“Izwi ra Mwari . . . Rino Simba”
“Izwi ra Mwari rakavanga, rino simba.”—VAHEBERI 4:12.
1. Zvicinyi zvinomukhohwesa kuti Soko ra Mwari rina simba? (Vonanyi pikica yo kutanga.)
VANDHU va Jehovha vanokhohwadi kuti Izwi rake, soko rake ku vandhu, rakavanga kana rinopona zve “rino simba.” (Vaheberi 4:12) Itusu tiri kuvona kushanda ko simba ro Bhaibheri mu upenyu hwedu no hwo vamweni. Vamweni vedu vainga mbhavha, avacairarama pacina mutombo jinodhakwisa kana vaihura vacito vava Zvapupu. Vamweni vainga no nduma kana mare, asi avaizwa kuti pana ciro ciri kukaraira mu upenyu hwavo. (Mucumaeri 2:3-11) Zvinodakajisa ngo zvokuti vazinji vacaengaya no vetero zve vaengaya vakapsejeka, wari vaana ndhungamiriro no vetero. Mu Murindiri, tiri kuverenga no kudakajihwa ngo zviitiko zvakadari inga zviri mu mutevejwana una musoro unoti “Bhaibheri Rinochinja Upenyu”. Pikija vandhu povanotova maKristu, vanodikana kugara vacivangisa ushamwari hwavo na Jehovha ngo besero ro Bhaibheri.
2. Soko ra Mwari rakabesesa kudini vandhu mu zana ro kutanga ro makore?
2 Azvikahamarisi kuti vandhu vazinji vanoita cinjo jakakura povanojija cokwadi. Hama no hambzaji jo mu zana ro kutanga ro makore jainga no vetero yo kumatenga jakaitavo cinjo jakadari. (Verenganyi 1 VaKorinto 6:9-11.) Pauro paakabhuya ngo vacikazogari utaka hwo Umambo hwa Mwari, wakaengejera aciti: “Vamweni venyu vainga vakadaro.” Soko ra Mwari no mujimu mucena wake zvakavabesera kuti vaite cinjo. Pikija povakava maKristu, vamweni vavo vakaita zvishaishi zvikuru zvakapsasa ushamwari hwavo na Jehovha. Inga muezaniso, Bhaibheri rinonanga ngo imwe hama yakazojwa yaidikana kujingwa. Mu kufamba ko nguva, iyona yakazoita cinjo kuitira kuti ivezve divi ro ungano yo ciKristu. (1 VaKorinto 5:1-5; 2 VaKorinto 2:5-8) Zvinovangisa ngo zvokuti hama no hambzaji jiri kukwanisa kuita cinjo jakawanda maningi ngo ndava yo simba ro Soko ra Mwari.
3. Ticazojijenyi pa musoro uu?
3 Soko ra Mwari rina simba maningi. Zvecivoneka kuti Jehovha wakatipa Bhaibheri, tinodikana kuva no gwinyiso rokuti tiri kunasa kurishandisa. (2 Timoti 2: 15) Musoro uu unozobhuya kuti tingaitenyi kuti tishandise simba ro Bhaibheri (1) mu upenyu hwedu, (2) mu kucumaira no (3) potinojijisa pa tiribhuna. Zvotinojija pano zvinozotibesera kuti rudo no kubonga kuna Baba wedu wo kumatenga, vanotijijisa weya kuti tiwane zvakanaka.—Isaia 48:17.
MU UPENYU HWEDU
4. (a) Tinodikana kuitenyi kuti Soko ra Mwari ritipsase? (b) Munoitenyi kuitira kuti mutame kushwa kuverenga Bhaibheri?
4 Tinodikana kuverenga Soko ra Mwari mukuvo wese, kuti titendere kupsaswa ndirona. Tinodikana kuvangisira kuti tiriverenge njiku jese. (Joxwa 1:8) Uzinji hwedu tino upenyu hwakabatikana, asi atidikani kusiya kuti ciricese, kubatanija mutoro jedu, azvidikani kutiregeresa kuverenga Bhaibheri. (Verenganyi VaEfeso 5:15, 16.) Tingawana mukuvo sedo comangwanani, nguva jimweni comasikati kana no usiku. Tinotenderana no mutari wo nduyo wakataraya kudari: “Ndinodisisa mupango yenyu; ndinoirangarira njiku yese.”—Nduyo 119:97.
Atidikani kutendera kuti ciri cese, kubatanija mutoro jedu, jiitise kuti titame kuverenga Bhaibheri
5, 6. (a) Ngenyi tinodikana kurangarijisisa? (b) Tingaitenyi kuti kurangarijisisa kwedu kuve kunoshanda? (c) Kuverenga Bhaibheri no kurangarijisisa kwakamubesera kudini?
