1, 2. Ngenyi tinodikana kuroveja vamweni kuti vaite mabasa o umwari?

JESU wakashanda ngo simba kuti acumaire ngo pamusoro po Umambo. Iyena wakapejazve nguva yakawanda maningi acijijisa vajiji vake. Iyena wakavatatija majijisiro no matajiro ovaizoita vandhu va Mwari. Vajiji vakajija kuva vakafanana no vahavisi vanokorondha mushambi wavo. (Mateu 10:5-7) Firipi waibatikana maningi pa kucumaira, asi iyena wairovejazve vana vake vokaji kuti vaitevo basa rondhoro. (Maitiro o Vapostori 21:8, 9) Nyamasi uno, tinodikanavo kuroveja vamweni. Ngenyi?

² Mu ungano jo mu nyika yese, muna vandhu vakawanda vaciri vapsa vacito vabhabhatijwa. Vapsa ava vanoda kurovejwa. Tinodikana kuvabesera kuzwisisa kuti ngenyi zvakanaka kuverenga no kujija Bhaibheri pavega. Zve tinodikanazve kuvaroveja kucumaera no kujijisa masoko akanaka. Hama jabhabhatijwa sasambi jinodikana kurovejwa kuitira kuti pa kufamba ko nguva jizokwanise kushanda inga vabatiri  vanoshandira no vakuru. Vese pa ungano vangaita zvizinji kuti vabesere vapsa.—Mazwi Akangwara 4:2.

3, 4. (a) Pauro wakabatanijisa kudini jijo yo Matahwa no mushando unobudirira? (b) Ticito tavangisa vajiji vedu kuti vajije Bhaibheri pacavo, tinodikana kuitenyi?

³ Vashandiri vese va Jehovha vanodikana kuverenga no kujija Bhaibheri kuti vazive kuti ngokwapi kuda ka Mwari. Mupostori Pauro wakadurujira hama no hambzaji jo ku Korose paakananga kudari: “Tinokumbira Mwari kuti amuzivisisevo kuda kwake.” Ngenyi kuverenga no kujija Matahwa zvaisisira maningi kovari? Ngokuti zvondhozvo zvaizovapa ungwaru no kuvabesera kuzwisisa vaizoitisa kudini kuti: ‘Vapone ngo maponero anodakajira [Jehovha].’ Izvo zvaizovabeserazve kuti vaite “bziito bzakanaka” zvaaida Jehovha kuti vaite, maningi-ningi kucumaira masoko akanaka. (VaKolosi 1:9, 10) Ngokudaro, kudari tiri kujija no mundhu, tinodikana kumubesera kuzwisisa kuti kuverenga no kujija Bhaibheri nguva jese zvinomubesera kuti ashandire Jehova.

⁴ Atingakwanisi kubesera mujiji wedu wo Bhaibheri kuzwisisa mutengo wo jijo yo mundhu ega yo Bhaibheri, kudari atijiji Bhaibheri tega. Zvokadi, kudari tinoverenga Bhaibheri no kurangarijisisa zvotaverenga, zvinozotibesera mu upenyu no mu mushando wedu. Inga muezaniso, mundhu akaita mubvunjo unonesa potinonga ticicumaira, tinozokwanisa kushandisa Bhaibheri kuti timudavire. Kana potinoverenga kuti Jesu, Pauro no vamweni vakaitisa kudini kuti vatame kuramwa mushando wavo, zvinozotivangisa zve tinozoramba ticicumaira pikija pozvinozonesa. Potinobvunja vamweni zvotakajija pa jijo yedu no mabesero ozvakatiita, tingavavangisa kuti vajije maningi Bhaibheri kuitira kuti vabeserekevo kudaro.

5. Ipanyi zano ro mabesehwo angaitwa vapsa kuti vave no urongwa hwo jijo yo Bhaibheri yo mundhu ega.

⁵ Mungazvibvunjisa kuti, ‘ndingarovejesa kudini mujiji wangu kuti ajije Bhaibheri nguva jese?’ Kangaije maizomutatija manasiririro aangaita masoko ari mu bhuku romuri kujijaro nae. Mungamubvunja kuti averenge masoko anozwirana no zvomuri kujijaro mu masoko o kuengejera o bhuku Bhaibheri Rinojijisenyi Kamare? no kuverenga  mavhesi o Bhaibheri akatahwemo. Tevere, maizomutatija manasiririro aangaita kuti azodavire pa musongano. Muvangisenyi kuti averenge mujeura jese jo Murindiri no Despertai! Zve maizomutatija mawaniro omunoita mupinguro jo mubvunjo jo mu Bhaibheri, inga muezaniso, ngo kushandisa Watchtower Library kana BHIBHIRIOTEKA RO MU INTERNETI ro Torre de Vigia. Kudari akaeja maitiro aya akasiana-siana o jijo yo mundhu ega, anozodakajihwa ngo kuita izvi, woda kuziva zvizinji.

