1, 2. (a) Jesu waizwa kudini ngo pamusoro po Mutemo wa Mwari? (b) Vatari no vaFarisi vaishandisisa kudini Mutemo, mu njira yakashata?

JESU waida mutemo wa Mosi. Izvo azvitishamaisi, ngokuti Mutemo uwu wakabva ka Babake, Jehovha, Mundhu anosisira maningi mu upenyu hwa Jesu. Pana Nduyo 40:9, Bhaibheri rinonanga ngo rudo hwakajika hwa Jesu kuitira Mutemo hwa Mwari paakati: “Kuti ndiite kuda kwenyu; Mwari wangu, ndinoda kungwarira mupango wenyu mukati mu mwoyo wangu.” Jesu wakazvitatija ngo zvaainanga no zvaaita kuti Mutemo wa Mwari waiperera, waibesera zve waizokwanirisika.—Mateu 5:17-19.

² Zvinovoneka inga kuti Jesu wakanyangajwa maningi paakavona kuti vatari no vaFarisi vaishandisa Mutemo wa Baba wake mu njira yakashata, vaciuita kuti utame kuzwisisika. Iyena wakavabvunja kudari: “Munoxabira ngo mupfumbha, musone, no mathapa,” kureva kuti ivona vaitozwira pikija zviro zvidoko zvainangwa ngo Mutemo. Waro, ngocapi cainga cineso? Jesu wakasanangura eciti: Asi ‘makakanganwa bziro bzikuru-kuru bzo Mutemo: urungami, unyaxa no ugondeki.’ (Mateu 23:23) VaFarisi avacaisotesesa revo yo Mutemo zve vaijivona inga vakanakisisa  maningi kupinda vamweni. Asi Jesu waizwisisa zvainga sure ko Mutemo zve vaipsaka kuvona kuti mutemo umwe nga umwe wainangenyi ngo pamusoro pa Jehovha.

3. Tinozojijenyi pa musoro uno?

³ Inga maKristu, ativetehwi kuti tizwire Mutemo wa Mosi. (VaRoma 7:6) Waro, ngenyi Jehovha wakabatanija Mutemo uwu mu Soko rake, Bhaibheri? Iyena waida kuti tizwisise zve tiushandise mu “bziro bzikuru-kuru,” mu magama amweni, mu zviambi zviri ngo sure ko Mutemo. Inga muezaniso, ngocapi ciambi catinojija ngo nasiriro yo madhorobha okutizira? Mu musoro wakaperari, takajija ngo zvaidikana kuithwa ngo mutizi no zvijijo zvatingawana. Mu musoro uno, tinozojija kuti madhorobha okutizira anotijijisenyi ngo pamusoro pa Jehovha zve tingatevejeresa kudini mugariro jake. Tinozodavira mubvunjo mutatu: Madhorobha okutizira anokhombijisa kudini kuti Jehovha ano unyasha? Iwona anotijijisisa kudini ngo pamusoro po mavonero anoita Mwari upenyu? Zve anovonesa kudini kuti urungami hwake hwakaperera? Pa divi rimwe nga rimwe, ejanyi kuvona kuti mungatevejeresa kudini Baba wenyu vo mugore.—Verenganyi VaEfeso 5:1.

4, 5. (a) Zvicinyi zvakaithwa kuitira kuti mutizi atame kunesehwa kwenda ku dhorobha ro kutizira zve ngenyi? (b) Izvi zvinotijijisenyi ngo pamusoro pa Jehovha?

⁴ Jehovha wakanasirira madhorobha matandhatu okutizira mu njira yo kuti atame kunesa kunghwinemo. Iyena wakabvunja vaIziraeri kuti vasane madhorobha matatu ngo divi rimweni ro Jorodhani. Ngenyi? Ngokuti zvaizova zvakareruka kuti mutizi aghwine mu dhorobha ngo kukasika. (Bziverengo 35:11-14) Makwanja aitungamirira koondhoyo aidikana kuva no mugariro wakanaka. (Deuteronòmio 19:3) Mukuzwirana no cirovejeso co Cijudha, imona mainga no zvitatijo zvinobesera kuti vatizi vagume ku madhorobha. kubvira mu madhorobha o kutizira o muiziraeri, muIziraeri waiuraya umweni acikazvidi aacaidikana kwenda koopsaka kungwaririhwa ku nyika jo vamweni, ino kwaizoejwa kuti ashandire zvimwari zvo manyepo.

