Zvakatara Mateu ngo pamusoro po kubahwa no upenyu hwo kutanga hwa Jesu zvakasiyana no zvakatara Ruka ngokuti mutari umwe nga umwe wavo waisotesesa murangariro no zvakaitika no vandhu vaviri vakasiyana.

Zvakatara Mateu zvainga zvakasotana na Jasefa. Iyena wakasanangura ngo pamusoro po mazwire akava na Jasefa paakazwa kuti Maria wainga no mimba, hope jaakarota ecidurijihwa zviro ngo ngirozi, no matevejere aakaita ndhungamiriro jaakapuwa ndiyona. (Mateu 1:19-25) Zvakatara Mateu zvakananga ngo pamusoro po mangwajihwe akaizwa Jasefa ngo ngirozi mu hope kuti atizire ku Egipita no mbhuri yake no kuizwira kwaakaita. Mateu anotibvunjazve kuti Jasefa wakarotazve ecibvunjwa ngo ngirozi kuti ahwirire ku nyika yo Iziraeri zve agare no mbhuri yake ku Nazareta. (Mateu 2:13, 14, 19-23) Mu zvipauko zviviri zvo kutanga zvo Vhangeri rake, Mateu anonanga zina ra Jasefa kasere, kuveni ra Maria anorinanga karongomuna basi.

Asi, zvakatara Ruka zvainga zvakasotana na Maria. Ruka wakasanangura ngo pamusoro po kubvakacihwa kwakaitwa Maria ngo ngirozi Gabrieri, kubvakaca kwaakaitira Erizabheti, no magama ake o kukuja Jehovha. (Luka 1:26-56) Ruka anosumurazve zvakananga Simioni ecibvunja Maria ngo pamusoro po dambujiko raizova na Jesu. Ruka anosumura ngo pamusoro po bvaza yo kuti Jesu wakaenda ku temberi paainga no makore 12 o kubahwa. Pa ndhorovondho yondhoyo Ruka wakatotara magama a Maria, haiwa a Jasefa, ecitibvunja kuti Maria wakapsaswa maningi ngo zvakaitikari. (Luka 2:19, 34, 35, 48, 51) Mu zvipauko zviviri zvo Vhangeri rake, Ruka anonanga zira ra Maria bvaza 12, asi zina ra Jasefa anorinanga katatu basi. Ngo kudaro, Mateu ananonga maningi ngo pamusoro po murangariro no zviito zva Jasefa. Asi, Ruka wakasotesesa pa kunanga murangariro ja Maria no zvaakasongana nazvo.

Munda-nda-nda wo ukama hwa Jesu wakarongwa ngo maitiro akasiyana mu ma Vhangeri maviri ao. Mateu wakandandanisa ukama hwa Jasefa ecikhombija kuti Jesu, waidanijwa pa mutemo kuti mwana wa Jasefa, wainga no citendehwa co pamutemo co kuva pa umambo hwa Dhavhidhi. Ngenyi? Ngo kuti Jasefa wainga wo mubarihwana wa Mambo Dhavhidhi kubvira ku mwana wake Soromona. (Mateu 1:6, 16) Asi, Ruka wakandandanisa ukama hwa Maria ecikhombija kuti mucibarihwe, Jesu wainga no citendehwa co kuva mu utongi hwa Dhavhidhi ngo ‘ku nyama.’ (VaRoma 1:3, Shanduro yeNyika Itsva) Ngenyi? Ngo kuti Maria wainga wo mubarihwana wa Mambo Dhavhidhi kubvira ku mwana wake Natani. (Luka 3:31) Ngenyi Ruka aazivi kumudira pa Munda-nda-nda inga mwana wa Heri? Ngo kuti ndhariro yo pamutemo kazinji yaibatanija basi vanarume vo pa mbhuri. Ngo kudaro Ruka paakadira Jasefa pa Munda-nda-nda ecimudanija inga mwana wa Heri, vandhu vanozwisisa kuti izvi zvinoreva kuti Jasefa wainga mukwambo wa Heri.—Luka 3:23.

Munda-nda-nda wo ukama hwa Jesu unowanika mu maVhangeri a Mateu na Ruka unovonesa kuti Jesu wainga Mesiya wakagondiswa ndi Mwari. Jesu, kuva kwake wo mubarihwana wa Dhavhidhi kwakanasa kuzivika zvo kuti pikija vaFarisi no vaSadhusi avacaikwanisa kuzviramba. Zvakadurujira Mateu na Ruka ngo pamusoro po ukama hwa Jesu zvinovangisa gonda redu no kutithembesa kuti zvigondiso zvese zvimweni zva Mwari zvinozokwanirisika.