1. Vashandiri vazinji vakagondeka va Mwari, vanozwa kudini pavanoshaisha?

MUPOSTORI Pauro wakatara kudari: “Yowé kondiri, mundhu wo khombo!” (VaRoma 7:24) Nyamasi uno, vashandiri vazinji vakagondeka va Mwari, vakambojizwa kupera simba zve vacikasisiri inga ndi Pauro. Ngenyi? Ngokuti pikija tinoda kudakajisa Jehovha, tese tinoshaisha zve atizivi kukwana. Ngokudaro, tingatama kujizwa ushoni patinokonehwa kumudakajisa. MaKristu amweni akaita zvishaishi zvikuru akaguma pa kujizwa inga kuti aafaneri kuregerehwa ndi Jehovha.

2. (a) Nduyo 34:23 inobesera kudini mushandiri wa Mwari kuti atame kunyiswa ngo mazwiro o kujipa ndava? (b) Tiri kuda kujijenyi pa musoro uno? (Vonanyi bhokiso rinoti “ Madhorobha o kutizira anoezanisira zviri zvese kana anotijijisa zviri zvese?”)

² Matahwa anogondisa kuti mundhu anotizira kuna Jehovha aana dikano yo kunyiswa ngo mazwiro o kujipa ndava ngo zvishaishi zvake. (Verenganyi Nduyo 34:23.) Asi zvinorevenyi kutizira kuna Jehovha? Tinodikana kuitenyi kudari tinoda kuva no unyasha zve ruregerero hwa Jehovha? Tingawana mupinguro ku mubvunjo iji ngo kujija ngo pamusoro po nasiriro yo madhorobha o kutizira o ku Iziraeri yo kare. Nasiriro yo madhorobha  okutizira iyi yaiita divi ro citenderano co Mutemo, ico cakafakeiwa mu Petekoste yo mu gore ro 33. Asi mutemo uwu wakabva kuna Jehovha. Ngokudaro, kubvira pa nasiriro yo madhorobha o kutizira, tinojija mavonero a Jehovha ngo pamusoro po cishaishi, mushaishi zve vaya vanokhauya. Pakutanga, ngativone kuti ngenyi kwakava no madhorobha o kutizira zve aishandenyi.

3. MuIziraeri akauraya mundhu waiitwenyi?

³ Jehovha waineseka maningi paiurawa mundhu. Kudari muIziraeri akauraya mundhu, ukama worume wo phedo wa nyakufa, waidanijwa “muhwirijiri wo ngazi” waidikana kuuraya muuraiwo. (Bziverengo 35:19) Ngo maitiro aya, muurai wairipa upenyu hwa wiya waakauraya weya acina ndava, ngo upenyu hwake kamare. Kudari mundhuwo akatama kuuraya ngo kukasika, zvaizogumira pa kupsipisa Nyika yo Cipihwa, kana kuti aicaizova yakacena. Jehovha wakati: ‘Mucangoresa nyika yamunogara’ ngokuti ngazi yo kuurawa ko mundhu inongoresa nyika.— Bziverengo 35:33, 34.

4. Zvicinyi zvaiitika muIziraeri akauraya mundhu acikazvidi?

⁴ Asi zvicinyi zvaiitika muIziraeri akauraya mundhu acikazvidi? Pikija zvakaitika acikadi, iyena wainga no ndhango yo kuuraya mundhu acina ndava. (Genesi 9:5) Asi, pa ndhango yakadari, Jehovha wakananga kuti muurai uwo, waidikana kuitihwa unyasha. Muurai uwo waidikana kutiza muhwirijiri wo ngazi kwenda ku madhorobha matandhatu okutizira. Kudari akatendehwa kugara mudhorobhemo, waizova wakangwaririka. Iyena waidikana kugaremo mbhera kufa ko mupiri mukuru.—Bziverengo 35: 15, 28.

5. Ngenyi nasiriro yo madhorobha okutizira ingatibesera kuti tinase kuziva Jehovha?

⁵ Nasiriro yo madhorobha okutizira aicainga murangariro wo vandhu. Yakabva kuna Jehovha. Iyena wakapangira Joshuwa eciti: “Vereketai no vaIsraeli, ‘Sananyi maguta o kutiziremo’.” Madhorobha ondhowo [“akaceneswa”, Shanduro yeNyika Itsva]. (Joxwa 20:1, 2, 7, 8) Jehovha wakasunga kuti madhorobha aidikana kukashwa. Ngokudaro ngo nasiriro ii, tingajija zvizinji ngo pamusoro pa  Jehovha. Inga muezaniso, inotibesera kuti tinase kuzwisisa unyasha wa Jehovha. Zve inotijijisa kuti tingatizirisa kudini kuna Jehovha nyamasi uno.

