1, 2. Ngenyi ngo zvo ungwaru kuzwira Jehovha pamunosana zvokuita mu upenyu hwenyu? (Vonanyi pikija yo kutanga.)

Kudari muri mujaha kana musikane, kangaije makamboashira mbhangiro jakawanda ngo pamusoro po kumbeji kwenyu. Mapirisori, zvipangamazano no vamweni vangamubvunja kuti mujije maningi kana muwane basa ringamubesera kuwana mare yakawanda. Asi Jehovha anomupa mbhangiro yakasiyana. Zvokadi kamare, iyena anoda kuti muvangisire pa kujija kuti muzokwanise kupona no kujisapota. (VaKolosi 3:23) Asi, iyena anozivazve kuti pamunonga muri mujaha kana musikane, munodikana kutema zvivaringo zvinosisira maningi zvingazopsasa kumbeji kwenyu. Ngokudaro, iyena anomupa ndhungamiro kuti jimutungamirire no kumubesera kuti mupone mu njira ingakwanisa kumudakajisa mu mazuva ano o kupejisira.—Mateu 24:14.

² Ceukijanyi kuti Jehovha anoziva zvese. Iyena anoziva zvinozoitika kumbeji zve anonasa kuziva kamare kuti mugariro  wo nyika ino unopera rini. (Isaia 46:10; Mateu 24:3, 36) Jehovha anonasa kumuziva. Zve anoziva zvicinyi zvinomudakajisa no zvicikamudakajisi. Mbhangiro jo vandhu nguva jimweni jingatoita inga kuti jaushoni, asi, kudari ajizivi kucijikira mu Soko ra Mwari, asipi mbhangiro jo ungwaru.—Mazwi Akangwara 19:21.

3, 4. Kuitisa kudini kuzwira mbhangiro yakashata kwakapsasa Adhamu na Evha pomwe no vana vavo?

³ Kubvira kare mbhangiro jakashata jaindonga jiriyo. Sathana ndiyena wakava mundhu wokutanga wakapa mbhangiro yakashata. Iyena wakabvunja Adhamu na Evha kuti vaizodakara maningi kudari vakajitemera vega zvavanoda. (Genesi 3:1-6) Asi, Sathana wainga no umbau! Iyena waida kuti Adhamu na Evha, pomwe no vana vavo, vazwire iyena zve vamunamate kuciripi kunamata Jehovha. Asi, Sathana aazivi kuita ciri cese kuitira vandhu. Jehovha wainga wakapekeja Adhamu na Evha zvese zvavaida. Wakavaita kuti vave shamwari umwe kuno umweni, wakavapazve munda wavo waiseja zve muviri wakakwana waizovaita kuti vapone kwenda no kwenda.

⁴ Zvinosuruvarisa ngo zvokuti, Adhamu na Evha avazivi kuzwira Mwari. Ngokuita kudaro, vakagura ushamwari hwavo na Jehovha, uwo wakavapa upenyu. Muviyo wakona wakava unosuruvarisa. Inga mafirori aguhwa pa muti pawo, Adhamu na Evha padoko ngo padoko vakaita harahwa zve vofa. Vana vavo vakatambujikavo, kubatanijavo na itusu. (VaRoma 5:12) Vandhu vazinji nyamasi uno vanoramba kuzwa zvinonanga Mwari zve vanoita basi zviya zvavanoda. (VaEfeso 2:1-3) Waro, vanowanenyi ngo kuita kudaro? Bhaibheri rinonanga kuti apana “uzivi,” unohwisana na Jehovha.—Mazwi Akangwara 21:30.