6. (a) Mungabeseresa kudini mujiji wenyu kuti anyengejere kuda Bhaibheri ngo mwoyo wese? (b) Mujiji wo Bhaibheri anozodakarirenyi kudari ari kuda Matahwa ngo mwoyo wese?

⁶ Potinojija no mundhu, tinomuda kuti azive kuti Bhaibheri rina mutengo mukuru ngokuti rinomubesera kuti azive ushoni Jehovha. Kunja ko kumuvangijira kuti ajije, tingamukhombija kuti angabesereka kudini ngo kujija. Paanonga eciengejera kujija Bhaibheri, anozoengejeravo mazwiro akadari inga o mutari wo nduyo, uwo wakaimba kudari: “Kugara pamwepo na Mwari, kunaka kwangu! Mwari, ndiyena citiziro cangu.” (Nduyo 73:28) Mujimu wa Jehovha unozobesera kamare mundhu wiya anoda kukhwedera kwaari.

7. Jesu wakarovejesa kudini vatokotesi vo masoko akanaka? (Vonanyi pikica yo kutanga.)

⁷ Tingajija zvizinji ngo marovejero aakaita Jesu vapostori vake. Jesu waivatora paaienda koocumaira, zve ivona vaivona majijisiro aaiita. Iyena wakavapazve ndhungamiriro jakajeka ngo pamusoro po macumairiro ovaizoita. (Mateu, cipauko 10) ^[1] (Vonanyi masoko o kupejisira.) Pa mukuvo mushoma, vapostori vakajija ndi Jesu macumairiro anoitwa vandhu cokwadi. (Mateu 11:1) Ngativone zviro zviviri zvotingaroveja vapsa kuti vazviite povanocumaira.

8, 9. (a) Jesu waikhwedereresa kudini vandhu pa kucumaira? (b) Tingabeseresa kudini vacumairi vapsa kuti vabhuisane no vandhu inga zvaaiita Jesu?

⁸ Pa kubhuisana no vandhu. Jesu aacaivereketepi nguva jese ku mbungano jo vandhu. Kazinji waibhuisana no mundhu umwe ngo umwe, zve waizviita ngo njira yo ushamwari. Inga muezaniso, iyena wakava no mabhuyo anodakajisa no mwanakaji wakaza koocera kumwa pa mwimbo phedo no dhorobha ro Sikari. (Johani 4:5-30) Jesu wakabhuyazve no mushabisi Mateu Revi, womukoka kuti ave mujiji wake. Mateu wakadavira zve vakazokoka Jesu no vajiji vamweni kuti vaende koha kumuzi kwake. Kondhoyo, Jesu wakazobhuya no vandhu vakawanda.—Mateu 9:9; Luka 5:27-39.

⁹ Jesu wakavereketazve ngo njira yo ushamwari na Natanaeri, pikija hazvo  Natanaeri waenga wakananga zviro zvakashata ngo vandhu vokubva Nazareta. Ngo ndava yo mavereketere o ushamwari aakaita Jesu naye, Natanaeri wakacinja mavonero ake ngo pamusoro pa Jesu, uwo waibva Nazareta. Zve Natanaeri waida kujija zvizinji ndi Jesu. (Johani 1:46-51) Ngo muezaniso wa Jesu, tinojija kuti potinobhuya no vandhu ngo ushamwari no kunaka mwoyo, ivona vanozodakarira maningi kupurukira zvotiri kunanga waro. ^[2] [Vonanyi masoko o kupejisira.] Potinoroveja vapsa kuti vaverekete ngo njira iyi, vanozodakarira maningi basa ro kucumaira.

