1, 2. Ngojapi murangariro jino vandhu ngo pamusoro po paradhiso?

UZINJI wo hama no hambzaji jo nyika jakasiyana-siyana vakaenda ku gungano ku dhorobha ro Seuri, Koreya. Povaenga vecibuda mucitadhiyo, Zvapupu zvo mundharaundhemo zvakavatendeneja. Cakava cidakajiso cikuru maningi zvokuti uzinji wazvo zvakavamusira mukono zve zvonanga kuti: “Tinozovonana mu Paradhiso!” Munorangarira kuti i paradhiso yapi iri kunangihwari apa?

² Vandhu nyamasi uno, vano mavonero akasiana ngo pamusoro po paradhiso. Vamweni vanonanga kuti paradhiso i ngano hayo. Vamweni vanonanga kuti indau imweni yokuti ivona vanonga vakadakara. Mundhu wakatikuti ano njara wakagara pa meza yakazara ngo zvokuha, kangaije angajizwa kuti ari mu paradhiso. Pa makore akatikuti akakhirira, mwanakaji umweni wakavona ndau imweni yakaseja maningi yakazara ngo mafirori zve wakakahamara eciti, “Hei i paradhiso kamare!” Ndau iyo icandodanwa Paradhiso mbhera nyamasi uno, pikija kuti kunowanika maningi mbhute. Munorangarira kuti paradhiso i cinyi? Munovetera kuti iyona inoviyadi kamare?

3. Paradhiso yakatanga kunangwa rini mu Bhaibheri?

³ Bhaibheri rinobhuya ngo pamusoro po paradhiso yakavepo  kareko zve rinobhuyazve ngo paradhiso icazovepo kumbejiyo. Tinoverenga ngo pamusoro po paradhiso mu bhuku ro kutanga ro Bhaibheri. Bhaibheri rimweni rinodanwa kuti Catholic Douay Version rakasanduja kubva ku Ciratini, Genesi 2:8 reciti: “Pakutanga Tenji Mwari wakasima Paradhiso inodakajisa ngo kumabvazuva: pondhopo wakadira mundhu waakarura.” Matahwa o ciHebheri anoti ‘munda wo Edheni.’ Gama rokuti “Edheni” rinoreva “Mudakaro,” zvokadi kamare munda uwo wainga ndau inodakajisa. Waiseja kamare, wainga no zvokuha zvizinji zve no runyararo ku vandhu no zvinyama.—Genesi 1:29-31.

4. Ngenyi tingananga kuti munda wo Edheni wainga paradhiso?

⁴ Gama ro ciHebheri rokuti “munda,” rinosandujwa kuti pa·raʹdei·sos ku ciGiriki. Bhuku rinozwi Cyclopaedia ra M’Clintock pomwe na James Strong, rinonanga kuti mundhu anovereketa ciGiriki paaizwa gama rokuti pa·raʹdei·sos, wairangarira kuti i ndau yakakura, yakaseja zve yakajiviririka ku zvese zvinokhuvaza, ino muti jinoshamaisa, jinobara mucero jakasiyana-siyana pomwe no murambo jakanyara no mauswa aushoni o kuti shoma no zvibvuta zvihave.—Ezanisanyi na Genesi 2:15, 16.

5, 6. Ngenyi Adhamu na Evha vakaruza mukana wo kupona mu paradhiso zve ngenyi vazinji vanoshamaisika?

⁵ Jehovha wakadira Adhamu na Evha pa mukhaindi uwo wo munda, mu paradhiso. Asi ngo kutama kwavo kuzwira Jehovha, vakaruza mukana wo kupona mu paradhiso, ivona no vana vavo. (Genesi 3:23, 24) Pikija amucaengepi no vandhu vaigara mu paradhiso yondhoyo, iyona yaingepo mbhera pa Ndambi yo mu njiku ja Nowa.

⁶ Vazinji kangaije vangashamaisika vaciti, ‘Paradhiso inozovazve pasi pano here?’ Mugariro unokhombijenyi? Kudari munovetera kupona no vadiwa venyu mu Paradhiso, muno mathangwe okadi anovonesa vetero yenyu here? Mungasanangura here cinotiitisa kuti tive no cokwadi cokuti kunozova no paradhiso kumbejiyo?