⁵ Rangariranyi izvi basi: Jehovha wakapangira kuti muurai anodikana kuurawa. Asi iyena wakaita kuti mundhu anouraya umweni acikazvidi waidikana kuashira unyasha, usizi no ngwaririro. Umwe anobhuya ngo  zvo Bhaibheri wakananga kuti: “Zviro zvese zvaiithwa mu njira yakareruka, zve azvicainesa kukwanirisa.” Jehovha asipi mutongi wakashata uwo anopsaka nguva yo kupanica vashandiri vake. Kunja kwa izvo iyena ano “unyaxa hwakawanda.”—VaEfeso 2:4.

6. VaFarisi vaitevejera unyasha hwa Jehovha here? Sananguranyi.

⁶ Asi vaFarisi avacainga no cido co kuda kukhombijira unyasha vamweni. Inga muezaniso, cirovejeso co Cijudha cainanga kuti vaFarisi vairamba kuregerera vamweni vaiita cishaishi condhoco pa bvaza ndhatu. Kuitira kuvonesa kuti mugariro uwu wainga wakashata, Jesu wakashandisa muezaniso wo mufarisi waiita mukumbiro phedo no muxabisi. MuFarisi wakati: “Mwari, ndinomubonga, ngokuti inini andiripi inga vandhu vamweni: mambava, vacizivi kururama, vanyaupombo, nokutibze andiripi kudari inga muxabisi uwo.” Ngozvapi zvaida kunanga Jesu? VaFarisi ‘vaijiita varungami vonyenya vadoni,’ zve vairangarira kuti ivona avafaniri kuitihwa unyasha.—Luka 18:9-14.

7, 8. (a) Mungatevejeresa kudini unyasha hwa Jehovha? (b) Ngenyi tinodikana kuzvidodokesa kuti tiregerere vamweni?

⁷ Tevejeranyi Jehovha, haiwa vaFarisi. Khombijiranyi unyasha no usizi. (Verenganyi VaKolosi 3:13.) Itanyi kuti vandhu vajizwe vakarerukihwa kuvia koomukumbira ruregerero. (Luka 17:3, 4) Zvibvunjisenyi kudari: ‘Ndinoregerera vamweni ngo kukasika zve ndicikanesehwi, pikija pavanonga vandicamwisa kakawanda here? Ndinovangisira kuita runyararo no mundhu wandicamwisa kana wandishaishira here?’

⁸ Kuti tikwanise kuregerera vamweni, tinodikana kujidodokesa. VaFarisi vaijivona kuti vakanakisisa kupinda vamweni, ngokudaro avacaireregera vamweni. Asi inga maKristu, tinozvidodokesa ‘tecivona vamweni inga vakuru’ kupinda itusu zve tivaregerere ngo mwoyo wese. (VaFilipi 2:3) Tingazvibvunjisa kudari, ndinotevejera Jehovha zve ndinotatija kuzvidodokesa here? Kudari tinozvidodokesa, zvinozova zvakareruka vamweni kutikumbira ruregerero zve zvinoreruka kuvaregereravo. Ngative tinokasika kukhombijira unyasha zve tononoka kunyangajwa.—Mucumaeri 7:8, 9.

