1, 2. Mukuzwirana no Vaheberi 13:4, maKristu anodikana kuvona kudini mucadho?

TESE TINODA kureremeja Jehovha. Iyena anofanera kureremejwa ndisu zve anogondisa kuti anozotireremejavo. (1 Samueli 2:30; Mazwi Akangwara 3:9; Apokalipsi 4:11) Iyena anodavo kuti tireremeje vandhu vamweni, vakadari inga utongi hwo nyika ino. (VaRoma 12:10; 13:7) Asi pano divi rimweni ro upenyu hwedu ratinodikana kureremeja kamare. Mucadho wedu.

² Mupostori Pauro wakatara kudari: “Mucadho ngaureremejwe ngo vese; mwamuna no mukaji wake ngavagondane ngocavo.” (Vaheberi 13:4) Pauro aacaingepi ecidira mutemo ngo pamusoro po mucadho. Wainga ecibvunja maKristu kuti anodikana kureremeja mucadho, kana kuti kuuvona inga unosisira. Waro munovona mucadho inga unosisira, maningi-ningi mucadho wenyu kudari makacadha here?

3. Jesu wakapa ngwajo yapi inosisira ngo pamusoro po mucadho? (Vonanyi pikica yo kutanga.)

³ Kudari munovona mucadho inga unosisira, muri kutevera muezaniso waushoni maningi. Jesu ambhwine waireremeja mucadho. VaFarisi povakamubvunjisa ngo pamusoro po kurambana, iyena wakasanangura zvakananga Mwari  ngo pamusoro po mucadho wo kutanga, paakati: “Ngo njio yondhoyo mwanarume anozosia baba na mai wake vozoita vovaviri muviri umwe; ngokudaro avaciripi vaviri, kaveta muviri umwe.” Jesu wakaengejera eciti: “Mundhu acadoparaja bzakabatanijwa ndi Mwari.”—Verenganyi Marco 10:2-12; Genesi 2:24.

4. Ngocapi cidisiso ca Jehovha ngo pamusoro po mucadho?

⁴ Jesu wakananga kuti Mwari ndiyena wakaita mucadho zve iwona unodikana kuva wo kwenda no kwenda. Mwari paakaita mucadho wokutanga, iyena aazivi kubvunja Adhamu na Evha kuti vazorambane. Kunja kwa izvo, cidisiso cake cainga co kuti “vovaviri” varambe vakabatana mu mucadho kwenda no kwenda.

5. Rufu unopsasisa kudini mucadho?

⁵ Inga zvamunoziva, Adhamu paakashaisha, zviro zvizinji zvakacinja. Cimwe co zviro zvondhozvo, ngo co kuti vandhu vakatanga kufa zve izvo zvakapsasa maningi mucadho. Mupostori Pauro wakasanangura ku maKristu kuti kufa ko mundhu umwe pa mucadho kunoita kuti wasararo acadhe no mundhu umweni.—VaRoma 7:1-3.

6. Mutemo wa Mosi unotijijisenyi ngo pamusoro po mavonero anoita Mwari mucadho?

⁶ Mutemo wakapa Mwari ku vaIziraeri wakananga zvizinji ngo pamusoro po mucadho. Inga muezaniso, muIziraeri waitendehwa kuva no vakaji vazinji. Cirovejeso ici caingepo Mwari acito wapa Mutemo uwo. Asi, Mutemo uwo waingwarira mukaji no vana vake kuti vatame kushaisha kutajwa. Inga muezaniso, kudari umwe mwanarume wo muIziraeri akacadha no muranda zve worovorazve mukaji wo cipiri, iyena waidikana kuramba ecindotaja mukaji wokutanga inga zvaaita kare. Mwari waida kuti iyena arambe ecimukorondha no kumungwarira. (Exodo 21:9, 10) Nyamasi uno, itusu atiripi kuteverera Mutemo wa Mosi. Asi, iwona unotijijisa kuti  Mwari anovona mucadho kuva unosisira. Zvokadi kamare, izvi zvinotibesera kuti tireremeje mucadho.

7, 8. (a) Mutemo wainangenyi ngo pamusoro po kurambana mukuzwirana na Deuteronòmio 24:1? (b) Jehovha anovona kudini ngo pamusoro po kurambana?