5. Jehovha waizivenyi ngo pamusoro po vandhu zve kureva kuti ndizvonadi here?

⁵ Jehovha waizviziva kuti kwaizova no vandhu vaizoda kumuziva no kumushandira, kubatanijavo majaha no vasikane vazinji. (Nduyo 103:17, 18; 110:3, Shanduro yeNyika Itsva) Majaha no vasikane vondhovo vanosisira maningi kuna Jehovha! Muri umwe wavo here? Dangani munoshandira Mwari, muri kudakajihwa ngo zviro zvizinji ‘zvakanaka’ zvaanomupa zve zvondhozvo zvinoengejera mudakaro wenyu mu upenyu. (Verenganyi Nduyo 103:5, Shanduro yeNyika Itsva; Mazwi Akangwara 10:22) Tinozobhuisana ngo zviro zvirongomuna zvatinopuwa ndi Jehovha. Zvokuha zvokumujimu, ushamwari hwaushoni, kubesera kwaanotiita kuti tigaje zvido zvoumwari pomwe no rusujunuko hwokadi-kadi.

6. Ngenyi tinodikana kutaja zvinodiwa zvedu zvo umwari zve Jehovha anotipenyi kuitira kutibesera?

⁶ Mukusiyana no zvinyama, itusu tino zvinodiwa zvedu zvoumwari, kana kuti tinodikano yo kuda kuziva ngo pamusoro po Musiki wedu. (Mateu 4:4) Patinozwira Mwari, tinowana zwisiso, uzivi no mudakaro. Jesu wakananga kudari: ‘Vanodakara nga vaya vanoziva zvinodiwa zvavo zvo kumujimu.’ (Mateu 5:3, Shanduro yeNyika Itsva) Mwari wakatipa Bhaibheri zve anoshandisa “muranda wakagondeka no wakangwara” kuti atipe mabhuku anotibesera kuvangisa rutendo hwedu. (Mateu 24:45) Mabhuku ondhowo tinomadanija inga zvokuha zvokumujimu ngokuti anovangisa rutendo hwedu  zve anoita kuti ushamwari hwedu na Jehovha uvange. Tinodakara maningi ngo kuva no zvokuha zvese izvi.—Isaia 65:13, 14.

7. Kuitisa kudini zvokuha zvo zvo kumujimu zvinozomubesera?

⁷ Zvokuha zvo kumujimu zvingamupa uzivi zve zvinomubesera kuti munase kurangarira no kumujivirira mu njira jakasiyana-siyana. (Verenganyi Mazwi Akangwara 2:10-14.) Inga muezaniso, mugariro ijo jinozomubesera kuvona manyepo, inga o kuti akuna Musiki, kana okuti mare no zviro zvo kunyama zvinozomuita kuti mudakare. Mugariro jondhojo jingamubeserazve kuti muzive zvido kana zvirovejeso zvinomukhuvaza. Ngokudaro, itanyi zvese zvamunokwanisa kuti muve makangwara no kunasa kurangarira. Perapo, munozokwanisa kuvona kuti Jehovha anomuda maningi zve anoda zvaushoni kwamuri.—Nduyo 34:9; Isaia 48:17, 18.

8. Ngenyi munodikana kukhwedera phedo na Jehovha wari zve munozobesereka kudini kumbejiyo?

⁸ Sasambi, nyika yese ya Sathana inoparajwa. Ndi Jehovha basi anozokwanisa kutijivirira no kutipa zvatinoda, zvingabatanija zvokuha zvatinozoda pa nguveyo. (Habakuki 3:2, 12-19) Ngokudaro, wari i nguva yo kukhwedera phedo na Jehovha no kuvangisa kuthemba kwatinomuita. (2 Pedru 2:9) Kudari mukaita kudaro, azvinenyi zvicinyi zvinonga zveciitika, mungatojizwavo inga ndi Dhavhidhi paakati: “Ndinodira Tenji Mwari pambeji pangu mukuvo wese, Yena ana inini: anobata mukono wangu wo muho, wondivangisa.”—Nduyo 16:8.

9. (a) Inga zvatinoverenga pana Johani 6:44, Jehovha anoitenyi? (b) Ngozvapi zvinodakajisa patinosongana no Zvapupu zvimweni?

