JEHOVHA wakafemera mupostori Pauro kuti atare ngo pamusoro po mugariro mufumbhamwe jinoviiswa ngo kushanda ko mujimu mucena. (VaGalàsia 5:22, 23) Jiri pamwepo, mugariro iji jakaseja jinodanijwa ‘mucero wo mujimu.’ * (Vonanyi masoko o pasi.) Mucero wo mujimu i divi ro ‘undhu hupsa’ unodikana kusimihwa ngo maKristu. (VaKolosi 3:10) Kudarivo inga muti unobara mucero kudari ukadirijihwa ushoni, mundhu anozova no mucero iji jakaseja kudari mujimu mucena ukashanda ushoni mu upenyu hwake.—Nduyo 1:1-3.

Mugariro wo kutanga i rudo. Mugariro uwu unosisira zvakadini? Pauro wakananga kuti acina rudo, iyena ‘aacaizova ciro.’ (1 VaKorinto 13:2) Asi rudo i cinyi, zve tingauengejeresa kudini no kuukhombijira njiku ngo njiku?

Pikija hazvo zvinonesa maningi kusanangura kuti zvokadi kamare rudo i cinyi, Bhaibheri rinodurujira kuti mundhu ano rudo anorangarirenyi zve anoitenyi. Inga muezaniso, mundhu ano rudo ‘anosengerera no wakanaka mwoyo’ zve ‘anodakara ngo cokwadi.’ Mundhu ano rudo, ‘anokungurira bzese, anotenda bzese, anovetera bzese, anovangirira ku bzese.’ Mundhu ano rudo hwakavanga kuno vamweni, anovataja, ndi shamwari yakagondeka. Asi mundhu akatama rudo, anova no ushanje, anojitutumaja, aana maitiro akanaka, ano umbau, zve aaregereri. Pa ndau pokukhombija mugariro iji jakashata, itusu tinoda kukhombijira rudo hwokadi-kadi kuno vamweni, mukhaindi wo rudo ‘hucikapsangi kuda kwahwo.’—1 VaKorinto 13:4-8.

“Mwari, rudo.” (1 Johani 4:8) Mabasa ake ese no zviito zvake zvinovonesa kudaro. Ciito cake cikuru co rudo kuno vandhu cakava co kutumira Jesu pasi pano woviya kotambujika no kufira itusu. Mupostori Johani wakati: “Rudo hwa Mwari hwakavoneswa kudaro kotiri: Mwari wakatumira nyika yo pasi Mwana wake umwe ega, kuti tirarame ndiyena. Rudo nga uhu: Asipi itisu takada Mwari. Kaveta yena wakatida wotitumira Mwana wake, kuti bzifujuhwe bzixaixi bzedu.” (1 Johani 4:9, 10) Ngo ndava yo rudo hwa Mwari, zvishaishi zvedu zvingaregerehwa, towana vetero no upenyu.

Jesu wakakhombija kuti waida vandhu vese ngo kupira upenyu hwake kuti aite kuda ka Mwari. Mupostori Pauro wakati: “Itisu takaceneswa ku uxaixi, ngo kujipira kwaakaita Yena kamare [Jesu Kristu] kamwe basi.” (Vaheberi 10:9, 10) Akuna na umwe hake waizokhombija rudo hwakakura kudari. Jesu wakananga kudari: “Akuna ano rudo hukuru kupinda wiya anopa uhomi hwake ngo ndava yo xamwari.” (Johani 15:13) Zvinokwanisika here kuti vandhu vacizivi kukwana vatevejere rudo hwakakhombija Jehovha na Jesu? Hina. Ngativone kuti tingazviitisa kudini.

Pauro wakativangisa kudari: “Ngokudaro, ivanyi vaejaeji va Mwari, inga vana vanodikana. Fambanyi mecidisana, kudari inga Kristu wakatidisavo, wojipira ka Mwari ngo ndava yedu.” (VaEfeso 5:1, 2) Zvinoda kurevenyi kuti ‘fambanyi mecidisana’? Zvinoreva kukhombija rudo nguva jese. Atidikani basi kunanga kuti tinoda vamweni. Tinodikana kukhombija rudo ngo zviito. Johani wakatara kudari: “Vana vadoko, ticadisa ngo mazwi nokuti ngo rurumi. Ngatidise ngo bziito no bzokadi.” (1 Johani 3:18) Inga muezaniso, tinocumaira “vangeri iri ro Umambo” ngo kuti tino rudo na Jehovha zve no mudoni wedu. (Mateu 24:14; Luka 10:27) Tinoramba tecidisana patinosengerera, kunaka mwoyo, no kuregerera. Tinoshandisa mbhangiro yo Bhaibheri yokuti: “Regererananyi inga bzaakamuregerera” Jehovha.—VaKolosi 3:13.

Asi patinopangira kana kupa mazano vamweni, azvirevi kuti atiripi kukhombija rudo. Inga muezaniso, vabari vamweni kuti vanyaraje mwana wavo vanoita zvaanodaro. Asi vabari vano rudo kamare no mwana wavo vanomupa mbhangiro yakavanga zvecidiwaya. Ngo maitiro akafanana, pikija Mwari i rudo, iyena “anopangira vaanodisa.” (Vaheberi 12:6) Ngo kudaro, kupangira mundhu zvecidiwaya, i rudo. (Mazwi Akangwara 3:11, 12) Asi mucadokanganwa, tese tinoshaisha zve nguva jimweni tinokonehwa kukhombijira rudo. Ngo kudaro tese tinodikana kuitisa nane pa kukhombija rudo. Tingazviitisa kudini? Ngatende tivone njira ndhatu.

