Vamweni povanotitaja ngo unyasha, zvokadi kamare zvinotiita kuti tijizwe ushoni. Kuziva kuti ivona vanoneseka ndisu zvinotivangisa. Tese tinobongesera maningi, vamweni pavanotitaja ngo unyasha, waro tingavisa kudini no vara rakadaro?

Mundhu ano unyasha zvokadi kamare anoneseka ngo vamweni zve anozvikhombija ngo zvaanonanga no zvaanoita. Kukhombijira unyasha kunopinda kuva mundhu anoreremejeka. Mukusiyana mundhu ano unyasha anokhombijira rudo zve anozwisisa mazwiro o vamweni. Zvinosisira maningi ngo zvokuti, unyasha i divi ro mucero wo mujimu mucena wa Mwari. (VaGalàsia 5:22, 23, Shanduro yeNyika Itsva) Jehovha anoda kuti tive no unyasha, ngokudaro ngativone kuti iyena no Mwana wake vakakhombijisa kudini unyasha zve tingatevejeresa kudini muezaniso javo.

Jehovha ano unyasha no vandhu vese, pikija no vaya “vacingabongi no vakaxata.” (Luka 6:35) Inga muezaniso, Jehovha ‘anobudisira zuva ku varungami no vaxaixi, anonisira nvura vanasi no vacikanasi.’ (Mateu 5:45) Pikija ku vandhu vaya vacikatendi kuti Jehovha ndi Musiki, vangabeserekavo ngo unyasha hwake vova no upenyu unodakajisa.

Muezaniso mukuru wo unyasha hwa Jehovha, unovoneka ngo zvaakaitira Adhamu na Evha. Pasure po kushaisha kwavo, “vakatora masakani o mukuyu, vosimira.” Asi, Jehovha waizviziva kuti kunja ko munda wo Edheni, ivona vaidikana kusimira nguvo jakareremera ngokuti mabvu aizozara ngo “mizwa no manama.” Ngokudaro, Jehovha ngo unyasha hwake wakavaitira “nguvo jo matovo” kuti vasimire.—Genesi 3:7, 17, 18, 21.

Pikija hake Jehovha anoitira unyasha “varungami no vaxaixi,” iyena anoitiravo unyasha maningi-ningi vashandiri vake vakagondeka. Inga muezaniso, mu mukuvo wo kuti Zakaria wainga muporofita, ngirozi imweni yainga yecitambujika ngokuti vaIziraeri vainga vasiya kuvakiswazve ko temberi yo Jerusarema. Jehovha wakanasa kupurukira zvainga zvecinanga ngirozi iya zve wakaidavira ngo “mazwi [o unyasha, Shanduro yeNyika Itsva] no okupendejera.” (Zakaria 1:12, 13) Jehovha wakatajavo muporofita Eria mu njira yakafanana. Pakava no mukuvo umweni wo kuti muporofita uwu waizwa kusuruvara zve ari ega, zvomuita kuti akumbire kuti Jehovha amuuraye. Jehovha wakakhombija kuti waineseka ndiyena zve wakamutumira ngirozi kuti iyende komuvangisa. Wakamugondesazve kuti iyena aacaengepi ega. Unyasha hwa Jehovha wakavangisa Eria kuti arambe ari mu basa rake. (1 Majimambo 19:1-18) Asi, pa vashandiri vese va Jehovha aripo umwe wakanasa kutevejera unyasha wa Jehovha. Ndiani?

Jesu paainga pasi pano, vandhu vaikwanisa kuvona kuti iyena wainga ano unyasha. Iyena acaengepi no hasha zve aacaiejepi kuvangirija vandhu kuti vaite zvaanoda. Iyena waitaja vamweni zve  wakati: “Izanyi kondiri mwese makaremba, munoremehwa kukuru. Inini ndinozomuzoroja. . . . Kanga yangu yakapfava.” (Mateu 11:28-30) Ngokuti Jesu wainga mundhu ano unyasha, vandhu vaimutevera kwese kwaaienda. Ngo kuvazwira unyasha, Jesu wakavapa zvokuha, wakavarapa zve wakavajijisa “bziro bzizinji.”—Marco 6:34; Mateu 14:14; 15:32-38.