⁹ Pamunotanga kusongana no mudhu acikaripi mu cokwadi, ngozvapi zvamunoziva ngo pamusoro pake? Kangaije munoziva zina rake no mavonekero ake asi amuzivi zvizinji. Zvinosiyana kamare, pamunosongana no mundhu ari mu cokwadi. Munoziva kuti iyena anoda Jehovha. Munozivazve kuti Jehovha wakavona zvaushoni mwaari zve wakamukoka kuti aviye koita divi ro mbhuri yo vanamati vake.  (Verenganyi Johani 6:44.) Azvinenyi hazvo kuti mundhu anobva kwapi kana kuti wakakurira kwapi, imwimwi munoziva zvizinji ngo pamusoro pake zve iyena anoziva zvizinji ngo pamusoro penyu!

10, 11. Ngozvapi zviro zvakaezana zvino Zvapupu zva Jehovha zve zvinomupsasisa kudini?

¹⁰ Pamunosongana no Capupu cimweni, munozviziva kuti muno zviro zvizinji zvakaezana umwe no umweni. Munozviziva kuti pikija munovereketa ndumi jakasiyana, imwimwi munobhuya ndumi yakaezana, ‘ndumi yakacena’ yo cokwadi. (Sofonia 3:9, Shanduro yeNyika Itsva) Izvi zvinoreva kuti munotenda Mwari wondhowo, muno ndhungamiro jakafanana ngo pamusoro po mufambiro zve muno vetero yondhoyo kuitira kumbeji. Zviro izvo zvinomuita kuti muthembane zve muve no ushamwari hwakavanga unogara kwenda no kwenda.

¹¹ Ngokudaro, asipi kunyanyisa kunanga kuti vanamati va Jehovha vano ushamwari hwaushoni. Muno shamwari kutenderera nyika yese, pikija no vandhu vamucikato masongana navo! Makambovona vandhu vamweni vano ushamwari hwakadari kusiyapo zvapupu zva Jehovha here?

12. Zvido zvapi zvo umwari zvomakagaja?

¹² Verenganyi Mucumaeri 11:9–12:1. Muno zvido zvamuri kueja kukwanirisa here? Kangaije makagaja cido co kuda kuverenga Bhaibheri njiku jese kana kupa mupinguro jaushoni kana kunasa kuita ushoni mativi enyu pa musongano. Kangaije muri kueja kuitisa nane kushandisa kwenyu Bhaibheri. Munozwa kudini pamunojivona kuti muri kuita nane kana vamweni pavanomubvunja kuti muri kuitisa nane? Kangaije munodakara maningi, ngo kuiita kudaro! Ngenyi? Ngokuti munonga meciita zvinoda Jehovha, inga zvakaita Jesu.—Nduyo 40:9; Mazwi Akangwara 27:11.

13. Ngenyi kuva no zvido zvoumwari zvakanaka maningi kupinda kuva no zvido mu nyika ino?

¹³ Pamunobatisisa basa renyu kuna Jehovha, muri kuita basa rinomuita kuti mudakare zve munoita kuti upenyu hwenyu uve no cinangwa. Pauro wakatara kudari: “Ngo ndava yabzo, hama jangu jokudikana, vanganyi, mucatetemera. Batiranyi Tenji ngo simba rese, meciziva kuti kuremba kwenyu akuiti kwabiresi kuna Tenji.” (1 VaKorinto 15:58) Asi, vandhu pavanobatikana ngo zvido zvo nyika ino, zvakadari inga mare kana kuva no nduma avana mudakaro wokadi-kadi. Pikija hazvo vakajizwa inga vari kubudirira, ngo mukati avana mudakaro. (Luka 9:25) Tinozvivona izvo ngo muezaniso wa Mambo Soromona.—VaRoma 15:4.

