1, 2. Kuhwisana kwapi kuna vashandiri va Jehovha?

VASHANDIRI vese vakagondeka va Mwari vakavangisira, kubvira ku murungami Abheri mbhera vashandiri vakagondeka vo nyamasi uno. Mupostori Pauro vakabvunja maKristu o ciHebheru kuti ainga ‘akavangirira ecirhwa no kutambujika’ paaida kudakajisa Jehovha no kuwana makomborero ake. (Vaheberi 10:32-34) Pauro wakaezanisa kuvangirira ko maKristu no kuvangisira ko vaphikizani vo muphikizano jo ciGiriki, jakadari inga jo kugogoma no kutakana ngo zvibhakera kana soko. (Vaheberi 12:1, 4) Nyamasi uno, tiri pa muphikizano kuitira upenyu, zve tino vavengi vanoda kutikangaija no kutiita kuti tiruze mudakaro wedu wari no mupfupo wo kumbeji.

² Pa kuvangirira kwedu pa kutakana, kana ‘kuhwisana,’ tinohwisana na Sathana no nyika yake. (VaEfeso 6:12) Zvinosisira maningi kuti tivangisire kuti titame kupsaswa ngo jijiso, uzivi hwo nyika, no zviito zvakashata zvo nyika ino, zvakadari inga uhure, kubhema no kudhakwa kana kushandisa mutombo jinodhakwisa. Tinodikanazve kuhwisana no kuvora mwoyo, no mugariro jedu jinoviiswa ngo kutama kukwana.—2 VaKorinto 10:3-6; VaKolosi 3:5-9.

3. Mwari anotirovejesa kudini kuti tihwe no vavengi vedu?

 ³ Zvinokwanasikadi kunyisa vavengi avo vano simba here? Hina, asi zvinozonesa! Pauro wakazviezanisa no mukhandiri wo zvibhakera kana soko paakananga kudari: “Inini andigogomi ndicikazivi ko ndinoda kuguma; ndinorhwa, asi andirhwi no mbhepo.” (1 VaKorinto 9:26) Tinodikana kutakana no vavengi vedu kudarivo inga zvinoita mukhandiri wo zvibhakera kana soko pakutakana no muvengi wake. Jehovha anotibesera no kutiroveja kuti tizviite. Iyena anozviita ecishandisa Bhaibheri. Anoshandisavo mabhuku edu akacijikira mu Bhaibheri, musongano jo ciKristu, magungano o mutundhu no o ndharaundha. Munoshandisa ndhungamiriro jese jomunoashira here? Kudari amuripi, mukufanana no mundhu anokhandirira zvibhakera mu mbhepo, amuzobudiriri pa kuhwisa muvengi wenyu.

4. Tinorambisa kudini kunyiswa ngo ushaishi?

⁴ Tinodikana kuva takangwarira nguva jese. Ngenyi? Vavengi vedu vangatihwisa pa mukuvo woticikaveteri kana potinonga takaremba. Bhaibheri rinotipa ngwajo no vangiso porinonanga kudari: “Ucadonyiswa ngo uxaixi. Kaveta nyisai uxaixi ngo kuita bzauxoni.” (VaRoma 12:21) Kudari tikaramba ticihwisana no ushaishi, tinozokwanisa kunyisa! Asi, kudari tikaregera kungwarira, toregerazve kuhwa, Sathana, nyika yake no mugariro jedu jinoviiswa ngo kutama kukwana, zvinozotinyisa. Ngokudaro, mucadoramwa. Mucadorembejeka zve nyara jenyu jicadopera simba!—1 Pedru 5:9.

5. (a) Zvicinyi zvaticikadikani kukanganwa kudari tecida kutendehwa ndi Mwari no kuwana makomborero? (b) Ngovapi vanonangwa mu Bhaibheri vaticada kujija ngo zvavo?