7, 8. (a) Zvicinyi zvakagondesa Mwari kuna Abhirahama? (b) Zvigondiso zva Mwari kuna Abhirahama zvakamuita kuti arangarirenyi?

⁷ Kwatingawana mupinguro jo mubvunjo jinobhuya ngo pamusoro po Paradhiso, ndi mu Bhaibheri basi, ngokuti ndi bhuku rinobva ka Jehovha, uwo wakasika Paradhiso pakutanga. Vonanyi basi zvakananga Mwari kuno shamwari yake Abhirahama. Mwari wakamubvunja kuti waizomupa mbhuri yakawanda inga “musanga uri mu jombe.” Perapo, Jehovha wakapa cigondiso cinosisira maningi kuna Abhirahama, cokuti: “Ngo ndava yo mbhuri yako, anozokomborehwa majinja ese o nyika ngokuti wakandipurukira.” (Genesi 22:17, 18) Pakufamba ko nguva, Mwari wakaitazve cigondiso condhoco kuno mwana wa Abhirahama no muzukuru wake.—Verenganyi Genesi 26:4; 28:14.

⁸ Mu Bhaibheri apana panotatija kuti Abhirahama wakamborangarira kuti vandhu pakupejisira vaizoenda mu paradhiso kudenga. Mwari paakagondisa Abhirahama kuti “majinja ese o nyika” anozokomborehwa, pacina kukana-kana Abhirahama waizviziva kuti makomborero awo aizova pasi pano. Asi, ndizvona basi zvatinowana mu Bhaibheri zvinotatija kuti kunozova no paradhiso pasi pano here?

9, 10. Kuitisa kudini zvigondiso zvakatahwari, zvinotipa thangwe rokuvetera kuti kunozova no paradhiso kumbejiyo?

⁹ Dhavhidhi mubarihwana wa Abhirahama  wakafemehwa ndi Mwari kuti azivise mugariro unozowanika kumbejiyo paakati “akuzovibze no muxati.” (Nduyo 37:1, 2, 10) Asipi izvo basi, “asi varombo vanozoita veno vo nyika, vanozodakara ngo kunyarara kwakaperera.” Wakaengejera eciti: “Varurami vanozoita veno vo nyika, vanozogaremo mbhera narini.” (Nduyo 37:11, 29; 2 Samueli 23:2) Munorangarira kuti zvigondiso izvi zvinopsasa kudini vandhu vanoda kuita zvinoda Mwari? Ivona vano mathangwe o kuti njiku iri yese, varurami basi vanozoita veno vo nyika zve nyika inozovazve inga munda wo Edheni.

¹⁰ Pakufamba ko nguva, vaIziraeri vazinji vainangaya kuti vaishandira Jehovha, vakamuramba zve vosiya kunamata kokadi-kadi. Asi Mwari wakatendera kuti vaBhabhironi vanyise vandhu vake, vaparaje nyika yavo zve vazinji vavo vatohwe kwenda ku ushoko. (2 Kronike 36:15-21; Jeremia 4:22-27) Asi muporofita wa Mwari wakananga kuti vandhu vake vaizohwirira ku muzi kwavo pakupera ko 70 o makore. Zve zviporofita zvese izvo zvakakwanirisika. Zve zvingavavo no revo kwatiri nyamasi uno. Wari ngatibhuisane ngo zvimwe zvazvo, tivone manera azvinotipa mathangwe o kuvetera paradhiso pasi pano.

11. Isaia 11:6-9 yakatanga kuzajisika rini zve mubvunjo japi jaticada kuita?

¹¹ Verenganyi Isaia 11:6-9. Mwari wakabvunja muporofita wake Isaya, kuti vaIziraeri povaizohwirira ku muzi kwavo, nyika yaizova no runyararo. Apana na umwe wavo waizothya kuhwiswa ngo zvinyama kana ngo vandhu. Mudoko no mukuru vaizova vakagarisika. Izvi azvimuceukiji runyararo wakava mu munda wo Edheni here? (Isaia 51:3) Isaya wakanangazve kuti nyika yese, kuciripi basi jinja ro Iziraeri, “inozozara ngo kuziva Tenji, inga kumwa inozaja murambo.” Zvaizoitika rini izvo? Zvakajeka kuti zviri kunangira kumbeji.