14. Tingajijenyi ngo muezaniso wa Soromona?

¹⁴ Soromona, wainga mukhupuki zve wainga mundhu ano simba wakamborarama. Iyena wakajibvunja kudari pacake: “Bzakanaka, ndinoda kukueja ngo kudakara, ndozokuzivisa kupfara!” (Mucumaeri 2:1-10) Ngokudaro, Soromona wakavaka nyumba yakaseja, wakanasirira jhardhim pomwe no ndau jo kutambira jakaseja zve wakaita zvese zvaaida. Kureva kuti wakava no mudakaro here? Soromona paakasota zvese zvaainga aita, iyena wakananga kuti, ndavona kuti “bzese bzainga bzabiresi.” Wakaengejera kudari: “Akuna ciro cinobesa.” (Mucumaeri 2:11) Tinojijenyi ngo zvakaitikari na Soromona?

15. Ngenyi tinodikana kuva no rutendo zve unozomubesera kudini, inga zvatinoverenga pana Nduyo 32:8?

¹⁵ Vandhu vamweni vanojija ciri cese mu  upenyu ngo kushaisha kuita ciri cese zve votambujwa ndicona. Jehovha aadi kuti izvo zvimuitikirevo. Iyena anoda kuti mumupurutane no kumuzwira. Kuti muite zvakadaro, zvinodikana kuva no rutendo, asi amuzozvidembi ngo kuita zviro zvakadaro mu upenyu hwenyu. Zve Jehovha narini aazokanganwi “unyaxa hwo makatatija ngo zina rake.” (Vaheberi 6:10) Ngokudaro, itanyi zvamunokwanisa kuti rutendo hwenyu huvange. Perapo, munozokwanisa kusana zvaushoni mu upenyu hwenyu zve munozovona kuti Baba wenyu vo mugore vanoda zvaushoni kwamuri.—Verenganyi Nduyo 32:8.

16. Ngenyi tinodikana kureremeja rusujunuko hwatinahwo no kuushandisa ngo ungwaru?

¹⁶ Pauro wakatara kudari: ‘Pano mujimu wa Jehovha, pano rusujunuko.’ (2 VaKorinto 3:17, Shanduro yeNyika Itsva) Jehovha anoda rusujunuko zve wakamusika kuti mudevo rusujunuko. Asi, Jehovha anoda kuti muushandise ngo ungwaru, kuitira kuti uzomungwarire. Inga muezaniso, majaha no vasikane vamweni, vanovona zvo umitu mitu, kuva no mufambiro ucizivi kucena, kuita mutambo jino ngozi kana kushandisa mutombo jinodhakwisa no doro. Pa kutanga zviro izvi zvingatovoneka inga kuti zvinodakajisa kana zvinonyaukirisa, asi kazinji zvinoviisa muviyo jakashata, jakadari inga ndhendha, kuva muranda wo doro kana wo mutombo jinodhakwisa, kana kutofa kamare. (VaGalàsia 6:7, 8) Majaha no vasikane vanoita zviro izvi, vanorangarira kuti vano rusujunuko, asi avana.—Tito 3:3.

17, 18. (a) Kuitisa kudini kuzwira Mwari kunotipa rusujunuko hwo kadi-kadi? (b) Ngowapi musiyano wo rusujunuko wainga na Adhamu na Evha no wo vandhu nyamasi uno?

¹⁷ Ngo divi rimweni, kuzwira Jehovha zvaushoni kwatiri. Zvaushoni kuitira uhomi hwedu zve zvinotiita kuti tive no rusujunuko wokadi-kadi. (Nduyo 19:8-12) Zve pamunosana kushandisa rusujunuko hwenyu ngo ungwaru, kana kuti pamunosana kuzwira mutemo jakaperera no ndhungamiro ja Mwari, munonga mecikhombijira ku vandhu vaviri, Mwari no kuno vabari venyu kuti muri mundhu anoreremejeka. Vabari venyu vanozomuthemba maningi zve vanozomupa rusujunuko. Zve Jehovha anogondisa kuti sambiri pano anozopekeja vashandiri vake vese vakagondeka rusujunuko wakaperera, uwo unodanijwa ngo Bhaibheri kuva ‘rusujunuko no goja ro vana va Mwari.’—VaRoma 8:21.