6, 7. (a) Sananguranyi basa ro vakuru pa kutonga mundhu waiuraya umweni acikazvidi. (Vonanyi pikica yo kutanga.) (b) Ngenyi zvainga zvo ungwaru mutizi kwenda koobhuya no vakuru?

⁶ Kudari muIziraeri waiuraya mundhu acikazvidi, iyena waidikana kutiza kwenda ku dhorobha ro kutizira zve ‘woverengera zvakaitika’ kuno vakuru pa musuvo wo dhorobha. Vakuru vaidikana kumuashira ushoni. (Joxwa 20:4) Nopapera nguva yakati kuti, ivona vaizodikana kumuhwirija kuti atongwe ngo vakuru vo ku dhorobha raakaurairaro mundhu. (Verenganyi Bziverengo 35:24, 25.) Kudari vakuru vakananga kuti wakauraya acikazvidi, ivona vaizomuhwirijazve ku dhorobha ro kutizira.

⁷ Ngenyi mutizi waidikana koobhuya no vakuru? Vakuru vaizova no cokwadi co kuti ungano yo Iziraeri yaizoramba yakacena zve zvaizobesera kuti mundhu wakaurayari acikazvidi abesereke ngo unyasha hwa Jehovha. Umwe mujiji wo zvo Bhaibheri watara kuti, kudari mutizi akatama kwenda ku vakuru, iyena waizourawa. Iyena wakaengejera kuti mutizi waizova no ndava ngo kufa kwake ngokuti aazivi kuita zvaakapangihwa ndi Mwari. Mundhu wakaurayaro acikazvidi, waidikana kukumbira besero zve wotenda kuashira besero raapuwaro. Kudari akatama kutizira ku madhorobha o kutizira, ukama wo phedo wo mundhu wakauraiwaro uno citendehwa co kumuuraya.

8, 9. Ngenyi muKristu waita cishaishi cikuru anodikana kwenda koobhuya no vakuru?

⁸ Nyamasi uno, kuti avezve no ushamwari hwakanaka na Jehovha, muKristu akaita cishaishi cikuru anodikana kwenda ku vakuru ngokudaro ivona vanozomubesera. Ngenyi zvinosisira? Cokutanga, ndi Jehovha wakaita nasiriro yo kuti vakuru vatonge shwiro jo zvishaishi zvikuru. (Jakobo 5:14-16) Cocipiri, vakuru vanobesera vashaishi vakakhauya kuti vawanezve kutendehwa ndi Mwari zve vatame kuitazve zvishaishi zvavo. (VaGalàsia 6:1; Vaheberi 12:11) Cocitatu, vakuru vakatendehwa no kurovejwa kuti vavangise vashaishi vanonga vakhauya no kuvasujunura pa kusuruvara no kujipa ndava kwavo. Jehovha anodanija vakuru avo kuti “citiziro co njiku yo mbhepo.” (Isaia 32:1, 2) Nasiriro iyi ndi imwe njira inovonesa kuti Mwari ano unyasha nesu.

⁹ Vashandiri vazinji va Mwari vakavona kuti kupsaka besero ro vakuru kunosujunura kamare. Inga muezaniso, hama imweni inodanijwa Dhanyeri yakaita cishaishi cikuru, asi no pakhirira mweji munganani iyona aizivi kwenda koobvunja vakuru. Iyona yakati: “Nopapera nguva yakawanda, ndakangarira kuti vakuru avacaizokwanisazve kuita ciri cese kuti vandibesere.” Ngokudaro, nguva jese Dhanyeri waithya kuti ariwese waizoziva cishaishi cake zve wainga no mazwiro aimuita kuti nguva jese jaaida kuita mukumbiro atange wakumbira kuregerehwa ndi Jehovha. Pakupejisira, wakapsaka besero ku vakuru. Akarangarira zvakamuitikirari, iyena anoti: “Zvokadi, ndaithya hangu kukhwederera vakuru. Asi pandakapera kubhuya navo, ndakazwa inga kuti ndathuhwa zimutoro rairema rainga pa mapfunji angu.” Dhanyeri arikukwanisa kubhuya na Jehovha  akasunjunuka. Wari iyena ano hana yakacena zve nguva shomani yapera, wakagajwa inga mubatiri anoshandira.