9. Jehovha wakaitisa kudini kuti abesere vaIziraeri kuti vazwisise kuti upenyu wakacena?

⁹ Tanghwe rimwe rinosisira ro madhorobha okutizira rainga ro kungwarira vaIziraeri ku ndava yo ngazi vacina ndava. (Deuteronòmio 19:10) Jehovha anoda maningi upenyu zve anonyenya muurai. (Mazwi Akangwara 6:16, 17) Ngo kuva wakarungama zve Mwari wakacena, aacaizorejareja ngozi yo kuuraya mundhu pikija acikazvidi. I cokwadi  kuti mundhu waiuraya umweni acikazvidi waiashira unyasha. Asi cokutanga waidikana kusanangura mugariro wake ku vakuru. Kudari vakuru vakavona kuti wakauraya acikazvidi, mutizi waidikana kugara mudhorobha ro kutizira mbhera kufa ko mupiri mukuru. Kangaije zvingareva kuti mutizi agare ku dhorobha rokutizira upenyu hwake hwese. Nasiriro iyi yakakohomeja ku vaIziraeri vese kuti upenyu wakacena. Kuti vareremeje Wiya wakapa upenyu, ivona vaidikana kuita zviri zvese kuti vatame kudira upenyu hwo vamweni pa ngozi.

10. Mukuzwirana na Jesu, vatari no vaFarisi vakakhombijisa kudini kuti avacaireremeja upenyu hwo vamweni?

¹⁰ Mukusiana na Jehovha, vatari no vaFarisi vakakhombija kuti ivona avacaireremeja upenyu hwo vamweni. Jesu wakavabvunja kudari: “Mabvisa khiya ro uzivi. Imwimwi amuzivi kunghwina, makarambisiravo vaya vaida kunghwina.” (Luka 11:52) Jesu waida kunangenyi? Vatari no vaFarisi vaidikana kusanangura Soko ra Mwari ku vandhu zve vovabesera kuti vawane upenyu ucikaperi. Kunja kwaizvo, ivona vaieja kujivirira vandhu kuti vatame kutevera Jesu ‘Muimiriri Mukuru wo Upenyu.’ (Maitiro o Vapostori 3:15, Shanduro yeNyika Itsva) Mu njira iyi, vaitungamirira vandhu kuti vaparajwe. Vatari no vaFarisi vaizvikuja zve vainga no umbau zve avacaitotaja upenyu hwo vandhu. Mashatironyi ozvaiita!

11. (a) Mupostori Pauro wakakhombijisa kudini kuti waivona upenyu inga zvaiita Jehovha? (b) Zvicinyi zvingatibesera kuti titevejere kuvangisira kwa Pauro mu mushando?

¹¹ Tingatevejeresa kudini Jehovha zve totama kuita zvaiithwari ngo vatari no vaFarisi? Tingazviita patinoreremeja upenyu. Mupostori Pauro wakazviita izvi ngo kucumaera masoko akanaka ngo pamusoro po Umambo ku vandhu vazinji vaiikwanisa. Iyena wakakwanisa kunanga kudari: ‘Ndakacena ku ngazi yo vandhu vese.’ (Verenganyi Maitiro o Vapostori 20:26, 27, Shanduro yeNyika Itsva.) Asi Pauro waicumaera basi ngokuti iyena aacaida kuva no ndava yo ngazi kana kuti waiizviita ngokuti wakazvibvunjwa ndi Jehovha? Haiwa. Pauro waida vandhu. Iyena waivona kuti upenyu hwavo unosisira zve waida kuti ivona vawane upenyu ucikaperi. (1 VaKorinto 9:19-23) Tinodikanavo kuvona upenyu inga zvaanoita Jehovha. Iyena waida kuti vandhu vese vakhauye kuti vawane upenyu. (2 Pedru 3:9) Kuti titevejere Jehovha, tinodikana kuda vandhu. Mugariro wo unyasha unotindundira kuti ticumaere no kuvangisira zve mukaita kudaro munozowana mudakaro mu basa renyu.

