1, 2. (a) Upenyu hwaizova hwakadini kudari kucainga no Bhaibheri? (b) Zvicinyi zvinoita kuti tibesereke ngo Soko ra Mwari?

UPENYU hwenyu hwaizova hwakadini kudari amucaenga no Bhaibheri? Amucaizowana mazano anomutungamirira njiku ngo njiku. Amucaizoziva cokwadi ngo pamusoro pa Mwari, upenyu kana kumbeji. Zve amucaizoziva kuti Jehovha wakaitirenyi vandhu.

² Zvinodakajisa ngokuti atiripi pa mugariro uu unosuruvarisa. Jehovha wakatipa Soko rake, Bhaibheri. Wakagondesa kuti masoko aro anozogara mbhera narini. Mupostori Pedhru wakanokora masoko ari pa Isaia 40:8. Pikija vhesi iyi aibhuyi ngo pamusoro po Bhaibheri, asi inoshandisihwa ku masoko o Bhaibheri. (Verenganyi 1 Pedru 1:24, 25.) Tinobesereka maningi ngo Bhaibheri kudari tikariverenga ngo ndumi yedu kamare. Vaya vanoda Soko ra Mwari vanozviziva izvi. Pa mazana o makore akapera, vandhu vakashanda ngo simba pa kusanduja Bhaibheri no kuita kuti riwanike, pikija no zvineso zvovaiwanana nazvo no kuteverehwa. Jehovha anoda kuti vandhu  vese “vaponeswe, no kukwanisa kuziva bzokadi.”—1 Timoti 2:3, 4.

3. Ticabhuisanenyi pa musoro uu? (Vonanyi pikica yo kutanga.)

³ Pa musoro uu, ticabhuisana kuti Soko ra Mwari rakacungiririsa kudini pikija no (1) kucinja ko ndumi, (2) kuenderera mberi ko zvomatongehwe o nyika kwakacinja ndumi yaiverekethwa, zve (3) kuteverehwa ko vasanduji vo Bhaibheri. Kubhuisana uku kunozotibesera kudini? Tinozokurisa kubongesera kotinoita ngo ndava yo Bhaibheri no Mune waro.—MIKEYA 4:2; VaRoma 15:4.

4. (a) Ndumi inocinjisa kudini pa kufamba ko nguva? (b) Tinozvizivisa kudini kuti Mwari aavoni ndumi imwe kuti ngo iri nane kupinda jimweni? (c) Munozwa kudini ngo kuziva zvondhozvo?

⁴ Ndumi jinocinja pa kufamba ko nguva. Magama no manangiro angaguma pa kureva ciro cakasiyana maningi no zvaaireva kareko. Kangaije mungazviezanisa ngo ndumi yomunovereketa. Izvo ngo zvaiitikavo no ndumi jokare. Cihebheru no Cigiriki ciri kuvereketwa wari cakasiyana no Cihebheru no Cigiriki cakashandiswa pa kutara Bhaibheri. Vandhu vazinji avakwanisi kuzwisisa ndumi jokare jakashandiswa pa kutara Bhaibheri, zve vanoda sandujo. Vamweni kangaije vairangarira kuti kudari no vakajija Cihebheru no Cigiriki cokare, vaizonasa kuzwisisa Bhaibheri. Asi kangaije azvicaizovabesera maningi inga zvovanorangarira. * (Vonanyi masoko o pasi.) Tiri kubonga maningi ngokuti Bhaibheri rese kana divi raro rakasandujwa kuenda mu ndumi jinodarika 3.000. Jehovha ngaanoda kuti vandhu vo “majinja, ndimi no mabvumbo ese” vabesereke ngo Soko rake. (Verenganyi Apokalipsi 14:6.) Zvokadi kamare, izvo zvinotiita kuti tijizwe kuti tiri phedo maningi na Mwari, ano rudo zve acina mukheto.—Maitiro o Vapostori 10:34.

5. Icinyi cakaitisa kuti sandujo yo King James Version ive inosisira?

⁵ Kucinja ko ndumi kunopsasavo sandujo jo Bhaibheri. Sandujo yakareruka maningi kuverenga poinotanga kubudiswa, aizovi yakajeka pa kufamba ko mukuvo. Muezaniso wazvo ngo wo King James Version, rakatanga kubudiswa pa gore ro 1611. Rakazova Bhaibheri ro Cingezi rinoshandiswa maningi. Magama akashandiswa mu Bhaibheri ro King James Version akazotoguma pa kupsasa ndumi yo Cingezi. * (Vonanyi masoko o pasi.) Asi, sandujo iyi yaenga no mativi mashoma basi aitahwa zina rokuti Jehovha. Mu ndau zinji jo mu Matahwa o Cihebheru maiwanika zina ra Mwari kareko, makadihwa gama rokuti “TENJI” ngo maretera  makuru. Pa kufamba ko nguva, mucini jo kudhindha jakashandisavo gama rokuti “TENJI” ngo maretera makuru mu mavhesi amweni mu Matahwa o ciGiriki o ciKristu. Ngo njira iyi, King James Version inonanga kuti zina ra Mwari rinowanika mu Testamento Imbza.