10. Kuti aregerehwe, waidikana kuitenyi mundhu waiuraya umweni acikazvidi?

¹⁰ Kuti awane unyasha, mundhu waiuraya mundhu acikazvidi waidikana kutiza ngo kukasika kwenda ko madhorobha okutizira ko gareyo. (Verenganyi Joxwa 20:4.) Kuti arambe ecipona waidikana kutizira ku madhorobha aya, woramba ari kondhoyo mbhera kufa ko mupiri mukuru. Izvi azvicainga zvakareruka kuzviita. Iyena waidikana kusia basa rake, kugarika kwaainga nako pa muzi pake zve rusujunuko hwaainga nahwo hwokwenda kwaanoda. * (Vonanyi masoko o pasi.) (Bziverengo 35:25) Asi kuvangisira kwese uku kwaibesa. Kudari akabva hake pa nguva iri yese mu dhorobha ro kutizira kwenda ku ndau imwenivo, waizovonesa kuti wainga acikatoneseki hake ngo kuuraya mundhu kwaakaitaya, ngo kudaro waidira pa ngozi upenyu hwake.

11. MuKristu wakhauya angatatijisa kudini kuti anobongesera maningi ngo unyasha hwa Mwari?

¹¹ Nyamasi uno, mushaishi wakhauya anodikanavo kuita ciri cese kuti aregerehwe ndi Mwari. Anodikana kuima kuita zviro zvakashata. Izvo zvinobatanija kutama kuita ciri cese cinotungamirira pa kuita cishaishi cakakura. Mupostori Pauro wakasanangura zvakaitwa ngo maKristu akakhauya o ku Korinto. Iyena wakatara kudari: “Rangariranyi ibzo bzakabva mu kucamwa kwenyu kwokuteveja Mwari: Makarangarira uxoni ndava iyo, makapota kukungurihwa, makajiinikira bzakaxata, makathya Mwari, makada kundivonabze, makarangarira mazano o kupanica wiya wakaxaixa!” (2 VaKorinto 7:10, 11) Ngokudaro, kudari tikaita zvese zvatinokwanisa kuti titame kuitazve cishaishi, tinozovonesa kuna Jehovha kuti tiri kunasa kuziva kushaisha kwedu zve tinodikana kuita ciri cese kuti tikhombijihwe unyasha ndiyena.

12. MuKristu anodikana kuitenyi kuti aenderere mbheri eciashira unyasha hwa Jehovha?

¹² MuKristu anodikana kuitenyi kuti aenderere mbheri eciashira unyasha hwa Jehovha? Iyena anodikana kusia kuita zviro zvokuti zvinotomudakajisa asi zvingamutora kuti aitezve cishaishi. (Mateu 18:8, 9) Inga muezaniso, kudari shamwari jenyu jinomuitisa kuti muite zviro zvinonyangaja Jehovha, munozoramba mucishamwarijana najo here? Kudari mucikakwanisi kujibata pamunomwa doro, munozotiza mugariro waizomuita kuti mumwe maningi doro here? Kudari munovona kuti zvinonesa maningi kungwarira zvido zvenyu ku mufambiro wakashata wo vatano, munozotiza kuvona firimi, masaiti kana zviro zvimweni zvingamuita kuti muve no murangariro ucizivi kucena here? Ceujanyi kuti kuvangisira kuri kwese kwamunoita kuti muzwire mutemo ja Jehovha kunobesera. Zve akuna cinopinda kukhombijihwa “rudo hucikaperi” ndi Jehovha.—Isaia 54:7, 8.

13. Sananguranyi ngenyi mutizi waikwanisa kujizwa wakabvikirika, kungwaririka, zve ano mudakaro mudhorobha ro kutizira.

¹³ Akambhera ngo kuguma ku dhorobha ro kutizira, mutizi waingwaririka. Ngo pamusoro  po madhorobha ondhoo, Jehovha wakati: ‘Iwona anozoshanda inga citiziro kwamuri.’ (Joxwa 20:2, 3) Jehovha aacaida kuti mutizi aguma kondhoyo atongwezwe ngo ndava yake iya. Zve nee muhwirijiri wo ngazi wiya aacaitendehwa kunghwina mudhorobha miya komuuraya. Paaindonghwina basi mu mudhorobha ro kutizira, mutizi waijizwa akangwaririka pasi po bvikiro ya Jehovha. Iyena aacainga mu kadheya. Iyena waitobatavo basa, kubesa vamweni no kushandira Jehovha no runyararo. Hina, zvaikwanisika kuwana mudakaro no upenyu unodakajisa.