⁵ Kuti tiwine, tinodikana kurangarija kuti ngenyi tiri kuvangisira kuhwa. Tiri kuhwa ngokuti tinoda kutendehwa ndi Mwari no kuwana makomborero. Vaheberi 11:6, Shanduro yeNyika Itsva, inonanga kudari: ‘Ngo kuti anokhwedera kuna Mwari, anodikana kutenda kuti ariyo zve kuti anopa mupfupo vaya vanomupsaka ngo mwoyo wese.’ Kupsaka Jehovha ngo mwoyo wese zvinoreva kuti tinodikana kushanda ngo simba rese kudari ticida kutendehwa ndiena. (Maitiro o Vapostori 15:17) Mu Bhaibheri muna muezaniso jakawanda jaushoni, jo vanarume no vanakaji zvakazviitavo. Jakobe, Rakeri, Jasefa na Pauro vakasongana no mugariro jakavanesa mu mazwiro no mu muviri. Asi vakakwanisa kubudirira. Muezaniso javo jinokhombija kuti tinozoashiravo makomborero a Jehovha kudari tikashanda ngo simba. Ngativone kuti tinoawanisa kudini.

6. Icinyi cakabesera Jakobe kuti avangirire, wakazowanisa kudini mupfupo? (Vonanyi pikica yo kutanga.)

⁶ Mugondeki Jakobe wakahwa no kucungirira ngokuti waida Jehovha zve waireremeja ushamwari hwake naye. Iyena waigondadi kamare cipikihwa ca Jehovha co kukomborera mubarihwana wake. (Genesi 28:3, 4) Jakobe paainga no makore anokhedera kuita 100, wakatohwisana no ngirozi kuti aashire makomborero a Mwari. (Verenganyi Genesi 32:25-29.) Kunanga kuti Jakobe waikwanisa kamare kutakanaka no ngirozi yakavanga ecishandisa simba rake kamare here? Haiwa! Asi iyena wainga wakasunga kuzviita,  zve wakakhombija kuti waizoshanda ngo simba rese kuti awane makomborero! Jehovha wakakomborera Jakobe ngo kuvangirira kwake zve wakamudura Iziraeri, zvinoreva ‘Murovani, kana Muvangiriri, na Mwari. Jakobe wakaashira mupocero wotiri kupsakarivo, wo kutendehwa ndi Jehovha no kuwana makomborero ake.

7. (a) Mugariro wapi unorembesa waenga na Rakeri? (b) Rakeri wakaitenyi, zve wakazokomborehwesa kudini?

⁷ Rakeri, mukaji anodiwa wa Jakobe, waengavo no cido co kuvona kuti Jehovha waizokwanirisa kudini cipikihwa cake ku mwamunake. Asi paenga no cineso. Rakeri aacaibara. Mu nguva jo Bhaibheri, kutama kubara cainga ciro cinohwaja maningi kuno vanakaji. Rakeri wakarambisa kudini acihwa pikija no mugariro wake unorembesa? Iyena aazivi kuruza vetero. Kunja kwa izvi, wakaramba acihwa ngo kuita maningi mukumbiro kuna Jehovha. Iyena wakazwa mukumbiro jo mwoyo wese ja Rakeri, wakazojizwa kukomborehwa paakazobara vana. Ngo iyo ndava wananga kudari: ‘Ndakarhwisisa . . . ndonyisa ngo simba.’—Genesi 30:8, 20-24.

8. Zvineso zvapi zvakava na Jasefa, zve wakava kudini muezaniso vakanaka kotiri?

⁸ Muezaniso wo kugondeka wa Jakobe na Rakeri kangaije wakapsasa mwana wavo Jasefa no kumubesera paakava no zvineso mu upenyu. Jasefa paaenga no makore 17, upenyu hwake hwese hwakacinja. Hama jake jakava no shanje naye, zve jomutengesera ku uranda. Tevere, wakazopeja makore akawanda ari mukaraboso mu Ejipita, pikija waenga acina ndava. (Genesi 37:23-28; 39:7-9, 20, 21) Asi Jasefa aazivi kuvora mwoyo kana kuva no cishatihwa, zve aazivi kupsaka kuhwirijira. Ngenyi aazivi kuhwirijira? Ngokuti Jasefa waireremeja ushamwari hwake na Jehovha zve waihubatisisa ngo mwoyo wake wese. (VaLevi 19:18; VaRoma 12:17-21) Muezaniso wa Jasefa ungatibesera. Pikija  takava no makurire akashata kana kudari upenyu hwedu huri kudari inga hucina vetero wari, tinodikana kuramba ticihwa no kucungirira. Potinozviita, tinova no gwinyiso kuti Jehovha anozotikomborera.—Verenganyi Genesi 39:21-23.