5 Asi, kuverenga Bhaibheri basi azvikwani. Tinodikana kurangarijisisa no kujikisa zvotinoverenga. (Nduyo 1:1-3) Tikadaro, tinozokwanisa kushandisa ungwaru wo Bhaibheri mu upenyu hwedu. Ngokudaro, azvinenyi kuti tinoverenga Bhaibheri rakadhindhwa kana mu cimucini cedu, tinoda kutendera kuti Soko ra Mwari riticinje no kutikwevejera.
6 Tingaitenyi kuti kurangarijisisa kwedu kuve kunoshanda? Potinoverenga Bhaibheri, ngatiime, tojibvunjisa kudari: ‘Izvi zvinondibvunjenyi ngo pamusoro pa Jehovha? Zvondaverengari ndiri kuzvishandisa kudini mu upenyu hwangu? Cinjo japi jondicadikana kuita?’ Potinorangarijisisa ngo Soko ra Mwari no kuita mukumbiro ngo pamusoro po zvotinoverenga, tinova no cido co kuzvishandisa. Tikadaro, tinozovona simba ro Bhaibheri mu upenyu hwedu.—2 VaKorinto 10:4, 5.
MU KUCUMAERA
7. Tingashandisa kudini ushoni Soko ra Mwari pa kucumaera?
7 Zvinosisira maningi kuti tishandise Soko ra Mwari kakawanda patinonga tecicumaera no kujijisa. Hama imweni yakananga kudari: “Kudari mainga mecicumaera muzi ngo muzi na Jehovha ambhwine, maizovereketa ndimwi basi nguva jese, kana kuti maizosiya kuti iyena averekete?” Patinoverengera mundhu Bhaibheri, tiri kusiya kuti Jehovha averekete no mundhuwo. Vhesi yakanasa kukhetwa ino simba maningi kupinda ciri cese catingananga. (1 VaTesalònika 2:13) Waro pamunonga mecicumaera, kunanga kuti munopsaka mukana wokuverenga Bhaibheri kakawanda here?
Patinoverengera Bhaibheri mundhu, tinosia kuti Jehovha averekete naye
8. Ngenyi atidikani kuperera pa kuverenga vhesi basi patinonga tecicumaera?
8 Asi, kuverenga basi vhesi yo mu Bhaibheri kuno mundhu watiri kucumaera azvikwani. Vandhu vazinji avazwisisi zvinonanga Bhaibheri. Izvi zvakavoneka mu zana ro kutanga ro makore, zve nyamasi zviri kuvonekavo. (VaRoma 10:2) Atibviri kurangarira kuti samuzi wazvizwa zvatinonga tapera kuverenga mu Bhaibheri. Tinodikana kumubesera ngo kuhwirijira magama anoumba mafundo makuru ari pa vhesiyo, perepo tomudurujira zvaanoreva. Tikadaro, Soko ra Mwari rinopsasa murangariro no mwoyo wa samuzi.—Verenganyi Luka 24:32.
9. Zvatinonanga ticito taverengera mundhu vhesi zvingamubesera kudini kuti areremeje Bhaibheri? Ipanyi muezaniso.
9 Zvatinonanga ticito taverengera mundhu vhesi, zvingamubesera kuti areremeje Bhaibheri. Inga muezaniso, tingananga kudari: “Ngativone kuti Musiki anoti kudini ngo shwiro iyi.” Kudari tiri kubhuya no mundhu aciripi mu ciara co ciKristu, tingananga kudari: “Ngatimbozwe zvinotibvunja Matahwa Akacena.” Kudari tikasonanga no mundhu acina ndava no zvokunamata, tingamubvunjisa kudari: “Makaamba kuzwa masoko aya akanangwa kareko here?” Ticadokanganwa kuti umwe nga umwe ano magariro no zvitendhwa zvake, tikaita kudaro tinokwanisa kuita kuti matangiro edu ave anokwevejera.—1 VaKorinto 9:22, 23.
10. (a) Zvicinyi zvakaitikira hama imweni? (b) Makavonesa kudini simba ro Soko ra Mwari mu kucumaira?
10 Vazinji vari kuvona kuti kushandisa Soko ra Mwari kuno simba ro kupsasa mazwiro o vandhu vatinocumaera. Inga muezaniso, hama imweni yaifambira musharuka umweni waiverenga marevhista edu ko makore akawanda. Njiku imweni, kusiapo kumupekeja revhista Murindiri, yainga yabva kubudiswa, hama iya yakaverengera vhesi imwe musharuka wiya. Iyona yakaverenga 2 VaKorinto 1: 3, 4, inoti: “Baba wo unyaxa, Mwari wo unyarajo hwese, anotinyaraja mu matambujiko ese.” Magama aya akabaya maningi mwoyo wo musharuka uu, wokumbira hama iyi kuti iverengezve mavhesi aya. Mwanarume uu no mukaji vaidadi kunyarajwa. Wakada kuziva zvizinji ngo pamusoro po Bhaibheri ngondava yo mavhesi aya. Kushandisa Soko ra Mwari mu kucumaira kuna simba maningi kamare!—Maitiro o Vapostori 19:20.