Cokutanga, Mwari anotipa mujimu mucena wake, unobara rudo. Jesu wakananga kuti Jehovha anopa “mujimu mucena kwa vaya vanoukumbira.” (Luka 11:13) Tingava no gwinyiso ro kuti kudari tikakumbira mujimu mucena perepo totendera kuti utibesere, tinozoramba tecinderera mberi mu kuva no rudo. (VaGalàsia 5:16) Inga muezaniso, kudari muri mukuru, mungakumbira mujimu mucena kuti umubesere kuva no rudo pamunopa mbhangiro yo Bhaibheri kuno vamweni. Kudari muri mubari, mungakumbira kuti mujimu wa mwari umubesere kukwanisa kupangira vana venyu ngo rudo haiwa ngo ushungu.

Cocipiri, rangariranyi ngo pamusoro po makhombijire akaita Jesu rudo pikija vamweni vaishaisha kumutaja. (1 Pedru 2:21, 23) Kudari ariwese akamukhugunya kana kudari mukaizihwa zvicizi kururama, jibvunjisenyi kudari: “Jesu waizoitenyi?” Hambzaji imweni inodanijwa Leigh yakavona kuti kujiita mubvunjo uwo kwakaibesera kutanga yarangarira icito yaita ciro. Yakangana kudari: “Bvaza imweni, mushandi doni wangu wakatumira mensajhi kuno vashandidoni vamweni no masoko ainanga zvakashata ngo pamusoro pangu no basa randaiita. Zvakandihwaja maningi. Asi ndakajibvunjisa kudari: ‘Ndingatevejeresa kudini Jesu pa kutongana no mundhu uwu?’ Nondapera kurangarijisisa zvaizoita Jesu pa shwiro yakadaro, ndakavona kuti zvainga nane kuzvisiya zvakadaro. Pa kufamba ko nguva, ndakazozwa kuti mushandidoni wangu wiya waihwisana no cineso co uhomi zve wainga pakati po kubararika musoro. Ndakazozwisisa kuti kangaije wainga acikatodi kutara zvaakataraya. Kurangarijijisa muezaniso wa Jesu pikija pandinophehwa ngo vamweni zvakandibesera kukhombijira rudo hwakafanana ku mushandidoni wangu.” Tikatevejera Jesu, nguva jese tinozokhombijira rudo kuno vamweni.

Cocitatu, jijiranyi kukhombijira rudo wokujipira. Mukhaindi uwu wo rudo ngaunovonesa vateveri vokadi va Jesu. (Johani 13:34, 35) Jesu ambhwine wakakhombija mukhaindi uwo wo rudo, wotisiira muezaniso wakaperera. Kuitisa kudini? Ngo kusiya mugore, ‘wakazvidurura,’ ngo ndava yedu, ‘kugumira pa kufa.’ (VaFilipi 2:5-8, Shanduro yeNyika Itsva) Patinotevejera rudo hwo kujipira hwa Jesu, murangariro no mazwiro  edu zvinoguma pa kutojana no ake, ngo kudaro todira zviro zvo vamweni kumbeji ko zvedu.

Kuna muviyo muzinji jakanaka jo kukhombija rudo. Ngativone muezaniso muviri:

• KUDISANA INGA HAMA PASI PESE: Ngo kudisana kwedu umwe kuno umweni, tinoziva kuti ku ungano yo nyika iri yese hayo kotinoenda, tinoashihwa ngo hama no hambzaji jo kondhoyo. Makomborereo aakadini atinao ngo kuti tinodiwa ngo hama jo “pasi pese”! (1 Pedru 5:9) Rudo uhwo tinokwanisa kuhuwana basi pakati po vandhu va Mwari.

• RUNYARARO: Kukhombijirana ‘kusengerera’ umwe kuno umweni, kunotipa “rubatano no rugarisiko.” (VaEfeso 4:2, 3) Izvi tinozvivona pa musongano, pa magungano o ndharaundha no o mutundhu. Amudaviri kuti runyararo watinawo ndiwona woga, mu nyika ino yakaparajana here? (Nduyo 119:165; Isaia 54:13) Patinopsaka runyararo no vamweni, tinokhombija kuti tinovadadi kamare, zve tinodakajisa Baba wedu vo mugore.—Nduyo 133:1-3; Mateu 5:9.

Pauro wakatara kudari: “Rudo hunovaka.” (1 VaKorinto 8:2) Zvinoda kurevenyi? Pa vaKorinto cipauko 13, inodanijwaya ngo vamweni kuti i “Nduyo yo Rudo,” iyena wakasanangura kuti rudo unovakisa kudini. Rudo hunopsaka kugarika ko umweni. Rudo unotaja zvido zvo vamweni. (1 VaKorinto 10:24; 13:5) Zvecivoneka kuti rudo unoita kuti mundhu atange arangarira acito aita ciro, hunotajavo vamweni, hunosengerera, zve wakanaka mwoyo, ngo kudaro unovaka mbhuri zve unobatanija ungano.—VaKolosi 3:14.

Kuno manera akawanda o kukhombijira rudo kuno vamweni, asi rudo hwatinahwo na Mwari ndihwona unosisira maningi no kuvaka kupinda hwese. Ngenyi? Ngo kuti rudo hwatinahwo na Mwari unotibatanija! Vandhu, vo magariro akasiyana-siyana, rasa jakasiyana-siyana no ndumi jakasiyana-siyana vari kunamata no kushandira Jehovha ‘vakabatana.’ (Sofonia 3:9; Shanduyo yeNyika Itsva) Ngatikhombijire rudo, mugariro unosisira wo mucero wo mujimu wa Mwari njiku ngo njiku.