1, 2. (a) Tinozvizivisa kudini kuti zvinokwanisika kuva no undhu hupsa? (b) Mugariro japi jo undhu hupsa jatinojija pa VaKolosi 3:10-14?

MAZWI o kuti “undhu hupsa” anowanika kaviri mu Biblia Mazwi a Mwari. (VaEfeso 4:24; VaKolose 3:10) Undhu uhwo ‘hunoteveja ciito ca Marure wahwo.’ Zvinokwanisika kwatiri kuwana hundhu hupsa here? Hina. Jehovha wakatisika ngo muezaniso wake, ngo kudaro, tinokwanisa kumutevejera mugariro jakanaka.—Genesi 1:26, 27; VaEfeso 5:1.

² Zvecivoneka kuti tese takagara utaka hwo kutama kukwana, nguva jimweni tese tinova no zvido zvakashata. Tinopsaswavo ngo mugariro watinonga tiri. Asi ngo unyasha hwa Jehovha, tingakwanisa kuva vandhu vano mugariro jaanoda. Kuti tizvikwanise, ngatende tibhuye ngo pamusoro po mugariro jinoumba hundhu hupsa. (Verenganyi VaKolosi 3:10-14.) Perepo tinozovona makhombijire atingaita mugariro iji mu mushando wedu.

3. Ngo wapi umwe wo mugariro jo undhu hupsa?

³ Pauro wakasangura kuti kutama mukheto i divi rinosisira ro undhu hupsa. Iyena wakati: “Apacinabze mugrego no muJuda, wakasokwa no acikazivi kusokwa, munyikanja, musita, xoko nokuti musununguki.” * (Vonanyi masoko o pasi.) Mu ungano, akuna anodikana kujizwa inga ari nane maningi kupinda umweni ngo ndava yo ganda rake, kwaakabahwa, kana kuti zvaanazvo. Ngenyi? Ngokuti inga vateveri va Kristu, tese ‘tiri umwe basi.’—VaKolosi 3:11; VaGalàsia 3:28.

4. (a) Vashandiri va Jehovha vanodikana kutajana kudini umwe kuno umweni? (b) Mugariro wapi ungaphinga rubatano hwo maKristu?

⁴ Patinova no undhu hupsa, tinotaja vandhu vese no rukujo zve nderemejo, azvinenyi mukhaindi wo ganda ravo kana kovakabarihwa. (VaRoma 2:11) Mu ndau jimweni jo nyika, zvinganesa maningi. Inga muezaniso, kareko ku Afrika dhu Suri, utongi hwakagaja ndau jaidikana kugahwa ngo ganda rakasiya no rovamweni. Vazinji munyikemo, kubatanija no Zvapupu, vaciri kurarama mu ndau jondhojo. Mukhumbi unotonga waida kuvangisa hama jedu kuti ‘vafunungure mwoyo yavo.’ Ngo kudaro, mu mweji wa Gumi Guru wo 2013, ivona vakaita nasiriro inosisira yaizobesera hama jo vasvipe no vazungu kuti vanase kuzivana.—2 VaKorinto 6:13.

5, 6. (a) Nasiriro japi jakaitwa ku nyika imweni kuitira kubesera vandhu va Mwari kuti vanase kubatana kamare? (Vonanyi pikica yo kutanga.) (b) Ngo wapi wakava muviyo?

⁵ Kwakaizwa nasiriro kuti mukupera ko mabviki amweni, hama jo ungano imwe yo vazungu no imweni yo vasvipe kana jo ndumi jakasiyana jisongane pamwepo. Hama no hambzaji, jo ungano jondhojo jaicumaera pamwepo, kwenda ku musongano no kufambirana mu mamuzi. Mazana o ungano akatora rutivi pa nasiriro iyi, zve hofise yo cine yakaashira ripoti zinji jinodakajisa. Izvi zvakatokahamaja vandhu vacaingepi Zvapupu. Inga muezaniso, umweni wainamata ciara cimweni wakananga kudari: “Andiripi Capupu, majhi ndiri kuda kunanga kuti basa renyu ro kucumaera rakanasa kurongeka, zve muno rubatano kamare pikija muri vo ganda rakasiyana.” Hama no hambzji jakazwa kudini ngo nasiriro iyi?