Unyasha hwa Jesu waivonekavo ngo manera aaitaja vandhu no kuzwisisa mazwiro avo. Zvokadi kamare, pikija pa mukuvo ucaifanera, iyena waibesera ngo unyasha, ari wese waiviya kwaari. (Luka 9:10, 11) Rangariranyi ngo zvakaitika no mwanakaji waingaya no ndhendha yo kubuda ngazi. Iyena waida kurapwa, ngokudaro wakapsasa nguvo ya Jesu. Asi, mukuzwirana no Mutemo wa Mosi, iyena acaidikana kuita zvondhozvo ngo kuti wainga wakangora. (VaLevi 15:25-28) Jesu wakaitenyi? Iyena aazivi kubhuya naye ngo kumukharamusa. Wakazwira unyasha mwanakaji wiya ngokuti wainga ecitambujika ko 12 o makore. Womubvunja kudari: “Mwana, kutenda kwako kwakuponesa. Endai ngo kunyarara. Rapikai ndhenda yako.” (Marco 5:25-34) Jesu waingadi no unyasha kamare!

Pa muezaniso jotaperari kunanga, tajija kuti kudari tikava no unyasha, tinozoita ciri cese kuti tibesere vamweni. Jesu wakakohomeja kusisira kwazvo paakaita muezaniso wo muSamaria waushoni. Mwanarume umweni mu Judha wakabihwa, wotakwa, vomusiya acida kufa mu citaka. MuSamaria wakafamba ndipona wozwira unyasha mwanarume wiya, pikija vaSamaria no vaJudha vainyenyana. Unyasha wakamuita kuti abesere mudoni wake. Wakasuka zvivonje zvake woenda koomusiya pa muzi wakati kuti. MuSamaria wakapagari mundhu waizosarari acimukorondha zve wakaita ndamburiko iri yese kuti azopagari zvimweni zvaizofaratari.—Luka 10:29-37.

Kusiyapo kukhombija unyasha ngo zviito basi, tingaukhombijazve ngo zvatinonanga. Bhaibheri rinoti: “Bonezi ro mwoyo rinopeja simba; izwi rakanaka rinodakajisa.” (Mazwi Akangwara 12:25) Unyasha no unaki paunotindundira kuti tibhuye zviro zvinovangisa vamweni, tinozovaita kuti vadakare. * (Vonanyi masoko o pasi.) Magama edu o unyasha anozokhombija kuti tinotaja vamweni zve zvinozovaita kuti varerukihwe pa kucungirira zvineso zvo mu upenyu.—Mazwi Akangwara 16:24.

Itusu tese tinokwanisa kukhombijira unyasha ngo kuti Mwari wakatisika ngo mufananijo wake. (Genesi 1:27) Inga muezaniso, mupostori Pauro paienda ku Roma, Jurio umwe musoca wo ciRoma wainga no mutoro wo kwenda naye zve iyena “wakaitira unyaxa Paulo, womutendera kuenda kovonana no xamwari jake, kuti akorondhwe ndijona,” mu dhorobha ro Sidhoni. (Maitiro o Vapostori 27:3) Pauro no vamweni povakandondomera mu jombe, vandhu vo ku cirundo caidanwa Malta vakavakhombijira ‘unyasha ukuru’ maningi zve vakabwakija muriro kuti vakote. (Maitiro o Vapostori 28:1, 2, Baiberi Mazwi Akacena aMwari) Vandhu ava vakaita zviro zvaushoni maningi. Asi, kuti mundhu adakajise Jehovha, anodikana kukhombijira unyasha nguva jese.

Jehovha anoda kuti unyasha uve divi ro undhu pomwe no upenyu hwedu. Ngo iyo ndava, iyena anotibvunja kuti ‘tisimire’ unyasha. (VaKolosi 3:12) Asi, azvizivi kureruka kuva no unyasha nguva jese. Ngenyi? Nguva jimweni zvinoitika ngokuti tino nyowa, atizvithembi kana tino umbau padoko. Kana kuti tinovona kuti zvinonesa kuva no unyasha no vaya vanoshaisha kutitaja. Asi, kudari tikakumbira mujimu mucena zve toeja kutevejera Jehovha, iyena angatibesera kuti tive no unyasha wokadi-kadi.—1 VaKorinto 2:12.