⁷ Mutemo wainangenyi ngo pamusoro po kurambana? Pikija Jehovha aacaidepi kuti mwamuna no mukaji varambane, Mutemo waitendera kuti mwamuna arambane no mukaji wake kudari “wakavona kwaari ciro cakaxata.” (Verenganyi Deuteronòmio 24:1.) Mutemo aucainanga kamare kuti icinyi “ciro cakaxata” canangwari. Ngokudaro, caidikana kuva ciro cinopseruja kamare kana cakashatisisa haiwa cirovo haco. (Deuteronòmio 23:15) Zvinosuruvarisa ngo zvokuti, mu njiku ja Jesu, vaJudha vazinji vairambana no vakaji vavo “ngo ndava iriyese.” (Mateu 19:3) Zvokadi kamare atidi kusakurira murangariro wakadaro.

⁸ Mu njiku jo muporofita Marakiya, cainga cirovejeso mwanarume kurambana no mukaji wokutanga, kangaije wotocadha no musikane acikashandiri Jehovha. Asi, Mwari wakanasa kujekesa kuti ngoapi mavonero ake ngo pamusoro po kurambana. Iyena wakati: “Andidi kamare rurambano.” (Malakia 2:14-16) Mavonero anoita Jehovha mucadho aazivi kucinja kubvira pakutanga, izvi zvinovoneka pa magama ake okuti, mwanarume ‘anozobatana no mukaji wake, vovaviri vanozova mundhu umwe.’ (Genesi 2:24) Zve Jesu wakabesera mavonero a Baba wake ngo pamusoro po mucadho, paakati: “Mundhu acadoparaja bzakabatanijwa ndi Mwari.”—Mateu 19:6.

9. Magama a Jesu pana Marco 10:11, 12 anorevenyi?

⁹ Nguva jimweni mungazvibvunjisa kudari: ‘Pangava no thangwe ro kuti muKristu arambane zve acadhezve here?’ Vonanyi basi zvakananga Jesu: “Ndiani anoramba mukaji wake worovora umweni, anoxaixira wokutungamira. Mukaji, kudari akaramba murume worovohwa ngo umweni anoitavo upombo.” (Marco 10:11, 12; Luka 16:18) Zvakajeka kamare kuti Jesu waireremeja mucadho zve waida kuti vamweni vaitevo kudaro. Kudari mwanarume akarambana no mukaji wake wakagondeka zve wocadha no umweni, iyena anonga eciita upombo. Ndizvonavo zvondhozvo zvaiitika kudari mwanakaji akarambana no mwamuna wake vakagondeka. Izvi zvaiitika ngokuti kurambana akupfujuri mucadho. Mwari waindoramba ecivona varovorani avo kuva “mundhu umwe.” Jesu wakanangazve kuti, kudari mwanarume akarambana no mukaji wake acina ndava, waizomuita kuti apombore. Kuitisa kudini? Hina, ngokuti mu nguva jondhojo, mwanakaji wakarambiwa waizojizwa inga kuti ari kuvangirijwa kuti acadhezve kuti awane manera o kusapotwa. Asi mucadho wakadaro waitoezanazve no kuita upombo.

10. Ngorapi thangwe rimwe basi ringaita kuti muKristu arambane zve ave wakasujunuka kuti acadhe no umweni?

¹⁰ Jesu wakajijisa kuti kuno thangwe rimwe basi rinoitisa kuti mundhu arambane: “Inini ndinoti: ndiani anorambana no mukaji wake pacina ndava yo upombo, wocada  umwebze, anopombora.” (Mateu 19:9) Iyena wainga wakanangazve masoko ondhowo pa Hurukuro yake yo pa Dundhu. (Mateu 5:31, 32) Pa bvaza mbiri iji, Jesu wainangira ‘uhure.’ Uhure ungabatanija zvishaishi zvakadari inga upombo, ruvatano wo vandhu vacikazivi kucadha vese, ruvatano wo mwanarumwe no mwanarume kana mwanakaji no mwanakaji pomwe no kuvatana no zvinyama. Inga muezaniso, kudari mwanarume akaita uhure, mukaji wake angatema civaringo co kuti anoda kurambana kana kuti haiwa. Kudari akamuramba, Mwari anovona kuti mucadho wavo wapera.

11. Ngenyi muKristu angatema civaringo co kutama kurambana pikija umwe wavo waita uhure?

¹¹ Vonanyi kuti Jesu aazivi kunanga kuti kudari mundhu wakacadha akaita uhure, mundhu acinaro ndava anovangirijwa kuti arambane. Inga muezaniso, mwanakaji angasana hake kugara no mwamuna wake pikija waita uhure. Ngenyi? Kangaije aciri kumuda, anotoda kumuregerera ngo mwoyo wese zve anoda kushanda pamwepo naye kuti vaitise nane mucadho wavo. Cimwenizve, zvingaita kuti vakarambana avazodizve kucadha no umweni zvovaita kuti vave no zvineso zvakati kuti. Inga muezaniso, anozoitisa kudini kuti awane zvinodiwa zvake zvokunyama zve ndiani anozotaja mazwiro ake? Anozokwanisa kuhwisana no ushongwe here? Kurambana kondhoko kunozopsasisa kudini vana vake? Kureva kuti anozokwanisa kuvarera mu cokwadi here? (1 VaKorinto 7:14) Zvakajeka kamare, kuti mundhu acina ndava anoda kurambana, anozosongana no zvineso zvakawanda maningi.