⁶ Pakutanga, hambzaji imweni yaivereketa Cixhoza yaizwi Noma, aicaijizwa yakasujunuka kuti ikoke Zvapupu zvo ungano jo Cingezi kuti jiviye ku muzi kayo. Asi hambzaji iyi payakazocumaera no vo ungano yo Cingezi, perepo yoenda ku mamuzi ko hama jo Cingezi, yakatanga kujizwa yakasujunuka naivona. Hambzaji iyi yakana kudari: “Afinari i vandhu vakadarivo inga ndisu!” Ngokudaro, ungano yo Cingezi  pavakaviya kuzocumaera no ungano yo Cixhoza, hambzaji Noma vakavakoka kwenda ku muzi kwavo, kooha navo. Hambzaji iyi yakakhamara ngo kuvona hama yo ungano yo Cingezi, yainga mukuru zve muzungu, yakadakara ngo kugara pa zikasha ro prastiko. Kubvira pa urongwa uhu, hama no hambzaji zinji jiri kuita shamwari imbza zve jiri kuenderera mberi jicizivana no hama jo magariro akasiyana-siyana.

7. Ngenyi nguva jese tinodikana kuva no pena?

⁷ Nyika ya Sathana icito yapera, vandhu va Jehovha vacazondova no zvineso. Zviro zvakadari inga kutama basa, kuhwaja, kuteverehwa, ngozi jinoitika jeka, kuruza zviro zvedu ngo ndava yo ugevenga, kana matambujiko amweni, zvingatigumira. Kuitira kubesera umwe kuno umweni pa nyatwa jakadari, tinodikana kuva no pena yokadi kamare. Pena inozotikwevejera kuti titaje vamweni ngo kunaka mwoyo. (VaEfeso 4:32) Mugariro iji jinobatanijwavo pa hundhu hupsa. Ijona jinozotibesera kutevejera Mwari no kunyaraja vamweni.—2 VaKorinto 1:3, 4.

8. Ngo zvapi zvingaitika kudari tikakhombijira pena no kunaka mwoyo kuno vese mu ungano? Ipanyi muezaniso.

⁸ Tinokhombijisa kudini kunaka mwoyo kuno vaya vari mu ungano yedu vakabva ku nyika imweni kana kuti vano zvishoma? Tinodikana kuvaashira ushoni, tova shamwari javo, no kuvabesera kuitira vavone kuti tinovada mu ungano. (1 VaKorinto 12:22, 25) Inga muezaniso, Dannykarl wakathutha kubva ku Firipina kwenda ku Japau. Zvecivoneka kuti wainga wo nyika imweni, vashandi doni vake avacaimutaja ushoni ku basa. Paakaenda ku musongano jo Zvapupu zva Jehovha. Dannykarl wakananga kudari: “Vazinji pa musonganowo vainga vo Japau, asi vakandiashira no mudakaro wese, inga kutoti vaindiziva no kare.” Kunaka mwoyo ko hama kwakaramba kwecimubesera kukhwedera phedo na Jehovha. Pa kufamba ko nguva, Dannykarl wakazoguma pa kubhabhatijwa, zve nyamasi uno ari kushanda inga mukuru wo ungano. Vakuru doni vake vari kudakara ng okuti iyena na Jennifer, mujimai wake, wari vari mu ungano yo ciKristu zve vakananga kudari: “Dannykarl na Jennifer vano upenyu hwakareruka inga mapiyona zve vari kugaja muezaniso wakanaka wo kupsaka Umambo pa kutanga.”—Luka 12:31.

9, 10. Ipanyi muezaniso wo muviyo jiri kuwanika ngo kukhombijira pena mu basa ro kucumaera.

⁹ Tino mukana wokuitira ‘zvauxoni’ vandhu vese patinocumaera masoko akanaka o Umambo. (VaGalàsia 6:10) Ngo pena no vaya vakasiya nyika javo, Zvapupu zvizinji zviri kujija ndumi jo vandhu avo. (1 VaKorinto 9:23) Kuvangisira kwavo kuri kuva no muviyo jakanaka. Inga muezaniso, imwe hambzaji iri piyona ku Autraria, inodanijwa Tiffany yakajijira Ciswahiri, kuti ikwanise kubesera ungano yo Ciswahiri ku dhorobha ro Brisbhane. Pikija kujijira ndumi cainga cineso, upenyu hwo hambzaji iyi wakaengejera kuva no cinangwa. Tiffanyi wakananga kudari: “Ukada kuva no basa ro kucumaera rinodakajisa, shandai mu ungano inovereketwa ndumi yo nyikanja. Kwakadari inga kuita hwendo ucizivi kubuda mu dhorobha rako. Unoziva  zvakawanda zvo hama no hambzaji jo pasi pese zve unovona wega cishamaiso co rubatano.”