12. (a) Ngoapi makomborero akava no vaya vakabvaya ku ushoko ku Bhabhironi? (b) Zvicinyi zvinokhombija kuti Isaia 35:5-10 inozokwanirisika kumbejiyo?

¹² Verenganyi Isaia 35:5-10. Vonanyi kuti Isaya wakanangazve kuti vaIziraeri pavaizohwirira kubva Bhabhironi avacaizohwiswa ngo zvinyama kana ngo vandhu. Iyena wakananga kuti nyika yavo yaizovabudisira zvokuha zvakawanda ngokuti kwaizowanika kumwa yakawanda inga mu munda wo Edheni. (Genesi 2:10-14; Jeremia 31:12) Kureva kuti ciporofita ici, cakazajisika mu nguva yo vaIziraeri basi? Vonanyi kuti ciporofita cinonangazve kuti mapofu, zvigono no vanomandondo vanozorapwa. Asi izvi azvicaizoitika ku vaIziraeri vaibvaya ku Bhabhironi. Zvokadi kamare, Mwari wainga ecitatija kuti waizorapa vese vanohwaja kumbejiyo.

13, 14. Isaia 65:21-23 yakakwanirisika kudini vaJudha povakabva Bhabhironi, asi ngorapi divi ro ciporofita condhoco cinodikana kukwanirisika? (Vonanyi pikica yo kutanga.)

¹³ Verenganyi Isaia 65:21-23. VaJudha povakahwirira ku nyika yavo, ivona avazivi kuwana nyumba jaushoni kana kutorima munda javo no muvhinyu. Asi, ngokuti Mwari wakavakomborera, ngo kufamba ko  nguva zviro zvakacinja. Rangariranyi mudakaro wakava no vandhu avo povakatanga kuvaka nyumba zve vogaremo no kuva no zvokuha zvinonaka zvovakarima!

¹⁴ Vonanyi kuti mukuzwirana no ciporofita ici, njiku jedu jaizodari inga njiku jo muti. Muti jimweni jinopona zviuru zvo makore. Kuti vapone mukuvo wakadaro, vandhu vaizodikana kuva no uhomi hwaushoni. Zve kudari no vaizokwanisa kupona mu mugariro wo runyararo inga zvakanangwa ndi Isaya, vaizodari inga vari mu paradhiso kamare! Zve ciporofita ici cinozokwanirisika!

15. Ngoapi amwe o makomborero akanangwa mu bhuku ra Isaya?

¹⁵ Rangariranyi ngo pamusoro po zvigondiso zvotaperari kubhuya, zvinokhombija kuti kunozova no paradhiso kumbejiyo. Nyika yese inozozara ngo vandhu vakakomborehwa ndi Mwari. Na umwe hake anozothya kuhwiswa ngo zvinyama kana ngo vandhu vakashata. Mapofu, nyamandondo pomwe no zvigono vanozorapwa. Vandhu vanozovaka nyumba javo zve vanozodakara ngo kuha zvokuha zvavo. Ivona vanozopona makore akawanda kupinda muti. Hina, Bhaibheri rinotipa zvitatijo zvokuti paradhiso iri kuviya. Asi, vandhu vamweni vatinobhuya navo kangaije vangananga kuti zviporofita izvi azvirevi kuti kunozovadi no paradhiso pasi pano. Munozovadavira kudini? Waro ngorapi thangwe ramunaro ro kuti kunozovadi kamare no paradhiso pasi pano? Mundhu mukuru wakambopona, Jesu, wakatipa thangwe guru kamare.

16, 17. Jesu wakabhuya rini ngo pamusoro po Paradhiso?