12, 13. (a) Zvicinyi zvakaitika no mucadho wa Hoseya? (b) Ngenyi Hoseya wakatorazve Gomeri zve tingajijenyi ngo pamusoro po mucadho?

¹² Zvakaitika no muporofita Hoseya zvinotipa cijijo cikuru maningi ngo pamusoro po mavonero anoita Jehovha mucadho. Mwari wakabvunja Hoseya kuti acadhe no mwanakaji waizwi Gomeri, uwo wakaguma pa kuva “hure” zve waidikana kuva no “vana vo uhure.” Gomeri na Hoseya vakava no mwana. (Hoseya 1:2, 3) Mukufamba ko nguva, Gomeri wakavazve no mwana wokaji no worume, zvinoita inga kuti ngo vo mwanarume umweni. Pikija Gomeri wainga waita upombo pa bvaza jakawanda, Hoseya wakandoramba ari mwamuna wake. Pasure pazvo, Gomeri wakasiya Hoseya woguma pa kuva muranda. Pikija zvakadaro, Hoseya wakaenda komutenga. (Hoseya 3:1, 2) Jehovha wakashandisa Hoseya kuti akhombije kuregerera kwaaiita jinja ro vaIziraeri kuphinda no kuphinda paraiva ricizivi kugondeka no kunamata zvimwari zvimweni. Tingajijenyi kubvira ku mucadho wa Hoseya?

¹³ Kudari muKristu akaita uhure, mundhu acinaya ndava angatema hake civaringo caanoda. Jesu wakananga kuti mundhu anongaya acina ndava angarambana hake zve wova akasujunuka kuti acadhezve. Asi, apana cakashata kudari mundhu acinaya ndava akada kuregerera umweni. Hoseya wakatorazve Gomeri. Naamutora, wakamubvunja kuti aacaibvira kuvatanazve no mwanarume umweni. Hoseya aazivi kuvatana na Gomeri. (Hoseya 3:3) Asi, pa kufamba ko nguva, Hoseya waidikana kuvatana no mukaji wake Gomeri. Izvo zvaimirira kuti Mwari wakatenderazve kuti vaIziraeri vamunamate zve arambe ano ushamwari hwake navo. (Hoseya 2:2; 3:3-5) Izvi zvinotijijisenyi ngo pamusoro po mucadho nyamasi uno? Kudari mundhu acinaya ndava akatenda kuvatanazve no mudoni wakashaishaya, izvo zvinokhombija kuti wakamuregerera. (1 VaKorinto 7:3, 5) Ngokudaro, varovorani avo, avacinazve  thangwe rinovaita kuti varambane. Kubvira pondhopo, vovaviri vanodikana kushanda ngo simba kuti vabesane kuva no mavonero a Mwari ngo pamusoro po mucadho.

14. Mukuzwirana no 1 VaKorinto 7:10, 11, zvicinyi zvingaitika no mucadho?

¹⁴ MaKristu ese anodikana kureremeja mucadho inga zvinoita Jehovha na Jesu. Asi, nguva jimweni vamweni avakwanisi kuzviita, ngokuti atizivi kukwana. (VaRoma 7:18-23) Ngokudaro, izvi azvitikahamaji ngokuti maKristu amweni o muzana ro kutanga akava no zvineso zvikuru mu mucadho wavo. Pauro wakatara kudari: “Mwanakaji atame kuparajana no mwamuna wake.” Asi, nguva jimweni izvo zvaiitika.—Verenganyi 1 VaKorinto 7:10, 11.

15, 16. (a) Kudari varovorani vakasongana no zvineso mu mucadho wavo, ngocapi cinodikana kuva cido cavo zve ngenyi? (b) Izvi zvinoshandisa kudini ku maKristu akacadha no mundhu acikashandiri Jehovha?