10-12. (a) Jesu waisakurira kudini cido ku vamweni vaidakarira masoko akanaka? (b) Tingabeseresa kudini vacumairi vapsa kuti vaengejere kukwanisa kwavo kujijisa cokwadi co Bahaibheri?

¹⁰ Jijisanyi vaya vanoda kupurukira. Jesu waibatikana maningi. Asi vandhu povaida kumupurukira, waipeja nguva navo no kuvajijisa zviro zvizinji. Inga muezaniso, njiku imweni mbungano yo vandhu yakaungana mumbhiripiri mo Jombe kuti vapurukire Jesu. Ngokudaro, Jesu wakabzuka mu ngarava na Pedhru vojijisa vandhu kubvira pondhopo. Perepo, waida kujijisavo Pedhru cijijo. Jesu wakaita mushamaiso ngo kuita kuti Pedhru abate hove jakawanda maningi. Iyena wakazobvunja Pedhru kudari: “Kubvira nyamasi unozoita mutandi wo vandhu.” Pondhopo Pedhru no vaenga nae “novacevesa ngarava yavo pa mbhiripiri vakasia bzese” votevera Jesu.—Luka 5:1-11.

¹¹ Nikodhemo waidavo kujija zvizinji ndi Jesu. Asi zvecivoneka kuti waenga umwe wo vo Sinagoga, iyena waithya zvaizonanga vandhu vamweni kudari vakamuvona acibhuya na Jesu. Ngokudaro, iyena waifambira Jesu no usiku. Jesu aacaimupindisepi asi kunja kwa izvi, waipeja nguva naye acimudurujira zvokadi. (Johani 3:1, 2) Jesu nguva jese waida kushandisa nguva yake kuti ajijise vandhu cokwadi no kuvavangisa gonda ravo. Ngo maitiro ondhoo, tinodikana kufambira vandhu pa nguva yakavanakira, zve tinodikana kupeja nguva navo ticivabesera kuzwisisa Bhaibheri.

¹² Potinoshanda no vapsa mu kucumaira, tingavajijisa kuhwiririra ariwese wakatatija kuda kuzobhuyazve navo. Tingakokazve vapsa kuti tiende navo pa koita hwiririro no koitisa jijo jo Bhaibheri. Ngokudaro, vanozovona majijisihwe anoitwa vamweni, zve vanozovona mudakaro unoviiswa ngo kujijisa vandhu vakadaro cokwadi ngo pamusoro pa Jehovha. Perepo, vapsa ava vanodisisa kuhwiririrazve vandhu no kujija navo Bhaibheri. Vanozojijazve kuva vanosengerera no kutama kukasika kuramwa, kudari vakatama kuwana mundhu wovari kuhwiririra waro.—VaGalàsia 5:22; vonanyi bhokiso rinoti “ Aazivi Kuramwa.”

13, 14. (a) Munorangarijenyi ngo muezaniso jo mu Bhaibheri jo vaya vakajipekejera kuti vabesere vamweni? (b) I njira japi jinoshanda jomungaroveja ndijona vacumaeri vapsa no vocidoko kuti vakhombije rudo ku hama no hambzaji javo?

¹³ Jehovha anoda kuti vashandiri vake vadisane ngocavo inga hama no hambzaji no kushandirana ngocavo. (Verenganyi Luka 22:24-27; 1 Pedru 1:22.) Bhaibheri rinodurujira kuti Jesu wakapira zviro zvese, kubatanija no upenyu, kuti abese  vamweni. (Mateu 20:28) Dhorika “waiita mabasa akanaka mazinji, no kubesa varombo.” (Maitiro o Vapostori 9:36, 39) Maria waishanda ngo simba kuitira hama jake no hambzaji ku Roma. (VaRoma 16:6) Tingabeseresa kudini vapsa kuzwisisa kuti zvinosisira maningi kuita zviro zvakanaka ku hama no hambzaji jedu?

¹⁴ Potinobvakacira vasharuka kana vaya vari kuhwaja, tingakoka vapsa kuti tiende navo. Zve vabari vangatora vana vavo povanofambira vasharuka kana vanohwaja kudari zvicidikana. Vakuru vo ungano vangakumbira vocidoko kana vapsa kuti vashande navo kudari pecidiwa kuti vape zvokuha vasharuka kana kuvanasiririra nyumba javo. Vocidoko no vapsa povanovona kutajana kunoita hama no hambzaji, vanozojija kuitavo zvondhozvo. Inga muezaniso, umwe mukuru paaicumaira mu ndharaundha iri ndhambo no dhorobha, waibvajacira hama nguva jese jairarameyo kuti kojivona kuti jiri ushoni. Hama imwe yocidoko yaienda nae kazinji, yakajija kurangarira ngo zvoyaizoita kuti ibesere hama jayo no hambzaji ngo muezaniso wakanaka wo mukuru uu.—VaRoma 12:10.