PA KUJIJISA PA TIRIBHUNA
11. Mutoro wapi uno hama jinokhwiraya pa tiribhuna koojijisa?
11 Tinoda maningi kuenda ku musongano, magungano o mutundhu no o ndharaundha. Cikurukuru catinoendera ku musongano iji i konamata Jehovha. Tinobesekavo ngo zvatinojija mu musongano iji. Ngo iyo ndava, hama jinoenda pa tiribhuna koojijisa jino cidakajiso cikuru no mutoro unosisira maningi. (Jakobo 3:1)Ivona vaidikana kuva no cokwadi co kuti zvavanojijisa zvakacinjikira mu Soko ra Mwari. Waro kudari imwimwi muno cidakajiso condhoco, munoshandisa kudini Bhaibheri kuti mubaye mwoyo jo vapurutani venyu?
12. Muiti wo hurukuro angavisa kudini no cokwadi co kuti hurukuro yake yakacijikira mu Bhaibheri?
12 Matahwa anodikana kuva ciro cinosisira maningi o divi riri rese pa hurukuro. (Johani 7:16) Ngo kudaro, ngwariranyi maningi pamunoita hurukuro yenyu kuitira kuti kusumura zvakaitika kana kuita muezaniso kutame kufukija zvinonanga Bhaibheri. Cimwenizve ngo co kuti munodikana kuceukija kuti kuverenga Bhaibheri no kujijisa mwakacijikira mu Bhaibheri, zvakasiyana. Zvokadi, kudari mukaverenga vhesi jakawanda, vandhu avadojiceukiji. Ngo kudaro, nasanyi kungwarira pamunokheta mavhesi amunozoda kushandisa. Pejanyi nguva meciaverenga, perepo monasa kuasanangura, kumaezanisira no kudurujira mashandisihwe ao. (Neemia 8:8) Kudari hurukuro yenyu yakacijikira pa phepha ro hurukuro, nasanyi kujija zviri pa phepha ro hurukuroyo no mavhesi anowanikepo. Ejanyi kuzwisisa kuti masoko ari pa phephero anozwirana kudini no mavhesi ari pondhopo. Perepo khetanyi mavhesi amweni kuti mujijise mafundo makuru ari pondhopo. (Mungawana mazano akanaka pa zvijijo 21 no 23 co Bhuku Batsirwa Nedzidzo Yechikoro chaMwari Choushumiri.) Pa musoro pa zvese, kumbiranyi Jehovha kuti amubesere kukovana murangariro jake jinosisira jinobva mu Bhaibheri.—Verenganyi Esdra 7:10; Mazwi Akangwara 3:13, 14.
13. (a) Hambzaji imweni yakapsaswa kudini ngo imwe vhesi payainga pa musongano? (b) Mashandisihwe anoizwa Bhaibheri mu musongano jedu anomupsasa kudini?
13 Hambzaji imweni yo ku Austraria payainga iciri mwana mudoko, yakasongana no mugariro jinozizimusa, zve pikija hazvo yakazoziva Jehovha, iyona yainasa kuthemba kamare kuti Jehovha waiidavo. Njiku imweni pa musongano, hambzaji iyi yakazwa vhesi imweni yakapsasa mazwiro ayo o mukati. Yakarangarijisisa no kupsakisisa, payakapsakisisa yakatowana mavhesi amweni. Yakaguma pa kukhohwa kuti Jehovha anoida. * (Vonanyi masoko o pasi.) Makambozwa vhesi pa musongano, gungano ro ndharaundha kana ro mutundhu, yakamupsasavo maningi here?—Neemia 8:12.
14. Tinokhombijisa kudini kuti tinoreremeja zve tinoda Soko ra Jehovha?
14 Atibongi Jehovha ngo kutipa Soko rake rakatahwa, Bhaibheri here? Iyena wakagondisa kuti irona raizoramba riripo, zve ari kukwanirisa cigondiso cake. (1 Pedru 1:24, 25) Ngo kudaro tinoda kuva no gwinyiso ro kuti tiri kuverenga Bhaibheri nguva jese, kushandisa zvatinoverengemo, no kurishandisa kuitira kubesera vamweni. Patinoita kudaro, tinovonesa kuti tinoda zve tinobonga ngo upfumi uhu, zve cinopinda zvese tinoda Mune wao, Jehovha Mwari.
^ ndim. 13 Vonanyi bhokiso rino musoro unoti “ Cinjo Huru.”