¹⁵ Pauro aazivi kusanangura mugariro jaiitisa kuti varovorani vaparajane. Asi, tinozviziva kuti cineso cakona acicaengepi co kuita uhure. No zvainga zvondhozvo, mukaji waizova no thangwe ro kurambana zve acadhe no umweni. Pauro wakatara kuti mwanakaji wakaparajana no mwamuna wake aacaidikana ‘kurovohwa; nokuti aviirane no mwamuna wake.’ Mwari waivona varovorani avo inga vakacadha. Pauro wakananga kuti azvinenyi zvineso zvinosongana no varovorani, kudari apana mundhu waita uhure, cido cavo cinodikana kuva co kuviirana kana kuti kupeja zvineso zvavo kuti varambe vari vese. Ivona vangakumbira besero kuno vakuru. Vakuru avazonangi kuti uwu ano razawe zve umweni aana, asi ivona vanomupa mazano anoshanda anobva mu Bhaibheri.

¹⁶ Waro, tingati kudini kudari muKristu akacadha no mundhu acikashandiri Jehovha? Kureva kuti vangaparajana kudari mukabuda zvineso mu mucadho wavo here? Inga zvapera kunangwa, Bhaibheri rinonanga kuti thangwe rimwe basi rinoitisa kuti vandhu varambane ndi uhure. Asi, Bhaibheri aripekeji mathangwe o kuti vandhu vaparajane. Pauro wakatara kudari: “Ndibzonavo bzondhobzo, mwanakaji akagara no mwamuna wake aciripi mutendi, murumewo woda kugara na yena, acadoparajana na yena.” (1 VaKorinto 7:12, 13) Izvi zvinoshandavo nyamasi uno.

17, 18. Ngenyi maKristu amweni akaramba akabatana pa mucadho pikija vacisongana no zvineso?

¹⁷ Asi, kuno mugariro jimweni jo kuti ‘mwamuna aciripi mutendi’ anokhombija ngo zviito kuti aadi ‘kugara’ no mukaji wake. Inga muezaniso, mwamuna angava  mundhu anoshupha maningi mukaji wake, woita kuti mukaji wake ajizwe kuti upenyu hwake uri pa ngozi. Kangaije anoramba kusapota mukaji wake no mbhuri kana anoita kuti iyena atame kushandira Mwari. Pa mugariro jakadari, vanakaji vamweni vangazwisisa kuti azvinenyi zvinonangwa ngo murume wavo, zviito zvavo zvinotatija kuti avadi “kugara na yena” zve zvingadikana kuparajana. Asi, maKristu amweni akambova pa mugariro wakafanana vakatema civaringo co kuramba vari vese. Ivona vakakheta kuvangirira no kueja kushanda pamwepo kuti vaitise nane mucadho wavo. Ngenyi vakatema civaringo co kuita zvondhozvo?

¹⁸ Zvecivoneka kuti vaciri vese inga varovorani, kuparajana kwavanoita kunozobara zvineso zvanangwaya pakutanga. Mupostori Pauro, wakapa thangwe rimweni rinoita kuti varovorani varambe vari vese. Iyena wakatara kudari: “Ngokuti mwamuna aciripi mutendi anonaswa ngo pa musana po mukaji wake; mwanakajivo aciripi mutendi anonaswa ngo pa musana po mwamuna mutendi. Bziciripi ibzi, vana venyu vangazoita vakangora; waro, vanoita vanasi.” (1 VaKorinto 7:14) MaKristu mazinji akatema civaringo co kuramba akabatana pa mucadho no mundhu acikashandiri Jehovha pikija no zvineso zvavaisongana nazvo. Ivona vari kudakara maningi ngo zvese zvovakaita maningi-ningi povanovona kuti mudoni wavo waguma pa kuva umwe wo Zvapupu zva Jehovha.—Verenganyi 1 VaKorinto 7:16; 1 Pedru 3:1, 2.

19. Ngenyi mu ungano yo ciKristu muno varovorani vazinji vakadakara?

¹⁹ Jesu wakapa ngwajo ngo pamusoro po kurambana zve mupostori Pauro wakapa ngwajo ngo pamusoro po kuparajana. Vese vovaviri vanoda kuti vashandiri va Mwari vareremeje mucadho. Kutenderera nyika yese, mu ungano jo ciKristu muno varovorani vazinji vakadakara. Kangaije mu ungano mwenyu mungatovona varovorani vakadakara, ngokuti mwamuna vano rudo vanodisisa mukaji wavo zve mukaji ano rudo anoreremeja mwamuna wake. Vese ava, vari kukhombija kuti mucadho unodikana kureremejwa. Zve zvinodakajisa kuziva kuti zviuru no zviuru zvo vamuna no vakaji vari kutatija kamare kuti soko ra Mwari ngo ro kadi, parinoti: “Ngo ndava yabzo, mwanarume anozosia baba na mai wake; wozobatana no mukaji wake; vozoita vovaviri muviri umwe.”—VaEfeso 5:31, 33.