1, 2. (a) Zvicinyi zvinotiitisa kuti tibvunjise kuti, “mbhera rini?” (b) Ngenyi muezaniso jo vashandiri vakagondeka va Jehovha vokare jinotivangisa nyamasi uno?

“MBHERA rini?” Mubvunjo uu wakaitwa ngo vaphorofita vakagondeka, Isaia na Habhakuki. (Isaia 6:11; Habakuki 1:2) Mambo Dhavhidhi paakatara Nduyo 13, wakabvunjisavo karongomuna mubvunjo wondhowo. (Nduyo 13:2, 3) Zve Jesu paaitendenejwa ngo vandhu vacina gonda, wakavabvunjisavo kuti “mbhera rini?” (Mateu 17:17) Itusu nyamasi uno tingazviitavo mubvunjo wondhowo.

² Zvicinyi zvinotiitisa kuti tibvunjise kuti, “mbhera rini?” Kangaije ngokuti takaitihwa ciro cicizivi kurungama. Dangani tiri kuhwaja kana tiri kuita vasharuka. Nguva jimweni tingasuruvara ngokuti tiri kurarama mu “njiku jokupejisira.” (2 Timoti 3:1) Kangaije zvingaita ngokuti mugariro jakashata jo vandhu vakatitendenejari jiri kutirembesa  no kutivoja mwoyo. Azvinenyi kuti thangwe rakona ngorapi, zvinotivangisa kuziva kuti Jehovha aazivi kukharamusa vashandiri vake vakagondeka vokare povaiita mubvunjo uwo.

3. Zvicini zvinotibesera pa mugariro unonesa?

³ Zvicinyi zvingatibesera patinonga tiri pa mugariro unonesa kucungirira? Jakobo hama ya Jesu, wakafemehwa kuti atibvunje kudari: ‘Ndizvo, sengereranyi hama, mbhera kuviya kwa Tenji.’ (Jakobo 5:7, BMAA) Ngokudaro, tese tinodikana kuva vanosengerera. Asi icinyi kusengerera, zve tinokhombijisa kudini mugariro uu wakanakari kadari?

4, 5. (a) Icinyi kusengerera, zve tingava kudini vanosengerera? (b) Jakobo wakasanangura kudini kusengerera? (Vonanyi pikica yo kutanga.)

⁴ Bhaibheri rinonanga kuti kusengerera kunobva ku mujinu mucena wa Mwari. Pacina besero ra Mwari, zvinganesa kuno vandhu vacina kukwana kuti vave vanosengerera pa mugariro jinonesa maningi. Kusengerera ndi cipo cinova kuna Mwari, zve tinocikhombija patinoda Jehovha no vamweni. Potinotama kuva vanosengerera, rudo hwatinahwo no vamweni hunoremba. (1 VaKorinto 13:4, BMAA; VaGalàsia 5:22, BMAA) Kusengerera kunobatanijeni? Kunobatanija kucungirira pa mugariro unonesa, uno mavonero aushoni. (VaKolosi 1:11, BMAA; Jakobo 1:3, 4, BMAA) Kusengerera kunotibesera kuti tirambe takagondeka kuna Jehovha azvinenyi kuti tino zvineso zvakadini. Kunozotibeserazve kuti titame kuhwirira sure potinova no zvineso. Bhaibheri rinonanga kuti tinodikana kuda kutendera dikano yo kuvetera. Izvo i zvijijo zvinosisira zvotinojija pa karata ya Jakobo 5:7, 8, Shanduro yeNyika Itsva. (Verenganyi.)

⁵ Ngenyi tinodikana kuva no cido cokuvetera kuti Jehovha aite ciito? Mupostori Jakobo anoezanisa mugariro watinawo no womurimi. Pikija murimi anobata ngo simba pakusima zvirimwa zvake, aakwanisi kuvonerera ngari kana mbeuyo inokura ngo kukasika zvakadini. Anotodikana kuvetera ngo kusengerera ‘mucero unosisira wo nyika.’ Mukufananavo, kuno zviro zvakawanda zvaticikakwanisi kuzvingwarira patinovetera kuti zvigondiso zva Jehovha zviitike. (Marco 13:32, 33; Maitiro o Vapostori 1:7) Inga murimi, tinodikana kuvetera ngo kusengerera.