Tingazvizivisa kudini kuti tiri kuva vandhu vano unyasha? Zvibvunjisenyi kudari: ‘Ndinonasa kupurukira vamweni no kueja kuzwisisa mazwiro avo here? Ndinokwanisa kuvona vamweni povanoda  besero here? Ndirini pondakapejisira kukhombijira unyasha ari wese acikaripi wo mbhuri yangu kana shamwari yangu?’ Perapo gajanyi zvido zvamunoda kukwanirisa, zvakadari inga kuda kunasa kuziva vandhu vanogara phedo nemwi maningi-ningi vo mu ungano yenyu. Izvo zvinozomubesera kuti muzive zvineso zvavari kusongana nazvo no zviya zvavanoda. Tevere, ejanyi kutaja vamweni ngo unyasha inga maizoda kutajwa. (Mateu 7:12) Pejisire, kumbiranyi kuti Jehovha amubesere zve iyena anozokomborera kuvangisira kwenyu kuti muve mundhu ano unyasha.—Luka 11:13.

Pauro paakandhandhanisa mavara aimuita kuti ave mucumaeri waushoni, iyena wakabatanijavo unyasha. (2 VaKorinto 6:3-6) Vandhu vaidakarira Pauro ngokuti iyena wainanga no kuita zviro ngo unyasha zve ivona vakazwisisa kuti iyena waineseka navo. (Maitiro o Vapostori 28:30, 31) Mu njira yakafanana, kudari tikava no unyasha, vandhu vangada kujija zvizinji ngo pamusoro po cokwadi. Patinova no unyasha no vandhu vese, pikija vaya vanoshaisha kutitaja, zvinozovapsasa zve zvovaita kuti vacinje mugariro wavo. (VaRoma 12:20) Kangaije zvinozovaita kuti vade kujija Bhaibheri.

Mu Paradhiso, vandhu vese vanozokhombijirana unyasha. Vese vanozomuswa ko vakafa vanozotajana ngo unyasha, vamweni kangaije vanozotajwa kudaro pa bvaza yo kutanga. Zvondhozvo zvinozovaita kuti vatajevo vamweni ngo unyasha. Zvokadi kamare, Mundhu wese acikataji vamweni ngo unyasha zve aadi kubesera vamweni, aazotendehwi kupona pasi po Umambo hwa Mwari. Basi vandhu vano rudo no unyasha vanozopona kwenda no kwenda mu Paradhiso. (Nduyo 37:9-11) Tinozopona mu nyika yakangwaririka mu runyararo! Asi, icito yaguma nguva yondhoyo, tingabesereka ngo kuva vandhu vano unyasha. Kuitisa kudini?

Bhaibheri rinoti: ‘Mundhu ano unyasha, anojiitira bzakanaka.’ (Mazwi Akangwara 11:17, Baiberi Mazwi Akacena aMwari) Vandhu vanodakarira vaya vano unyasha zve kazinji ivona vanotajavo vandhu vamweni ngo unyasha. Jesu wakati: “Mupimo wo munopimira ndiwona vadoni, munozopimihwavo ndiwona kamare.” (Luka 6:38) Ngokudaro, mundhu ano unyasha anokwanisa kuva no shamwari jaushoni jinogara kwenda no kwenda.

Mupostori Pauro wakabvunja vandhu vo mu ungano yo ku Efeso kuti vave ‘vokuthiva mwoyo, vazwirane unyaxa, vakungurirane ngocavo.’ (VaEfeso 4:32) Vandhu vese mu ungano pavanokhombijirana unyasha no usizi, ungano jinozovanga zve joramba jakabatana. Itusu atidikani kuva vanoshora hama jedu, kuvaitira magumbu kana magumba kana kutonanga zviro zvakashata kana zvinokhuvaza pikija patinonga tecitamba. Kusiyapo izvo, zvatinobhuya nguva jese zvinodikana kuva zviro zvinobesera zve zvinovangisa. (Mazwi Akangwara 12:18) Muviyo ngo wo kuti, vese mu ungano vanozoshandira Jehovha no mudakaro.

Inga zvotaperari kuvona, unyasha ndi vara rinokhombijwa ngo magama pomwe no zviito. Zve patinova mundhu ano unyasha, tinonga tecitevejera Mwari wedu ano rudo zve anokova, Jehovha. (VaEfeso 5:1) Zvondhozvo zvinozoita kuti ungano jedu jivange zve zviite kuti vamweni vade kumushandira. Ngokudaro, ngatiite zvese zvatinokwanisa kuti vandhu vavone kuti Zvapupu zva Jehovha ndi vandhu vano unyasha!