¹⁰ Mbhuri imweni ku Japau yakaitavo zvakafanana. Sakiko, mwana wo kaji wo mbhuri yondhoyo, wakananga kudari: “Nguva jese taisongana no vandhu vaibva Braziri patainga mu basa ro mu munda. Patinokhombija matahwa tecishandisa Bhaibheri ro Ciputukezi, akadari inga Apokalipsi 21:3, 4 kana Nduyo 37:10, 11, 29, vainasa kupurutana zve nguva jimweni vaitombhweja musoji.” Mbhuri iyi yaizwira pena vandhu avo zve yaida kuvabesera kujija cokwadi, ngo kudaro, yakatanga kujijira Ciputukezi. Pa kufamba ko nguva, yakabesera pa kufunungura ungano yo Ciputukezi. Ko makore, mbhuri iyi iri kubesera vonyikanja vakawanda kuti vashandire Jehovha. Sakiko wakananga kudari: “Kujija Ciputukezi i basa maningi, asi makomborero anopinda kuvangisira kuri kwese kwatinoita. Tinobonga maningi Jehovha.”—Verenganyi Maitiro o Vapostori 10:34, 35.

11, 12. (a) Ngenyi kujidodokesa kwedu kunodikana kubahwa ngo cido co kuva no hundu hupsa? (b) Zvicinyi zvinotibesera kuramba tecijidodokesa?

¹¹ Cido cedu co kuva no hundhu hupsa cinodikana kuva co kukuja Jehovha, haiwa kuti tisimbwe ngo vamweni. Ceujanyi kuti ngirozi yakakwana yakagumira pa kujikuja yotoshaisha. (Ezanisanyi na Ezekieli 28:17.) Itusu atizivi kukwana, ngo kudaro, zvinonesa maningi kwatiri kuti tijidodokese. Asi pikija zvakadaro, tingakwanisa kujidodokesa. Zvicinyi zvingatibesera kuita kudaro?

¹² Ciro cimwe cinozotibesera kujidodokesa i kuverenga Soko ra Mwari njiku jese no kurangarijisisa zvatinoverengemo. (Deuteronòmio 17:18-20) Zvinosisira maningi ngo zvo kuti tinodikana kurangarijisisa zvakajijisa Jesu no muezaniso wake wakanakisisa wo kujidodokesa. (Mateu 20:28) Jesu wakajidodokesa maningi zvokuti wakazosuka murenje jo vajiji vake. (Johani 13:12-17) Cimweni catingaita ngo cokuita mukumbiro kuna Jehovha kuti atipe mujimu wake. Mujimu uwo ungatibesera kuhwisana no mazwiro ari ese o kuda kujivona kuti tiri nane kupinda vamweni.—VaGalàsia 6:3, 4; VaFilipi 2:3.

13. Ngo japi muviyo jimweni jo kuva vanojidodokesa?

 ¹³ Verenganyi Mazwi Akangwara 22:4. Jehovha anoda kuti tive vanojidodokesa. Kujidodokesa kunotipa muviyo jakawanda. Tikajidodokesa, ungano inozova no runyararo zve yakabatana. Zve Jehovha anozotipa unyasha hwake hucikatifaneri. Mupostori Pedhru wakananga kudari: “Jidodokesenyi ngocenyu, ngo kuti Mwari anorhwisana no vandhu vanojikuja wopa unyasha vaya vanojidodokesa.”—1 Pedru 5:5.

14. Ndiani ari muezaniso wakanakisisa wo kupfava no kusengerera watingavejera?

¹⁴ Mu nyika yo nyamasi uno, kudari mundhu akava wakapfava zve anosengerera, kazinji vandhu vanorangarira kuti aana simba. Asi izvi asipi zvokadi. Mugariro uwu wakaseja unobva ka Jehovha, ano simba maningi kupinda ari wese. Iyena ndi muezaniso wakanakisisa wo kuva wakapfava zve anosengerera. (2 Pedru 3:9) Inga muezaniso, rangariranyi ngo pamusoro po kusengerera kwakakhombija Jehovha paakadavira Abhirahama na Roti, acishandisa ngirozi Yake. (Genesi 18:22-33; 19:18-21) Zve rangariranyizve ngo pamusoro po kusengerera kwakakhombija Jehovha kuno vaIziraeri pavaitama kuzwira ko makore anodarika 1.500.—Ezekieli 33:11.

15. Muezaniso wapi wakagaja Jesu ecikhombijira kuti wainga wakapfava zve waisengerera?

¹⁵ Jesu wainga mundhu “wakapfava.” (Mateu 11:29) Wakava anosengerera no kutama kukwana ko vajiji vake. Paainga acaita basa rake pasi pano, Jesu waishohwa no kupumbhwa acina ndava. Asi wakakhombijira kuva wakapfava no kusengrera mbhera kufa kwake. Paainga ecihwajihwa kamare pa danga ro kurambujikira, wakakumbira Baba wake kuti varegerere vandhu vaidaya kumuraya. Wakati: “Avabzizivi bzo vanoita.” (Luka 23:34) Pikija paainga ecihwajihwa, Jesu wakaramba akapfava no kujidodokesa.—Verenganyi 1 Pedru 2:21-23.

