DIANA, imwe hambzaji ino makore anodarika 80, iri kutambujika maningi kubvira mu makore manganani adarika. Mwamuna wayo, vainga no ndhendha inozwi Alzema zve vaidikana kugara pa nyumba inogara vanohwaja, mbhera kufa kwavo. Iyona yakafihwazve ngo vana vaviri zve yaidikanazve kuhwisana no kanseri yo mazamu. Asi, hama no hambzaji pajinovona hambzaji Diana pa musongano kana mu basa ro kucumaera, vanovona kuti iyona nguva jese inonga yakadakara.

Hama John vainga muvonereri wo ndharaundha pa makore anodarika 43. Ivona vaidakarira maningi basa ravo zve avazivi kumborangarira kuita basa rimweni. Asi, vakadikana kusiya kushanda inga muvonereri kuti vaende kokorondha ukama hwavo waihwaja. Hama no hambzaji jinoziva hama John, pajinosongana navo mu magungano, jinovona kuti hama John avazivi kucinja. Vandori mundhu ano mudakaro.

Zvicinyi zvakabesera hambzaji Diana na hama John kuti vave vakadakara? Mundhu angadakara acisongana no matambujiko here? Bhaibheri rinotipa mupinguro. Irona rinoti: “Mururami anodakara” ndi Jehovha. (Nduyo 64:10) Tingazwisisa cokwadi ici kudari tikaziva kuti zvicinyi zvinopa mudakaro ucikaperi zve zvicinyi zvicikapi.

Zviro zvimweni kazinji zvinopa mudakaro. Inga muezaniso, rangariranyi vandhu vaviri vanodisana vari kucadha. Kana varovorani vanoda kuva no mwana kana hama inoda kuva no mutoro mu basa ra Jehovha. Zviro izvi zvinopa mudakaro ngokuti zvinobva kuna Jehovha. Ndiyena muumbi wo mucadho, wakatiita kuti tikwanise kubara vana pomwe no kukwanisa kuita basa mu sangano rake.—Genesi 2:18, 22; Nduyo 127:3; 1 Timoti 3:1.

Asi, zviro zvimweni zvinoviisa mudakaro wo nguva shomani. Zvinosuruvarisa ngo zvokuti, varovorani vamweni vanoita uhure, vamweni vanoguma pa kufa. (Ezekieli 24:18; Hoseya 3:1) Vana vamweni avazwiri vabari pamwepo na Mwari vopejisira ngo kujingwa. Inga muezaniso, vana va Samueri avazivi kushandira Jehovha mu njira inotendehwa zve Dhavhidhi wakava no zvineso zvizinji mu mbhuri yake ngo ndava yo cishaishi caakaita na Bhati-sheba. (1 Samueli 8:1-3; 2 Samueli 12:11)  Zviro zvakadari pazvinoitika azviviisi mudakaro asi zvinoviisa kusuruvara pomwe no kuhwajihwa.

Mukufananavo, nguva jimweni atikwanisi kuramba tecishandira Jehovha ngo ndava yo zvineso zvo uhomi kana kudikana kukorondha mbhuri kana cinjo iri yese inoithwa ngo sangano. Uzinji wo vaya vakasiya basa ro vaiita mu sangano ra Jehovha, wari vari kuvona kuti raivapa mudakaro.

Izvi zvingatibesera kuvona kuti zvinyuke izvi zvo mudakaro azvigari kwenda no kwenda. Waro, kuno mudakaro unoramba uripo pikija patinosongana no zvineso here? Hina uriyo, ngokuti Samueri na Dhavhidhi pomwe no vamweni avazivi kuruza mudakaro wavo povakasongana no zvineso.

Jesu waizviziva kuti icinyi mudakaro wokadi-kadi. Acito aviya pasi pano, Bhaibheri rinonanga kuti iyena ‘waidakara pamberi pa [Jehovha] mazuva ese.’ (Mazwi Akangwara 8:30, Biblia Mazwi Akacena aMwari) Asi, paakaviya pasi pano, wakasongana no zvineso zvakawanda maningi. Pikija zvakadaro, Jesu wakawana mudakaro ngo kuita kuda ka Baba wake. (Johani 4:34) Tingati kudini ngo nguva jo kupejisira jo upenyu hwake? Bhaibheri rinoti: “Eciziva rudakaro hwaizomuviira, wakadavira kufa pa [‘danda ro kutambujikira,’ Shanduro yeNyika Itsva].” (Vaheberi 12:2) Ngokudaro, tingava no zvijijo zviviri kubvira ku zvakanangari Jesu ngo pamusoro po mudakaro wokadi-kadi.

Pa bvaza imweni, Jesu wakatuma 70 o vajiji kuti vaende koocumaera. Povakahwirira ivona vainga vakadakara ngo zvese zvovainga vaita, pikija kutombirimbija madhimoni. Asi, Jesu wakavabvunja kudari: “Mucadakara ngokuti mabjoka anomuzwira, kaveta dakaranyi ngokuti mazina enyu akatahwa mugore.” (Luka 10:1-9, 17, 20) Hina, kuva tinotendehwa ndi Jehovha zvinosisira maningi zve kunotipa mudakaro mukuru kamare kupinda kuva no basa riri rese mu sangano ra Jehovha.