9. Tingatevejeresa kudini Jakobe, Rakeri na Jasefa?

⁹ Nyamasi uno, tingadikanavo kucungirira zvineso zvikuru. Kangaije muri kutambujika ngo kutama kururama, mukheto, kana kusekwa kana ngo ndava yo mundhu ari kumuitira thima. Kunja ko kurembejeka, rangariranyi zvakabesera Jakobe, Rakeri na Jasefa kuti varambe vacishandira Jehovha no mudakaro. Mwari wakavavangisa no kuvakomborera ngokuti vaidisisa ngo mwoyo wese ushamwari hwavo naye. Ivona vakaramba vacihwa kana kutakana no kuita ciito mu kuzwirana no mukumbiro javo. Ngokuti tiri kurarama mu njiku jo kupejisira, zvinosisira maningi kuti tirambe tina vetero yakavanga yo kumbeji! Muri kuda kuramba mucihwa, kana kushanda ngo simba, kuti muwane unyasha hwa Jehovha here?

10, 11. (a) Ngenyi tingadikana kuti tihwe kuitira makomborero a Mwari? (b) Cinyi cingatibesa kuti tisane kuita zvaushoni?

¹⁰ Ngenyi tingadikana kuti tihwe kuitira makomborero a Mwari? Thangwe rimwe ngo ro kuti ngo kutama kwedu kukwana tingahwisana no cido ciri cese cakashata. Vamweni vanohwa kuti vave no mavonero akanaka ngo pamusoro po mushando, vanohwa ngo ndava yo zvineso zvo uhomi kana ngo ndava yo ushongwe. Kuna vamwenizve vanonesehwa ngo kuregerera mundhu wavaposera. Azvinenyi kuti tashandira Jehovha mukuvo wakarebesa kudini, tese tinodikana kuhwisana no zvinotiitira cineso kuti tishandire Mwari, wiya anozopfupa vaya vakagondeka.

¹¹ Zvokadi, zvinganesa maningi kuva muKristu no kusana kuita zvaushoni, maningi-ningi potinonga ticihwisana no zvido zvedu zvakashata. (Jeremia 17:9) Kudari muri kujizwa kudaro, itanyi mukumbiro kuna Jehovha zve mukumbirenyi mujimu mucena wake. Mukumbiro no mujimu mucena zvinokwanisa kumubesa kuti muve no simba ro kuita zvakanaka, kusiyapo izvi, munozowana makomborero a Mwari. Sunganyi kuti murarame mukuzwirana no mukumbiro jenyu. Ejanyi kuverenga Bhaibheri njiku jese, no kupeja nguva meciita jijo yo mundhu ega no kunamata ko mbhuri.—Verenganyi Nduyo 119:32.

12, 13. MaKristu maviri akabeseswa kudini kuti angwarire zvido zvakashata?

¹² Kuna muezaniso jakawanda jokuti Soko ra Mwari, mujimu wake no mabhuku edu o ciKristu zvakabesesa kudini hama jedu no hambzaji kuti jinyise zvido zvakashata. Muaruki umwe wakaverenga musoro unoti: “Ungakurira Sei Kuda Zvakaipa?” mu Mukai!, yo 8 ya Mbuji 2003. Wakazoitenyi? “Ndiri kuhwa kuti ndingwarire murangariro jangu jakashata. Pondakaverenga musoro uwo ndozwa kuti ‘ku vazinji, hondo yo kuda kunyisa zvido zvakashata kwakavanga maningi,’ zvakandiita kuti ndijizwe kuti ndiri divi ro ukama hwo nyika yese. Ndakajizwa kuti andiripi ndega.” Wocidoko uu wakabeserekazve ngo musoro unoti: “Mararamiro Asiri Omuzvarirwo—Mwari Anoabvumira Here?” wakabudiswa mu Mukai! yo 8 ya Gumi Guru, 2003. Mu musoro uwo, wakavona kuti ku vazinji kuhwa uku ngo konguva jese, inga “muzwa [uri] mu muviri.” (2 VaKorinto 12:7) Asi, povanoramba  vacihwisa kuti varambe vano mufambiro wakacena, vanova no vetero yokadi yo kumbeji. Iyena wakati: “Ngo thangwe iro, ndinorangarira inga kuti panokhirira njiku imwe na imwe, ndingaramba ndakagondeka. Ndiri kubonga maningi Jehovha ngo kushandisa sangano rake kuti ritibesere kupokonyoka njiku imwe na imwe mu mugariro uno wakashata.”