6. Tinojijenyi ngo muezaniso wo muphorofita Mikeya?

⁶ Muphorofita Mikeya waidikana kucungirira mugariro jinonesa, inga jotiri kucungirira nyamasi uno. Wakararama mukuvo waitonga Mambo Ahazi. Ahazi wakava mambo wakashata maningi. Inga muviyo, mu nyika makazara ngo uvori. Zviro zvaishata maningi zvokuti Bhaibheri rinonanga kuti vandhu vakava ‘vakanasirira kuita bzakaxata.’ (Verenganyi MIKEYA 7:1-3.) Mikeya waizviziva kuti aakwanisi kucinja mugariro uwo. Waro, tinodikana kuitenyi? Mikeya anotibvunja kudari: “Inini ndinosota Tenji, ndinovetera Mwari wo ruponeso hwangu, Mwari wangu anozondipurukira.” (MIKEYA 7:7) Mukufanana na Mikeya, tinodikanavo kukhombija mugariro wo ‘kuvetera.’

7. Ngenyi tinodikana kuita zvinopinda kuvetera basi kuti Jehovha akwanirise zvipikihwa zvake?

 ⁷ Kudari tina gonda rakaezana no ra Mikeya, tinova no cido co kuvetera Jehovha. Mugariro wedu wakasiyana no womundhu ari mujere, acivetera njiku yo kuurawa kwake. Iyena anovangijihwa kuti avetere, zve aaiveteri no mudakaro njiku iyi. Izvo zvakasiana maningi no zvotiri! Itusu tina cido co kuvetera Jehovha ngokuti tinozviziva kuti pa nguva kwayo kamare, anozokwanirisa cipikihwa cake co kutipa upenyu hucikaperi. Ngokudaro, tinova no ‘kusengerera no’ kucungirira ‘kwese ngo kudakara.’ (VaKolosi 1:11, 12, BMAA) Potinonga tecivetera, tinongwarira kuti titame kun’gun’gutira Jehovha kuti ari kunonoka kuita ciito. Kudari tikan’gun’guta, Jehovha aazodakari.—VaKolosi 3:12.

8. Tinojijenyi ngo vanarume no vanakaji vakagondeka vokare?

⁸ Zvicinyi zvinozotibesa kuti tive no cido co kuvetera? Tingarangarira ngo pamusoro po vanarume no vanakaji vakagondeka vakararama kare, vakavetera ngokusengerera kuti Jehovha akwanirise zvingondiso zvake. (VaRoma 15:4) Potinorangarira ngo muezaniso javo, zvaushoni kuceuja kuti vakavetera mukuvo wakadini, ngenyi vainga no cido co kuvetera, zve Jehovha wakavakomborera kudini ngo kusengerera kwavo.

9, 10. Abhirahama na Sara vakavetera Jehovha mukuvo mungana?

⁹ Vonanyi muezaniso wa Abhirahama  na Sara. Ivona vakaashira ‘zvigondiso’ ngokuti vakakhombija gonda no ‘kuvangirira’ kana kusengerera. Bhaiberi rinotibvunja kuti naasengerera Abhirahama, Jehovha wakapikira kuti anozomukomborera no kumuita kuti ave baba wo jinja guru. (Vaheberi 6:12, 15) Ngenyi Abhirahama waidikana kukhombija kusengerera? Ngokuti cigondiso ico caizotora mukuvo wakareba kuti cikwanirisike. Mu njku 14 ya Nisani wo gore ro 1943 Kristu acito waviya, Abhirahama, Sara no vese vo pamuzi pake vakadarika Murambo Eufrati, vonghwina mu Nyika yo Cipikihwa. Asi Abhirahama wakavetera makore 25 Izaki mwanake acito wabahwa, woveterazve 60 o makore vazukuru vake Isau na Jacobe vacito vabahwa.—Vaheberi 11:9.