12. Ngenyi kujiviririka kunosisira ku vandhu va Mwari?

¹² Kuti tivone upenyu inga zvinoita Jehovha, tinodikanavo kuva no murangariro waushoni ngo pamusoro po kujiviririka. Tinodikana kufambisa karu zve kushanda takajiviririka, pikija patinonga tecivaka, tecinasirira-nasirira kana patinonga tecienda ku nyumba yo kunamatira. Vandhu, kujiviririka no uhomi nguva jese zvinosisira maningi kupinda nguva no mare. Mwari wedu nguva jese anoita zvakarungama zve anoda kuti tiitevo kudaro. Maningi-ningi vakuru vanodikana kurangarira ngo pamusoro po kujiviririka kwavo no ko vamweni. (Mazwi Akangwara 22:3) Kudari mukuru akamuceukija ngo ndhungamiro yo kujiviririka, mupurutanenyi. (VaGalàsia 6:1) Vonanyi upenyu inga zvinota Jehovha zve ‘amuzovi no ndava yo ngazi.’

13, 14. Vakuru vo vaIziraeri vaitevejeresa kudini urungami hwa Jehovha?

¹³ Jehovha wakapangira vakuru vo vaIziraeri kuti vatevejere urungami hwake. Cokutanga, vakuru vaidikana kutendera zvese. Perapo, ivona vainasa kusotesesa zvakaitisaro kuti aurae, murangariro zve muitiro wake wokare kuti aashire unyasha. Vakuru vaivona dangani mutizi wainyenya mundhu wiya zve wova no cido cokumuuraya. (Verenganyi Bziverengo 35:20-24.) Kudari mundhu wakapumbhwa kuti wauraya mundhu umweni acikazvidi kuti atongehwe nyathwa paaidikana kuva no zvapupu zviviri.—Bziverengo 35:30.

¹⁴ Pasure po kunasa kuvona zvakaitika, vakuru vaidikana kurangarira ngo pamusoro po mundhuwo kamare, haiwa basi pozvaakaitaro. Vakuru vanodikana kusotesesa no ungwaru zvese zviri ngo sure ko zvakaitikaro zve vavone zvakaitikaro. Maningi-ningi pa zvese, ivona vanoda mujimu mucena wa Jehovha kuti uvabesere kutevejera ungwaru hwake, unyasha no urungami.—Exodo 34:6, 7.

15. Kuitisa kudini mavonero aiita Jesu vashaishi aisiana no o vaFarisi?

¹⁵ VaFarisi avacaitonga ngo unyasha. Ivona vaisotesesa basi cishaishi caingaro caita mundhuwo kupinda mushovo wo mundhu. MuFarisi umweni paakavona Jesu aciha pa muzi pa Mateu, wakabvunjisa vajiji vake kuti: “Ngenyi mujijisi wenyu anoha no vaxabisi no vaxatisi?” Jesu wakadavira kuti: “Vakavanga avadi murapi, kaveta vanohwaja ngo vanomupsanga. Endanyi mojija bzinoreva kudini: Ndinoda unyaxa, andidi mbhamba. Ngokuti andizivi kuza kodanija vakarungama, ndakazira vaxatisi.” (Mateu 9:9-13) Kureva kuti Jesu aacaivonepi zvakashata zvaiitahwa ngo vashaishi here? Andizvopi. Iyena waida kuti vakhauye. Iro rainga divi rinosisira ro kucumaera masoko. (Mateu 4:17) Asi Jesu wakazwisisa kuti vamweni vo “vaxabisi no vaxaixi” vaida kucinja. Ivona avazivi kwenda ku muzi ka Mateu basi kuti vahe. Vakaenda kondhoyo ngokuti vaida kutevera Jesu. (Marco 2:15) Zvinosuruvarisa ngo zvokuti, vaFarisi vazinji avacaivonepi vandhu inga zvaiita Jesu. Avacaitenda kuti vandhu vanocinja zve vaivavona inga kuti ndi vashaishi vacina vetero. Ivona vaisiana kamare na Jehovha, uwo wakarungama zve ano unyasha!