¹⁶ Pikija Jesu wainga acina ndava, iyena wakapumbhwa zve wakakohomehwa pa danda kuti afe, pamwepo no zvigevenga zvo ciJudha zvaingaya ku divi rake. Cimwe cavo caizviziva kuti Jesu wainga mambo, zve cakati: ‘Jesu, ndiceukijenyi mukaguma mu umambo hwenyu.’ (Luka 23:39-42) Cigondiso cakaita Jesu kuno cigevenga ciya cinopsasa kumbeji kwenyu. Magama ondhoo, akatahwa pana Luka 23:43, Shanduro yeNyika Itsva. Vajiji vamweni vanodira vhirgura vacito vadira gama ro kuti ‘nyamasi’ zve vosanduja magama aya kudari ‘Zvokadi ndinokubvunja kuti, nyamasi unozova na inini mu Paradhiso.’ Kuno mavonero akasiyana ngo pamusoro po kuti vhirgura inodikana kugara papi mu shwiro iyi. Asi, Jesu waida kunangenyi paakati ‘nyamasi’?

¹⁷ Mu ndumi zinji jinobhuiwa wari uno, vhirgura jinoshandiswa kuti jibesere kuti zviri kunangwaro zvinase kujeka. Asi, mu matahwa o ciGiriki o kare amucaishandiswa maningi pontuwasau. Waro, tingazvibvunjisa kudari: Jesu wainga ecinanga kuti: ‘Ndinokubvunja kuti, nyamasi unozova na inini mu Paradhiso’? Kana kuti wainga ecinanga kuti: ‘Ndinokubvunja nyamasi kuti, iwewe unozova na inini mu Paradhiso’? Vasanduji vanodira vhirgura pa ndau yo vanoda, zvingaita vacito vadira gama ro kuti ‘nyamasi’ kana pasure paro mukuzwirana no zvovanorangarira ngo pamusoro po zvaida kunanga Jesu zve nyamasi uno mungawana ma Bhaibheri mazinji akadaro.

18, 19. Zvicinyi zvinotibesera kuzwisisa zvaida kunanga Jesu paakati ‘nyamasi’?

¹⁸ Rangariranyi zvakananga Jesu kuno vateveri vake ngo pamusoro po kufa kwake. Iyena wakati: “Mwana wo mundhu anozogaravo pasi po mabvu mazuva matatu no usiku hutatu.” Iyena wakanangazve kudari: ‘Mwana  wo Mundhu anozopuwa mu nyara jo vandhu, ivona vanozomuuraya, kaveta yena anozomuka pa njiku yocitatu.’ (Mateu 12:40; 16:21; 17:22, 23; Marco 10:34) Mupostori Pedru wakananga kuti izvi zvakaitika. (Maitiro o Vapostori 10:39, 40, Shanduro yeNyika Itsva) Ngokudaro, Jesu no cigevenga ciya avazivi kwenda mu Paradhiso pa njiku yo vakafa. Bhaibheri rinonanga kuti Jesu wainga ‘mu guva’ ngo njiku ndathu, mbhera Mwari paakamumusa.—Maitiro o Vapostori 2:31, 32. * (Vonanyi masoko o pasi.)

¹⁹ Ngokudaro, kuti Jesu atangise cigondiso cake ku cigevenga ciya, iyena wakati: ‘Zvokadi inini ndinokubvunja nyamasi.’ Yainga njira inovereketwa ngo vazinji pikija mu nguva ya Mosi kwaitovereketwavo kudaro. Nguva imweni Mosi wakati: “Mazwi aya o ndinokutonga nyamasi, agare mu mwoyo mako.”—Deuteronòmio 6:6; 7:11; 8:1, 19; 30:15.