¹⁰ Abhirahama wakagara utaka ndau ngana mu Nyika yo Cipikihwa? Bhaibheri rinonanga kuti Jehovha ‘aazivi kumupa ndau, nokuti cisoka haco, kaveta wakagondesa kuzoipa yena no vana vake; yena wainga acito akabara mwana.’ (Maitiro o Vapostori 7:5) Mubarihwana wa Abhirahama auzivi kuva jinja raizorarama mu nyika yocipikihwa mbhera 430 o makore, Abhirahama naapera kudarika Murambo Eufrati.—Exodo 12:40-42; VaGalàsia 3:17.

11. Ngenyi Abhirahama wainga no cido cokuvetera zve makomborero api aanozovona ngo kusengerera kwake?

¹¹ Abhirahama wainga ano cido cokuvetera ngokuti wainga ano cokwadi cokuti Jehovha waizokwanirisa zvigondiso zvake. Wainga no gonda na Jehovha. (Verenganyi Vaheberi 11:8-12) Abhirahama waidakara ngo kuvetera pikija azivi kuvona kukwanirisika ko zvigondiso zvese zva Mwari acito afa. Asi rangariranyi mudakaro waanozova nawo paanozomuswa mu paradhiso pasi pano. Acazokahamara paanozoverenga ndhorovondho yake no yo mbhuri yake mu mativi akawanda mu Bhaibheri. * (Vonanyi masoko o pasi.) Amborangariranyi basi mudakaro waanozova nawo ngo kuziva kusisira ko basa raakaita kuitira kukwanirisika ko cidisiso ca Jehovha ngo pamusoro pa Messia wakapikiwa! Tino cokwadi cokuti anozojizwa kuti makomborero ao aifaneradi kuvetera.

12, 13. Ngenyi Josefa waidikana kusengerera, zve murangariro wapi waushoni waaenga nao?

¹² Josefa, muzukuru-kuruhwe wa Abhirahama wakavavo no cido co kusengerera. Iyena wakaitihwa kutama kururama kunothyisa. Pakutanga, hama jake jakamutengesa kuti aite muranda paainga no makore 17. Tevere, wakapumbhwa zvo kucengejera kuti wakadojipa mukaji wa tenji, woendeswa mu karaboso. (Genesi 39:11-20; Nduyo 105:17, 18) Pikija wainga mushandiri wakagondeka wa Mwari, waivona kuti waikhawiswa kuciripi kukomborehwa. Asi zviro zvakazocinja no pakhirira makore 13. Josefa wakazobudiswa mu karaboso, wova mutongi mukuru wocipiri mu Ejipita.—Genesi 41:14, 37-43; Maitiro o Vapostori 7:9, 10.

¹³ Kutama kururama uko kwakaitisa kuti Josefa ave no cishatihwa here? Wakajizwa kuti Jehovha wamusiya here? Aazivi. Josera wakavetera ngo kusengerera. Icinyi cakamubesera? I gonda rake kuna Jehovha.  Waizwisisa kuti Jehovha waizvivona. Izvo tinozvivona ngo zvaakabvunja hama jake kuti “mucathya! Inini ndiri pa ndau ya Mwari, kani? Bzakaxata bzo maida kundiitira, Mwari wakabziita bzakanaka, kuti bziitike bzinoitwa nyamasi: kuponesa vandhu vazinji.” (Genesi 50:19, 20) Josefa waizviziva kuti kuvetera makomborero a Jehovha kunosisira maningi.

14, 15. (a) Ngenyi kusengerera kwa Dhavhidhi kunoshamaisa? (b) Zvicinyi zvakabesera Dhavhidhi kuti avetere ngo kusengerera?

¹⁴ Mambo Dhavhidhi wakaitihwavo kutama kururama kwakawanda. Jehovha wakazoja Dhavhidhi kuti ave mambo wo Iziraeri paainga cimujaha. Asi Dhavhidhi waidikana kuvetera makore 15 acito wava mambo, nee kutonga vo ukama wake. (2 Samueli 2:3, 4) Pa mukuvo wondhowo, waidikana kutiza no kufindara ngo kuthya kuurawa ndi Mambo Sauri. * (Vonanyi masoko o pasi.) Izvo zvakaitisa kuti Dhavhidhi atame kuva no nyumba yake kamare. Waidikana kugara nyikanja kana mu mapako o muzvipare. Pakupejisira, Sauri wakazouraiwa mu hondo. Asi Dhavhidhi waindovetera ko makore anodarika manomwe acito wava mambo wo jinja rese ro Iziraeri.—2 Samueli 5:4, 5.