6. Ngenyi tinobonga maningi ngo ndava yo Shanduro yeNyika Itsva?

⁶ Pakatanga kunasirihwa King James Version, yaishandisa magama aizika kuva o cibarihwe pa mukuvowo. Asi mukuvo powaikhirira, magama amweni akatanga kuzika kuva okare, zve nyamasi uno onesa kutomazwisisa. Zvondhozvo ngo zvakaitikavo no sandujo jo kutanga jo Bhaibheri ngo ndumi jimweni. Ngokudaro, tiri kubonga maningi ngo kuva no Shanduro yeNyika Itsva yeMagwaro Matsvene, yakatahwa ngo mavereketero ari kuitwa wari. Sandujo iyi inowanika yese kana divi rayo, mu ndumi jinodarika 150. Izvi zvinoreva kuti vandhu vazinji mu nyika, wari uno vari kuverenga sandujo iyi ngo ndumi yavo kamare. Zvicivoneka kuti inoshandisa magama akajeka zve owari uno, zvinoita kuti soko ra Mwari rikasike kubaya mwoyo wedu. (Nduyo 119:97) Asi zvinoitisa kuti Shanduro yeNyika Itsva ive inosisira ngo cokuti yakadihwazve zina ra Mwari mu ndau mwaro, moraiwanika kareko.

7, 8. (a) Ngenyi vaJudha vazinji mu zana rocitatu ro makore N.V.I.Y. avacaikwanisa kuzwisisa Matahwa o Cihebheru? (b) Septuaginta yo Cigiri i cinyi?

⁷ Kuenderera mberi ko zvomatongehwe o nyika nguva jimweni kwakacinja ndumi jaivereketwa ngo vandhu pa umwe mukuvo. Asi Jehovha wakangwarira kuti Bhaibheri riwanike ngo ndumi yaizozwisisika ngo vandhu. Inga muezaniso, 39 o mabhuku o Bhaibheri akatahwa ngo vaJudha, kana vaIziraeri. Ndivona “vakaaxira mazwi a Mwari” pa kutanga. (VaRoma 3:1, 2) Ivona vakatara mabhuku ngo Cihebheru kana Ciaramaiko. Asi mukati mo zana rocitatu ro makore N.V.I.Y. (Nguva ya Vese Icito Yaguma), vaJudha vazinji avacaizwisisazve Cihebheru. Ngo ndava yenyi? Ngokuti Arishandre Mukuru paakanyisa divi guru ro nyika, utongi hwo Cigiriki hwakaparajika. Inga muviyo, Cigiriki cakava civereketero co vazinji mu ndau jaitongwa ngo Gresia, zve vazinji vakatanga kuvereketa Cigiriki kusiyapo ndumi yavo. (Danieli 8:5-7, 20, 21) Izvi zvaibatanijavo vaJudha vazinji ngokudaro zvakazovanesa kuti vazwisise Bhaibheri ngo Cihebheru. Ngowapi wakava muviyo wakona?

⁸ Paciri no 250 o makore Jesu acito wabahwa, kwakasandujwa mabhuku mashanu o kutanga o Bhaibheri kuenda mu Cigiriki. Pa mukuvo wakazotevera, Matahwa amweni o Cihebheru akazosandujwavo. Sandujo iyi yakazozivika inga Septuaginta yo Cigiriki. Iyona ndi sandujo yo kutanga inozivika, yakatahwa yo Matahwa ese o Cihebheru.

9. (a) Septuaginta no sandujo jo kutanga zvakabesera kudini vaiverenga Soko ra Mwari? (b) Ngorapi divi romunodakarira ro Matahwa o Cihebheru?

⁹ Septuaginta yakaita kuti zvikwanisike kuti vaJudha vanovereketa Cigiriki vaverenge Matahwa o Ciheberu mu Cigiriki. Muri kuvona kuti mudakaro wakadini wo vakava nao ngo kukwanisa kuzwa kana kurevenga Bhaibheri ngo ndumi yavo kamare here? Pakugumisira, mativi o Bhaibheri akazosandujihwa mu ndumi jimweni jaivereketwa ngo  vazinji, jakadari inga Cisiria, Cigoti no Ciratini. Vazinji povaikwanisa ushoni kuverenga no kuzwisisa Soko ra Mwari, vaigumavo pa kuva no rudo naro. Zve vakava no mavhesi ovaidakarira, inga zvotinoitarivo nyamasi uno. (Verenganyi Nduyo 119:162-165.) Hina, Soko ra Mwari rakacungirira pikija no kucinja ko zvomatongehwe o nyika no kucinja kuenda ku mavereketero o vazinji.