Hwendo humweni, Jesu paainga ecijijisa mbungano yo vandhu, mwanakaji umweni muJudha wakashamaisika maningi ngo majijisiro ake woti, vanodakara mai vakakubara. Asi Jesu wakati: ‘Vanodakara avo vanopurutana izwi ra Mwari no kuriteveja.’ (Luka 11:27, 28, Shanduro yeNyika Itsva) Kudada ngo ndava yo vana kunopa mudakaro. Asi,  zvinotipa mudakaro wo kwenda no kwenda ndi kuzwira Jehovha no kuva no ushamwari wo phedo naye.

Zvinotipa mudakaro mukuru maningi, patinovona kuti Jehovha ari kudakara ndisu. Pikija no zvineso zvatinosongana nazvo, izvona azvikwanisi kutibvisira mudakaro wedu. Zvokadi kamare, patinoramba takagondeka pikija no zvineso, mudakaro wedu unoramba weciengejeka. (VaRoma 5:3-5) Cimwenizve, Jehovha anopa mujimu wake ku vese vaya vanomuthemba zve mudakaro i divi ro mucero wo mujimu. (VaGalàsia 5:22) Izvi zvinotibesera kuzwisisa kuti ngenyi Nduyo 64:10 inonanga kuti: “Mururami anodakara” ndi Jehovha.

Izvi zvinosanangura kuti ngenyi hambzaji Diana na hama John, wakaramba vakadakara pikija vecisongana no zvineso. Hambzaji Diana vakati: “Ndakapsaka kutizira kuna Jehovha, inga vana vanoitavo no vabari vavo.” Ivona vakaengejera veciti: “Njira imwe yo kuvona kuti Jehovha ari kundikomborera ngo yo kuti ndiri kukwanisa kucumaera ndakadakara.” Zvicinyi zviri kubesera hama John kuti varambe vakadakara zve vakabatikana mu mushando pikija vasiya kuita basa rovaidakarira maningi? Ivona vakati: “Kubvira mu gore ro 1998 pondakagajwa inga mujijisi wo Cikora co Rovejo yo Mushando (Escola de Treinamento Ministerial) ndakava mundhu anoita maningi jijo yo mundhu ega kupinda kare.” Ivona vakanangazve kuti cinjo iyo yakabesera ivona pamwepo no mukaji wavo kuti vashandire Jehovha mbhera paya po kuti mugariro wavo unotendera. Vakaengejera vaciti: “Atizvidembi ngo zvese zvotakaita.”

Vandhu vazinji vakavona kuti zvinonangwa pana Nduyo 64:10 ndizvonadi kamare. Inga muezaniso, vonanyi basi, varovorani vamweni vakashandira ku Bheteri ro ku Estadhus Unidhus ku makore anodarika 30. Vakabvunjwa kuti vanodikana kushanda inga mapiyona anosisira. Ivona vakati: “Pamunoruza ciro camunoda maningi, zvinoitika kugara takasuruvara,” asi, ivona vakaengejera vaciti: “Amungagari makasuruvara kwenda no kwenda.” Povakandoenda ku basa ravo imbza, vakatanga kucumaera no ungano yavo. Ivona vakanangazve kudari: “Takaita mukumbiro tecikumbira zviro zvakati kuti, tecizvinanga ngo zina kamare. Perapo potaivona kuti mukumbiro jedu jaidavihwa zvaitivangisa maningi zve zvaitipa mudakaro. Pacito papera mukuvo wakareba, vamweni mu ungano yedu vakatanga kushanda inga mapiyona zve takakomborehwa ngo kuva no vajiji vaviri vo Bhaibheri vari kwenderera mbheri.”

Zvokadi kamare, azvizivi kureruka kuva takadakara nguva jese. Nguva jimweni tingatosuruvara. Asi Jehovha anotivangisa ngo magama anowanika pana Nduyo 64:10. Pikija paya patinonga takasuruvara, tingava no cokwadi co kuti kudari tikaramba takagondeka azvinenyi hazvo tino zvineso zvakadini, ‘tinozodakara’ ndi Jehovha. Tingatosotavo kumbeji kwedu pa nguva yo kuti Jehovha anozokwanirisa cigondiso cake co kuti “ndinorura madenga mapsa no nyika ipsa.” Perapo vandhu vanozova vakakwana zve ‘vanozodakara, vozotamba mbhera narini’ ngondava yo zvese zvo vanonga vaiitihwa ndi Jehovha.—Isaia 65:17, 18.

Vonanyi kuti izvi zvinorevenyi. Tinozova no uhomi hwakakwana zve tinozova no simba njiku jese. Kuhwajihwa kwese kwatinako nyamasi uno, atizokuzwizve kumbejiyo. Jehovha anotigondisa kudari: “Bzo kare abzizocerecejwibze, abzizodihwibze mu mwoyo.” Tinozoti kwaviya wakanaka ku vadiwa vedu povanozomuswa zve tinozojizwavo inga vabari vo cimusikane ciya cainga no 12 o makore cakamuswaya ndi Jesu. Bhaibheri rinoti: Ivona “vakakahamara kukuru kamare.” (Marco 5:42) Pejisire, vandhu vese mu nyika ino, vanozova vakarungama zve ‘vanozodakara’ ndi Jehovha kwenda no kwenda.