Zvainangwaro zvinotibesera kuzwisisa kuti Pauro waibhuya ngo pamusoro po masoko a Mwari ngo pamusoro po cidisiso cake, kudari ngo zvotinowana mu Bhaibheri.

Kazinji mu mabhuku edu tinoshandisa Vaheberi 4:12 kuitira kutatija kuti Bhaibheri rina simba ro kucinja upenyu, zve zvorinonanga ndizvona. Asi, zvinobesera maningi kuzwisisa zvaida kunanga Pauro paakatara masoko ari pa Vaheberi 4:12. Iyena waivangisa maKristu o ciHebheru kuti ashandire pamwe no cidisiso ca Mwari. Zvipikihwa zvizinji zvakona zvaiwanika mu matahwa akacena. Pauro wakashandisa inga muezaniso vaIziraeri vaya vakabudiswa ndi Mwari kubva mu Ejipita. Ivona vainga no vetero yo kuenda mu “nyika inopopoma mukaka no uci” yakapikihwa, kovaizobusa kuzorora ko cokwadi.​—Exodo 3:8; Deuteronòmio 12:9, 10.

Ici caenga cidisiso ca Mwari. Asi vaIziraeri vakaramba ndhungamiriro ja Jehovha no kumugonda, ngokudaro vazinji vavo avazivi kunghwina mu kuzorora kondhoko. (Bzviverengo 14:30; Joxwa 14:6-10) Asi, Pauro wakaengejera kuti kwaenga kuciri no “cigondiso co kunghwina mu zororo [ra Mwari].” (Vaheberi 3:​16-​19; 4:1) “Cigondiso” ico i divi rakajeka ro zvaakatatija Mwari ngo pamusoro po cidisiso cake. Kuezana no maKristu o ciHebheru, tingaverenga no kurarama mukuzwirana no cidisiso condhoco. Kuti akohomeje kuti cipikihwa ico cakacijikira mu Matahwa, Pauro wakanokora mativi o tsamba ja Genesi 2:2 na Nduyo 95:11.

Izvo zvinobaya mwoyo jedu kuti ‘cigondiso co kunghwina mu zororo [ra Mwari] cakandovanga.’ Tinogonda kuti zvinojijisa Bhaibheri ngo pamusoro po kunghwina mu zororo ra Mwari zvinokwanisika kamare, zve taita mudanyu kuti timunghwine. Atiiti izvi kuti tieje kuteveja Mutemo wa Mosi kana ngo kuita zviro zvaushoni basi kuti titendehwe ndi Jehovha. Mukusiyana, tinozviita ngo gonda redu kuna Mwari, zve tiri kuita mushandira pamwe unodakajisa no cidisiso ici zve tiri kuramba teciita kudaro. Zviuru no zviuru zvo vandhu, kutenderera pasi pese vakatangavo kujija Bhaibheri no kujija zvakatatija Mwari ngo pamusoro po cidisiso cake. Izvo zvakandundira vakawanda kuti vacinje mararamiro avo, vatatije gonda no kubhabhatijwa. Mapsasihwe ovari kuita i citatijo cakajeka cokuti “Izwi ra Mwari [“rinopona,” BMAA]” zve “rino simba.” Zvaakatatija Mwari mu Bhaibheri ngo pamusoro po cidisiso cake zvakapsasa upenyu hwedu, zve zviri kuramba zvina simba mu upenyu.