16. Tingakhombijisa kudini kupfava no kusengerera?

¹⁶ Pauro wakananga njira imweni yatingakhombija ndiyona kuti takapfava zve tinosengerera paakatara kudari: “Cijikiranyi ngocenyu ngo rudo, mecikungurirana. Kudari aripo ana ciricese no mudoni wake. Regererananyi inga bzaakamuregerera Tenji.” (VaKolosi 3:13) Kuitira tikungurire kana kuregerera vamweni, tinodikana kuva vakapfava zve vanosengerera. Izvi zvinovangisa rubatano mu ungano.

17. Ngenyi kujidodokesa no kusengerera kunosisira maningi?

¹⁷ Jehovha anoda kuti tive vakapfava zve vanosengerera kuno vamweni. Mugariro iji jinosisira maningi kudari tecida kurarama mu nyika imbza. (Mateu 5:5; Jakobo 1:21, Baiberi Mazwi Akacena aMwari) Tikava vakapfava zve vanosengerera, tinokuja Jehovha zve tinobesera vamweni kuitavo kudaro.—VaGalàsia 6:1; 2 Timoti 2:24, 25.

18. Rudo no kutama mukheto zvakabatana papi?

¹⁸ Mugariro jese jatabvari kubhuya jakabatana no rudo. Inga muezaniso, mujiji Jakobo wakapangira hama jake ngokuti jaireremeja maningi vakakhupuka kupinda varombo. Wakasanangura kuti ciito ico caihwisana no mupango wa Mwari wo kuti “unozodisa mudoni wako ngo madisiro o unojiita wega.” Wakazoengejera eciti: “Kaveta, mukasana mundhu [kana kuva no mukheto], munoxaixa.” (Jakobo 2:8, 9) Kudari tecida vandhu, atizonyenyi vamweni ngokuti avazivi kujija maningi, ngo vo ganda rimweni kana ngokuti i varombo. Atidikani kucengejera inga atina mukheto. Asi kutama mukheto kunodikana kuva divi rinosisira ro upenyu hwedu.

19. Ngenyi zvinosisira maningi kuti tisimire rudo?

¹⁹ Rudo hunosengerera zve wakanaka mwoyo zve “ahuzari ngo theka.” (1 VaKorinto 13:4) Tinodikana kuva vanosengerera, kunaka mwoyo, no kujidodokesa kuti tirambe tecikovana masoko akanaka no vamweni. (Mateu 28:19) Mugariro iji jinobesera kuti tizwane no vese mu ungano. Tese tikakhombija rudo hwakadaro, ungano jedu jinozova jakabatana zve zvinopa rukujo kuna Jehovha. Vamweni vanozovona rubatano hwedu zve voviya mu cokwadi. Zvinofanera kuti sananguro yo Bhaibheri ngo pamusoro po undhu hupsa ipejiswe ngo magama okuti: “Kaveta panyezuru po bzese, simiranyi rudo, huri cisungo cakaperera.”—VaKolosi 3:14.

20. (a) Mubvunjo japi jatinodikana kuzviita tega? Ngenyi? (b) Mugariro wapi unodakajisa watiri kuvetera kumbejiyo?

²⁰ Tinodikana kujibvunjisa kudari: ‘Cinjo japi jandiciri kudikana kuita kuti ndibvise undhu hwo kare zve ndoramba ndicina?’ Tinodikana kuita mukumbiro kuna Jehovha tecideketera kuti atibesere. Tinodikana kushanda ngo simba kuti tibvise murangariro kana zviito zvakashata kuti tiashire “utaka hwo Umambo hwa Mwari.” (VaGalàsia 5:19-21) Tinodikanazve kuzvibvunjisa kudari: ‘Ndiri kuenderera mberi ndecicinja manera angu o kurangarira kuti ndidakajise Jehovha here?’ (VaEfeso 4:23, 24) Itusu atizivi kukwana, ngo kudaro, tinodikana kuramba tecishanda ngo simba kuti tiwane undhu hupsa zve tirambe tinaho. Iri i basa rotinodikana kuramba teciriita. Mudakaro wakadini watinozova nawo ukaguma mukuvo wo kuti vandhu vese vanozova no undhu hupsa, vozonasa kutevejera mugariro jakanaka ja Jehovha!