kuti mukaji wenyu aashandiri Jehovha. Zvicinyi zvamungaita kudari mukajizwa kuti amuripi kureremejwa? Kudari mukaita basa ro kumukharamusa, mecirangarira kuti: ‘anodikana kuzviziva kuti ndini ndinotonga pano,’ waro waizomurereja ndizvona here? Haiwa. Mwari anovetera kuti muve mwamuna ano rudo anotevejera Jesu. (VaEfeso 5:23) Jesu, musoro wo ungano, mazuva ese anosengerera zve ano rudo. (Luka 9:46-48) Kudari mukatevejera Jesu, mu kufamba ko nguva mukaji wenyu angazodavo kushandira Jehovha.

15. Mwamuna wo ciKristu vanokhombijisa kudini kuti vanoda mukaji wavo?

¹⁵ Jehovha wakapangira majimwamuna kudari: “Vanarume, disanyi vakaji venyu: mucadovaitira haxa.” (VaKolosi 3:19) Mwamuna vano rudo vanotatija kuti vanoreremeja mukaji wavo. Kuitisa kudini? Iyena anodikana kupurutana mazano o mukaji kuti azive kuti zvaanonanga zvinosisira kuno mwamuna wake. (1 Pedru 3:7) Pikija azvikwanisiki mazuva ese kuita zvaanonanga, ngo kumupurukira zvingamubesera kutema zvivaringo zvaushoni. (Mazwi Akangwara 15:22) Mwamuna vano rudo avadikani kuita ngo kukumbira nderemejo yo mukaji wake. Kunja kwa izvo, anoeja kuita ciri cese kuti areremejwe ndiyena. Mwamuna pavanokhombija rudo ku mukaji no vana, vanozodakara ngo kushandira Jehovha zve voashira mupfupo wo upenyu.

16, 17. Mujaha kana musikane angaitisa kudini kuti atame kunyangajwa maningi no vabari vake?

¹⁶ Kangaije uri muaruki zve uri kuvona inga kuti vabari vako avaripi kukuzwisisa nee avaripi kukusiya kuti utambe ujaha kana usikane. Izvi zvingakucamwisa maningi, wotogumira pa kukana-kana kuti kushandira Jehovha kwakanakadi here. Asi, kudari ukasiya Jehovha, unozozvivona kuti ku nyika akuna nee umwe anokuda inga madire anoita vabari vako vo ciKristu no shamwari jako jo mu ungano.

¹⁷ Rangarirai basi: Kudari vabari vako vakatama kukupangira, waizozivisa kudini kuti ivona vanokuda kana kuti haiwa? (Vaheberi 12:8) I zvokadi kuti ivona avazivi kukwana, ngo iyo ndava manera avanokupangira ndiwona angakucamwisa nguva jimweni. Asi ucasota mapangirire avanokuita. Kusiyapo zvondhozvo ejai kuzwisisa mathangwe avatora kuti vakuitire kana kukubvunja zviri zvese. Rambai wakathiva, ucagogomera kunyangajwa. Soko ra Mwari rinoti: “Ndiani anongwarira mazwi ake, ano uzivi; muzivi anorangarira acito akavereketa.” (Mazwi Akangwara 17:27) Ivai no cido co kuguma pa kuva mundhu wakaibva anotendera mbhangiro no kuishandisa, azvinenyi mapihwe yainoizwa. (Mazwi Akangwara 1:8) Ucakanganwa kuti kuva no vabari vanoda Jehovha i cipo cicikabviri. Ivona vanoda kukubesera kuti upone no kucingaperi.

18. Ngenyi matema civaringo co kuramba makasotesesa pa mupfupo?

¹⁸ Azvinenyi dangani tinovetero yo kurarama kwenda no kwenda mugore kana mu paradhiso pasi pano, umwe nga umwe wedu angavetera kumbeji kunodakajisa. Vetero yedu asipi kurota. Yakacijikira pa cigondiso co Musiki wo pasi no mugore, wakanangaya kudari: “Ngokuti nyika inozozara ngo kuziva Tenji.” (Isaia 11:9) Sambiri pano, vese pasi pano vanozojijiswa ndi Mwari. Kuno mupfupo umweni watingashandira kuciripi uwo waro here? Waro nguva jese ceujanyi zvaakamugondisa Jehovha, zve mucadotendera kuti ciri cese cimuphingaije pa kuashira mupfupo!