¹⁵ Ngenyi Dhavhidhi wakava no cido co kuvetera? Iyena wakatipa mupinguro mu nduyo yondhoyo yaakabvunjisa karongomuna kuti, “mbhera rini?” Iyena wakati: “Ngo cangu, ndinogonda rudo hwenyu! Mwoyo wangu unodakara ngo ruponeso hwenyu. Ndinozoimbira Tenji Mwari ngo ndava yo bzakanaka bzaakandiitira. Ndinozorijira zina ra Tenji Mwari Mukuru-kuru!” (Nduyo 13:6, 7) Dhavhidhi waizviziva kuti Jehovha anomuda zve mukuvo wese anozogondeka kwaari. Wairangarira ngo mukuvo waakabesehwa ndi Jehovha kare zve waivetera mukuvo wokuti Jehovha waizopeja zvineso zvake. Dhavhidhi waizviziva kuti zviri nane kuvetera makomborero a Jehovha.

16, 17. Jehovha na Jesu vakagajisa kudini muezaniso jakanakisisa jo kuva no cido co kuvetera?

¹⁶ Jehovha aatibvunji kuita ciro cokuti iyena aadi kuciita. Iyena wakagaja muezaniso mukuru wokuva no cido co kusengerera. (Verenganyi 2 Pedru 3:9.) Inga muezaniso, zviuru zvo makore akapera, Sathana wakapumbha Jehovha mu minda mo Edheni kuti aazivi kururama. Jehovha ari ‘kugarira’ ngo kusengerera mukuvo unozonasa kuceneswa zina rake. Muviyo wakona unozova makomborero anoshamaisa kuna ‘vanomugarira.’—Isaia 30:18.

¹⁷ Jesu wakavavo no cido co kuvetera. Paainga pasi pano, Jesu wakagondeka mbhera pa kufa kwake. Mu gore ro 33, wakapa Jehovha mutengo wo mupiro wake  mugore. Asi wakavetera mbhera mu gore ro 1914 kuti atange kutonga inga Mambo. (Maitiro o Vapostori 2:33-35; Vaheberi 10:12, 13) Pikija zvakadaro, Jesu acindori kuvetera mbhera pa kupera ko Kutonga kwake ko Ciuru co Makore, vavengi vake vese vacito vaparajwa. (1 VaKorinto 15:25) Uwo i mukuvo wakareba maningi kuti auvetere. Asi, makomborero ao anofanera kumavetera.

18, 19. Zvicinyi zvinozotibesera kuti tive no cido co kuvetera?

¹⁸ Zvakajeka kuti Jehovha anoda kuti tive vanosengerera zve tive no cido go kuvetera. Icinyi cinozotibesera kuti tizviite? Tinodikana kukumbira mujimu mucena wa Mwari. Ceujanyi kuti kusengerera kunoviiya ngo mujimu mucena wa Mwari. (VaEfeso 3:16; 6:18; 1 VaTesalònika 5:17-19) Ngokudaro, deketereranyi Jehovha kuitira amubesere kuti mucungirire ngo kusengerera.

¹⁹ Ceujanyizve zvakabesera Abhirahama, Josefa na Dhavhidhi kuti vavetere ngo kusengerera mbhera zvigondiso zva Jehovha zviitike. I gonda ravo no kuthemba kwavo Jehovha. Avazivi kurangarira basi ngo pamusoro pavo no zvovaidakarira. Potinorangarira zvakazovaitikira, tinozovangiswavo kuti tikhombije mugariro wo kuvetera.

20. Tinodikana kutema civaringo co kuitenyi?

²⁰ Pikija tingahwisana no zvineso, takatema civaringo co kukhombija mugariro wo ‘kuvetera.’ Nguva jimweni tingabvunjisa kuti, Jehovha, “mbhera rini?” (Isaia 6:11) Asi ngo besero ro mujimu mucena wa Mwari, tinokwanisa kutevejera muphorofita Jeremia, tonanga kudari: “Ndhaka yangu ndi . . . Mwari, ndinovetera mwaari.”—Macumbiro 3:21, 24.