16. Zvicinyi zvinodikana kueja kuzwisisa vo pa dare ro kutonga?

¹⁶ Nyamasi uno vakuru vanodikana kutevejera Jehovha, uwo “anodisisa bzakarurama.” (Nduyo 37:28) Cokutanga, vanodikana ‘kupsakisisa’ kuti vave no cokwadi cokuti paitikadi cishaishi. Kudari zviripo, vanodikana kutevera ndhungamiro jo Bhaibheri pakuzviita. (Deuteronòmio 13:13-15) Pavanonga vacishanda pa dare ro kutonga, vanodikana kunasa kusotesesa kuti muKristu wakaita cishaishi waguma pa kukhauya kana kuti haiwa. Izvi azvizivi kureruka kuita. Kukhauya kunobatanija mavonero anoita mushaishi kuposa kwake zve zviri mu mwoyo make. (Apokalipsi 3:3) Mushaishi wakakhauya anoashira unyasha. *—Vonanyi masoko o pasi.

17, 18. Vakuru vangazivisa kudini kudari mundhu wakhauyadi kamare? (Vonanyi pikica yo kutanga.)

¹⁷ Jehovha na Jesu vanonasa kuziva kamare zviri kurangarihwa ngo mundhu no mazwiro aanawo ngokuti ivona vanovona zviri  mu mwoyo. Asi vakuru avakwanisi kuvona zviri mu mwoyo. Kudari muri mukuru, mungazivisa kudini kuti mundhu wanasa kukhauya kamare? Cokutanga, itanyi mukumbiro kuitira ungwaru no kuzwisisa. (1 Majimambo 3:9) Cocipiri, shandisanyi Soko ra Mwari no mabhuku atinopuwa ngo muranda wakangwara kuti amubesere kuvona musiano pakati po “kucamwa ko pasi” no “kucamwa kwenyu kwokuteveja Mwari” zvinoda kureva, kukhauya kunobva pa mwoyo. (2 VaKorinto 7:10, 11) Vonanyi kuti Bhaibheri rinosanangura kudini ngo kukhauya ko vandhu vamweni zve vaya vacizivi kukhauya zve sotesesanyi mazwiro avo, murangariro wavo no zviito zvavo.

¹⁸ Cocitatu, rangariranyi ngo pamusoro po mundhuwo, haiwa basi go zvaakaitaro. Ngenyi iyena ndi mundhu wakadaro? Ngenyi wasunga kuita zviro zvakadaro? Ngozvapi zvineso zvake zve ngozvapi zvaacikakwanisi kuita? Bhaibheri rinonanga kuti Jesu, musoro wo ungano yo ciKristu kuti “aazotongi vandhu inga mavonekere avo pameso ake, aazopangiri ngokuteveja zvaanozwa ngo njeve jake. Anozotonga ngo kururama vano magariro akaderera, anozoita matongero akarungama ku vashuphwi vo nyika.” (Isaia 11:3, 4) Vakuru, Jesu wakamugaja kuti mungwarire ungano yake zve iyena anozomubesera kuti mutonge ngo urungami no unyasha. (Mateu 18:18-20) Tinobonga maningi ngo kuva no vakuru vanotikorondha! Vanotibeseravo kuti tikhombije urungami no unyasha kuno vamweni.

19. Ngozvapi zvijijo ngo pamusoro po madhorobha okutizira amunoda kushandisa?

¹⁹ Mutemo wa Mosi uno “uzivi no bzokadi.” Unotijijisa ngo pamusoro pa Jehovha no zviambi zvake. (VaRoma 2:20) Madhorobha okutizira anosananguhwaya mu Mutemo anojijisa vakuru kuti ‘vatonge ngo urungami’ zve anojijisavo itusu tese ‘makhombijire atinoita rudo hwo kugondeka no unyasha.’ (Zakaria 7:9, Shanduro yeNyika Itsva) Pikija kuti atidikani kutevera mutemo, Jehovha aazivi kucinja. Urungami no unyasha zviciri kundosisira maningi kwaari. I cidakajiso kunamata Mwari wakadari. Ngatende titevejere mavara aya akaseja zve tikwanise kuvhikirihwa no kungwaririhwa ndiyena!