15. Ngenyi zvinosisira kuti vakuru vo ungano vave no cido co kubudirira ko vanarume mu ungano?

¹⁵ Jehovha wakapa vanarume basa ro kujijisa Soko ra Mwari ku ungano. Ngo kudaro, zvinosisira maningi ku hama kuziva majijisire ojingaita pajinonga jeciita hurukuro. Kudari muri mukuru, kangaije maizopurukirisisa mubatiri anoshandira paanoita hurukuro no kumubesera kuti akwanise ushoni. (Neemia 8:8.) ^[3]—Vonanyi masoko o kupejisira.

16, 17. (a) Pauro wainga no cidisiso capi pa kukura kumujimu ka Timoti? (b) Vakuru vangarovejesa kudini vaya vanozova vahavisi mu ungano kumbejiyo?

¹⁶ Pana dikano yo kuroveja hama zinji kuti jive vahavisi mu ungano. Pauro wakaroveja Timoti no kumuvangisa kuti arovejevo vamweni. Pauro wakati: “Vangai mu unyaxa, huri mwa Kristu Jesu: Bzo wakandizwa ndecibzinanga pa nyasi po vandhu vakawanda, bzipekejei vandhu vakagondeka, vanotojanira kuzojijisa vamweni.” (2 Timoti 2:1, 2) Timoti wakajija zviro zvizinji ndi Pauro, uwo waenga mukuru no mupostori, zvakadari inga majijisiro aaizoita ushoni no mabesero aaizoita vamweni mu ungano.—2 Timoti 3:10-12.

¹⁷ Pauro wakapeja nguva yakawanda na Timoti ngokuti waida kuva no gwinyiso kuti Timoti warovejekadi ushoni. (Maitiro o Vapostori 16:1-5) Vakuru vo ungano vangatevejera Pauro ngo kutora vabatiri vanoshandira vanokwanirisa, pavanoenda  koita bvakaciro javo jimweni jo kuhavisa. Ngo maitiro ao, vabatiri vanoshandira vanozojijavo ngo vakuru kuti vangajijisa kudini, vangatajisa kudini ngo rudo no kusengerera zve vangathembesa kudini Jehovha povanokorondha mushambi wake.—1 Pedru 5:2.

18. Ngenyi kuroveja vamweni mu basa ra Jehovha kunosisira kotiri?

¹⁸ Mu mukuvo uno wo kupejisira, vazinji vaciri vapsa vanoda kurovejwa kuti vaengejere kukwanisa kwavo mu basa ro kucumaira. Panazve dikano yokuti tijije kungwarira ungano. Jehovha anoda kuti vashandiri vake vese varovejwe ushoni, zve wakatipa rudakajiso hwo kuroveja vapsa. Ngokudaro, zvinosisira kuti tishande ngo simba pa kuroveja vamweni, kudari ngo zvakaitwa ndi Jesu na Pauro. Tinodikana kuroveja vakawanda inga zvinokwanisika ngokuti pacina zvakawanda zvokuita mu basa ro kucumaira mugumo ucito waviya.

19. Ngenyi tinodikana kuthemba kuti kuvangisira kwese kwatinoita pa kuroveja vamweni mu basa ra Jehovha kunozobudirira?

¹⁹ Kuroveja vamweni zvinoda nguva no kuvangisira. Asi tingava no gwinyiso rokuti Jehovha na Jesu vanozotibesera kuti tizive mabeserero otingaita vamweni kudari ngo zvotinokwanisa. Tinozodakara tikavona kuti vaya votarovejaya vari kushanda ngo simba no kudakara pa ungano kana mu basa ro kucumaira. (1 Timoti 4:10) Pa mukuvo wondhowo, tinodikana kuramba ticiita mbhera panoperera simba redu kuti tikure kumujimu, kuengejera mugariro jedu jo ciKristu no kukhwedera phedo na Jehovha.