MUKUZWIRANA na Mateu 13:24-26, Jesu wakananga kudari: “Umambo hwo mugore hunoezaniswa no mundhu wakakusa mbeu yakanaka mu munda make. Pa ngari yo vaivata vandhu, wakaza mukorore wake, wokusa sakuro [kana sora] pakati po mbeu yakanaka, wopinda. Mbeu noyatumbuka, pondhopo rakawanikavo sakuro.” Vatari vamweni avathembi kuti mufananijo uwu wakacijikira pa zviro zvaiitikadi kamare, asi mukuzwirana no matahwa o mutemo wo ciRoma, zviro zvakadaro zvaiitikadi.

Dura Mazwi rimweni ro Bhaibheri, rakananga kuti pa mutemo wo ciRoma, kusima sora mu munda mo umweni ngo kuda kuhwirijira cishaishi, yainga ndhango. Kuvepo ko mutemo uwu, kunovonesa kuti kwainga no vaizviita kamare. Umwe mujiji wo zvo Mutemo, waizwi Alastair Kerr wakasanangura kuti mu gore ro 533 pasure po kuviya ka Jesu, Mutongi wo Roma waidanijwa kuti Justinian, wakabudisa bhuku rake raizwi Digest. Bhuku iri raigurisira mutemo jo ciRoma zve rainokora masoko akanangwa ngo vazivi vo mutemo vakararama kubvira mu makore o 100 mbhera 250 pasure po kuvia ka Jesu. Mukuzwirana no mu bhuku rondhoro, umwe muzivi wo mutemo, waizwi Ulpian, wakabhuya ngo ndhango imweni yakaitika mu zana ro cipiri ro makore. Ndhango yakona yainga yo mundhu wakasima sora mu munda mo umweni, kuitira kuuraya mbeu yake. Bhuku Digest rinonanga kuti pa mutemo, mundhu wakaruzaya mbeu, wainga no citendehwa co kupuwa mare, ngokuti wakasimaya sora, mu kuripira mbeu yake.

Mukuzwirana no zvakaitikari mu Roma yo kare, ngo kudaro zvinovonesa kuti zvakanangaya Jesu pa mufananijo zvaiitikadi kamare mu upenyu.