14. I gwinyiso rapi rinodikana kuva no muKristu wakakhauya?

¹⁴ Vashandiri vamweni va Mwari vakamboita zvishaishi zvikuru vanoramba vano mazwiro o kujipa ndava pikija pasure po kukhauya. Vamweni vanovona kuti Jehovha narini aazombovaregererizve. Kudari munojizwavo kudaro, ivanyi no gwinyiso rokuti Jehovha wakamuregerera mukuperera. Amudikani kujipa ndava. Izvi ngo zvakaitika na Danyeri, wanangwaya pa kutanga. Paakapera kupangihwa no kubesejehwa ngo vakuru wakava no hana yakacena zve wakazwa kusujunukihwa. Iyena wakati: “Andiripi kujizwazve kuti ndino ndava. Ngokuti cishaishi cikandoregerehwa, catoregerehwa kamare. Jehovha wakananga kuti anotora zvishaishi zvako wozvidira ndhambo na iwewe kamare. Aucazozvivonizve.” Mutizi paaighwina mu dhorobha rokutizira, iyena acaidikanazve kuthya kuti muhwirijiri wo ngazi waizoviya komuuraya. Mukuezana, Jehovha paanotiregerera cishaishi cedu, atibviri kuthya kuti  anotirangarijazve kana kutipanica ngo ndava yaco.—Verenganyi Nduyo 103:8-12.

15, 16. Kuziva kuti Jesu wakaita muripo zve ndi Mupiri Mukuru wedu, zvinovangisa kudini kuthemba kwenyu kuti Mwari ano unyasha nemwi?

¹⁵ Ngokudaro, itusu tino mathangwe akawanda maningi, okuti tithembe unyasha wa Jehovha kupinda vaIziraeri. Pauro naapera kunanga kuti waijizwa ano “khombo” ngokuti aacaikwanisa kuzwira Jehovha ngo maitiro akaperera, iyena wakati: “Ngaakujwe Mwari, ndi Jesu Kristu Tenji wedu!” (VaRoma 7:25) Waida kunangenyi? Pikija iyena wainga ecihwisana no zvido zvakashata zve wainga mundhu waiita zviro zvakashata kareko, iyena wainga akhauya. Ngo kudaro waithemba kuti Jehovha wakamuregerera ecishandisa muripo wo kujipira wa Jesu. Itusuvo, tingava no hama yakacena no runyararo wo mukati ngo kuti Jesu wakaita muripo. (Vaheberi 9:13, 14) Inga Mupiri Mukuru wedu, Jesu “anokwanisa kuponesa kucikaperi vaya vanokhwedera ka Mwari, ecigara ecivainikira.” (Vaheberi 7:24, 25) Mu nguva jo kare, mupiri mukuru waibesera vaIziraeri kuti varegerehwe zvishaishi zvavo ndi Jehovha. Jesu mupiri wedu Mukuru, ano thangwe guru rokutitora kuti “tiwane unyaxa, topuwavo unyaxa hwo kuzobeswa pa ngari yokudikana.” —Vaheberi 4:15, 16.

¹⁶ Kuti Jehovha ave citiziro cedu, tinodikana kuva no gonda ku muripo wa Jesu. Azvikwani kutenda kuti muripo unoshanda basi kuitira vandhu vese. Ivanyi no gonda ro kuti muripo unobesera imwimwi pacenyu. (VaGalàsia 2:20, 21) Ivanyi no gonda ro kuti Jehovha wakaregerera zvishaishi zvenyu kamare, ecishandisa muripo. Ivanyi no gonda ro kuti muripo unopa imwimwi pacenyu, vetero yo kupona no kucikaperi. Muripo wa Jesu ii cipo ca Jehovha kwamuri!

17. Ngenyi munoda kutizira kuna Jehovha?

¹⁷ Madhorobha okutizira anotibesera kuzwisisa unyasha wa Jehovha. Nasiriro ii inotijijisa kuti upenyu wakacena pamberi pa Jehovha. Izvi zvinokhombijavo mabesere angatiita vakuru, zvinorevenyi kukhauya kamare zve tingava kudini no cokwadi co kutiJehovha watiregerera. Muri kutizira kuna Jehovha here? Akuna ndau imweni yatingatizira kuciri kwaari! (Nduyo 91:1, 2) Pa musoro unotevera, ticazovona kuti madhorobha okutizira, angatibesera kudini kutevejera muezaniso mukuru wa Jehovha wo kukhombijira urungami no unyasha.