20. Zvicinyi zvinobesera zwisiso yedu ngo pamusoro po zvakananga Jesu?

²⁰ Umwe musanduji wo Bhaibheri wo ku Orienti Medhiyo wakananga kuti: “Kukhohomejehwa kunodikana maningi pa vhesi iyi, kuri pa gama ro kuti ‘nyamasi’ zve rinodikana kuverengwa kudari, ‘Zvokadi inini ndinokubvunja nyamasi kuti, iwewe  unozova na inini mu Paradhiso.’ Cigondiso ico cakaithwa pa njiku yondhoyo zve caizokwanirisika kumbejiyo.” Musanduji uwu, wakanangazve kuti awo ndi mavereketero o vandhu vo ku Orienti zve anokhombija kuti “cigondiso ico cakaithwa njiku yakati zve cinondokwanirisika basi.” Matahwa amweni o ciSiriyako o mu makore 500, akasanduja vhesi iyi kudari: “Ameni, ndinokubvuja nyamasi kuti iwewe unozova na inini mu Munda wo Edheni.” Cigondiso ici cinovangisa itusu tese.

21. Zvicinyi zvicizivi kuitika ku cigevenga ciya zve ngenyi?

²¹ Jesu paakabhuya no cigevenga ciya ngo pamusoro po Paradhiso, iyena aacaingepi ecinangira paradhiso yo mugore. Tinozvizivisa kudini izvo? Rimwe ro thangwe ngo rokuti cigevenga ciya acicaizviziva kuti Jesu wainga waita citenderano no vapostori vake vakagondeka kuti vaizotonga naye mugore. (Luka 22:29, Shanduro yeNyika Itsva) Cimwenizve, cigevenga ici cainga cicizivi kubhabhatijwa. (Johani 3:3-6, 12) Ngokudaro, Jesu paakaita cigondiso ici kuna cigevenga ciya, wainga ecibhuya ngo pamusoro po paradhiso pasi pano. No papera makore akati kuti, mupostori Pauro waibhuya ngo pamusoro po civoniso co mwanarume ‘wakatohwa woendeswa ku paradhiso.’ (2 VaKorinto 12:1-4, Shanduro yeNyika Itsva) Pikija Pauro no vapostori vamweni vainga vakasanwa kuti vapone mugore zve vatonge na Jesu, Pauro wainga ecibhuya ngo pamusoro po paradhiso yo kumbejiyo. * (Vonanyi masoko o pasi.) Paradhiso yondhoyo yaizowanika pasi pano? Mungakwanisa kunghwinemo here?

22, 23. Mungaveterenyi kumbejiyo?

²² Ceujanyi kuti Dhavhidhi wakabhuya ngo pamusoro po nguva yo kuti “varurami vanozoita veno vo nyika.” (Nduyo 37:29; 2 Pedru 3:13) Dhavhidhi wainga ecinangira nguva yo kuti vandhu vese pa nyika vanozozwira ndhungamiro ja Mwari. Ciporofita ca Isaia 65:22 cinonanga kuti: “Ngokuti kudaro ngo mazuva o muti, kunozodarovo no mazuva o vandhu vangu.” Izvi zvinokhombija kuti vandhu vanoshandira Jehovha mu nyika imbza, vanozopona zviuru zvo makore. Mungavetera kuti izvi zvinoitika here? Hina, ngokuti, mukuzwirana no Apokalipsi 21:1-4, Mwari anozokomborera zve amwe o makomborero ondhowo ngo okuti “akucazovi no kufa.”

²³ Zvinojijisa Bhaibheri ngo pamusoro po Paradhiso ndizvona. Adhamu na Evha vakaruza cidakajiso co kupona kwenda no kwenda mu Paradhiso, asi nyika inozovazve paradhiso. Inga zvakagondiswa ndi Mwari, iyena anozokomborera vandhu pa nyika pano. Dhavhidhi wakananga kuti vakapfava no varurami vanozoita veno vo nyika zve vanozopona kwenda no kwenda. Zve ciporofita cinowanika mu bhuku ra Isaya cinotibesera kuti tisote kumbeji mu nguva yo kuti tinozodakara ngo kupona mu paradhiso yakaseja pasi pano. Zvinozoitika rini izvi? Paya panozokwanirisika cigondiso cakaita Jesu kuno cigevenga ciya. Imwimwi munganghwinavo mu Paradhiso yondhoyo. Pa nguva yondhoyo, zvakanangwaya no hama no hambzaji jaingaya pa gungano ku Koreya zvinozova izvona kamare: “Tinozovonana mu Paradhiso!”