Ici cainga cimwe co zviro zvaaishohwa ndizvona Jesu no vajiji vake ngo vavengi vake. Mutemo wa Mosi waidurujira zvaizoitisa kuti mundhu asvipiswe, inga muezaniso, kubuda ngazi pa muviri, mapere, kana kupsasa mutembo jo vandhu kana yo zvinyama. Mutemo waipazve ndhungamiriro ngo macenesehwezve aaizoitwa mundhu. Izvo zvaizoitwa ngo mupiro, kusamba kana kufafaizira.—VaLevi, cipauko 11-15; Bziverengo, cipauko 19.

Vajijisi vo ciJudha, vaizivikazve inga majiRabhi, vakaengejera muthetho javo pa mutemo iji. Cimwe cinyuke co masoko cakananga kuti majiRabhi akaita muthetho jimweni ngo pamusoro po zvaizosvipisa kuti mundhu no masvipisire aaizoita vamweni. majiRabhi akaitazve muthetho ngo pamusoro po mukhaindi wo mujiyo no zviro zvaizosvipisa no zvicaizosvipisepi mundhu no mutango-mutango jovaidikana kuteveja vandhu kuti vacenezve.

Vavengi va Jesu vakamubvunjisa kudari: “Ngenyi vajiji vako avateveji cirovejeso co vokare, vanoha nyara nojakangora?” (Marco 7:5) Vafarisi ava avacainangirepi ukhirini hwaushoni, hwo kusamba nyara vacito vaha. Vafarisi vakaita muthetho wokuti mundhu acito aha, adururihwe kumwa mu nyara jake inga divi ro mutango-mutango. Cinyuke co masoko canangwaya pa nyezuru apa cakaengejera kuti majiRabhi “aibhuisanazve ngo pamusoro po kuti i cijuvi [ kana cinvuko] capi cinodikana kushandiswa pa kudururira kumwa, kumwa yapi inofanera, ndiani anodikana kuidururira, zve i nyara ngana jinodikana kubijwa ngo kumwa.”

Jesu wakaitenyi ngo mutemo jese iji jo kuitwa ngo vandhu? Iyena wakabvunja vatungamiriri vo zviara vo ciJudha kudari: “Isaia wakafembera uxoni ngo njio yenyu imwimwi, vaxaixi, eciti: ‘Jinja iri rinondireremeja ngo muromo, kaveta mwoyo waro urindhambo na inini. Ngwhabiresi muphaxo wo vanondiitira, vecijijisa mujijiso no mupango yo vandhu. Bzokadi, munosia pa mutivi mupango wa Mwari, munoteveja bzirovejo bzo vandhu.”—Marco 7:6-8.