10. Ngenyi mu mukuvo wa John Wycliffe vandhu avacaikwanisa kuverenga Bhaibheri?

¹⁰ Ko makore akawanda vatungamiriri vano simba vakaeja kujivirira vandhu kuti vacadoverenga Bhaibheri. Asi vandhu vanoreremeja Mwari avazivi kuregera kushanda pa kuita kuti Bhaibheri riwanike ngo vese. Umwe wavo ndi John Wycliffe, wairarama ku Ingratera mukati mo zana ro makore ro ci 14. Iyena waikhohwa kuti vandhu vanodikana kukwanisa kuverenga Bhaibheri. Paairarama, vandhu vazinji ku Ingratera vainga vacito vaverenga Bhaibheri ngo ndumi yavo. MaBhaibheri aidhura maningi, zve aitahwa ngo nyara. Ngokudaro, ndi vandhu vashoma basi vainga no Bhaibheri. Zve vandhu vazinji vo pamukuvowo avacaitokwanisa kuverenga. Vaiendaya ku ciara, kangaije vaizwa Bhaibheri riciverengwa ngo izwi rakakhwira ngo Ciratini, asi yainga yaandumi icaizwisisika ngo vandhu vacizivi kujija. Jehovha wakatungamirira kudini kuti vandhu vave no Bhaibheri ngo ndumi yavo?—Mazwi Akangwara 2:1-5.

11. Ngozvapi zvakakwanisika ngo ndava yo Bhaibheri ra Wycliffe?

¹¹ Mu gore ro 1382, John Wycliffe no vamweni vakasanduja Bhaibheri kuenda mu Cingezi. Bhaibheri ra Wycliffe rakashandiswa maningi ngo cikwata caizivikana kuti Lollardos. Vandhu vondhovo vainga no rudo no Bhaibheri. Ivona vaifamba ngo soka mu ndharaunda jese jo mu Ingratera. Vaiverengera vandhu Bhaibheri no kuvapekeja khopi jo mativi aro, jakatahwa ngo nyara. Basa rovakaitaro rakaitazve kuti Bhaibheri riwanike ngo vazinji.

12. Vatungamiriri vo zviara vakajizwa kudini ngo pamusoro pa Wycliffe no basa rake?

¹² Vatungamiriri vo zviara vakanyenya  Wycliffe, Bhaibheri rake no vateveri vake. Vakateverera cikwata Lollardos no kumwesa-mwesa maBhaibheri ese a Wycliffe ovaiwana. Pikija Wycliffe wainga wafa, vatungamiriri vo zviara vaimunanga kuti i mupandukiri, kana muvengi wo ciara. Vakafukunyura maphondo ake, vomapisa, zve vakakhandira marota ao mu murambo Unopopoma. Asi vandhu vazinji, vaida kuverenga Bhaibheri no kurizwisisa, zve ciara acicaizokwanisa kuvarambisa. Pa mazana o makore akazotevera, ku Europa no ku mativi amweni o nyika, vandhu vakatanga kushanduja no kudhindha Bhaibheri ngo ndumi jinozwisisika ngo vazinji.

13. Tingava no gwinyiso renyi? Zvinovangisisa kudini gonda redu?

¹³ Bhaibheri rakafemehwa ndi Mwari. Izvo azvirevi kuti basa ro kusanduja Septuaginta, Bhaibheri ra Wycliffe, King James Version, kana sandujo imweni, rakatofemehwavo ndi Mwari. Asi, potinopopora kuti sandujo iji jakabudisiswa kudini, zvakajeka kuti Soko rake rakacungiriradi, inga zvaakapikira. Izvo zvinovangisa kugonda kwedu kuti zviri zvese hazvo zvaakapikira Jehovha zvinozokwanirisika.—Joxwa 23:14.

14. Zvotinojija ngo pamusoro po Bhaibheri zvinokurisa kudini rudo hwedu kuna Mwari?

¹⁴ Potinoziva kuti Jehovha wakajiviririsa kudini Soko rake, kumugonda kwedu kunovanga zve rudo hwedu kwaari hunokura. * (Vonanyi masoko o pasi.) Ngenyi Jehovha wakatanga kutipa Bhaibheri zve wozopikira kurijivirira? Ngokuti anotida zve anoda kutijijisa mawaniro otingaita zvakanaka. (Verenganyi Isaia 48:17, 18.) Izvi zvinotikwevera kuti timude no kumuzwira.—1 Johani 4:19; 5:3.

15. Ticazojijenyi pa musoro unotevera?

¹⁵ Itusu tinoda maningi Soko ra Mwari. Waro tingabesereka kudini pa kuverenga kwedu Bhaibheri tega? Tingabeseresa kudini votinosongana navo mu kucumaira kuti vade Bhaibheri? Vanojijisa mu ungano vangava kudini no gwinyiso rokuti zvovanojijisa zvakacijikira mu Soko ra Mwari? Ticazodavira mubvunjo iji pa musoro unotevera.