¹⁸ Uwu, ndiwona mushovo wo rusujunuko wakambova na Adhamu na Evha. Mu munda wo Edheni, mainga no ciro cimwe basi cakananga Mwari kuti vatame kuita. Ivona avacaidikana kuha mucero umwe wo muti wakati kuti. (Genesi 2:9, 17) Munorangarira kuti Mwari ngo kupa mutemo uwu wainga eciposa kana kuva acizivi kurungama here? Zvokadi kamare haiwa! Rangariranyi ngo mutemo muzinji jakadihwa ngo vandhu zve vacivangirija vamweni kuti vajizwire. Asi,  Jehovha wakapa Adhamu na Evha mutemo umwe basi.

19. Jehovha na Jesu vari kutibeseresa kudini kuti tive no rusujunuko?

¹⁹ Jehovha anotitaja ngo ungwaru kamare. Kusiyapo kutipa mutemo jakawanda, ngo kusengerera anotijijisa kuti tide mutemo wo rudo. Iyena anotijijisa kuti tipone mukuzwirana no ndhungamiro jake zve tonyenya zvaanonyenya. (VaRoma 12:9) Pa Hurukuru yo pa Dundhu, Jesu, wakatibesera kuzwisisa kuti ngenyi vandhu vanoita zviro zvakashata. (Mateu 5:27, 28) Zve mu nyika imbza, inga Mambo wo Umambo hwa Mwari, Jesu anozoramba ecitijijisa kuti tivone zviro zvakanaka no zvakashata, inga zvaanoita iyena. (Vaheberi 1:9) Jesu anozotiita kuti tive vakakwana mu murangariro no mumuviri. Vonanyi kuti narini amuzoejwizve kuti muite zviro zvakashata zve amuzotambujikizve ngo ndava yo kutama kukwana. Pejisire, munozobusa ‘rusujunuko no goja’ rakagondeswa ndi Jehovha.

20. (a) Jehovha anoshandisa kudini rusujunuko hwake? (b) Mungamutevejeresa kudini?

²⁰ Mu nyika imbza, rusujunuko hwedu unozova no paunogumira. Mu njira yapi? Tinozondundihwa ngo rudo hwedu kuna Mwari no kuno vamweni. Patinotungamirihwa ngo rudo, tinonga tecitevejera Jehovha. Pikija Jehovha ano rusujunuko wakaperera, iyena anoita kuti zvese zvaanoita zvitungamirihwe ngo rudo, kubatanijavo manera aanotitaja. (1 Johani 4:7, 8) Kudari tinoda kuva no rusujunuko hwokadi-kadi, tinodikana kutevejera Mwari tecitungamirihwa ngo rudo.

21. (a) Dhavhidhi waizwa kudini ngo pamusoro pa Jehovha? (b) Tinozobhuisana ngenyi pa musoro unotevera?

²¹ Kureva kuti muri kubongesera ngo zviro zvese zvaushoni zvamuri kupuwa ndi Jehovha here? Iyena ari kumupa zvokuha zvokumujimu, shamwari jaushoni, zvido zvo umwari, vetero yakakwana yo kuva no rusujunuko kumbejiyo pomwe no zvipo zvimweni zvinoshamaisa. (Nduyo 103:5) Kangaije munozojizwa kudari inga ndi Dhavhidhi, paakaita mukumbiro, inga zvatinovona pa magama a Nduyo 16:11: “Munozondijijisa gwanja ro kurarama, pa meso penyu ndinozara ngo kudakara, ndikagara nemwi ndinozobusa mbhera narini.” Pa musoro unotevera, tinozobhuisana ngo zvokadi zvimweni zvinosisira zvinowanika mu Nduyo 16. Zvinozomubesera kuti muvone kuti mungaviisa kudini no upenyu hwakanakisisa!