¹³ Vonanyizve zvakawanana no hambzaji yo ku Estadhos Unidhos. Iyona yakatara kudari: “Ndiri kumubonga ngo kutipa nguva jese zvokuha zvotinoda pa nguva kwayo. Kazinji ndinozwa kuti musoro iji jakatarihwa inini basi. Ko makore mazinji, ndiri kuhwisana no cido cakavanga co ciro cinonyenywa ndi Jehovha. Nguva jimweni, ndinoda kuramwa ndoregera kuhwisana. Ndinoziva kuti Jehovha ana unyasha zve anoregerera, asi ngokuti ndino cido ici cakashata zve ngo mukati andiripi kucinyenya, ndaijizwa kuti andikwanisi kuashira besero rake. Hondo iyi yo kuenderera mberi yakapsasa divi guru ro upenyu hwangu. . . . Nondapera kuverenga musoro wokuti “Une ‘Mwoyo Wokuti Uzive’ Jehovha Here?” mu Murindiri wo 15 ya Soka ra Baba, 2013, mu ciShona, ndakazwa kamare kuti Jehovha anoda kundibesera.”

14. (a) Pauro waijizwa kudini ngo pamusoro po kuhwa kwake? (b) Tingawinisa kudini pa kuhwa no marembo edu?

¹⁴ Verenganyi VaRoma 7:21-25. Pauro waizviziva ushoni manesero ozvaizoita kuhwisana no zvido zvakashata no marembo. Asi, iyena waenga no cokwadi co kuti waizowina pa kuhwisana uko kudari akaita mukumbiro kuna Jehovha, womuthemba kuti amubesere, no kudira gonda ku muripo wa Jesu. Tingativo kudini ndisu? Tingawina pa kuhwisana no marembo edu? Hina, kudari tikatevejera Pauro no kuthemba Jehovha ngo mwoyo wese, kuciripi simba redu, no kuva no gonda ku muripo.

15. Jehovha angatibeseresa kudini kuti tirambe takagondeka no kucungirira zviejo?

¹⁵ Nguva jimweni, Mwari angatendera kuti titatije matambujikiro otiri kuita ngo shwiro iri yese. Inga muezaniso, kudari itusu kana mundhu wo pambhuri yedu ari kuhwaja maningi, kana ari kutajwa zvicizivi kururama, taizoitenyi? Kudari tinogonda Jehovha ngo mwoyo wese, tinozomukumbira kuti atipe simba rotinoda kuti tigare takagondeka no kuramba takadakara no kumunamata takavanga. (VaFilipi 4:13) Muezaniso jo maKristu mazinji okare no awari, jinotatija kuti mukumbiro ungativangisa no kutipa kucunga kotinoda kuitira kuti tikwanise kuramba ticicungirira.

16, 17. Masunga kuti muitenyi?

¹⁶ Dhiabhu anoda kumuvona mecirembejeka, kuramwa zve nyara jenyu jecipepera simba. Ngokudaro, ivanyi makasunga ‘kubatisisa zvakanaka.’ (1 VaTesalònika 5:21, BMAA) Mungawina pa kuhwisana na Sathana, nyika yake yakashata no cido ciri cese cakashata! Mungawina kudari mukagonda ngo mwoyo wese kuti Mwari anozomuvangisa no kumubesera.—2 VaKorinto 4:7-9; VaGalàsia 6:9.

¹⁷ Ngokudaro, rambanyi mucihwisa. Rambanyi mucivangisira. Rambanyi mucirovana. Rambanyi mucicungirira. Munozova no gwinyiso rese kuti Jehovha ‘anozodurura panyezuru penyu makomborero akawanda.’—Malakia 3:10.